“Pagdali og Adto sa Templo,” Liahona, Hunyo 2022.
Mga Tingog sa mga Santos sa Ulahing mga Adlaw
Pagdali og Adto sa Templo
Unsaon nato nga makasugakod sa gasto sa pag-adto sa templo kon igo ra gani kitang makakaon?
Litrato sa São Paulo Brazil Temple ni Matthew Reier
Samtang nagserbisyo ko isip usa ka bishop, ang among presidente sa stake mihangyo sa mga bishop sa among stake nga magpakita og ehemplo alang sa mga miyembro sa ilang ward pinaagi sa pagsakripisyo aron masilyo sa templo. Niadtong higayona, ang Bolivia nagsinati og grabe nga krisis sa ekonomiya. Tungod sa sobrang pagsaka sa presyo, ang mga palitonon lahi og presyo inigka buntag ug dayon motaas ang presyo inigka hapon.
“Unsaon nato nga makasugakod sa gasto sa pag-adto sa templo kon igo ra gani kitang makakaon?” Akong gipangutana ang akong asawa, si Alicia.
“Wa ko kahibalo,” mitubag siya, “apan ang saad sa Ginoo mao nga Siya mosangkap” (tan-awa sa Doktrina ug mga Pakigsaad 118:3).
Bisan pa sa among pinansiyal nga sitwasyon, pareho kaming mibati sa dinalian nga panginahanglan sa pag-adto sa templo. Mao kadto nga daw ang Espiritu nagsulti kanamo nga, “Pagdali, pagdali!”
Pagka Disyembre 1981, ang São Paulo Brazil Temple—dul-an sa 2,000 ka milya (3,220 km. ) ang gilay-on—mao lang ang templo sa South America. Aron makabayad sa tibuok semana nga biyahe, nangutang ko og $1,000. Dako kaayo kadto nga kwarta, apan nasayod mi nga ang sakripisyo dili makawang.
Human sa taas nga biyahe sa bus ngadto sa utlanan sa Brazil, misakay mi og tren padulong sa São Paulo. Ang tren wala nay bakante nga lingkoranan, busa milingkod mi sa agianan uban sa among duha ka gagmay nga mga anak. Nagkulang mi sa pagkaon, apan ang mga tawo nga dili namo kaila nakigbahin kanamo. Dihang miabot mi sa São Paulo, ang among gamay nga anak nga lalaki hapit mawala didto sa metro [andergrawon [underground] nga agianan sa tren].
Human niini ug sa uban pang mga hagit, sa kataposan miabot mi sa estasyonan sa metro nga duol sa templo. Sa among paggawas, nakita namo sa layo ang estatuwa ni anghel Moroni ibabaw sa templo. Miluhod mi ug nagpasalamat sa Langitnong Amahan. Dihang miabot mi pipila ka minutos ang milabay, ang presidente sa templo mahigugmaon nga mihangop namo.
Sayo sa sunod nga adlaw nadawat namo ang among mga ordinansa ug nasilyo isip managtiayon ug pamilya. Nianang pagkagabii, sa wala namo mahibaloi daan nga hitabo, ang templo gisirado hangtod mahuman ang tuig alang sa pagmentinar.
Kon naglangan mi sa pag-adto sa templo, ang among biyahe mas dako unta og gasto kay sa among gihulam. Kon miabot mi sa sunod nga semana, ang templo masirado na unta. Mapasalamaton mi nga ang Ginoo midasig namo sa pagdali og adto sa templo.