Mga Sukaranan sa Ebanghelyo

Ang Sakramento: Usa ka Paagi sa Paghinumdom sa Manluluwas

placeholder altText

The Last Supper [Ang Kataposang Panihapon], ni Simon Dewey

Sa gabii sa wala pa Siya gilansang sa krus, nakigkita si Jesukristo sa Iyang Apostoles diha sa Kataposang Panihapon. Didto gipahigayon Niya ang sakramento sa unang higayon. Iyang gipasabot nga usa kadto ka paagi sa ilang paghinumdom Kaniya. Ang sakramento usa ka ordinansa diin kita moambit sa pan ug tubig sa paghinumdom sa Pag-ula ni Kristo. Ang pan nagrepresentar sa lawas ni Kristo, ug ang tubig nagrepresentar sa Iyang dugo.

Nag-ambit kita sa sakramento matag Domingo panahon sa panagtigom alang sa sakramento. Manganta kita og usa ka himno samtang ang mga naghupot sa pagkapari mopikaspikas sa pan ngadto sa gagmay nga mga piraso.

Ang mga naghupot sa pagkapari kinsa mipikaspikas sa pan mosulti sa espesyal nga mga pag-ampo. Kini nga mga pag-ampo makita diha sa Doktrina ug mga Pakigsaad 20:77, 79. Ang mga pag-ampo nagpahinumdom kanato unsay atong gisaad ngadto sa Langitnong Amahan ug unsa ang Iyang gisaad ngari kanato.

Ang ubang mga naghupot sa pagkapari mopasa sa sakramento ngadto sa mga miyembro sa ward o branch. Samtang mag-ambit kita sa sakramento, mohinumdom kita sa Manluluwas ug sa Iyang sakripisyo alang nato. Kita usab mopasalig pag-usab nga mohupot sa mga pakigsaad (mga saad) nga atong gihimo uban sa Langitnong Amahan.

batan-ong babaye nga nag-ambit sa pan panahon sa panagtigom alang sa sakramento

Kita nagtahod sa balaan nga paagi samtang nagpanalangin ug nagpasa sa sakramento. Panahon kini alang kanato sa paghinumdom sa kinabuhi, mga pagtulon-an, ug Pag-ula ni Jesukristo. Makahunahuna usab kita mahitungod kon unsaon nato sa pagsunod sa Iyang mga ehemplo.

Mga Pulong nga Angay Mahibaloan

Ordinansa: Usa ka sagrado, pormal nga buhat nga gipahigayon pinaagi sa awtoridad sa pagkapari.

Mga naghupot sa pagkapari: Takos nga mga lalaki ug batan-ong mga lalaki nga gihatagan sa awtoridad sa paglihok sa ngalan ni Jesukristo.

Ang Pag-ula ni Jesukristo: Iyang pag-antos alang sa atong mga sala, pagkamatay diha sa krus, ang Pagkabanhaw, nga naghimo nga posible alang kanato nga makabalik sa pagpuyo uban sa Dios.

Pagkaplag pa og Dugang

Kon kamo adunay mga pangutana kabahin sa sakramento, mahimo kamong makigsulti sa inyong tigpangalagad nga mga brother o mga sister, sa inyong mga lider sa ward o branch, o sa mga misyonaryo.