“Ang Akong Amahan ug ang Templo,” Liahona, Hunyo 2022.
Dali, Sunod Kanako
Ang Akong Amahan ug ang Templo
Ang damgo sa akong amahan bahin sa usa ka maanindot nga puti nga balay nagpahinumdom nako nga ang templo kinahanglan nga mao ang kanunay nga tutokan sa atong kinabuhi.
Mga paghulagway pinaagi ni David Green
Ang akong pamilya mipasakop sa Simbahan sa bata pa ko. Pipila ka semana human sa among bunyag, ang akong amahan nagdamgo. Naglakaw siya sa usa ka nindot nga dalan. Sa unahan nakita niya ang maanindot nga puti nga balay. Wala siya sukad makakita og ingon niana ka makadasig nga gambalay.
Gipaambit niya ang iyang damgo sa among pamilya pagkabuntag. Gipaambit usab niya kini sa senior nga misyonaryo nga magtiayon kinsa mitudlo sa ebanghelyo sa among pamilya. Ang senior nga mga misyonaryo misulti niya nga ang balay sa iyang damgo usa ka simbolo. Nagpasabot kini sa templo.
Sila mipakita niya og mga litrato sa pipila ka templo sa Simbahan sa tibuok kalibotan. Sila miingon niya nga usa ka adlaw adunay templo nga tukoron sa among gipuy-an, sa Democratic Republic of the Congo. Sa tibuok niyang kinabuhi, ang akong amahan nag-ampo nga ang usa ka templo moabot sa among nasod.
Ang Damgo Natuman
Human sa 25 ka tuig, ang damgo natuman. Sa Oktubre 2011 nga kinatibuk-ang komperensiya, si Presidente Thomas S. Monson mipahibalo sa mga plano sa pagtukod sa Kinshasa Democratic Republic of the Congo Temple. Ang pagpahibalo nakapahimo sa akong amahan nga labing malipayon nga tawo sa yuta! Hilabihan ang iyang kalipay nga nakatambong niadtong Pebrero 12, 2016, sa dihang si Elder Neil L. Andersen sa Korum sa Napulog Duha ka Apostoles nangulo sa seremonyas sa pagbungkal sa yuta [groundbreaking].
Walay suwerte, ang akong amahan namatay pagka-Disyembre 2016, sa wala pa mahuman ang templo. Pagka-Hunyo 2018, didto ko sa Salt Lake City, Utah, USA. Didto sa Jordan River Utah Temple nakahimo ko sa pagpahigayon og sagrado nga mga ordinansa sa templo alang sa akong amahan. Nianang gabhiona, mibisita nako ang akong amahan sa usa ka damgo. Silaw kaayo ang iyang kahayag. Nasayod ko nga gidawat niya ang unsay akong gihimo alang niya.
Mahigugmaon kami nga naghunahuna sa akong amahan sa dihang si Elder Dale G. Renlund sa Korum sa Napulog Duha ka Apostoles mipahinungod sa nahuman na nga templo sa Kinshasa niadtong Abril 14, 2019. Wala madugay human niini ang akong pamilya mipahigayon og mga ordinansa aron isilyo ang akong amahan ug inahan ngadto sa usag usa. Dayon ang ilang mga anak gisilyo ngadto nila. Ang among pamilya mohinumdom niana sa kahangtoran. Mihilak mi sa kalipay. Kami nasayod nga kon kita mosunod sa mga balaod ug mga sugo sa Dios ug magpuyo nga matinud-anon sa atong mga pakigsaad, ang among pamilya mahimong magkauban sa kahangtoran.
Ang damgo sa akong amahan bahin sa usa ka maanindot nga puti nga balay nagpahinumdom nako nga ang templo kinahanglan nga mao ang kanunay nga tutokan sa atong kinabuhi. Ang uban mibiyahe og layo kaayo ug mihimo og dagkong sakripisyo aron makaadto sa balay sa Ginoo. Apan bisan kon dili kita makaadto sa templo tungod kay layo kaayo kini, o naghulat kita samtang gitukod pa ang templo, o nagmaya kita tungod kay ang templo anaa na karon sa duol, ang templo kinahanglan nga anaa kanunay sa atong mga hunahuna ug sa atong mga kasingkasing.
Ngano nga Kita Adunay mga Templo
Si propeta Isaias mitudlo, “Umari kamo, ug manungas kita sa bukid sa Ginoo, ngadto sa balay sa Dios ni Jacob; ug kita pagatudloan niya sa iyang mga dalan” (Isaias 2:3).
Isip mga miyembro sa Simbahan, kinahanglan gayod nga atong isilsil sa atong hunahuna ang mahangturong panglantaw nga gitudlo diha sa templo—kon kinsa kita ug kong ngano nga ania kita dinhi sa yuta. Kinahanglan gayod nga atong hinumdoman nga ang atong tumong mao ang pagbalik ngadto sa atong Langitnong Amahan, aron mopuyo uban Niya hangtod sa kahangtoran. Mao kana ang hinungdan nga gitukod ang mga templo. Kini mao ang dapit alang nato, Iyang mga anak nga lalaki ug mga anak nga babaye, aron magkat-on sa mas hingpit nga paagi mahitungod sa atong Langitnong Amahan ug sa Iyang anak, si Jesukristo. Kini mao ang dapit diin makakat-on kita kon unsay atong kinahanglan nga buhaton aron makapuyo pag-usab uban Nila.
