Pilia ang Ginoo ug ang Iyang Propeta

Ni Elder Jeffrey R. Holland

Sa Korum sa Napulog Duha ka Apostoles

Ang mga propeta walay mas labaw pa nga kabalaka kay sa paggiya sa mga anak sa Dios ngadto sa Manluluwas nga si Jesukristo.

hulagway ni Russell M. Nelson, uban sa stained-glass nga imahe sa Amahan ug sa Anak sa background

Adunay importante kaayo nga higayon diha sa Daang Tugon nga, sama sa daghang mga higayon niana nga rekord, makapahinuklog nako. Nahitabo kini human sa pagpangulo sa dili hitupngan nga si Moises ug sa iyang mahalaron nga batan-ong sumusunod, si Josue.

Bisan pa sa mga milagro nga ilang nasinati ug sa diosnong pagpakabana diha sa ilang tinguha aron maangkon og balik ang kayutaan sa ilang katigulangan, ang mga anak sa Israel gibadlong tungod sa paghangop sa mga tulumanon sa mga pagano nga maoy komon sa mga nagpuyo niadto nga kayutaan.

“Unya ang katawhan sa Israel nagpakasala batok sa Ginoo ug mialagad sa mga Baal:

“Mihunong sila pagsimba sa Ginoo, ang Dios sa ilang katigulangan nga maoy nagkuha kanila gikan sa Ehipto. Nagsugod sila pagsimba sa laing mga diosdios, ang mga dios sa katawhan nga naglibot kanila. Misimba sila sa maong mga diosdios ug nakapasuko kini sa Ginoo” (Mga Maghuhukom 2:11–12).

Bisan sa iyang kasuko, si Jehova mipakita og kalooy pinaagi sa paghatag “[og] mga maghuhukom nga maoy nagluwas kanila gikan sa mga kaaway” (Mga Maghuhukom 2:16). Ang labing banggiitan sa tanan niadto nga mga maghuhukom mao si Samuel. Gitawag sa Ginoo sa dihang usa pa lamang ka bata, midako siya ngadto sa pagkamaghuhukom nga hilabihan gayod ka malampuson nga siya gipaluyohan sa tanang Israel “nga propeta sa Ginoo” (1 Samuel 3:20).

Ang Israel, o ingon sa makita, gikahimut-an na usab sa Dios, mibalik ug mipaluyo na usab sa hingpit nga pagpangulo sa propeta nga wala nila mahibaloi—ug dili nila gusto—sukad sa pagkamatay ni Josue. Ug unsa ang epekto niining pagbalik sa pagpangulo sa propeta nganha sa ilang kaayohan.

Ubos sa pagpangulo sa propetang maghuhukom nga si Samuel, si Jehova mihampak ug “midahunog ang tingog” ngadto sa mga kaaway sa Israel (1 Samuel 7:10). Sa kasaysayan, hangtod nga ang Israel maminaw sa tambag ni Jehova pinaagi sa Iyang mga propeta, ang kadaogan ug kalamboan misunod.

Apan sa kataposan—ug kini nga bahin nakapahingangha nako—ang Israel miabot og kapuol sa pagkamaghuhukom ni Samuel. Gikonsiderar nila siya ug ang iyang pagpangulo nga karaan na ug nabiyaan sa panahon. Human sa tanan, ang kadagkoan sa Israel miingon niya, “tigulang ka na” (1 Samuel 8:5). Ug, sa ilang hunahuna, ingon usab niana ang ideya sa usa ka maghuhukom, bisan kon usa pa siya ka propeta. Panahon na nga isalikway ang pangrelihiyon nga mga ideya nianang higayona ug hangopon ang mas moderno nga mga paagi sa kalibotan. Panahon na nga adunay usa ka hari.

“Busa pagtudlog hari nga magmando kanamo sama sa gibuhat sa ubang mga nasod,” miingon sila (1 Samuel 8:5), uban sa leksiyon nga kita kinahanglang mag-amping sa unsay atong gipangandoy kay basin maangkon nato kini ug masayran nga dili diay kini maayo alang nato. Sa dihang nag-ampo si Samuel mahitungod niini nga hangyo, si Jehova miingon niya, “Dili man ikaw ang ilang gisalikway kondili ako. Dili sila buot nga ako maoy maghari kanila” (1 Samuel 8:7).

Siyempre, sama sa nakasulat sa ibabaw, dili kini ang unang higayon nga ang Israel mipakita og pagtamay ni Jehova ug sa Iyang mga propeta.

