Mga Tingog sa mga Santos sa Ulahing mga Adlaw

Wala Gayod Mag-inusara

Ni Renan Apolonio de Sá Silva, Pernambuco, Brazil

Ang masakiton nga tawo usa ka estranghero apan dili ngadto sa Langitnong Amahan.

Nagsagol-sagol nga litrato gikan sa Adobe Stock ug Janae Bingham

Kaming unom ka misyonaryo nga taga-Brazil bag-ohay lang nangabot sa Argentina ug naghulat sa pagbiyahe sa eroplano paingon sa among mga misyon. Sa among pagsulod gyod dayon sa lugar nga hulatanan alang sa among pagbiyahe sa eroplano, gusto unta kaming magpalitrato sa tugpahanan nga ang siyudad naa sa layo nga likod. Samtang ang ubang lima nagkuha og mga litrato, ako nagpabilin nga nagbantay sa among mga bagahe.

Pagbalik nila, naglingi-lingi ko ug nakakita og lugar diin gusto ko nga magpalitrato. “Mobalik ra dayon ko,” akong giingnan ang uban.

Paghuman nako og kuha og litrato, nakadungog ko og usa ka tawo nga nanawag, “Elder.” Milingi dayon ko apan wala ako makakita og tawo. Dayon mitawag na usab sa ikaduhang higayon: “Elder.”

Sa dihang mitan-aw ko og usab, nakakita ko og usa ka tigulang nga tawo nga naglingkod sa duol nga lingkoranan. Sa dihang giduol nako siya, miingon siya, “Elder, gusto unta ko makadawat og panalangin sa pagkapari alang sa masakiton.”

Ang iyang hangyo nakapakurat nako. Usa ka tawo nga wala pa nako sukad mahimamat naghangyo kanako og usa ka panalangin sa akong unang adlaw sa nasod diin dili pa kaayo ko makasulti sa pinulongan.

Diha sa kangakanga nga pagkalitok sa Kinatsila, daghan ko og gipangutana niya: “Duna ka bay hugot nga pagtuo? Nagtuo ka ba sa gahom sa pagkapari? Nahibalo ka ba sa Ang Simbahan ni Jesukristo sa mga Santos sa Ulahing mga Adlaw?”

Mora og nalibog sa akong mga pangutana, siya mitubag, “ako usa ka miyembro sa Simbahan, Elder. Taga-Salta ko, sa amihanan. Nag-inusara ko, masakiton ko, ug nagkinahanglan ko og panalangin.”

Akong giadto ang ubang misyonaryo. Mipailaila kami sa among kaugalingon ug nakigsulti niini nga tawo sa makadiyot. Dayon ang akong kompanyon ug ako midala kaniya ngadto sa banyo, diin kami mihatag kaniya og usa ka panalangin.

Niana nga okasyon, wala na akoy panahon sa paghunahuna sa unsay gisulti sa tawo ngari nako gawas lang nga siya nagkinahanglan og panalangin. Apan human niana, ang iyang mga pulong “nag-inusara ako” nakapatandog sa akong kasingkasing. Mibati siya nga nag-inusara, apan siya adunay usa ka Langitnong Amahan kinsa nasayod hain siya ug nga siya masakiton. Kay sa isalikway siya, mipadala ang Langitnong Amahan sa mga misyonaryo aron sa paghupay kaniya, paghatag kaniya og panalangin, ug pagpahinumdom kaniya nga wala siya mag-inusara.

Kadto nga kasinatian milig-on sa akong pagpamatuod nga kita adunay Langitnong Amahan nga nakaila kanato ug dili gayod mosalikway kanato.