“Pagkaayo Gikan sa Pagkaadik: Posible pinaagi ni Kristo,” Liahona, June 2022.
Pagkaulian Gikan sa Pagkaadik: Posible pinaagi ni Kristo
Ang programa sa Simbahan aron maulian gikan sa pagkaadik may katuyoan sa pagsuporta ug pagkonekta sa usag usa diha sa pagbuntog sa pagkaadik, apan labaw nga importante mahitungod kini sa pagkonekta ngadto sa Manluluwas.
Litrato gikan sa Getty Images
Matag usa kanato nanglimbasog sa atong kaugalingong personal nga mga hagit. Alang sa kadaghanan, ang mga makaadik o dili mapugngan nga mga kinaiya tingali maoy usa niini nga mga pagsulay. Dili kita kanunay nga dayag nga maghisgot mahitungod sa pagkaadik o dili mapugngan nga mga kinaiya diha sa katilingban ug ilabi na sa Simbahan. Kon kamo o ang usa ka minahal nanglimbasog sa pagkaadik, tingali bation mo og kaulaw o kahasol mahitungod sa paghusga gikan sa uban.
Kon kamo nanglimbasong sa pagkaadik, tingali bation ninyo nga naguba o daotan mo nga pagkatawo. Kini nga hagit mahimong bation nga bug-at kaayo, makauulaw, o dili mahatagan og kasulbaran. Hinuon, walay usa sa atong mga binuhatan ang makausab sa atong bili sa mga mata sa Dios. Kitang tanan adunay walay kataposan nga bili. Ug wala kamo mag-inusara sa inyong mga pagsulay. Ang tanang butang, lakip ang pagkaulian gikan sa pagkaadik, posible pinaagi ni Kristo. Tinuod usab kini alang niadtong tingali nanglimbasog sa kasakit o mga sangpotanan sa mga binuhatan sa uban. Si Presidente M. Russell Ballard mitudlo:
“Alang kaninyo nga nahimong bihag sa bisan unsang matang sa pagkaadik, adunay paglaum tungod kay ang Dios nahigugma sa tanan Niya nga mga anak ug tungod kay ang Pag-ula ni Ginoong Jesukristo naghimo nga posible sa tanang butang.
“Akong nakita ang talagsaong panalangin sa pagkaayo nga maghimo sa usa ka tawo nga gawasnon gikan sa mga kadena sa pagkaadik. Ang Ginoo mao ang atong Tigbalantay, ug walay makulang kanato samtang kita mosalig sa gah[o]um sa Pag-ula. Ako nasay[o]d nga ang Ginoo makahimo ug mohimo nga gawasnon sa nangaadik gikan sa pagkaulipon, kay si Apostol Pablo mipahayag, ‘Mahimo ko ang tanang butang pinaagi kang Kristo nga nagapalig-on kanako’ (Mga Taga-Filipos 4:13).”1
Pagkonektar ngadto ni Jesukristo ug sa Uban
Anaa ang nagkalain-laing mga panambal sa makaadik nga mga kinaiya. Ang addiction recovery program (ARP) sa Ang Simbahan ni Jesukristo sa mga Santos sa Ulahing mga Adlaw maoy usa ka dalan ngadto sa pagkaalim nga mohatag sa luwas ug masuportahon nga dapit alang ni bisan kinsa nga naningkamot sa pagbuntog sa makaadik o dili mapugngan nga mga kinaiya. Ang programa naglangkob sa personal o online nga suporta nga mga grupo nga nagsunod og 12 ka lakang nga pagsulbad subay sa pamaagi sa ebanghelyo. Ang matag grupo gilangkoban sa mga partisipante nga naglihok padulong ngadto sa pagkaulian, ARP nga pangserbisyo nga mga misyonaryo, ug mga tigpasiugda kinsa sila mismo sa ilang kaugalingon nakakaplag og pagkaayo ug pagkaalim pinaagi sa addiction recovery program.
