“Wetem Help blong Lod we I Lidim Yumi,” Liahona, Julae/Ogis. 2022.
Ol Voes blong Ol Lata–dei Sent
Wetem Help blong Lod we I Lidim Yumi
Long medel blong wan tes, mi lanem se mi save mekem ol had samting.
Pikja droing i kam long Stephanie Hock
Olsem wan nes blong stikim ol sikman o givim gas blong mekem bodi i ded long YS Nevi Risev long KOVID-19 wol sik, oli bin muvumaot mo asaenem mi i go long imejensi fil hospital long Jacob K Javits Konvenson Senta long Niu Yok Siti, blong givim fasfala kea long wan taem we KOVID-19 i kam bigwan long siti.
Taem mi statem ol diuti blong mi, i gat plante tingting i bin fulumap maen blong mi. Mi bin wari bigwan long kea blong ol sikman mo blong faet agensem bigfala sik ia.
Mi bin filim olsem Nifae, we “Spirit i lidim mi, we mi no save yet wanem samting bae hem i mas mekem” (1 Nifae 4:6). Tingting ia i bin helpem mi blong trastem Papa long Heven mo prea plante blong mi save harem voes blong Hem, folem ol instraksen blong Hem, mo givim nambawan kea we mi save givim i go long ol sikman blong mi.
Long fasfala naet blong mi blong givim kea, wan sikman i bin admit from nogud kondisen. Taem olgeta we mifala i wok tugeta i stat blong skelem kondisen blong hem, mi faenemaot se hem i save toktok long Spanis nomo. Mi wan nomo mi toktok Spanis from we mi bin lanem taem mi bin stap long misin blong mi long Venesuela.
Taem mi stat blong toktok long sikman ia, hem i bin askem sapos evri samting hem i oraet. Wetem tras, mi talem long hem se hem i stap risivim bes kea we i posibol. Mi filim save strong tras mo kamfot long ae blong hem. Truaot long naet, mi gohed blong visitim bed saed blong hem blong mekem asesmen mo givim ol apdeit. Afta sam moa dei, kondisen blong hem i kam gud bigwan mo hem i bin aot.
Truaot long wok blong mi, mi bin mitim plante moa sikman we oli toktok long Spanis. Skil ya blong save toktok long olgeta i helpem olgeta blong filim gud, mo filim kwaet long taem we oli stap kam oraet.
Taem mi tingbaot eksperiens ia blong lukaotem heven blong i lidim mi blong givhan long ol sikman wetem bes kea, mi tingbaot kaonsel blong Elda Brook P. Hales blong Olgeta Seventi. Hem i se Papa long Heven i stap “long ol ditel blong laef blong yumi” mo “yumi gat raet long wan smol reva blong help blong heven we i kam help tru long paoa mo insperesen blong Tabu Spirit.”1
Mi kam blong save se skil blong mi blong toktok Spanis hem i impoten semmak olsem medikol save blong mi. Taem mi givim kea long ol narawan, mi kasem wan klia lukluk se long medel blong hadtaem mo wetem help blong Lod blong lidim mi, mi save mekem ol had samting.