“Mga Istorya Nga Naghiusa Nato,” Liahona, Hunyo 2022.
Nagkatigulang nga Matinud-anon
Mga Istorya Nga Naghiusa Nato
Makapalig-on kita sa atong mga pamilya pinaagi sa pagpaambit og mga ehemplo sa hugot nga pagtuo ug kaisog gikan sa milabay ug sa karon.
Mga paghulagway ni Carolyn Vibbert
Samtang nagkatigulang na ko, ang akong kahimtang diha sa akong pamilya nausab. Kaniadto usa ko ka batan-ong inahan nga mopundok sa grupo sa sipat nga mga bata aron mahan-ay ang kagubot nga gitawag namo og home evening. Karon usa na ko ka lola, usahay anaa sa tungatunga sa mga panghitabo sa pamilya ug usahay anaa ra diha sa luyo. Anaa na ko sa henerasyon sa mga tigulang. Gihigugma nako ang duha ka nag-unang mga henerasyon, lakip na ang akong bana, nga anaa na karon sa pikas nga habig sa tabil. Ug gidayeg nako ang duha ka henerasyon nga sa pagkakaron anaa sa yuta (pun-an pa sa pipila ka mga apo sa tuhod gikan sa henerasyon nga moabot human niana).
Ang usa sa mga tahas nako karon mao diha sa kataposan sa among Dali, Sunod kanako nga mga videoconference sa pamilya. Isip sakop sa pamilya, gigamit namo ang programa sa online game aron matabangan ang mga manag-agaw nga magkailhanay sa usag usa ug aron matabangan kaming tanan nga makahinumdom o makaila sa among mga katigulangan. Samtang gihimo namo kini, naamgohan nako nga dili lang ang among mga pakigsaad sa templo ang naghiusa sa among pamilya sa kahangtoran, apan ang gipaambit usab namo nga mga istorya bahin sa kaisog ug hugot nga pagtuo.
Inspirasyon gikan sa Milabay
Nagtuo ko nga matag usa nato adunay istorya bahin sa hugot nga pagtuo ug kaisog nga angayng ipaambit. Sa pagkatinuod kadtong nag-una kanato makadasig nato kon kita mohinumdom sa ilang espiritu ug mga sakripisyo. Pananglitan:
-
Ang among pamilya mapasalamaton alang sa usa ka batan-ong lalaki, si Christian Hans Monson, kinsa niadtong mga 1800 midala og pagkaon ngadto sa mga misyonaryo didto sa bilanggoan sa Fredrikstad, Norway. Sila mitudlo niya sa ebanghelyo. Siya sekreto nga mipagawas nila sa bilanggoan, ug sila mibunyag niya sa fjord sa usa ka puno sa bitoon nga kagabhion. Human sa iyang pagpasakop sa Simbahan, gipalayas siya sa iyang amahan. Apan miadto siya sa Walog sa Salt Lake aron magpadako og matarong nga kaliwatan.
-
Nadasig usab kami sa istorya ni Johanna Kirstine Larsen. Atol sa ilang pagbaktas ngadto sa Walog sa Salt Lake, ang iyang grupo nga mga pioneer, gipangulohan ni Brigham Young Jr., nakasugat og nagdilaab nga dakong kalayo. Human sa ilang sinsero nga pag-ampo, ang gamayng panganod nahimong kusog kaayo nga ulan nga mipalong sa kalayo.
Inspirasyon alang Karon
Ang akong apo nga babaye ug ang akong “sinagop” nga apo nga babaye, usa ka bag-ong kinabig nga anaa nagpuyo sa pamilya sa akong anak nga babaye.
Litrato sa maayong kabubut-on sa tagsulat
Gibati nako ang hilabihan nga pasalamat alang niining matinud-anon, maisogon nga mga kalag. Apan gibati usab nako ang kamapainubsanon tungod sa maisogon nga mga espiritu sa among pamilya karon. Busa, nakahukom ko nga sa matag miting namo sa pamilya, mohangyo ko og duha sa akong mga apo nga mopaambit sa ilang pagpamatuod bahin sa hugot nga pagtuo ug kaisog. Dili lang kini makapadasig sa tanan sa pamilya, apan nagtugot kini niadtong kinsa mopaambit sa paggahin og pipila ka minuto aron makita kon giunsa sila pagtabang sa Dios nga makalahutay sa lisod nga panahon. Ania ang duha sa ilang mga istorya.
-
Ang among apo nga babaye nakigbatok sa kanser sa tutonlan isip usa ka tin-edyer. Miingon siya, “Ang Langitnong Amahan migiya nako, labi na sa akong semana sa radiation isolation. Ang akong pagpamatuod ug ang akong gamayng iro nga si Daisy nakatabang nako nga makalahutay.”
-
Sa dihang ang usa ka batan-on nga kinabig nakakaplag sa iyang kaugalingon nga wala nay panimalay o pamilya, ang mga misyonaryo midala niya ngadto sa balay sa akong anak nga babaye. Gidawat namo siya isip among kaugalingong pamilya ug gitan-aw siya isip usa kanamo. Kining malipayong batan-on nga kinabig miingon, “Akong nakat-onan nga bisan kon nahadlok ko, makahimo ko og lisod nga mga butang uban sa tabang sa Langitnong Amahan.” Siya nakapanalangin namo sa iyang mahigugmaon, malipayon nga kinaiya.
Sa akong tahas isip usa ka lola, akong nakat-onan sa makausa pa nga aduna kitay daghang mahimo isip mga ginikanan ug mga apohan sa paglig-on sa kadena sa atong mahangtorong pamilya. Ang pagpaambit og mga istorya bahin sa hugot nga pagtuo ug kaisog, gikan sa milabay ug sa karon, maoy usa ka paagi sa pagtabang sa atong mga anak ug mga apo nga makabaton og hugot nga pagtuo ug kaisog samtang atubangon nila ang umaabot. Ug usa kini ka maanindot nga paagi sa pagtabang sa pagpabalik sa mga kasingkasing sa mga anak ngadto sa ilang mga amahan ug mga inahan (tan-awa sa Malaquias 4:6).
Ang tagsulat nagpuyo sa Utah, USA.