“Ingon nga gisalikway ako nila sukad sa akong pagkuha kanila gikan sa Ehipto ug nag-alagad sila sa laing mga dios, gisalikway ka usab nila,” miingon ang Ginoo ni Samuel (1 Samuel 8:8). Unya, agi og direkta nga pagpakita og hustisya, ang Ginoo miingon niya “tumana ang ilang gihangyo” (1 Samuel 8:9) apan pasidan-an ang mga tawo bahin sa mga pamaagi sa dili matarong nga mga hari.

Agi og pagsunod, si Samuel nanagna bahin sa pag-abuso sa gahom ug sa hulga ngadto sa pamilya ug kabtangan. Sa pagpahibalo sa Israel nga ang ilang gipangandoy natuman, siya mipasidaan agi og panagna:

“Ug niadtong mga adlawa manghilak kamo tungod sa hari nga inyong gipangayo apan dili kamo kaloy-an sa Ginoo.

“Apan ang katawhan wala mamati kang Samuel ug sila miingon kaniya, “Gusto kamig hari;

“Aron mahisama kami sa ubang mga nasod. Gusto kamig hari nga magmando ug mangulo kanamo sa panggubatan” (1 Samuel 8:18–20).

Ang sakit nga hunahunaon dinhi mao nga sila aduna nay usa ka hari nga mikuyog nila ug nakig-away sa ilang mga gubat. Siya mao si Jehova, ang Hari sa tanan, apan dili na si Jehova mangulo nila. Dili na Siya makig-away sa ilang mga gubat. Ug sama sa tema sa daghan na kaayong mga leksiyon sa kasaysayan, ang sakit nga mga sangpotanan miabot sa dihang ulahi na kaayo ang paglikay niini. Sa kaulahian ang mga tawo nagbangotan, “Nadugangan namo ang among sala pinaagi sa pagpangayog hari” (1 Samuel 12:19).

Ang Makapadani nga mga Tentasyon sa Kalibotan

Isip mga sakop niining sama nga panimalay sa Israel nga halapad nga gihulagway, kita gimandoan nga dili lamang mahimong sama sa ubang mga tawo, dili lamang mahimong sama sa kalibotan. Apan sama sa mga tawo sa Dios sa panahon ni Samuel, nag-atubang kita og gamhanang impluwensiya sa tentasyon aron mamahimong sama niadtong mahuyang, niadtong mga tawo nga mibuhat sa mga butang nga popular sa ilang panahon.

“Alang sa tinuod nga tumutuo,” si Elder Neal A. Maxwell (1926–2004) sa Korum sa Napulog Duha ka Apostoles miobserbar, “ang mga makapadani nga mga tentasyon ug makapaagni sa kalibotan—lakip na ang mga kalingawan, gahom, pagdayeg, salapi, ug kahalangdon niini—anaa diha kanunay. Karon, hinoon, daghang mga butang nga kanhi nagsuporta nawala na o dili na mosalir. Dugang pa, ang makadaot nga mga butang sa kalibotan gipasiugdahan sa mikaylap nga teknolohiya ug gipasikat sa panulsol sa media, potensyal nga moabot sa hapit matag panimalay ug pinuy-anan.”¹

Ug unsa man ang pipila niadtong “makadaot nga mga butang sa kalibotan”? Tan-awa ang palibot. Ang sobrang pagdayeg sa sikat nga mga artista, paghigugma sa materyal nga mga butang, paghunahuna sa kaugalingon lamang, ug ubang mga elemento sa unsay sikat—dili nindot, dili maayo—makahulga sa atong espirituhanong kasensitibo sa matag higayon nga atong ablihan ang telebisyon, mopahigayon og pagpangita gamit ang internet, o mogawas sa pultahan.

Gitawag kita aron ipalayo ang atong kaugalingon gikan sa pagkadaotan (tan-awa sa Alma 5:57) ug mahimong espirituhanon nga igpapatubo sa pan ngadto sa kalibotan nga dili mahimong sama og lebel sa espirituhanong paagi sa kalibotan.

