“Wan tul long Han blong Lod,” Liahona, Julae/Ogis 2022.
Kam Folem Mi
Esta
Wan Tul long Han blong Lod
Sapos yumi folem Spirit mo gat wan hat we i wantem mekem samting, bambae Lod i gaedem yumi blong mekem wanem Hem i nidim yumi blong mekem.
Ol pikja oli kam long Dilleen Marsh
Blong stap olsem wan tul long han blong Lod hem i isi tumas. Yumi jes nid blong wantem blong letem Spirit i gaedem yumi mo gat strong paoa long tingting blong folem kwaet voes blong Hem. I semmak long taem we papa mo mama blong waef blong mi tufala i joenem jos long 1968. Wan yangfala misinari we i wantem blong stap olsem wan tul long han blong Lod i bin help blong tekem famli blong olgeta i kam long Jos.
Ol famli blong waef oli bin mit wetem ol misinari wan taem nomo, be afta, papa blong waef i no bin wantem blong gohed. Afta wan niufala misinari, Elda Fetzer, we hem i bin transfea i go long eria, mo yangfala misinari mo kompanion blong hem tufala i harem kwaet voes ia blong visit mo givhan long famli. Elda Fetzer i bin tajem hat blong ol memba blong famli long wan wei we ol nara misinari i no bin save mekem.
Long nekis sikis manis, ol misinari oli bin givhan long ol nid blong famli. I no longtaem, papa mo mama blong waef blong mi i bin filim Tabu Spirit mo joenem Jos Tufala i bin risivim olgeta blesing we i kam taem yumi mekem mo kipim ol kavenan. Tru long olgeta, fulap famli oli bin joenem Jos mo risivim olgeta blesing blong gospel.
Hemia i bin hapen, from nomo se wan yangfala blong Yuta i bin wantem blong letem God i win insaed long laef blong hem. Hem i bin gat strong tingting blong lego naesfala hom blong hem, lanem wan niufala lanwis, mo wok blong Lod long Brasil.
Wan Simpol Storian
Wan yia i pas, waef blong mi, Alessandra, i risivim wan teks mesej long fon blong hem we i kam long wan sista long wod blong mi long Brasil. I bitim moa long tu yia nao taem oli bin mit laswan. Sista ia i raet: “Long wan long ol rabis dei long laef blong mi, mi nomo save hao nao mi kambak long jos. Taem mi mekem, yu bin luk mi. Yu bin holem han blong mi mo talem long mi blong mi sidaon kolosap long yu. Mi bin toktok long yu. Yu bin lisin mo givim kaonsel long mi.”
Hem i olsem wan simpol storian long taem ia. Be afta, hem i hapen olsem wan janis long waef blong mi blong stap olsem wan tul long han blong Lod. Hem i givhan long dia sista ia long wan taem we hem i bin stap go tru long wan jalenj. Alessandra i no bin rili tingbaot long hemia. Hem i simpol nomo taem hem i bin filim kwaet voes ia mo lisin mo givim kamfot, mo hem i tekem aksen folem kwaet voes ya. Naoia, afta long tu yia i pas, hem i risivim teks mesej long sista ia, blong talem tangkyu.
Tru long ol taem olsem mi lanem se yumi no nidim blong gat wan koling blong stap olsem wan tul long han blong Lod. Yumi jes nid blong wantem mekem. Evriwan we i “wantem blong wok blong God, nao God i singaotem [olgeta] long wok” (Doktrin mo Ol Kavenan 4:3).
“From Wan Taem Olsem Hemia.”
Long OlTesteman yumi rid abaot wan nara man we i bin givim seves olsem wan tul long han blong God. Esta hem i wan yang woman we i lusum papa mo mama blong hem taem hem i smol pikinini. Kasen brata blong hem, Modekae i bin lukaotgud long hem taem hem i stap groap i kam antap.
Afta King Sekses i bin lego Kwin Vasiti, hem i jusum Esta blong kam olsem niufala kwin. “Nao hem i go luk king, mo taem king i luk hem, hem i laekem hem tumas, we olgeta tingting blong hem i go long hem nomo, i winim ol narafala gel ya” (Esta 2:17) Esta hem i wan Jiu, be King i no bin save.
