Mga Young Adult
Kaligdong: Labaw Pa Kini Kay sa Sininaan
Mas gitutokan og maayo ang kaligdong sa gawas nga panagway. Apan unsa man ang kaligdong sa sulod?
Daghan kanato ang nagdako nga nagkat-on mahitungod sa kaligdong diha sa Simbahan. Ug klaro kini kon ngano—nga ang kaligdong importante nga baroganan sa ebanghelyo nga makatabang nato sa pagdumala sa atong kaugalingong mga hunahuna ug mga binuhatan ingon man usab kon unsaon nato pagpresentar ang atong kaugalingon. Sa pagkat-on kon unsaon sa pagpatuhop ug pagtuman niini ug sa may kalabotan nga mga baroganan, kita mahimong mas mahisama sa atong Manluluwas.
Nagdako, kita tingali gitudloan nga ang kaligdong mahitungod lamang sa gawas nga panagway. Ang mga pagtulon-an mahitungod sa kaligdong tingali nagtutok lang diha sa sininaan nga hilabihan ka mapahayagon o ubang mga aspeto sa pagpresentar sa atong kaugalingon nga nanobra na, sama sa mga tusok, mga tattoo, mga estilo sa buhok, o kinatibuk-ang paggalam sa kaugalingon. Apan ang kaligdong dili lang mahitungod sa sininaan o unsay anaa sa gawas nga panagway—naglakip usab kini og unsay anaa sa sulod.
Ang kaligdong nangahulogan nga “usa ka kinaiya sa pagkamapainubsanon ug pagkadesente sa sininaan, pamustura, pinulongan, ug pamatasan. Kon ikaw maligdong, dili ka magpatagad nga dili angay nganha sa imong kaugalingon. Hinoon, magtinguha ka sa ‘paghimaya sa Dios diha sa inyong lawas, ug sa inyong espiritu’ (1 Mga Taga-Corinto 6:20; tan-awa usab sa bersikulo 19).”1
Kon kita nakasabot ug nagtuman niining mas kompleto nga kahulogan, uban sa kinaiya nga magtinguha sa paghimaya sa Dios, ang kaligdong mahimong usa ka butang nga mahimo natong magamit nga sukdanan sa tanan natong binuhatan batok sa—dili lang sa unsay atong pilion nga isul-ob.
Atong Kinahiladman nga Pasalig
Si Sister Elaine S. Dalton, kanhi Kinatibuk-ang Presidente sa Young Women, mitudlo: “Ang kaligdong mas labaw pa gayod sa gawas nga panagway. Usa kini ka kahimtang sa kasingkasing. Usa kini ka pagpakita sa gawas sa kinahiladmang kahibalo ug pasalig. Usa kini ka pagpahayag nga kita nakasabot sa atong kailhanan isip [mga anak] sa Dios. Usa kini ka pagpahayag nga kita nasayod sa unsay Iyang gilaoman nga atong buhaton. Usa kini ka pamahayag sa atong pagtuman sa pakigsaad.”2
Busa kon ang ligdong nga sininaan mao ang gawas nga pagpahayag sa atong kinahiladman nga pasalig nga magpuyo sa ligdong nga paagi, nan unsaon man nato sa pagpalambo kanang kinahiladman nga pasalig?
Una, mahimo natong palawman ang atong pagsabot kon kinsa kita, unsa ang kahulogan ngari nato sa atong mga pakigsaad, ug ang kasagrado sa atong mga lawas. Ug mahimo natong isilsil sa atong hunahuna ang tinuod nga mga hinungdan sa pagpili sa ligdong nga sininaan. Magpuyo sa paagi nga gusto sa Dios kanato.
