Ol Tempol: Wan Perel we I Gat Bigfala Praes

Pikja

Brigham Siti Yuta Tempol

Foto blong Brigham Siti Yuta Tempol

I wan naesfala blesing blong luk oli bildim hariap ol tempol raon long wol. Wetem ol memba blong Jos, yumi glad taem oli dediketem ol niu tempol long eria blong olgeta.

Yumi hop se ol pipol bae oli kam blong laekem moa tempol, mo no foldaon long ol mistek we Presiden Boyd K. Packer (1924–2015) i tokbaot , Presiden blong Kworom blong Olgeta Twelef Aposol. Long parabol blong perel mo bokis, hem i tokbaot wan man we i wok long wud i mekem wan naes bokis blong soem wan perel we i nambawan. Taem ol pipol oli kam blong luk perel ia, be, oli laekem bokis ia. (Luk longThe Cloven Tongues of Fire,” Liahona, July 2000, 7.)

Yes, perel we i gat bigfala praes insaed long tempol, i gat ol odinens, ol kavenan, mo ol promes blesing we yumi save kasem insaed long tempol nomo. Olsem we Elda David A. Bednar blong Kworom blong Olgeta Twelef Aposol i tijim long namba ia: “Evri samting we oli lanem mo oli mekem long ol lata-dei tempol i soem bigfala plan ia blong stap glad blong Papa long Heven, olsem wanem Jisas Kraes i tabu, mo rol blong Hem olsem Sevya blong yumi. Ol kavenan we oli kasem mo ol odinens we oli mekem insaed long ol tempol, oli stamba blong mekem hat blong yumi i kam klin evriwan, mo tu, blong ol boe mo gel blong God oli kam olsem wan god” (pej 6).

Taem yu ridim stori blong Elda Bednar, mifala i invaetem yu blong tingbaot ol kavenan we yu bin mekem insaed long tempol. Sapos hem i longtaem we yu no bin go insaed long tempol, mifala i invaetem yu blong gobak bakegen mo filim glad mo pis we oli faenem insaed long tempol. Sapos yu no go insaed yet long tempol, mifala i invaetem yu blong rere long yuwan blong “kasem paoa we i kam long heven” (Doktrin mo Ol Kavenan 38: 32).

Elda Kevin R. Duncan

Blong Olgeta Seventi

Eksekutiv Daerekta blong Tempol Dipatmen