Ang pagbaton og templo usa ka timailhan sa gugma sa Dios alang nato. Ang templo usa ka sagrado nga dapit diin ang mga indibidwal ug mga pamilya makadawat sa labing sagrado nga mga ordinansa sa ebanghelyo alang sa ilang kaugalingong kaluwasan ug kahimayaan. Ang templo usa usab ka dapit diin makapahigayon sila og sagrado nga mga ordinansa alang sa ilang mga katigulangan ug sa uban nga mipuyo dinhi sa yuta nga walay oportunidad nga makadawat niadto nga mga ordinansa. Sa ingon kita naghatag og oportunidad alang niadtong anaa sa laing habig sa tabil aron makadawat nianang wala nila madawat niini nga kinabuhi. (Tan-awa sa Mga Hebreohanon 11:40; Doktrina ug mga Pakigsaad 128:15.)
Mga Templo ug ang Pagpundok sa Israel
Si Presidente Russell M. Nelson mitudlo:
“Sigurado nga kini karon ang ulahing mga adlaw, ug ang Ginoo mipadali sa Iyang buhat sa pagpundok sa Israel. Kana nga panagpundok mao ang labing importanting butang nga nahitabo sa yuta karon. …
“Kon maghisgot kita kalab[o]t sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa matag [habig] sa tabil, angayang makadungog sa mensahe sa gipahiuli nga ebanghelyo ni Jesukristo. Mohukom sila sa ilang kaugalingon kon gusto ba nilang masay[o]d pa og dugang. …
“Ang matag anak sa atong Langitnong Amahan tak[o]s sa oportunidad sa pagpili nga mosunod ni Jesukristo, modawat sa Iyang ebanghelyo uban sa tanang panalangin niini.”1
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, isip ulahing mga adlaw nga Israel sa pakigsaad, kita adunay responsibilidad sa pagtabang sa atong Langitnong Amahan niining mahinungdanon nga buhat. Unsaon nato sa paghimo niini?
Si Presidente Nelson mitubag niini nga pangutana sa dihang miingon siya: “Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo. Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.”2
Sa laing pagkasulti, pangitaon nato ang mga matarong, kadtong kinsa “[mo]patigbabaw sa Dios labaw sa tanan”3 diha sa ilang kinabuhi, ug suportahan nato sila samtang ang Espiritu naggiya nila ngadto sa dalan sa pakigsaad, ngadto sa templo, ug ngadto sa kinabuhing dayon.
Mga Templo ug ang Pagpahiuli
Sama sa gihimo ni Solomon sa karaang panahon nga “gitukod ang Templo alang sa ngalan sa Ginoo, ang Dios sa Israel” (1 Mga Hari 8:20), gikan sa kinaunhang mga adlaw sa Pagpahiuli ang mga miyembro sa Simbahan gisugo sa pagtukod og templo (tan-awa, pananglitan sa, Doktrina ug mga Pakigsaad 57:3; 84:3–5; 124:31). Kabahin kini sa katumanan sa damgo nga gihubad ni Daniel, diin nakita niya nga ang Dios magtukod og gingharian sa ulahing mga adlaw nga dili gayod magun-ob. Ang gingharian molambo, mokatap, ug mouswag hangtod nga molukop kini sa tibuok yuta. (Tan-awa sa Daniel 2:35, 44–45.) Si Joseph Smith miingon, “Kini nga Simbahan mopuno sa Amihanan ug Habagatang Amerika––pun-on niini ang kalib[o]tan.”4
Ang Ginoo mihulagway sa atong panahon isip “sa kapaigoan sa ebanghelyo alang sa katap[o]san nga mga panahon; ug alang sa kahingpitan sa mga panahon, diha diin Ako mopundok ngadto sa usa sa tanan nga mga butang, nga anaa sa langit, ug anaa sa yuta” (Doktrina ug mga Pakigsaad 27:13). Ang importante nga mga bahin niana nga pagpundok sa mga butang nga anaa sa langit ug anaa sa yuta mahitabo diha sa templo.
Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta karon. Ang katuyoan sa Simbahan mao ang pag-andam sa mga tawo sa pagpuyo sa kahangtoran didto sa celestial nga gingharian. (Tan-awa sa Doktrina ug mga Pakigsaad 65.) Ang Simbahan ma-establisar kon ang mga anak nga lalaki ug mga anak nga babaye sa Dios adunay mga pagpamatuod ni Jesukristo:
-
Mabunyagan ug makompirmahan.
-
Modawat sa mga ordinansa sa templo.
-
Motuman sa ilang mga pakigsaad.
-
Mopakita nga sila magpabiling matinud-anon ug matinuoron ubos sa tanang sirkumstansiya ug moapil sa mahinungdanon nga buhat sa ulahing mga adlaw. (Tan-awa sa 1 Samuel 13:8–14; Doktrina ug mga Pakigsaad 98:14–15.)
Kini nga dispensasyon sa kahingpitan sa panahon gi-establisar aron sa pagpundok sa nagkatibulaag nga Israel, agi og pasiuna sa Ikaduhang Pag-anhi ni Jesukristo.
Nasayod ko nga ang gingharian sa Dios gi-establisar dinhi sa yuta aron sa pagtabang nato nga makakat-on ug makasabot sa maanindot nga plano sa Langitnong Amahan alang nato. Ang ebanghelyo ug ang templo makatabang nato nga mahinumdom kon kinsa kita, nganong ania kita dinhi sa mortalidad, ug asa kita moadto human niini nga kinabuhi. Nasayod ko nga ang sagrado nga mga ordinansa ug mga pakigsaad sa templo makatabang nato aron mahimong takos alang sa kinabuhing dayon ug sa kahimayaan kon kita magpabiling matinud-anon ngadto sa mga pakigsaad nga atong gihimo. Makapalig-on kini sa atong mga kaminyoon ug mga pamilya, ug kini makatabang nato nga madugangan ang atong personal nga kapasidad sa pagpakigbatok sa mga pag-ataki sa kaaway samtang mangandam kita matag adlaw sa paghimamat sa atong Tiglalang.