Adunay duha ka matang sa pagkaayo gikan sa addiction-recovery nga miting: (1) mga miting nga nakapukos sa tanang matang sa pagkaadik ug (2) mga miting nga nakapukos sa pagbuntog sa paggamit sa pornograpiya. May mga tigsuporta usab nga mga grupo nga matambongan sa mga kapikas ug mga miyembro sa pamilya.
Detalye gikan sa Beside Still Waters [Tapad sa Linaw nga mga Tubig], ni Simon Dewey
Ang programa aron maulian gikan sa pagkaadik may katuyoan sa pagsuporta ug pagkonekta sa usag usa diha sa pagbuntog sa pagkaadik, apan labaw nga importante mahitungod kini sa pagkonekta ngadto sa Manluluwas, si Jesukristo. Gusto Niya nga motabang kanato diha sa atong mga pagsulay, ug Siya mao ang tinubdan sa pagkaalim.
Unsaon sa Pagpangita og Miting
Matag semana, mga 2,800 ka ARP ka mga miting ang ipahigayon sa 30 ka lainlaing mga nasod ug 17 ka lainlaing mga pinulongan. Kon gusto ninyo nga mangita og miting, bisitaha ang addictionrecovery.ChurchofJesusChrist.org. Kini nga mga miting mahitabo sa personal ug sa online. Kon walay mga miting sa inyong dapit o kon gibati ninyo nga mas komportable nga motambong sa virtual nga paagi, mahimo kamong motambong sa online o pinaagi sa telepono nga miting. Makahangyo usab kamo sa inyong mga lider sa Simbahan kon mahimo ba nga mopahigayon og personal nga miting sa inyong dapit.
Sa ARP nga mga grupo, dili mo pugson sa pag-apil gawas lang kon ganahan mo. Makasugod mo pinaagi sa pagtambong og usa ka miting ug basta maniid lang, maminaw sa uban, ug mobati sa Espiritu.
Ania ang tulo ka mga kasinatian gikan sa mga tawo kinsa nakatambong sa programa aron maulian gikan sa pagkaadik: usa ka tawo kinsa mitambong alang sa iyang kaugalingon, ug usa ka tawo kinsa karon usa ka tigdumala, ug usa ka tawo kinsa mitambong aron sa pagsuporta sa usa ka higala (kining kataposan nga istorya mabasa diha sa digital nga bersiyon niini nga artikulo).
Kasinatian ni Dorinda sa Pagbuntog sa Pagkapalainom
Ang ngalan giusab.
Misugod ko sa pag-inom sa bata pa nga pangidaron. Sa nasod nga akong gipuy-an, naandan kadto nga kinaiya sa katilingban, ug gibati nako nga kinahanglan kong moinom aron dawaton sa grupo.
Human ko naminyo, ang akong bana ug ako nagumon sa inom. Nakapabalaka gayod kini sa akong mga ginikanan. Bisan human nga ang akong bana og ako nagkaanak sa among unang anak, ang among pagkaadik sa alkohol wala moundang.
Wala madugay human sa pagkatawo sa among anak, nahimo kong miyembro sa Ang Simbahan ni Jesukristo sa mga Santos sa Ulahing mga Adlaw, ug miundang ko sa pag-inom ug misugod sa pag-uswag aron mabuntog ang akong pagkaadik. Kini nga mga kausaban nakapungot sa akong bana, ug nasuko siya nga dili ko moinom ug makigparti niya.
Human sa daghan nga pag-ampo ug pagpuasa, nagtinguha nga makasiguro sa kabubut-on sa Ginoo, akong gibiyaan ang akong bana ug mibalhin sa Estados Unidos. Samtang naningkamot ko sa pagsunod sa ebanghelyo ni Jesukristo, akong nabuntog ang akong pagkapalainom, apan nanglimbasog pa gihapon ko sa pagkontrolar sa akong kabalaka ug mga pagbati sa kawalay paglaom. Sa kataposan naminyo ko pag-usab og isigka miyembro sa Simbahan, apan padayon ko nga nanglimbasog.
