Digital Lamang
Ang Akong Pag-ampo alang sa mga Peach ug mga Peras
Ang tagsulat nagpuyo sa Oregon, USA.
Gitubag sa Langitnong Amahan ang akong pag-ampo pipila ka bulan human ako nangayo.
Mga tuig ang milabay, sa diha nga ang akong bana ug ako diha pay unom sa among mga anak sa panimalay, kami usab adunay balay dangpanan diin miamuma kami alang sa tigulang nga mga pasyente nga adunay Alzheimer. Niana nga panahon, kami may dakong tanaman nga gitamnan ug nagpreserba og daghan sa among pagkaon. Usa ka tuig kami walay makuha nga mga peach o mga peras, nga mga paborito sa among pamilya ug labing maayo alang sa mga pasyente nga adunay Alzheimer kinsa nagkinahanglan og humok nga mga pagkaon.
Mihukom ako sa pag-ampo mahitungod niini nga panginahanglan. Mihangyo ako sa Langitnong Amahan sa paggiya kanako ngadto sa pipila ka barato nga mga peach ug mga peras kon Siya nasayod og pipila nga anaa. Ang akong tuyo mao ang pagpangita og prutas nga malabay lamang.
Duha ka adlaw ang milabay, gisakay ko ang mga bata ngadto sa Simbahan alang sa usa ka kalihokan sa kabatan-onan. Usa ka sister kinsa bag-o sa ward miduol kanako ug nangutana kanako kon makagamit ba ako og pipila ka hinog nga mga peach. Ang iyang pamilya bag-o lamang nakapalit og usa ka panimalay nga adunay daghang kahoy sa peach sa nataran, ug adunay mas daghang bunga kay sa ilang magamit. Nakapamu-po ako og daghang kahon sa mga peach ug nakapreserba niini nga walay bayad.
Pipila ka panahon ang milabay, ug wala ako makakaplag og bisan unsa nga mga peras. Nangatarongan ako sa akong kaugalingon nga ang Langitnong Amahan nasayod nga hilabihan ako ka nagkapuliki sa pagpahimutang sa mga bata sa eskwelahan ug sa pagpreserba sa pagkaon gikan sa among tanaman ug walay panahon alang sa mga peras.
Pipila ka bulan ang milabay, human mapu-po ang tanang prutas, diha ako sa hulatanan nga kwarto sa opisina sa akong chiropractor. Samtang ako naglingkod didto, usa ka lalaki misulod ug misugod sa pakigsulti sa receptionist. Sa akong kahibulong, akong nadungog siya nga nangutana kaniya [sa receptionist] kon may nailhan ba siya kinsa makagamit og pipila ka mga peras. Siya adunay mga kinahon sa peras nga anaa sa bugnaw nga tipiganan ug nangita og panimalay alang niini aron mapatay niya ang pabugnaw alang sa tingtugnaw. Nakahimo ako sa pagpalit og mga kinahon sa dagko, nindot nga mga peras sa tres dolyares lamang kada usa––minos kaayo nga presyo itandi sa unsay kasagaran nga akong gibayran!
Ang Langitnong Amahan mitubag sa akong pag-ampo sa milabay nga mga bulan, ug gipahimutang usab niya ang mga peras nga matipigan sa bugnaw hangtod ako adunay mas daghang panahon sa pagpreserba niini.
Sa usa ka kinatibuk-ang komperensiya nga pakigpulong, si Elder Brook P. Hales sa Kapitoan miingon: “Ang Langitnong Amahan nagpakabana kanato, nahibalo sa atong mga panginahanglan, ug hingpit nga motabang kanato. Usahay kana nga tabang ihatag sa higayon gayod o sa labing minos sa dili madugay human sa atong pagpangayo alang sa balaang tabang. Usahay ang atong labing bug-os ug takos nga mga tinguha wala matubag sa paagi nga atong gilaoman, apan atong mahibaloan nga ang Dios adunay mas dako nga mga panalangin nga gitagana. Ug usahay ang atong matarong nga mga tinguha dili mahatag niini nga kinabuhi.”1
Daghang mga higayon ang akong mga pag-ampo natubag dayon, apan pipila ka butang nga sa kinasingkasig akong giampo kada adlaw wala pa gihapon mahatag. Ang paghinumdom sa mga kasinatian sama sa akong pag-ampo alang sa mga peach ug mga peras nagpahinumdom kanako nga ang akong Langitnong Amahan nakaila kanako ug sa akong mga panginahanglan ug nga Siya motabang kanako sa hingpit nga mga paagi nga Siya nahibalo nga mga maayo alang kanako.