Ang Unang Sister nga mga Misyonaryo

Ang mosunod usa ka kinutlo gikan sa volume 3 sa Mga Santos: Ang Istorya sa Simbahan ni Jesukristo sa Ulahing mga Adlaw, nga gipagawas sa tingpamulak sa 2022.

Samtang ang iyang gisakyang bapor nagpadulong sa dunggoanan sa Liverpool, England, ang baynte-uno-anyos nga si Inez Knight nakakita sa iyang magulang nga lalaki nga si William diha sa pantalan, naghulat uban ang pundok sa kaubang mga misyonaryo. Abril 22, 1898 kadto. Si Inez ug ang iyang kompanyon, si Bernie Brimhall, mianha sa British Mission isip ang unang mga babaye nga dalaga nga gi-set apart isip “dalaga nga mga misyonaryo” alang sa Simbahan. Sama ni Will ug sa ubang mga elder, sila magsangyaw diha sa mga miting sa kadalanan ug mangadto og mga kabalayan, magsangyaw sa gipahiuli nga ebanghelyo ni Jesukristo.¹

Sa miaging mga dekada, Si Louisa Pratt, Susa Gates, ug ubang minyo nga mga babaye miserbisyo og malamposong mga misyon uban sa ilang mga bana, bisan og walay opisyal nga mga tawag sa misyon. Mga lider sa Relief Society ug Young Ladies Mutual Improvement Association [Kapunongan sa Batan-ong mga Babaye sa Pagtinabangay og Pagpalambo] [karon nailhan isip Young Women], labot pa, nahimong maayo nga mga embahador alang sa Simbahan diha sa mga dapit sama sa World Fair sa 1893. Ug daghang batan-on, dalaga ang nakaangkon og kasinatian sa pagtudlo ug paggiya sa mga miting sa YLMIA, sa pag-andam kanila sa pagsangyaw sa pulong sa Dios.²

Human mahiusa ni Will, si Inez mikuyog kaniya ug ni Jennie ngadto sa mga punoang buhatan sa misyon, usa ka upat ka andana nga gambalay nga gi-okupar sa mga Santos sukad sa mga 1850. Didto ilang gikahimamat si Presidente McMurin. “Gusto ko nga ang matag usa kaninyo makasabot nga kamo gitawag dinhi sa Ginoo,” mingon siya. Samtang siya nagsulti, gibati ni Inez sa unang higayon ang dakong responsibilidad nga iyang gipas-an.³

Sa sunod nga adlaw, siya ug si Jennie miuban ni Presidente McMurrin ug sa ubang mga misyonaryo ngadto sa Oldham, usa ka pabrika nga lungsod silangan sa Liverpool. Sa pagkagabii, nagliyok sila sa usa ka nagkapuliki nga eskina sa dalan, mihalad og pag-ampo, ug miawit og mga himno hangtod usa ka dakong pundok sa mga tawo milibot kanila. Mi-anunsyo si Presidente McMurrin nga usa ka espesyal nga miting pagahimoon sa sunod nga adlaw, ug iyang gidapit ang tanan sa pag-anha ug pagpaminaw sa sangyaw gikan sa “tinuod nga buhi nga mga babayeng Mormon.”

Samtang misulti siya niini, usa ka luya nga pagbati misuot ni Inez. Gikuyawan siya mahitungod sa pagpamulong ngadto sa dakong pundok sa katawhan. Sa gihapon, samtang mitindog siya uban sa mga misyonaryo nga nanagkalo og seda ug itom nga trahe, wala siya sukad nahimo nga mas mapagarbohon nga nahimong usa ka Santos sa Ulahing mga Adlaw.⁴

Sa sunod nga gabii, nangurog si Inez samtang gihulat niya ang iyang turno sa pagpamulong. Nakadungog og grabeng mga bakak mahitungod sa mga babaye nga Santos sa Ulahing mga Adlaw, nakuryoso ang mga tawo mahitungod kaniya ug sa ubang mga babaye nga namulong diha sa miting. Si Sarah Noall ug si Caroline Smith, ang asawa ug bayaw nga babaye sa usa sa mga misyonaryo, namulong og una sa kongregasyon. Dayon namulong si Inez, bisan pa sa iyang kahadlok, ug natingala sa iyang kaugalingon unsa niya ka maayo nga namulong.

Si Inez ug si Jennie natudlo dayon sa pagtrabaho sa Cheltenham. Miadto sila og mga balay ug kanunay mipamatuod sa mga miting diha sa kadalanan. Midawat usab sila og mga imbitasyon sa pakigkita og mga tawo sa ilang mga panimalay. Ang mga tigpaminaw kasagaran mitagad kanila og maayo, bisan tuod og usahay usa ka tawo mobiaybiay kanila o mopasangil kanila nga namakak.

Milaom si Inez ug Jennie nga makakita og daghan pang mga babaye nga magserbisyo sa misyon. “Gibati namo nga ang Ginoo nagpanalangin kanamo sa among mga paninguha sa paghupay sa daotang mga hunahuna ug pagsangyaw sa kamatuoran,” mireport sila ngadto sa mga lider sa misyon. “Nagsalig kami nga daghan sa takos nga batan-ong mga babaye sa Zion pagatugotan sa pagpahimulos sa samang pribilehiyo nga kami karon aduna, kay nagtuo kami nga sila daghan nga mahimo.”⁵