“Kon ang mga tawo moingon nato, ‘dili mo sama namo,’ motubag kita og ‘kahibalo mi; dili pod mi gusto,’” miingon si Presidente John Taylor (1808–87). “Gusto kita nga mahisama sa Ginoo, gusto kita nga maangkon ang Iyang pabor ug pag-aprobar ug magpuyo sa paagi nga ikalipay Niya, ug moila, sama sa gihimo sa karaang Israel sa usa ka okasyon ‘Ang Ginoo mao ang among Dios, among maghuhukom ug among hari, ug Siya ang maghari kanamo.’”²

Pinaagi sa pagpadayag, ang Ginoo nagsugo kanato sa “pagsalikway sa mga butang niini nga kalib[o]tan, ug pangita[on] ang mga butang nga maayo” (Doktrina ug mga Pakigsaad 25:10). Adunay motabang nato niana nga buluhaton. Kay bisan kon nagpuyo kita sa makalibog, mabingkilon, ug puno sa kagubot nga kalibotan, tungod sa balaanong direksiyon, dili kita magkinahanglan nga “[m]agpuyo nga walay Dios diha sa kalib[o]tan” (Mosiah 27:31).

Ang Dalan Padulong sa Kasigurohan

opisyal nga litrato sa grupo sa Korum sa Napulog Duha ka Apostoles, 2018 — Uban sa awtoridad sa among apostolikanhong pangalagad, kami namahayag ngadto sa kalibotan nga ang gipahiuli nga Simbahan ni Jesukristo gipangulohan pinaagi sa propesiya, pagpanagna, ug pagpadayag.

Nakaserbisyo diha sa Korum sa Napulog Duha ka Apostoles sulod sa hapit tulo ka dekada, ako makapamatuod nga ang maalamong kalalakin-an nga nangulo sa Ang Simbahan ni Jesukristo sa mga Santos sa Ulahing mga Adlaw adunay dakong panabot bahin sa moral ug sosyal nga mga isyu nga labaw pa nianang bisan kinsa diha sa grupo sa intelihente nga mga tawo sa kalibotan. Ang among mga kinabuhi, mga pagbiyahe, ug kalapdon sa naagian mao ang nakahatag namo og panglantaw bahin sa kalibotan nga nasinati sa pipila lamang.

Kon among ubanan kana nga natigom nga kasinatian sa awtoridad sa among apostolikanhong pangalagad, kami makapamahayag ngadto sa kalibotan nga ang gipahiuli nga Simbahan ni Jesukristo gipangulohan pinaagi sa propesiya, pagpanagna, ug pagpadayag. Ang kahayag nga nagagikan nianang balaanong direksiyon mao ang mogiya sa moderno nga Israel latas sa espirituwal ug pisikal nga kakuyaw sa nagkangitngit nga kalibotan.

“Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o miingon nga ako walay lab[o]t, akong nahibaloan nga akong gibutang ang akong kaugalingon sa peligro,” miingon si Presidente Henry B. Eyring, Ikaduhang Magtatambag sa Unang Kapangulohan. “Sa matag higayon nga ako namati ngadto sa tambag sa mga propeta, gibati ang paghimatuod niini diha sa pag-ampo, ug dayon gisunod kini, akong namatng[o]nan nga ako nagpaingon ngadto sa kahilwasan.”³

Ang mga propeta walay mas labaw pa nga kabalaka kay sa paggiya sa mga anak sa Dios ngadto sa Manluluwas nga si Jesukristo, kinsa, sama sa Iyang gihimo alang sa andam ug masulundon sa karaang panahon, modala kanila ngadto sa gisaad nga yuta. Apan ang paglangay sa pagsunod sa propetikanhon nga tambag o ang pagsalikway niini mao ang pagbutang sa atong kaugalingon sa peligro.

Ang mga tawo gisugo na sa paghinulsol sa wala pa si Noe gisugo sa paghimo og arka. Ang mga anak sa Israel gisugo na sa paghinumdom sa ilang pakigsaad ni Jehova sa wala pa mokanaog si Moises sa Bukid sa Sinai ug gibuak ang mga bato nga gisulatan sa kasugoan. Ang mga tawo ni Samuel gisugo na sa pagsalikway sa ideya nga adunay usa ka hari sa wala pa si Samuel mopasidaan nila bahin sa ilang dili maalamon nga gipangayo.

Sa atong panahon, ang Ginoo miingon bahin sa Iyang dinihogan:

“Ikaw maminaw ngadto sa tanan niya nga pulong ug mga sugo diin siya mihatag nganha kanimo ingon nga siya nakadawat kanila, maglakaw sa tanan nga pagkabalaan diha sa akong atubangan;

“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpail[o]b ug hugot nga pagtuo” (Doktrina ug mga Pakigsaad 21:4–5).

