2022
Kita Mosunod ni Jesukristo ug sa Iyang Propeta
Hunyo 2022

“Kita Mosunod ni Jesukristo ug sa Iyang Propeta,” Liahona, Hunyo 2022.

Alang sa mga Ginikanan

Kita Mosunod ni Jesukristo ug sa Iyang Propeta

inahan ug amahan nagtapad og lingkod kauban sa ilang gamayng anak nga babaye nga nagtan-aw sa libro

Minahal nga mga Ginikanan,

Ang Dios nanalangin kanato og usa ka buhi nga propeta aron makadawat og pagpadayag ug mogiya sa Iyang Simbahan sa yuta. Kini nga isyu sa magasin makatabang kaninyo sa pagtudlo sa inyong mga anak kabahin kon unsaon nga kita makasunod ni Jesukristo ug sa Iyang propeta. Magamit usab ninyo ang mga ideya sa ubos aron sa pagtabang kaninyo sa pagsugod og mga panaghisgotan mahitungod sa buhat sa templo ug sa kaimportante sa mga konseho sa pamilya.

Mga Panaghisgotan sa Ebanghelyo

Pagsunod sa Propeta

Basaha ang pipila ka mga kinutlo gikan sa artikulo ni Elder Holland sa pahina 4 mahitungod sa pagsunod sa propeta. Dapita ang mga bata sa pagpaambit kon giunsa nila sa pagsunod sa Ginoo ug sa Iyang mga propeta. Mahimo gani ninyong kantahon og dungan ang “Sunda ang Propeta” (Songbook sa mga Bata, 58–59) isip usa ka pamilya.

Pagtinambagay

Ang artikulo diha sa pahina 40 makatabang kaninyo nga makat-on og dugang kabahin sa sundanan sa Dios kabahin sa mga konseho. Paggahin og panahon aron magpahigayon og konseho sa pamilya—mahimong atol kini sa panihapon sa pamilya, home evening, o bisan unsa nga panahon nga hamugaway sa inyong pamilya—aron mopasiugda og bukas nga pagsultihanay uban sa inyong mga anak kabahin sa unsa ang gikinahanglan nila nga tabang ug unsa ang ilang matabang kaninyo. Paghisgot og mga hagit ug pagtinambagay aron makakaplag og mga solusyon.

Pag-apil sa Buhat sa Templo

Gamita ang artikulo ni Elder Mutombo sa pahina 44 aron sa pagtudlo sa inyong mga anak sa kaimportante ug sa mga panalangin sa templo. Gamit ang FamilySearch, pagtinabangay isip usa ka pamilya sa pagsiksik sa inyong kasaysayan sa pamilya [family history] ug, kon posible, pangita og mga ngalan nga dad-on ngadto sa templo.

Dali, Sunod Kanako nga Kalingawan sa Pamilya

Paminaw Kaniya

1 Samuel 3:1–10

Si Samuel nakadungog sa tingog sa Ginoo sa dihang bata pa siya apan wala dayon makaila niini sa unang higayon. Buhata kini nga kalihokan aron makakat-on kabahin sa pagpaminaw:

  1. Taptapi ang usa ka tawo o ipapiyong ang iyang mga mata.

  2. Gikan sa pikas nga lawak, usa ka sakop sa pamilya mosulti sa ngalan sa gitaptapan nga tawo.

  3. Kon ang gitaptapan nga tawo makatag-an kon kinsa ang nagsulti, ang nagsulti nga tawo mohatag og direksiyon aron sa pagtabang sa gitaptapan nga tawo sa pagpangita kaniya.

  4. Pagpuli-puli sa pagpataptap ug sa pagsulti sa ngalan.

Panaghisgotan: Kita makadungog sa tingog sa Ginoo diha sa mga kasulatan, sa templo, ug sa mga pagtulun-an sa buhi nga mga propeta. Giunsa ninyo pagpaminaw sa Iyang tingog? Basaha o paminawa ang pakigpulong ni Presidente Russell M. Nelson sa Abril 2020 nga kinatibuk-ang komperensiya “Paminaw Kaniya” ug pangitaa ang mga paagi nga kita mas makadungog sa tingog sa Ginoo sa ato mismong kinabuhi. Hisgoti kon unsaon ninyo isip usa ka pamilya nga “[maka]paminaw Kaniya.”

Suporta sa Pamilya nga Dula

Ruth 1–4

Human nga si Ruth nahimong biyuda, iyang gipili nga magpabilin uban sa iyang ugangan nga babaye, si Naomi, imbis nga mobalik ngadto sa iyang katawhan, “Bisan asa ka mopaingon mokuyog gayod ako. Bisag asa ka mopuyo adto usab ako puyo. Ang imong katawhan mahimong akong katawhan ug ang imong Dios mahimong akong Dios” (Ruth 1:16).

Si Ruth misuporta ni Naomi pinaagi sa pagpabilin uban niya. Buhata kini nga kalihokan aron makakat-on kabahin sa pagsuporta sa pamilya:

  1. Pagpili og usa ka sakop sa pamilya ug pagbarog nga magtalikdanay. Butangi og usa ka butang (gamay nga bola o libro) ang tunga-tunga nga bukobuko sa matag usa.

  2. Magtinabangay isip usa ka team, sulayi kon pila ka lakang ang inyong mahimo nga dili mahulog ang maong butang.

  3. Pagpulipuli isip usa ka pamilya hangtod nga ang matag usa makasulay sa pagpaningkamot isip usa ka team aron sa pagtabang sa usag usa.

Panaghisgotan: Giunsa ni Ruth ug Naomi pagtabang sa usag usa? Si Ruth misalig sa Langitnong Amahan ug adunay hugot nga pagtuo, busa nagpabilin siya uban ni Naomi. Sa unsang paagi siya napanalanginan? Unsaon nato pagsuporta sa matag usa ug mosalig sa Ginoo kon kita adunay mga kalisod?