Ang Garment sa Templo: Usa ka Sagradong Pahinumdom sa Ginoong Jesukristo

Pinaagi sa mga empleyado sa Departamento sa Templo

Ang garment sa templo nagtudlo kanato ngadto ni Jesukristo ug sa Iyang labing importanting tahas sa atong kaluwasan ug kahimayaan.

Nagtubo ka man diha sa Simbahan o nagpasakop sa ulahing bahin na sa kinabuhi, tingali nadungog na nimo ang mahitungod sa mga garment sa templo sa wala ka pa gayod makasulod sa templo sa imong kaugalingon. Apan ang pagkasayod mahitungod sa garment ug ang pagsabot sa kahulogan sa garment duha ka lahi kaayo nga mga butang!

Ang garment sa templo dili sama sa kinaraang isul-ob nga pang-ilawom. Ang pagsul-ob niining sagrado nga sinina sa matinud-anong paagi nagdapit og diosnong gahom nganha sa atong mga kinabuhi tungod kay kini nagpahinumdom kanato sa pagpuyo sa ebanghelyo sa mas hingpit nga paagi.

Naghunahuna ka ba sukad kon ngano nga ang sagradong pang-ilawom nga sinina ihatag ngadto niadtong kinsa mosulod ngadto og pakigsaad sa Dios diha sa templo? Ania ang pipila ka butang nga hunahunaon.

Usa ka Sundanan sa Sagradong mga Pahinumdom

Sukad sa sinugdanan, ang Dios naghatag sa Iyang mga anak og nagkalainlaing mga sundanan, mga buhat, ug mga ordinansa sa pagtabang kanato sa paghinumdom ug paglig-on sa atong relasyon ngadto Kaniya. Kini naglakip sa mosunod:

Ang Igpapahulay nga adlaw: usa ka adlaw sa pagpahulay ug pagsimba––usa ka adlaw nga gipahinungod sa pagpasidungog ug paghinumdom Kaniya (tan-awa sa Exodo 20:8–11; Doktrina og mga Pakigsaad 59:9–13).
Pagpalabay: usa ka solemne apan malipayon nga pagsaulog nga nagpahinumdom sa mga Israelita sa ilang pagkalingkawas gikan sa pagkaulipon sa Ehipto ug nagtudlo kanila ngadto ni Jesukristo, kinsa naghatag og espirituhanong kaluwasan alang sa tanang katawhan.(tan-awa sa Exodo 12–13).
Ang sakramento: usa ka sagradong ordinansa nga gitukod ni Jesus agi og handomanan sa Iyang maulaong pagsakripisyo (tan-awa sa Mateo 26; Marcos 14; Lucas 22; 3 Nephi 18). Pinaagi niini nga ordinansa, ang mga miyembro sa Simbahan nagbag-o usab sa mga pakigsaad nga ilang gihimo uban sa Dios.

Ang matag usa niini nagsilbi isip usa ka pahinumdom nga nagtudlo kanato ngadto sa Dios. Sa samang paagi, ang garment sa templo nagsilbi isip usa ka makita nga pahinumdom sa atong pakigsaad nga relasyon uban sa Dios nga Amahan, nga nahimong posible pinaagi sa iyang Anak, si Jesukristo. Ang garment usa ka tabon alang sa labing sagrado sa mga nilalang sa Dios: ang Iyang mga anak.

Ang Unang Kapangulohan nagpahayag, “Usa kini ka sagrado nga pribilehiyo ang pagsul-ob sa garment ug ang pagbuhat sa ingon usa ka makita nga pagpadayag sa usa ka kaugalingong pasalig sa pagsunod sa Manluluwas nga si Jesukristo.”¹ Sa matag higayon nga kita nag-apil sa usa ka ordinansa sa pagkapari, nagserbisyo sa uban, nag-ampo, o nagtuon sa ebanghelyo, pananglit, kita nagpakita og “dayag nga pagpahayag” sa atong kaugalingong indibidwal nga pasalig sa pagsunod sa Manluluwas. Samtang ang garment sa templo dili makita ngadto sa kalibotan, ang pagsul-ob niini sa matinud-anong paagi makahatag og kanunay nga pahinumdom ngadto sa nagsul-ob sa sagradong mga pakigsaad nga gihimo uban sa Dios––usa ka simbolo sa atong tinguha nga mahimong unsay nahibaloan sa Dios nga kita mahimo.