Mahimo natong sugdan pinaagi sa pagpangutana sa atong kaugalingon, “Komportable ba kaha ang akong pamati sa akong panagway kon anaa pa ako sa atubangan sa Ginoo?” Ingon man, mahimo natong ikonsiderar ang mga butang sama sa atong pinulongan ug pamatasan: “Mahimo kang mangutana sa imong kaugalingon … : ‘Ako bang isulti kining mga pulonga o moapil niini nga mga kalihokan kon ania pa ang Ginoo?’ Ang imong matinuoron nga mga tubag niining mga pangutana modala kanimo sa paghimo og importante nga mga kausaban sa imong kinabuhi.”3
Si Sister Carol F. McConkie, kanhi Unang Magtatambag sa Kinatibuk-ang Kapangulohan sa Young Women, mitudlo:
“Ang kaligdong sa pagsinina, panagway, hunahuna, ug pamatasan mao ang indibidwal, personal nga pagsaksi ngadto sa Ginoo nga kita mitahod Niya ug kita ‘nahimuot’ sa mga pakigsaad nga atong gihimo diha sa sagrado nga mga ordinansa sa pagkapari. …
“Ang inadlaw nga mga pagpili nga atong gihimo mahitungod sa sinina nga atong isul-ob, sa mga pulong nga atong isulti, sa mga hunahuna nga atong hunahunaon, sa mga imahe nga atong tan-awon, sa musika nga atong tugotan nga mosulod sa atong panimalay, ug sa media nga atong tugotan nga mosulod sa atong mga hunahuna ug mga kasingkasing, ug sa atong pamatasan diha sa publiko ug sa pribado—tanan niini—mopakita kon giunsa gayod nato pagtahod kana nga pakigsaad.”4
Hilabihan ang atong pagtutok sa usa ka aspeto sa kaligdong nga dili na gani kita makakonsiderar kon dili ba kita ligdong sa laing mga paagi. Agi og dugang ngadto sa paagi sa atong sininaan, unsay atong gitan-aw, gibasa, gipaminaw, o giistorya o gikomedya uban sa atong mga higala? Mahimong ligdong ka sa gawas apan dili ligdong sa kahiladman.
Adunay mga pamatasan nga tingali wala nato maamgohi nga wala mahisubay sa baroganan sa kaligdong, lakip na ang pagpanglibak, pagpanghukom o dili pagpaapil sa uban, pagkamagarbohon o pagpanghambog, pagpamalikas o paggamit og bastos nga pinulongan, paglihok nga walay paghunahuna o dili angay diha sa publiko, ug pagkamasinahon. Kini nga mga kinaiya ug pamatasan nakalapas sa mga sugo gawas sa kaligdong, sama sa sugo nga higugmaon ang imong silingan ug ayaw paghukom. Apan nagpakita usab kini og kakulang sa kamapaubsanon, kaaghop, ug koneksiyon ngadto sa Dios—tanan niini konektado sa kaligdong.
Ang kinahiladman nga kaligdong tingali usa ka bag-ong konsepto ngari nato, apan makahimo kita sa pag-usab sa atong panghunahuna ug makakita og sugod sa katuyoan nga ang Langitnong Amahan naghangyo kanato nga magmaligdong sa tanang butang. Gusto niya nga kita motutok sa mga butang nga atong mahimo aron molambo sa espirituhanong paagi, moserbisyo sa uban, mabinationg molihok, ug magbaton og putli nga hunahuna. Gusto niya nga gamiton nato ang atong mga lawas dili isip mga dayandayan apan isip mga instrumento diha sa Iyang mga kamot.5
Sa Unsang Paagi nga Kita Makatudlo og Kaligdong
Gamit niining mas kompleto nga pagsabot bahin sa unsay gilangkoban sa kaligdong, mas makatudlo kita niini nga baroganan ngadto sa uban.
Makatudlo kita nga ang kaligdong mao ang mahitungod sa kinahiladman nga pasalig ngadto ni Jesukristo ug makatabang sa uban nga masabtan kon unsaon sa pagpalambo niana nga matang sa pasalig.
