Lod i Kipim Ol Promes blong Hem

I Kam long Jose Luis Scotland Palomino, Esmeraldas, Ekuado

Blong mi mo famli blong mi, ol blesing blong Lod oli kam afta we mi stap obei.

Pikja

ol drop blong oel oli foldaon i go insaed long bol

Tu manis afta we oli singaotem mi olsem kaonsela long Stek Presidensi, mi lusum wok blong mi. Mi wari abaot hao bambae mi lukluk long nid blong waef mo tufala pikinini blong mitufala.

Taem mi stap lukaot wan niu wok, mi komitim miwan long koling blong mi, we i givim plante janis blong givim seves long ol brata mo sista blong mi. I mekem se mi kam bisi long koling blong mi mekem se waef blong mi i stat blong gat tingting se sapos i gat wan narawan long stek we i save helpem mi wetem sam long ol wok we oli bin givim long mi.

Long wan naet we i ren, jes bifo famli haos naet, fon i ring. Wan olfala brata we i sik bigwan long stek i nidim wan blesing, mo oli askem blong mi go luk hem. Kwiktaem. mi mekem arenjmen blong wan fren i folem mi.

Taem mitufala i kasem hem, mi bin luksave sik brata ia mo talem tangkyu from fon kol ia. Sam dei bifo, hem i bin kasem intaviu blong wan stek koling. Afta we mifala i bin anoentem mo blesem hem, mifala i talemaot long hem se bambae mifala i kambak blong jekem hem.

Mi gobak long haos let mo mi wetwet, be mifala i bin gat taem blong gat wan sot famli haos naet lesen. Mifala i disaed blong wajem wan vidio abaot Ilaeja mo wido blong Sarepat.

Taem wido ia i stap rere blong kukum las kaekae blong hem mo boe blong hem, Ilaeja i talem long hem se: “Yu no wari; yu gohed yu wokem kakae blong yu. Be fastaem, yu mekem wan smol bred long flaoa ya we i stap, yu tekem i kam long mi. Afta yu mekem hemia we i stap blong yu mo pikinini blong yu.” From hem i bin obei, “flaoa ya i no save finis long besin blong hem, mo oel ya i no save finis long botel blong hem, gogo kasem taem we hem bambae i sanem ren i kam.” (1 King 17:13-14).

Toktok blong Ilaeja i mekem “i stikim hat blong mi. Wetem wota long ae blong mi, mi talem long waef, ‘Hemia nao! Faswan, yumi mas mekem evri samting we Lod i givim komanmen long hem, mo afta, bambae blesing i kam.”

Semmak olsem promes blong Ilaeja i go long wido i bin hapen, kaekae mo oel blong yumi i no wes long taem we mi no bin wok. Lod i save ol had situesen blong mifala long saed blong mane, mo Hem i bin blesem mifala. Long nekis moning afta long famli haos naet blong mifala, mi kasem wan wok.

Mi save se Lod i kipim ol promes blong Hem. From eksperiens ya, fet blong mi i bigwan, semmak olsem we tangkyu blong mi i go long Hem.