Haman, wan long ol advaesa blong king, i bin kasem promosen blong sidaon antap bitim ol nara prins we oli bin stap wetem hem (luk long Esta 3–1) Mo hem i mekem plan “blong mas kilim olgeta evriwan oli ded. Ol yangfala wetem ol olfala, ol woman wetem ol pikinini, bambae yufala i mas kilim olgeta evriwan long wan dei nomo, we bambae yufala i no gat sore nating long olgeta” (Esta 3:13)
Taem Esta i harem abaot plan blong Haman, Modekae i askem strong long Esta blong toktok wetem king. Hem i bin save ded blong mekem hemia, be hem i tekem strong paoa long tingting aot long ol toktok blong Modekae. Hem i talem: “?Be naoia, hu i save? Maet yu yu kam kwin long taem ya, blong bambae yu save givhan long yumi long hadtaem ya” (Esta 4:14).
“Sapos i min se mi mi mas ded from, be bambae i mas olsem” hem i talem (Esta 4:16) mo hem i go luk king iven we king i no bin askem. Nao hemia hem i brekem loa we panismen blong hem hem i ded. From fasin blong no fraet blong hem, Esta i bin save winim tingting blong king. From hemia, King i bin pasem wan loa blong sevem laef blong Ol Man Jiu. Insaed long leta ia, hem i talem se “ bambae olgeta oli save kam wanples blong mekem rere blong faet blong sevem laef blong olgeta” (Esta 8:11)
Evri Rol I Impoten
Esta hem i glad blong stap olsem wan tul long han blong Lod. Laef blong hem, we hem i stap obei mo mo komitim laef blong hem, i bin mekem hem i rere. Taem mi tingbaot se hem i stap go insaed long kot blong king we hem i no gat invitesen, mi sapraes long strong paoa long tingting we hem i gat. Hem i rimaenem mi long invitesen blong Presiden Russell M Nelson long yumi evriwan blong letem God i win insaed long laef blong yumi.1 Esta i glad blong letem God i win.
Kasen brata blong Esta, Modekae, hem i stap olsem wan tul long han blong Lod. Hem i bin resemap gud Esta. Hem i givim hem sapot, strong paoa long tingting, mo insperesen. Yumi evriwan i gat wan pat blong plei long hem, mo wanwan pat ia i semmak olsem we hem i impoten tumas.
Lod i putum Esta long haos blong king from wan stamba tingting—blong sevem Ol Jiu. Olsem we Hem i bin mekem wetem Esta, Lod i putum yumi long ol ples we yumi save mekem ol stamba tingting blong Hem oli kamtru. From risen ya, yumi mas stap rere mo stap klin inaf taem yumi fesem ol janis we Hem i putum long fored blong yumi.
Plante Janis Raon long Yumi
Janis blong stap olsem wan tul long han blong Lod i stap raon long yumi. Responsabiliti blong yumi i blong stap rere blong tekem aksen. Wanwan taem, yumi no save wanem taem o hao, ol janis ia bambae oli kam. Yumi nid blong stap klin inaf blong gat kompanionsip blong Tabu Spirit mo gat wan hat we i wantem mekem samting. Afta, Lod bambae i gaedem yumi blong mekem wanem Hem i nidim yumi blong mekem.
Long Doktrin mo Ol Kavenan 35:3, Lod i toktok long Sidni Rigdon mo talem: “Mi bin luk long yu mo ol wok blong yu. Mi bin harem ol prea blong yu, mo mi bin mekem yu rere from wan wok we i moa bigwan.”
Lod i save yumi, mo Hem i gat wan wok blong wanwan long yumi blong i mekem. Samtaem hem i wan wok we yumi nomo i save mekem. Wok ia hem i save stap long hom we papa mo mama i helpem wan pikinini boe o gel we i stap traehad. O i save stap insaed long ol Jos responsabiliti. Mo tu, i save stap long eni taem, eni ples mo wetem eniwan.
Presiden Dieter F. Uchtdorf, bifo olsem Seken Kaonsela long Fas Presidensi i bin talem: “Lod i givim responsabiliti long yuwan from wan risen. Maet bae i gat ol pipol mo ol hat we yuwan i save go faenem mo tajem. Maet bae i no gat wan we i save mekem semmak olsem we yu mekem.”2
Presiden Uchtdorf i talem se: “Taem yumi folem (Sevya) eksampol ia we i stret evriwan, han blong yumi i save kam ol han blong Hem; ae blong yumi, ae blong Hem, hat blong yumi, hat blong Hem.”3
Olsem Esta, Modekae, Elda Fetzer, waef blong mi, mo plante narawan, yumi save stap olsem ol tul long han blong Lod.