Gidapit ko ngadto sa usa ka programa aron maulian gikan sa pagkaadik sa usa ka sister sa simbahan. Wala koy pagduda nga ang Langitnong Amahan naghunahuna kanako tungod kay ang akong nakat-onan didto alang ra gayod kanako. Among gihisgotan kon ang pagbati sa pag-inusara usa ba ka komon nga elemento niadtong nakasinati na og adiksyon. Kini nga pag-inusara maoy usa ka butang nga akong gipahamtang sa akong kaugalingon ug gipanlimbasogan.
Pinaagi sa programa aron maulian gikan sa pagkaadik, nakaamgo ko nga dili ko kinahanglan nga magpahilayo gikan sa Dios ug sa uban. Ako adunay kalig-on ug hugot nga pagtuo sa pag-atubang sa mga hagit ug sa pagbuntog niini.
Karon nasayod na ko nga wala ko mag-inusara. Nagtambongan gihapon ko sa mga miting sa grupo, ug usahay ang akong bana motambong sa mga miting sa grupo kuyog nako. Adunay daghang mga tawo gikan sa bisan asa nga dapit sa online nga mga miting, ug kami nagkat-on gikan sa usag usa nga mga kasinatian ug modalit og suporta sa matag usa. Ang akong bishop, akong bana, ug ang akong mga anak nasayod usab nga nagkinahanglan ko sa ilang suporta.
Labaw sa tanan, ako nasayod nga pinaagi sa Pag-ula ni Kristo nga ako makabuntog sa akong pagkaadik.
Kasinatian ni Ashly sa Pagbuntog sa Pagkaadik sa Drugas
Pamilya ni Ashly niadtong 2021
Litrato pinaagi sa Lori Romney Photography
Wala ko makaamgo sa gihatag nga kahilwasan sa ebanghelyo ni Jesukristo kanako hangtod nga akong gitugyan ang akong kabubut-on ngadto sa pagkaadik. Nagsugod ko sa pag-inom ug pagsuyop og drugas sa edad nga 14. Dihang nag 16 anyos ko, migahin ko og 15 ka bulan sulod sa usa ka binantayan nga pasilidad alang sa problemado nga mga bayong-bayong. Dihang mibiya ko, mibalik ko sa naandan nga bisyo. Nangawat ko aron makakwarta para sa drugas, ug limitado ang akong pagkontak sa akong pamilya. Sa usa ka higayon mipuyo ko uban sa usa ka pamilya kinsa namaligya ug naggamit og mga drugas. Ang akong sitwasyon ngitngit ug makahahadlok. Diha ko sa pinakangil-ad nga kahimtang. Sa dihang 19 anyos na ako, naadik ko sa heroin.
Sa taas nga panahon, wala ko maghunahuna nga aduna koy gahom sa pagkab-ot og taas nga panahon sa pagkaligdong o kinabuhi nga adunay kalinaw ug kalamposan. Hinuon, akong nakita ang kamot sa Dios diha sa akong kinabuhi pinaagi sa gagmay nga mga milagro, sama sa pagkakita og bookmark sa Basahon ni Mormon nga nakasup-it sa karaan nga Biblia o pagtagamtam sa walay kataposan nga gugma ug suporta sa akong papa. Pinaagi niining gagmay nga mga mensahe, akong nadungog ang tingog sa Ginoo.
Mibiya ko sa heroin ug nakahukom nga “mag-eksperimento” ug tan-awon kon unsa ang mahitabo kon buhaton nako ang tanan nga gisugo sa Dios kanako nga buhaton (tan-awa sa Alma 32:27). Nakahukom ko nga kon ang pagtuman sa mga sugo nakahimo nako nga malipayon, magpabilin ko nga dili na moinom. Ang pagbiya sa sigarilyo ug kape ug ang pagpadayon sa proseso sa paghinulsol lisod kaayo. Apan lahi ang akong gibati human nako kadto gibuhat. Nagsugod ko nga mobati nga luwas.
