Ang Media nga Akong Gikalingahan Nag-apekto ba Gayod Kanako?

Ni Megan Thomson Ramsey

Mga Magasin sa Simbahan

Kon kita nakaamgo ba o wala, ang media nga atong gikalingahan nag-apekto kanato. Busa unsaon nga makapili kita sa media nga “maayo og dungog o dalaygon”? (Mga Artikulo sa Hugot nga Pagtuo 1:13).

Imahe

mga tawo naggunit og mga simbolo

Sa dihang midula ako og tennis sa high school, kasagaran nakong madungog ang ubang magdudula nga mamalikas. Naninguha ako nga ang ilang mga pulong dili moapekto kanako. Apan atol sa usa sa akong mga sangka, wala nako makuha ang bola, ug usa ka ngil-ad nga pulong migawas sa akong ba-ba. Wala gani nako mamatikdi kini, sa hinay-hinay ako nahimong dili na lainan sa mga pulong nga ilang gisulti hangtod mora kini og natural alang sa “kinaiyanhon nga tawo” (Mosiah 3:19) nga anaa kanako sa paggamit usab niini.

Unsa ang atong gipalibot sa atong mga kaugalingon makaapekto kanato sa daghang mga paagi, ug usa sa labing maka-impluwensya nga mga butang nga naglibot kanato sa matag adlaw mao ang media. Makaamgo kita niini o wala, ang mga matang sa media nga kita nalinga makahimo sa hinayhinay, hapit dili mailhan, sa paghiwi sa atong reyalidad. Mahimong kita maghunahuna nga usahay ang pagtan-aw og media nga adunay mga panamastamas, kalaw-ay, o kapintas walay epekto kanato, apan ang kamatuoran mao nga kini aduna. Busa unsa ang atong mahimo mahitungod niini?

Magpili sa Pagpangita og Maayong Media

Kini importante sa paghinumdom nga, bisan pa sa tanang mangil-ad nga mga butang nga kita makakuha pinaagi sa atong mga telebisyon o mga smartphone, kini adunay maayo nga media nga makit-an. Ang mga misyonaryo nagpakigbahin sa ebanghelyo pinaagi sa makabayaw nga media. Tingali mahimo kitang makigkonektar og balik sa usa ka karaang higala o mangita og mensahe diha sa social media nga sa tinuoray mobayaw sa atong mga espiritu. Apan unsaon nato sa pagpaninguha og pangita niining mahiyason, matahom, ug maayo og dungog nga media? (tan-awa sa Mga Artikulo sa Hugot nga Pagtuo 1:13).

Si Elder David A. Bednar sa Korum sa Napulog Duha ka Apostoles mitanyag niining walay kapakyasang pagsulay: “Kon adunay butang nga mahunahuna, makita, madungog, o mabuhat nato nga makapalayo nato sa Espiritu Santo, nan moundang kita sa paghunahuna, pagtan-aw, pagpaminaw o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, nan sigurado kana nga kalingawan dili para kanato.”¹

Kon ako magpili og media, gusto ko nga pangutan-on ang akong kaugalingon og sama niini: Kini ba nagtabang kanako nga mas mapaduol ngadto sa Dios? Makabati ba gihapon ako sa Espiritu Santo diha sa akong kinabuhi? Tingali gusto usab nimo nga mogamit niini nga mga pangutana sa paggiya kanimo samtang ikaw naningkamot sa pagpangita og tinuod nga media. Ug samtang kita makahimo og mga kasaypanan, kita makahimo nga mas mamaayo––usa ka pagpili sa matag panahon.

Ako dili hingpit nga ehemplo niini. Nakatan-aw ako og kinaham nga mga salida nga wala magdasig kanako nga mahimong usa ka mas maayong tawo. Ug nag-scroll ko ngadto sa mga video sa social media nga usahay adunay dili angay nga pinulongan. Apan naningkamot ako nga mahimong mas mabinantayon. Kada adlaw ako naninguha sa pagpili og makabayaw nga media.

