“Ol Tempol Odinens: Rere blong Gobak mo Stap Wetem God” Liahona, Julae/Ogis 2022.
Ol Tempol Odinens: Rere blong Gobak mo Stap Wetem God.
Mi invaetem yu blong yu tingting strong blong lanem mo glad long hamas ol tempol kavenan,, ol tempol odinens, mo ol tempol wosip oli impoten mo no save finis; bae yu lanem hemia taem yu stap traehad blong go long Sevya.
Foto blong ples blong Mesa Arisona Tempol open haos, i kam long Lesli Nilson
Wok mo glori blong Hem i blong “blong mekem man i nomo save ded mo i kasem laef we i no save finis” (Moses 1:39)—blong rere long yumi blong laef long “wan hae mo tabu wei,”1 mekem se bae yumi save mekem blong gobak mo stap wetem Hem.
Long sore blong Hem we i no save finis mo i bigwan tumas, Lod, tru long ol profet mo ol aposol blong Hem, Hem i gohed blong invaetem ol pikinini boe mo gel blong Hem blong oli rere from kaming blong Hem mo kam ol pipol blong Saeon—we oli rere blong kam antap blong mitim Hem (luk long Alma 12:24; 34:32; Doktrin mo Ol Kavenan 45:45; 65:5; 88:96–97). Mo oltaem, long stamba blong fasin blong stap rere long Seken Kaming blong Hem, hem i blong lanem doktrin blong Kraes, stap praktisim fet long Hem, stap sakem sin, mo stap kasem ol tabu kavenan mo ol odinens.
Ol eksampol, insaed long OlTesteman, blong ol invitesen we God i givim i go long ol pikinini blong Hem blong oli rere blong oli laef long wan loa we i moa hae, mo blong oli kasem ol kavenan mo ol odinens blong sevem man, oli tijim yumi plante tedei.
Insaed long Eksodas, God i leftemap tingting blong Isrel blong kam “nambawan man blong mi” mo blong mekem olgeta oli kam tabu blong rere blong mitim Hem ( luk long Eksodas 19:4–6, 10–11, 17). Jehova i givim Isrel “tu flat ston, mo wan loa, mo ol komanmen” (Eksodas 24:12), mo oli mekem kavenan wetem God, oli talem: “Bambae mifala i mekem olgeta samting we Hae God i talem” (Eksodas 19;8; luk tu long 24:3). Lod i komandem ol pikinini blong Isrel blong bildim wan tabenakol mekem se Hem i save stastap long medel blong olgeta (luk long Eksodas 29:45– 45). Be, taem we Isrel i witnesem “bigfala laet ia we i saen we i soemaot Hae God i stap”(Eksodas 24:16) antap long hil blong Saenae, oli fraet, oli stanap longwe, mo afta, oli go agensem God (luk long Eksodas 20:18–21; 32:1–6).
Seken eksampol long OlTesteman hem i King Solomon we i bildim wan haos blong Lod (luk long 1 King 6:11–13). Ak blong kavenan mo ol nara tabu samting oli putum insaed long “Rum ya we i Tabu we i Tabu” (1 King 8:6), mo “saen we i soemaot we Hae God i stap … i fulumap haos ya” (1 King 8:11). Solomon i mekem wan prea blong dedikesen mo askem blesing long saed bodi mo spirit blong ol man blong Isrel we oli sakem sin mo stap prea. Lod i harem ol strong prea blong olgeta mo promesem Isrel ol bigfala blesing sapos oli stap obei. Be, Laen blong Isrel i fogetem Lod mo wosipim ol giaman god. (Luk long 1 King 9–11.)
Ol narafala profet insaed long OlTesteman oli bin strong blong wantem tijim Isrel mo mekem Isrel i kam tabu blong mekem se “oli save luk fes blong God, be oli bin mekem hat blong olgeta i kam strong mo oli no bin save stanap long fes blong hem” (Doktrin mo Ol Kavenan 84:23–24).
