Ayaw Pagsukol, Ayaw Kahadlok

Ni Elder Kevin R. Duncan

Sa Seventy

Sila si Josue ug Caleb nakasabot sa mga hagit nga naa sa ilang atubangan, apan nasayod sila nga makadangop sila ngadto sa Ginoo.

Sa akong kinabuhi nakamatngon ko nga ang mga tawo kasagaran mosanong sa inspirasyon nga madawat sa mga lider sa Simbahan sa usa sa duha ka paagi:

Nakasabot sila sa tumong sa unsay gibati sa lider nga gikinahanglan sa Ginoo nga buhaton, mosulti og positibo mahitungod niini, ug moawhag sa uban sa pagsabot sa samang tumong. Usahay magkinahanglan kini nga mopadayon sila sa unahan uban sa hugot nga pagtuo hangtod nga makaangkon sila og hingpit nga panabot.
Dili sila ganahang mosabot sa tumong, ila kining sawayon, ug mangita og mga rason nganong nahadlok sila nga dili kini mahitabo. O hingpit nila nga gibaliwala ang inspirasyon ug wala gayoy buhaton. Sa kataposan, kadtong nia ini nga kategoriya makakita nga ang buhat sa Ginoo molampos, bisan og dili sila mosuporta niini.

Ang Saad sa Ginoo ngadto kang Moises

Mabasa nato ang susama nga mga reaksyon ngadto sa inspirasyon sa mga lider sa dihang ang mga Israelita nagkaduol sa unsay nahibaloan nga yuta sa Canaan. Ang Ginoo miluwas sa mga Israelita gikan sa Ehipto. Misulti Siya kang Moises nga kon ang katawhan mohupot sa Iyang mga sugo, Iyang dad-on sila ngadto sa gisaad nga yuta, ang yuta nga gisaad sa Ginoo nga ihatag ngadto sa mga kaliwat ni Abraham, “usa ka yuta nga nagpaagay sa gatas ug dugos” (Exodo 3:17). Samtang sila nagpanaw paingon sa kamingawan niini nga dapit, ang mga Israelita miagi og daghang pagsulay sa ilang hugot nga pagtuo. Kasagaran nila misupak ug nahisalaag gikan sa mga sugo sa Ginoo. (Tan-awa sa Exodo 32:1–9; Numeros 11:1–34.)

Sa dihang ang mga Israelita sa kataposan duol na sa gisaad nga yuta, ang Ginoo misugo kang Moises sa pagpadala sa napulog duha ka espiya—usa gikan sa matag napulog duha ka tribo sa Israel—aron sa “pagpanag-espiya sa yuta sa Canaan” (Numeros 13:2). Gisugo sila aron sa pagsuta kon ang mga tawo nga nagpuyo didto “lig-on ba o huyang, diyotay ba sila o daghan ba” ug kon maayo ba ang yuta. Duha niini nga mga espiya mao sila si Josue ug Caleb. (Tan-awa sa Numeros 13:4–20.)

Kini nga mga espiya migahin og 40 ka adlaw sa pagpaniid sa yuta sa Canaan sa wala pa mobalik ngadto kang Moises ug sa mga anak sa Israel didto sa kamingawan. Ang mga espiya nagdala og bunga sa yuta sa Canaan. Gitaho nila nga ang yuta “nagapaagay sa gatas ug dugos. … Apan kusgan ang mga lumolupyo sa maong yuta, ug ang mga siyudad kinutaan, ug habog kaayo.” (Tan-awa sa Numeros 13:25–29, 33.)

Duha ka Paagi sa Pagtan-aw og mga Butang

Ang tanang napulog duha ka espiya nakasaksi sa samang mga benepisyo ug sa samang mga babag sa pagtuman sa sugo sa Ginoo sa pagpuyo sa Canaan. Bisan pa man, ang ilang mga tubag nagpakita kon sa unsang paagi nga ang napulo ka sakop sa grupo nga nakakita lamang sa mga problema, samtang ang laing duha mibutang sa ilang pagsalig diha sa Dios.