Sa tibuok nakong mga katuigan sa pagkaadik, mitambong ko og mga miting sa programa sa Simbahan aron maulian gikan sa pagkaadik. Gani akong nahimamat ang akong umaabot nga bana sa usa sa mga miting. Matag higayon nga mitambong ko, gihangop ko sa bukas nga mga bukton. Kadto usa ka dapit nga luwas alang kanako. Atol sa usa ka miting, usa ka lalaki midalit sa paghatag og espesyal nga pag-ampo alang kanako. Nianang gabhiona akong gibati ang gugma sa Langitnong Amahan alang kanako. Gibati nako nga takos sa pagkahimong limpyo. Mibiya ko sa inom human sa usa ka bulan gikan niadto.
Mga lima na ka tuig karon, ako nagserbisyo isip usa ka facilitator sa programa aron maulian gikan sa pagkaadik. Ang akong paborito nga parti kabahin sa mga miting mao nga makita ninyo ug masinati ang ebanghelyo ni Jesukristo nga naglihok. Walay mga pagbati sa pagkompara sa imong kaugalingon ngadto sa uban o mga kabalaka kon dawaton ba. Ang mga tawo tua didto kay gikinahanglan nila ang Dios. Ug andam sila nga kalimtan ang ilang garbo aron mobati sa Iyang kalinaw.
Kini nga mga miting maoy usa sa mga dapit nga akong nabati ang Espiritu sa hilabihan sa akong kinabuhi. Ang mga miting maoy usa ka dapit sa gugma, suporta, ug paglaom. Kini mga dapit sa kahilwasan diin ang kasakit ug mga problema gipaambit ug diin kita tinuoray nga makatabang sa pagpas-an sa mga kalisod sa usag usa.
Akong gibati nga kon ang mga tawo bag-o palang nagsugod sa pagkaayo, ang Dios anaa gyod kaayo sa ilang kinabuhi. Ang ginagmay nga mga milagro ug malumo nga mga kalooy mahitabo sa kasagaran, ug ako nagtuo nga kini maoy ginagmay nga pagtikdol gikan sa Ginoo aron ipabilin kining mga tawhana kanunay nga magsubay sa ensakto nga direksiyon.
Usa ka dakong dungog alang kanako nga makahimo sa paggamit sa akong kasinatian kabahin sa pagkaadik ug malimpyohan aron makahatag og paglaom ngadto kanila kinsa nanglimbasog. Kon mabalik pa lang unta nako ang panahon, nga mahibalo sa unsay akong nasayran karon, akong pilion ang pagsunod sa tambag sa atong mga lider sa Simbahan. Dili ko mopili nga mosulay sa drugas o ilimnong makahubog. Apan nasayod ko nga ang Ginoo makapalihok sa tanang butang alang sa kaayohan niadtong kinsa gihigugma Niya. Ako nasayod nga mao kana ang nahitabo para kanako. Ako nakahigayon aron ang akong kaguol ug kasakit mahimo nga usa ka mensahe sa paglaom.
Ang Kasinatian ni Rachel sa Pagsuporta sa usa ka Higala
Sa dihang ang lalaki nga akong gika-date misulti kanako mahitungod sa iyang pagkaadik sa pornograpiya, ang unang butang nga akong gisulti mao nga, “Unsay akong ikatabang?”
Mitubag siya, “Kuyogi ko ngadto sa maulian gikan sa pagkaadik nga mga miting. Adunay usa ka tigsuporta nga grupo alang sa pamilya ug mga higala nga imong matambongan.”
Nakahibalo ko kabahin sa 12 ka lakang nga programa aron maulian gikan sa pagkaadik, apan wala koy ideya nga dunay tigsuporta nga mga grupo. Nagpanuko ko permiro, pero akong gipahinumdoman ang akong kaugalingon nga nangutana ko niya kon unsay akong ikatabang, ug mao kini ang iyang gihangyo nako.