Be plante plante taem, ol pikinini blong Isrel, oli bin gohed blong no biliv, stap fraet, no wantem jenis; oli wantem rod we i moa isi; oli putum hat blong olgeta long ol samting blong wol; oli wantem go agensem Lod mo ol profet blong Hem. Evri taem we Isrel i tanem baksaed blong olgeta long God mo lego ol kavenan mo ol odinens blong olgeta, nao “from bigfala kros blong [Lod]i bin girap agensem olgeta” (Doktrin mo Ol Kavenan 84:24), mo oli no save kasem ful glori blong Hem.
Stamba Tabu Tingting blong Isrel I Kam Tugeta
Efot blong Lod blong karem ol pipol blong Hem oli kam tugeta mo blesem olgeta tru long ol tempol kavenan mo ol odinens, oli tokbaot insaed long Niu Testeman mo Buk blong Momon. Sevya i krae strong: “!Plante taem mi wantem putum han blong mi i goraon long yufala, olsem we faol i pulum ol pikinini blong hem oli kam haed andanit long wing blong hem, be yufala i no glad!” (Matiu 23:37; luk tu long 3 Nifae 10:4–6).
Profet Josef Smit i tijim: “?Wanem stamba tingting blong kam tugeta … blong ol pipol blong God long eni taem blong wol ia? … Stamba tingting i blong bildim wan haos long Lod, wan ples we Hem i save talemaot long ol pipol, ol odinens blong haos blong Hem, mo ol glori blong kingdom blong Hem, mo tijim ol pipol wei ia blong fasin blong sevem man… from se … bae oli kasem ol revelesen long heven, mo kam klin evriwan long ol samting blong kingdom blong God—be oli no wantem.”2
Lod i wantem blong karembak ol pikinini blong Hem long dispensesen ia mo i soemaot “ol samting we [hem i] bin holem i haed i stap stat long stat blong wol … evri samting long saed blong haos ia, mo prishud blong hem” (Doktrin mo Ol Kavenan 124:41–42). Hem i leftemap tingting blong yumi wanwan blong gobak mo stap wetem Hem—tru long bigfala sakrifaes blong Hem: “Luk, hemia i tingting blong mi, se olgeta evriwan we oli singaotem nem blong mi, mo oli wosipim mi folem gospel blong mi we i no gat en, bambae mi mekem oli kam tugeta wanples, mo bae oli stanap long ol tabu ples” (Doktrin mo Ol Kavenan 101:22).
?From Wanem Ol Tempol Odinens Oli Impoten Tumas?
Ol tempol oli ol tabu ples blong wosip. “Evri samting we oli lanem mo oli mekem long ol lata-dei tempol i soem bigfala plan ia blong stap glad blong Papa long Heven, olsem wanem Jisas Kraes i tabu, mo rol blong Hem olsem Sevya blong yumi. Ol kavenan we oli kasem, mo ol odinens we oli mekem insaed long ol tempol, oli wan mas blong mekem hat blong yumi i kam tabu, mo tu, blong ol boe mo gel blong God oli kam olsem wan god.
“Prishud we i moa hae i lukaotem gospel, mo i holem ki blong ol sikret blong kingdom, we i ki blong kasem save long saed blong God.
“Taswe, insaed long ol odinens blong hem, i gat paoa we i olsem hemia blong God i kamaot.
“Mo sapos i no gat ol odinens blong prishud ia, mo atoriti blong prishud, paoa we i olsem hemia blong God i no kamaot long man taem oli gat bodi blong mit mo bun” (Doktrin mo Ol Kavenan 84:19–21).
Ol tabu odinens we man i kasem we hem i klin inaf, mo i tingbaot olgeta oltaem, i openem ol rod we oli kam long heven we i mekem se paoa olsem hemia blong God i save kam insaed long laef blong yumi. Taem yumi kasem ol prishud odinens mo mekem mo kipim ol tabu kavenan, yumi wok wetem Sevya ( luk long Matiu 11:28–30)3 mo kasem blesing blong gat moa paoa bitim paoa blong yumi, blong save winim ol temtesen mo ol jalenj long wol ia taem yumi stap rere blong gobak mo stap wetem God.