Ang napulo sa mga espiya nakakita lamang sa mga kalisdanan sa ilang atubangan. Tungod kay wala sila mosalig sa Ginoo, nahadlok sila sa pagsunod sa Iyang sugo sa pag-adto sa yuta sa Canaan. Si Caleb ug Josue, sa laing bahin, nasayod nga kon ang mga Israelita adunay hugot nga pagtuo, ang Ginoo mohatag sa yuta sa Canaan ngadto kanila. Mitambag si Caleb, “Mangadto kita karon dayon ug puy-an nato kini [ang yuta]; kay mabuntog nato sila” (Numeros 13:30).

Ang ubang napulo ka espiya misupak sa tambag ni Caleb. “Dili kita makabuntog sa katawhan didto,” miingon sila, “kay sila mas lig-on kay kanato. … Ang tanang tawo nga among nakita … mga tag-as ug dagko kaayo. … Ug gibati namo nga sama lamang kamig apan-apan kon itandi kanila, ug nasiguro namo nga ingon usab niana ang ilang pagtan-aw kanamo” (Numeros 13:31–33).

Mga Pagpili nga Gibase sa Kahadlok

Subo lang, ang mga Israelita mipunting sa makahahadlok nga report. Tungod kay ang agianan daw malisod ug sila nahadlok sa katawhan nga nanimuyo didto, nagdumili sila sa pagsulod sa gisaad nga yuta. Misugod sila sa pagbagulbol batok kang Moises ug batok sa Dios. Wala gayod silay hugot nga pagtuo nga nangandoy pa gani sila nga gitugot na lang unta sa Dios nga mamatay na lang sila sa Ehipto o didto sa kamingawan. “Dili ba mas maayo pa nga mamalik na lamang kita sa Ehipto?” nangutana sila, ug mipadayon sa pag-ingon, “Magpili kitag pangulo, ug mamalik kita sa Ehipto” (Numeros 14:3–4).

Si Josue ug Caleb, bisan pa man, misulay gihapon sa pagtabang sa katawhan sa pagsalig diha sa Ginoo. “Kon nahimuot kanato ang Ginoo,” sila miingon, “dad-on kita niya niadtong yuta nga tabunok kaayo, ug itugyan niya kini kanato; usa ka yuta nga nagapaagay sa gatas ug dugos.

“Ayaw lamang kamo pagsukol sa Ginoo, ug ayaw kahadlok sa katawhan sa maong yuta; … kay ubanan man kita sa Ginoo: busa dili kita angay nga mahadlok kanila” (Numeros 14:8–9).

Ang mga anak sa Israel dili maminaw kang Josue ug Caleb ug gani hinoon misulay sa pagpatay kanila (tan-awa sa Numeros 14:10). Tungod sa ilang rebelyon, ang Ginoo misulti kanila nga sila maglatagaw sa kamingawan sulod sa 40 ka tuig. Gawas kon kadtong kinsa nagbagulbol batok Kaniya nangamatay na Siya modala na kanila balik ngadto sa gisaad nga yuta. Sa napulog duha ka espiya, si Josue ug Caleb lamang ang nakasulod sa gisaad nga yuta. (Tan-awa sa Numeros 14:22–38.)

Bag-ong mga Caleb ug mga Josue

Adunay daghan nga bag-ong mga Caleb ug mga Josue. Usa niini nga tawo mao ang lolo sa akong asawa nga si John Hulme. Usa ka adlaw niadtong 1926, ang bishop nakigsulti ni John. Nakahisgot ang bishop bahin sa misyon. Nakalitan si John niini.

Gusto gyod kaayo si John nga magmisyon, apan ang iyang kinabuhi komplikado. Ngano man? Tungod kay si John 42 anyos na. Minyo siya nga may upat ka anak, nag edad og 15, 12, 4, ug 2. Siya empleyado sa kaugalingon niyang rancho. Siya adunay yuta ug kabakahan nga magkinahanglan og superbisyon samtang wala siya. Mangita gyod siya og paagi aron masiguro nga ang iyang pamilya ug kabtangan maatiman samtang wala siya.

Ang bishop misulti kang John nga dili kini opisyal nga tawag, sugyot lamang. Misulti si John ngadto sa bishop nga hunahunaon niya kini ug mopahibalo siya kaniya pagkasunod adlaw.

