“Gat Strong Paoa long Tingting blong Helpem Ol Narafalawan,” Liahona, Julae/Ogis. 2022.
Ol Prinsipol blong Wok blong Givhan
Gat Strong Paoa long Tingting blong Helpem Ol Narafalawan.
God bae i yusum yumi blong mekem wan samting i defren taem yumi winim fraet.
Olsem ol man blong biliv, yumi mas gat strong paoa long tingting long ol kaen taem ia, iven ol eksperiens blong yumi wetem wok blong givhan. Jon (ol nem i jenis) oli givim wok long hem blong i givhan long Pita, wan memba we i neva kam long ol miting blong wod. Jon i stap tingting olsem wanem blong i go luk Pita, from hem i neva save hem, mo i no save stori blong hem. Be hem i tingbaot kaonsel ia blong “lavem, serem, mo invaetem;” nao Jon i prea blong i save wanem blong mekem, mo i go blong mekem fren wetem Pita. Hem i spendem taem blong kam blong save Pita, wetem ol visit, ol fon kol, mo dring ti long moning. Jon i kam blong save gud Pita, mo Pita i trastem frensip blong tufala. Taem hem i nidim help, i isi long hem blong kasem Jon, we i glad oltaem blong i helpem hem.
Wan dei, Jon i filim se Pita i rere blong oli invaetem hem i kambak long jos. Long wan long ol visit blong hem, hem i kam wetem wan tingting ia long wan simpol wei. Pita i tingting. Pita i talem: “Mi no go long jos 17 yia nao.” “Be yu save wanem. Mi ting se bae mi mekem.” Taem Pita i kam long wod, Jon i stap blong welkamem hem mo i sidaon wetem hem. Jon i glad tumas we hem i save winim fraet blong hem. Tru long ol efot ia, tufala man ia i gat wan gudfala rilesensip we i blesem laef blong tufala.
Yu No Mas Fraet long Hat blong Yu
Esta long fored blong King,, i kam long Minerva K. Teichert
Stori Esta long OlTesteman (luk long Esta 1–10) i tijim plante prinsipol, be ating bae yumi save gud long hem olsem wan stori blong gat strong paoa long tingting. Esta hem i wan yang woman Jiu taem oli jusum hem olsem wan kwin mo i soem strong paoa long tingting taem hem i putum laef blong hem long denja blong sevem ol pipol blong hem.
Tru long giaman, oli trikim king blong putum wan loa blong oli kilim evri Jiu long kingdom. Esta i tingting long wan plan we i nidim bigfala fet mo bae i wan janis ia nomo blong jenisim tingting blong king.
Long kastom blong hem, blong go luk king taem oli no invaetem yu, oli save kilim yu i ded, Be hem i strong mo i gohed wetem plan blong hem mo hem i askem ol pipol blong hem blong oli livim kakae from hem (luk long Esta 4:16). Tru long ol aksen blong hem mo ol aksen blong ol narafalawan, hem i winim tingting blong king blong hem i jenisim loa ia. God i ansarem ol prea blong Esta mo ol pipol blong hem.
Yumi save lukluk long Esta olsem wan eksampol blong gat strong paoa long tingting, iven insaed long wok blong givhan, taem yumi stap putum long saed ol fraet blong yumi blong kam blong save wan man blong helpem hem long ol jalenj blong hem.
Ol Prinsipol blong Tingting long Olgeta
?Wanem nao yumi save mekem blong putum yumi aotsaed long ol samting we yumi laekem blong mekem taem yumi stap mekem wok blong givhan?
-
Jon i askem God blong i helpem hem. Wetem help blong God, yumi save winim fraet (luk long Ol Sam 34:4).
-
Yumi save prea blong filim lav we Lod i gat long ol narafalawan. “Lav we i stret gud i sakemaot evri fraet” (1 Jon 4:18).
-
Olsem Esta, yumi save yusum fasin blong livim kakae mo prea blong mekem fet blong yumi kam strong moa blong tekem aksen (luk long Esta 4:3).
-
Yumi save trastem se i gat paoa taem yumi kipim olgeta kavenan blong yumi (luk long Doktrin mo Ol Kavenan 110:9). Stap laef folem ol kavenan blong yumi i mekem yumi save kasem help blong Hem.
-
Yumi save mekem fet blong yumi kam strong moa taem yumi fas mo tekem long hat blong yumi wanem Lod i promes long yumi. Tingting long ol promes long ol ves ia: : Dutronome 31:6; Aesea 41:10; 2 Timoti 1:7; Doktrin mo Ol Kavenan 6:33.
?Wanem Nao Yumi Save Mekem?
Gat strong paoa long tingting blong helpem ol narafalawan. I nomata we blong yu kam blong save wan man, o blong invaetem hem blong mekem wan samting we i save blesem laef blong hem, God bae i helpem yu.