Makapasabot kita nga ang kaligdong kinahanglang dili mopabati nato og kaulaw mahitungod sa atong lawas. Ang kaligdong dili mahitungod sa pagtabon sa atong lawas tungod kay bati kini tan-awon—gani, sukwahi gayod niini. Si Elder Robert D. Hales (1932–2017) sa Korum sa Napulog Duha ka Apostoles mitudlo, “Kon kita moila sa atong mga lawas isip mga gasa kon unsa gay[o]d kini ug kon kita makasab[o]t sa mga misyon nga kini makatabang kanato aron matuman, ato kining protektahan ug tahuron pinaagi sa linihokan ug sininaan.”6
Makasiguro kita nga ang kaligdong parehong gitudlo ngadto sa mga batang lalaki ug mga batang babaye, kalalakin-an ug kababayen-an. Ug makapaambit kita sa kamatuoran nga kita adunay kabubut-on “sa pagbuhat … ug nga dili pagaaghaton” (2 Nephi 2:26)—busa kon kita gilibotan sa dili maligdong sa kalibotan, kita adunay gahom sa paggamit sa pagkontrolar sa kaugalingon ug pagsalikway sa dili maayong mga hunahuna. Apan makabaton usab kita og kalooy alang sa uban ug buhaton kutob sa atong mahimo sa pagtabang sa usag usa nga ang atong mga hunahuna ug mga binuhatan nahisubay sa unsay gihangyo sa Dios kanato.
Sa kataposan, makatudlo kita nga ang kaligdong kinahanglang dili gamiton isip himan sa paghukom batok sa uban. Kinahanglang atong unahon ang paghigugma, pag-abiabi, ug pagdawat sa uban kay sa pagpabati sa usa ka tawo og dili maayo tungod sa paagi sa ilang sininaan. Kon himoon nato kining tumong nga unahon ang pagtabang sa uban nga makasabot sa ilang balaanong bili ug kailhanan, natural lang nga magsugod sila paghiusa sa mga baroganan sa kaligdong nganha sa ilang kinabuhi—sa kinahiladman ug sa gawas.
Paghimaya sa Dios
Kon kita motutok sa pagkaligdong diha sa kinahiladman, mas mabati nato ang impluwensya sa Espiritu Santo sa atong kinabuhi. Si Elder Hales mitudlo, “Ang pagkatar[o]ng og sininaan mao ang pagkamapainubsanon, ug ang pagkamapainubsanon nagdapit sa Espiritu nga atong makauban.”7 Ang Espiritu makagiya nato aron masayod kon unsay angayng isul-ob, unsay angayng isulti, ug unsay angayng buhaton aron magpabiling ligdong sa tanang paagi.
Ang kasulatan nagtudlo nato nga kita “maoy usa ka kaliwatan nga pinili, ang kahugpungan sa harianong pagkapari [sacerdote], ang nasod nga balaan, ang katawhan nga iyang kaugalingon sa Dios, aron [kita] magamantala sa kahibulongang mga buhat niya nga nagtawag [kanato] gikan sa kangitngit ngadto sa iyang katingalahang kahayag” (1 Pedro 2:9). Kita naghimaya sa Dios diha sa kaligdong sa atong mga binuhatan ug panagway. Dili lang kini mahitungod sa atong sininaan; mahitungod usab kini kon giunsa nato sa pagrepresentar sa buhat nga kita gitawag aron buhaton.
Siyempre, si Jesukristo mao ang atong hingpit nga ehemplo sa pagkamaaghop ug kaligdong sa tanang aspeto sa kinabuhi. Siya kanunay nga motudlo ngadto sa Iyang Amahan isip mao ang tinubdan sa Iyang gahom, dili ang Iyang kaugalingon. Gihimaya Niya ang Dios diha sa tanan Niya nga gibuhat ug sa tanan Kaniya. Ug kana mao gayod ang kahulogan sa kaligdong.