Kansang Tingog Imong Gipaminaw?

Niining nagkapuliki nga kalibotan, ako maglisod nga maglingkod nga walay timik. Ingon og gusto kong kuhaon ang akong cell phone aron i-scroll ang social media o mag-stream og mga video aron sa pagwagtang sa kahilom. Apan sa kadaghanan ako makaila sa Espiritu kon kini hilom. Busa ako naninguha nga mas makaamgo sa mga tingog sa kalibotan nga ako sa wala tuyoa nagwagtang sa malinawon, gamay nga tingog (tan-awa sa 1 Mga Hari 19:11–12).

Ania ang pipila ka paagi nga kitang tanan makasugod sa pagpugong sa atong paggamit sa media:

Pagsugod pinaagi sa pagka mas mabinantayon. Undanga ang pagtan-aw nga walay pagpakabana. Paggahin og panahon sa paghunahuna gayod mahitungod sa unsay imong gisulod ngadto sa imong hunahuna–– kini ba mopahilayo kanimo gikan sa Espiritu Santo?
Hatagi og pagtagad ang kanus-a ug nganong ikaw naggamit og media. Naggahin ka ba og panahon sa paglingkod nga hilom ug sa pagbati sa Espiritu? O ikaw ba may kalagmitan nga mokuha sa imong cell phone sa mga higayon nga hilom, sama sa akong buhaton usahay?
Hunahunaa ang paghimo og kanunay nga mga paghunong gikan sa media, tingali isip kabahin sa imong Dominggo nga pagsimba. Ang paghimo og mga paghunong gikan sa media makatabang kanimo nga mahimong mas sensitibo ngadto sa mga epekto niini nganha kanimo.

Paghimo og mga Pagpili sa Media nga Gihunahuna Pag-ayo

Pilia nga mahimong tinuyo mahitungod sa ug makaalinggat sa mga impluwensya nga imong gidapit nganha sa imong kinabuhi. Pilia ang paghunahuna og balik ug pagpangutana gayod sa imong kaugalingon kon unsa ang epekto sa media diha kanimo. Mahimo ganing ikaw nagkinahanglan nga mopalayo gikan sa piho nga mga basahon, mga salida, social media, o mga podcast aron makamatikod sa dili maklaro nga mga epekto nga kini mahimong aduna.

Apan kini nagkinahanglan og panahon! Ang atong panaw sa pagpaningkamot nga maanaa sa kalibotan apan dili iya sa kalibotan usa ka proseso sa paghashas (tan-awa sa Juan 17:11, 14–15). Sa hinay-hinay kita makapaninguha og gamay nga mahimong mas mamaayo og gamay. Si Presidente Russell M. Nelson miingon, “Ang Ginoo ganahan og paningkamot.”² Sa kadugayan, mahimo kita nga mahashasan nga maputli sama sa Manluluwas. Kon kita masayop, kita makahinulsol ug moduol ngadto Kaniya uban ang tinuod nga katuyoan ug mahimong nahashasan pa gani gyod! Kana ang milagro sa Pag-ula ni Jesukristo.

Kon ako malinga sa nauso nga media, kini malisod sa pagpiho kon ang mga tingog sa kalibotan aduna bay negatibong epekto kanako. Apan nahibalo ako nga kon ako mogahin og oras sa pagbiya gikan sa media, ako makakita hain nga mga impluwensya ang akong kinahanglan nga tangtangon gikan sa akong kinabuhi. Usahay kini usa ka malisod nga pagpili, apan kini takos niini.

Magpakatinuod ako––kadtong sangka sa tennis dili mao ang kataposang higayon ako misulti og ngil-ad nga pulong. Apan sa dihang ako nakaamgo kon unsaon nga ang pagkabantang ngadto niana nga sitwasyon nakaapekto kanako, mihimo ako og tinuyo nga pagpili sa pag-usab sa mga tawo nga ako nagpalibot sa akong kaugalingon. Makahimo kita og samang tinuyoan nga mga pagpili sa mga media nga atong kalingahan.