Atol sa unang miting, miginhawa ko og lawom ug miadto sa lawak diin ang tigsuporta nga grupo nagmiting. Sa dihang misulod ko sa lawak, gibati ko nga andam aron makat-on kon unsaon nako pagluwas ang akong uyab gikan sa pagkaadik.
Apan nasurprisa ko sa unsay akong nadiskobrehan.
Gihatagan ko nila og libro, Suporta nga Giya: Tabang alang sa mga Kapikas ug sa Pamilya sa mga Nagpaayo, ug among gibasa og kusog ang libro panahon sa klase.
Bisan kausa wala ko nakakat-on unsaon sa pagluwas sa akong uyab.
Hinuon, ang 12 ka leksiyon sa suporta nga giya mipakita nako nga sa dili pa ko makasuporta ni bisan kinsa, gikinahanglan una nako nga akong ibutang ang akong mga palas-anon ngadto sa mga tiil sa Ginoo ug tugotan Siya nga moayo kanako (tan-awa sa 3 Nephi 9:13)—aron ayohon ko gikan sa akong kaugalingong mga sayop ug mga panglimbasog ug antoson ang akong kasakit sa pagsuporta sa usa ka minahal nga nagpaayo gikan sa pagkaadik.
Nakaamgo ko nga kinahanglan ko nga mosalig ug moduol sa Manluluwas aron makakaplag og kalinaw, paglaom, ug kalig-on. Ug tungod niana, gibati nako nga mas andam sa pagsuporta sa uban kinsa nakigharong sa makaadik o lisod pugngan nga mga kinaiya.
“Ang atong prayoridad kinahanglan mao ang personal nga pagduol ngadto sa Ginoo,” nagsulti ang giya sa pagsuporta. “… Magbutang kini kanato sa mas maayong posisyon sa pagsuporta sa atong mga minahal. Bisan unsay ilang pilion nga buhaton, ang kalinaw ug paglaom sa Manluluwas maanaa kanato”(Suporta nga Giya: Tabang alang sa mga Kapikas ug sa Pamilya sa mga Nagpaayo [2017], iii).
Sa akong pagpadayon sa pagtambong sa kurso, nahibaloan nako kon unsa kadako ang paghigugma sa Maluluwas kanako ug unsa ka tinuod Siya nga nahibalo sa akong sitwasyon. Nakat-onan usab nako nga walay pagkaadik nga bisan kanus-a makausab kon unsa kadako sa Iyang paghigugma ni bisan kinsa sa mga anak sa Langitnong Amahan.
Apan tingali ang labing importante nga leksiyon nga akong nakat-onan samtang nagtambong sa suporta nga grupo mao nga dili ko makaluwas sa akong uyab (o ni bisan kinsa). Si Jesukristo lamang. Pinaagi sa Iyang maulaong sakripisyo, Siya adunay gahom sa pagluwas.
Hilabihan ang akong pasalamat nga Siya ang atong Manluluwas, kay Siya nasayod kon unsaon niya sa pag-agak nato sa hingpit nga paagi (tan-awa sa Alma 7:11–12). Samtang kita mosalig sa Iyang grasya, ako nasayod nga kita makadawat sa unsay gikinahanglan alang sa atong personal nga pagkaayo. Kita ituboy Niya ug mahimong mas takos sa pagsuporta sa atong mga minahal nga nag-atubang og mga adiksyon.
Tungod sa suporta nga grupo ug sa mga klase sa ARP, ang akong uyab mibati og kasayon sa pagsulti nako dihang giganahan siyang motan-aw og pornograpiya kay nasayod siya nga wala ko didto aron mohusga niya apan aron mohigugma ug mosuporta niya sa iyang mga paningkamot. Ang iyang panaw sa panglimbasog wala pa mahuman, apan akong nakita ang pag-uswag ug kausaban nga nahimo sa mga baroganan gikan niini nga mga klase diha sa kinabuhi namong duha. Ug akong gibati ang kamot sa Dios sa kanunay.