Ol Blesing blong Ol Kavenan mo Ol Odinens blong Tempol
Pikja blong Kraes mo Yangfala Pikinini, i kam long Carl Bloch
Tufala impoten blesing we yumi kasem long ol tempol kavenan mo odinens, oli, wan glad we i stap kam bigwan moa oltaem, mo blong gat moa paoa.
Ridima i stamba mo wan wei ia nomo blong kasem glad ia we i stastap oltaem. Tru glad i kam taem yumi stap praktisim fet long Lod Jisas Kraes, stap klin inaf blong kasem ol tabu kavenan mo odinens, mo stap fetful blong ona long olgeta, mo traehad blong jenisim laef fulwan i kam long Sevya mo ol stamba wok blong Hem.
Alma i tijim pikinini boe blong hem se bigfala tabu fasin mo glad long laef blong yumi, i kam posibol taem yumi kam klin mo taem yumi kam tabu tru long Atonmen blong Jisas Kraes. Taem nomo yumi gat fet long Ridima blong yumi, stap sakem sin, mo stap kipim ol kavenan nomo, bae yumi save klemem glad ia we i stap we i stap we yumi wantem tumas mo holemtaet.4
Plis tekem not long promes blong glad we i kam long Presiden Russell M. Nelson: “Mifala i stap invaetem evriwan long ol pikinini blong God, long tugeta saed blong vel, blong kam long Sevya blong olgeta, blong kasem ol blesing blong tabu tempol, gat wan glad we i gogohed blong stap, mo kwalifae from laef we i no save finis.”5
Long taem blong yumi, taem ol paoa blong tudak “oli spolem pis blong yumi,”6 paoa blong protektem wanwan long yumi i stap long wanwan long yumi insaed mo tru long ol tempol kavenan mo ol odinens (luk long Doktrin mo Ol Kavenan 38:32; 43:16; 76:39–42; 105:11–12, 33; 138:12–15). Nifae i luk long wan visen mo i “bin luk paoa blong Pikinini blong God, se i kam daon … long ol kavenan pipol blong Lod, … mo olgeta i gat gud mo stret fasin mo paoa blong God long bigfala glori” (1 Nifae 14: 14).
Long prea blong dedikesen blong Ketlan Tempol, Profet Josef Smit i krae long Papa se “ol wokman blong yu oli save aot long haos ia we oli fulap wetem paoa blong yu” mo “ Blong eni grup blong fasin nogud i no gat paoa… girap mo winim ol pipol blong yu, we nem blong yu i stap long olgeta insaed long haos ia” (Doktrin mo Ol Kavenan 109:22, 26).
Wan Laet blong Glori—Ketlan Tempol, i kam long Glen S. Hopkinson, oli no mas mekem kopi
Wanwan long yumi i traehad blong lan mo kam blong andastanem moa gud abaot paoa blong proteksen blong ol kavenan we oli stap insaed long haos blong Lod—mekem se, yumi, olsem ol disaepol, bae yumi save “stanap long ol tabu ples, mo … no muv” (Doktrin mo Ol Kavenan 45:32) mo “[yumi] save faet [agensem ol enemi taem dei blong faet long Setan i kam” (Efesas 6:13).
Invitesen mo Testemoni
Mi invaetem yu blong wok strong blong lanem mo stap glad from hamas i impoten blong gat ol tempol kavenan ia we oli no save finis, ol tempol odinens, mo gat tempol wosip taem yu stap traem blong go long Sevya mo kasem ol blesing we oli posibol blong kasem tru long Atonmen blong Hem. Mi testifae wetem glad, se God we i Papa mo Pikinini blong Hem, Jisas Kraes, Tufala i stap laef mo stamba tingting blong Tufala i blong yumi gobak mo stap wetem Tufala mo tekpat long glori blong Tufala (luk long Doktrin mo Ol Kavenan 97:16; 101:38).