Si John nangita ni bishop sayo anang pagkasunod buntag ug miingon nga dawaton niya ang tawag sa pag-alagad. Nianang buntaga, human sa daw walay katulog nga kagabhion, wala masayod si John kon unsaon niya pag-areglo aron makaalagad og misyon. Nasayod lang siya nga moalagad siya. Sama ni Caleb ug Josue, nasayod siya nga tabangan siya sa Dios nga makapangita og paagi. Ug gihimo sa Dios. Si John nakasuhol og usa ka silingan nga moatiman sa iyang yuta ug sa iyang kabakahan, ug mitabang ang ward ug ang komunidad sa pagsuporta sa iyang asawa ug mga anak.

mga misyonaryo nga diha sa kadalanan sa Siyudad sa New York nga may daghang tawo sa palibot — Daw nakalitan sa ilang kultura dihang si John, usa ka tig-rancho gikan sa gamayng lungsod, naabot aron pag-alagad sa iyang misyon sa Siyudad sa New York.

Si John gikan sa usa ka gamay nga lungsod sa nasod nga may populasyon nga mga 500. Naanad siya og sakay og kabayo ug magtrabaho sa yuta. Sa dihang gitawag siya sa pag-alagad sa Siyudad sa New York, daw nakalitan siya sa ilang kultura. Tingali gibati niya nga mura og apan-apan taliwala sa mga higante. Apan si John mialagad og malampuson nga misyon. Ang iyang ehemplo nakahatag sa iyang kaliwatan og tinguha sa pagbutang sa ilang pagsalig diha sa Dios bisan unsa pang nahibaloan ug wala mahibaloi nga mga babag. “Kay alang sa Dios walay dili mahimo” (Lucas 1:37).

Atubanga ang mga Babag uban sa Hugot nga Pagtuo

Sama sa mga anak sa Israel, kita moatobang og makahahadlok nga mga babag. Apan kadtong mga babag dili makabulag kanato gikan sa mga panalangin nga gisaad sa Ginoo kon mosunod kita sa Iyang mga sugo. Dili sayop kon kita moila niana nga mga babag. Apan importante nga kini atong atubangon uban sa hugot nga pagtuo.

Sila si Josue ug Caleb nakasabot sa mga hagit nga naa sa ilang atubangan, apan nasayod sila nga makadangop sila ngadto sa Ginoo.

Pinaagi sa pagtan-aw gamit ang lente aron mas makakita og maayo sa nagpadayon nga Pagpahiuli sa ebanghelyo, dali ra natong makita nga kon ang mga propeta mosulti kanato sa kabubut-on sa Ginoo, buhaton gyod nato ang atong labing maayo sa pagpangita og paagi sa pagtabang sa pagpahinabo niini. Sigurado nga naa gyoy mga babag, apan uban sa hugot nga pagtuo diha sa Dios makabuntog kita niini. Ania ang pipila ka mga ehemplo:

Dihang gihiusa ang mga high priest ug mga elder ngadto sa usa ka korum, ang uban naghunahuna kon unsay posibling mahimo niini nga kausaban. Ang uban mihangop sa kausaban ug mitabang sa pagtukod og bag-ong mga relasyon.
Sa dihang giilisan ang home ug visiting teaching ngadto sa pagpangalagad, ang pipila nakakita lamang sa mga hagit. Ang uban misugod sa pagpangalagad sa mas taas, mas balaan nga paagi.
Sa dihang si Presidente Russell M. Nelson mihatag og gibug-aton sa panginahanglan sa paggamit sa tibuok ngalan sa Simbahan, ang uban nagpanuko ug naglista og mga rason kon nganong ang mas mubo nga ngalan mas sayon. Ang uban mihangop dayon sa giya ug nakakita og mga paagi sa paggamit sa ngalan sigon sa unsay gisultidiha sa kasulatan.
Sa dihang gipamub-an ang eskedyul sa panagtigom sa adlaw sa Domingo gikan sa tulo ka oras ngadto sa duha, ang uban mibati nga ang panahon alang sa pagtudlo dili makaigo ug ang mga eskedyul makalibog. Ang uban dali rang nakapahiangay sa kausaban.

Siyempre naay daghan pang mga ehemplo, apan ang leksiyon tataw. Ang matag hagit ug matag babag nga atong giatubang usa ka oportunidad sa pagpili, sama ni Josue ug ni Caleb, nga misalig sa Ginoo. Ang “ayaw pagsukol … , ayaw kahadlok” (Numeros 14:9) usa ka maayo nga tambag alang sa mga anak sa Israel, ug maayo gihapon kini nga tambag alang sa matag usa kanato karon.