Pinaagi sa matinud-anong pagtahod sa mga pakigsaad sa pagtoga, nag-andam kita sa pagdawat sa bililhong gasa sa kahimayaan didto sa gingharian sa atong Langitnong Amahan. Ang garment nagpahinumdom kanato nga kita mahimong mosalikway sa kinaiyanhong tawo ug mahimong usa ka Santos pinaagi sa Pag-ula ni Jesukristo (tan-awa sa Mosiah 3:19).

Ang Pagkapukan ug ang Saad alang sa usa ka Manluluwas

Makakat-on kita og daghan pa mahitungod sa simbolismo sa garment sa templo pinagi sa pagtuon sa pakigsinultihay sa Dios uban ni Adan ug ni Eva. Human sa pagkaon sa gidili nga prutas, gibati ni Adan ug ni Eva ang kaulaw sa paghunahuna nga nagbarog diha sa atubangan sa Dios. Nasayod nga sila hubo, mihimo sila og mga tapis gikan sa dahon sa higuera ug mitago sa ilang mga kaugalingon. (Tan-awa sa Genesis 3:1–8.)

Apan sa dihang ang Dios nakakita unsay ilang nabuhat, wala Siya mobulag kanila o mibiya kanila nga walay kahupayan. Samtang giatubang ni Adan ug ni Eva ang reyalidad sa epirituhanon ug pisikal nga kamatayon, gitudloan sila sa Dios kabahin sa espirituhanong pagkatawo pag-usab ug sa gasa sa kinabuhing dayon, nga anaa alang sa tanan Niyang mga anak. “Maminaw ngari sa akong tingog.” miingon ang Dios, “ug motuo ug mohinulsol sa imong tanan nga mga kalapasan. ug mopabunyag, gani sa tubig, diha sa ngalan sa akong Bugtong nga Anak, kinsa puno sa grasya ug sa kamatuoran, nga mao si Jesukristo, ang bugtong ngalan nga ihatag ubos sa langit, diin ang kaluwasan moabot ngadto sa mga katawhan” (Moises 6:52).

Misugod si Adan ug si Eva sa ilang panaw dinhi niining makasasala nga kalibotan uban sa kahibalo kabahin sa Manluluwas, uban sa pagdapit sa pagduol ngadto Kaniya, ug makakab-ot ngadto sa Iyang matubsanong gahom. Sila misulod ngadto sa mga pakigsaad uban sa Dios ug gihatagan og “mga kupo nga mga panit” gihimo Mismo sa Dios sa pagpahinumdom Kanila niadto nga mga pakigsaad (Genesis 3:21; Moises 4:27).

Samtang kita nagtambong sa templo, kita gitogahan og gahom ug sa personal nga paagi misulod ngadto sa pakigsaad uban sa Dios. Ang garment usa ka ilhanan sa panalipod nga nadawat ni Adan ug ni Eva ug nga atong nadawat ug usa ka pahinumdom niining sagrado nga mga pakigsaad.

Usa ka Simbolikanhong Pasalig sa Pagsunod ni Jesukristo

Si Presidente Russell M. Nelson mipahayag nga ang “pagsul-ob sa garment sa templo adunay lawom nga simbolikanhong kahulogan. Kini nagrepresentar og nagpadayong pasalig.”² Kini naglakip sa pasalig sa Dios sa paghatag og usa ka Manluluwas alang sa Iyang mga anak (tan-awa sa Moroni 10:33), ingon man isip atong kaugalingong pasalig sa pagdawat ni Jesukristo isip atong Manluluwas ug Manunubos.

Samtang kita nagtahod sa mga pakigsaad sa templo ug matinud-anong nagsul-ob sa garment, kita gisaaran og mga panalangin nga panalipdan batok sa tintasyon ug sa daotan. Kita nagpahimulos og kanunay nga pahinumdom nga ang atong Manluluwas nagtinguha sa paglimpyo kanato gikan sa atong mga sala ug nagtabang kanato sa pagbuntog sa atong personal nga mga sala, mga kahuyang, mga kapakyasan, ug mga kasakit.

Alang kang Adan ug ni Eva, ang garment nagsilbi isip usa ka simbolo sa ilang relasyon ngadto sa Dios ug mihatag og pahinumdom sa mga pakigsaad nga mitugot kanila sa pagdawat sa daghang mga panalangin nga ang Dios aduna alang sa Iyang matinud-anong mga anak. Samtang kita mangita sa atong dalan taliwala sa mga hagit ug mga pagsulay sa mortalidad, ang garment makatabang kanato sa paghinumdom ni Jesukristo, pagmahal sa atong mga pakigsaad sa templo, ug sa pagpabilin nga lig-on sa atong pasalig aron takos alang sa mga panalangin sa kinabuhing dayon.