Usa ka Propeta alang sa Atong Panahon

Si Presidente Russell M. Nelson ug uban pa nga mitimbaya sa mga Santos didto sa Hong Kong, China — Isip kabahin sa usa ka tour sa pangalagad sa walo ka nasod, si Presidente Nelson ug Elder Holland, uban sa ilang mga asawa, mitimbaya sa mga Santos didto sa Hong Kong, China, niadtong Abril 21, 2018.

Sama ni Samuel, ang mga propeta, mga manalagna, ug mga tigpadayag karon mao ang mga kalalakin-an nga puno sa kaalam, kadaghanan niini mahimong maangkon lamang sa pangidaron. Si Presidente Russell Marion Nelson kay 97. Samtang among girebyo ang iyang dinasig nga pagpangulo, walay pagduhaduha kita adunay usa ka propeta sa Israel. Ikonsiderar ang pipila lamang ka ehemplo sa iyang mahigugmaong tambag ug direksiyon:

Si Presidente Nelson nanawagan kanato “nga dugangan ang [atong] espirituhanong kapasidad sa pagdawat og pagpadayag,” nagpasidaan nga “dili na posible ang espirituhanong pagsugakod kon wala ang giya, direksiyon, makahupay, ug kanunay nga impluwensya sa Espiritu Santo.”⁴
Nangulo siya sa Simbahan sa pagpatuman sa “mas bag-o, mas balaan nga paagi sa pag-amuma ug pagpangalad sa uban.”⁵
Nangulo siya nato latas sa pandemya, nagtabang nato sa pagpahiangay sa “usa ka nakasentro sa panimalay nga Simbahan, gisuportahan sa unsa ang gipangbuhat sulod sa atong branch, ward, ug stake nga mga gambalay [building].”⁶
Gitutokan niya ang atong Dominggo nga pagsimba diha sa sakramento ug ang atong kinaiya sa Dominggo diha sa pagbalaan sa adlawng Igpapahulay.⁷
Giusbawan niya ang buhat sa templo, mipahibalo sa pagtukod og sobra sa 80 ka bag-ong mga templo sa ulahing mga adlaw.
Siya mihangyo nato sa “pagpahiuli sa saktong ngalan sa Simbahan sa Ginoo, Siya kansang Simbahan mao kini mobu-bu sa Iyang gah[o]m ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad.”⁸
Siya nangamuyo kanato sa “[pagsinati sa] makapalig-on nga gah[o]m sa matag adlaw nga paghinulsol––sa pagbuhat ug mahimong mas maayo matag adlaw.”⁹
Siya miawhag sa mga Santos sa “[Pag]paminaw Kaniya”, nga mao ang “sundanan alang sa kalamp[o]san, ug hingpit nga kalipay niini nga kinabuhi.”¹⁰
Siya mihatag og bicentennial nga pamahayag ngadto sa kalibotan, nga nagdapit sa tanan aron masayod “nga ang kalangitan bukas” ug “ang Dios mipahibalo sa Iyang kabubut-on alang sa Iyang pinalanggang mga anak nga lalaki ug mga anak nga babaye.”¹¹
Siya midapit sa mga Santos nga “hangupon ang umaab[o]t uban sa hugot nga pagtuo” diha ni Ginoong Jesukristo, sa “paggamit sa gahom sa Dios sa atong kinabuhi.”¹²

Si Presidente Nelson namahayag: “Ang mga propeta makakita sa unahan. Makakita sila sa makalilisang nga kakuyaw nga gibutang o ibutang sa kaaway diha sa atong dalan. Ang mga propeta makakita usab sa talagsaong mga posibilidad ug mga pribilehiyo nga naghulat niadtong maminaw uban ang tuyo sa pagsunod.”¹³

Ako mopamatuod nga si Presidente Nelson giordinahan nang daan nga mahimong “guwardiya [nga] nagbarog didto sa tore” (2 Mga Hari 9:17) alang sa atong panahon:

Usa ka propeta nga nanawagan kanato
Sa pagpatigbabaw sa Dios labaw sa tanan
Ug sa pagpundok sa Israel
Sa duha ka habig sa tabil.14

Atong awiton uban sa kadasig ang lanog nga himno nga “Israel, Israel, Dios Nagtawag.”¹⁵ Unta kita isip mga Santos sa Ulahing mga Adlaw motubag niana nga tawag sama sa gibuhat sa bata nga si Samuel sa iyang dalan paingon sa pagserbisyo diha sa iyang kahingkod isip propeta sa Dios: “Sulti, O Ginoo, kay mamati ang imong sulugoon” (1 Samuel 3:9; tan-awa usab sa bersikulo 10).