“Mi Bin Stap Karem Yu,” Liahona, Julae/Ogis. 2022.
Ol Voes blong Ol Lata–dei Sent
Mi Bin Stap Karem Yu
Paoaful filing we i kam long mi hem i strong tumas i mekem mi foldaon i go daon long ol ni blong mi.
Mi bin gat tri yia mo mi no bin wantem kamaot long hospital we papa mo mama blong mi oli bin stap long hem taem tufala i stap kam gud bakegen afta long aksiden long trak.
Ol foto oli kam long man we i raet, foto kona oli kam long Getty Images
Mi traehad blong plante yia, wetem tingting blong fraet mo wari we i go wetem wan trak aksiden, we i bin hapen long papa mama blong mi, we mi bin pat long hem taem mi bin gat tri yia. Bebi brata blong mi we i stap long bel blong mama blong mi i no bin laef.
Long namba 25 aniveseri blong aksiden ia, tingting blong mi i gobak. Sam manis afta, mi stil gohed blong gat hadtaem taem wan fren i talem long mi blong lukluk i go long Papa long Heven. Mi laf mo askem: “?wanem nao bambae Hem i mekem blong mi?”
Ol hadtaem blong mi oli gohed. Afta wan yia o tu, mi bin taed blong stap harem nogud mo harem nogud blong mi i jenis i go long kros. Mi tekem advaes blong fren blong mi mo stat blong tanem mi go long God.
“Spos yu rili stap ya, sendem wanman—eniwan i kam” mi bin prea. “!Mi nidim wanman!”
Dei i kam mo i go taem mi stanap stret long doa mo stap wet blong nating.
“!Luk, God, i nogat wan i kea!” Mi talem. “!I nogat wan i kam!”
Wota blong ae i ron i go daon long fes blong mi, mi wokabaot slo i go insaed long haos mo sarem doa. Mi wokabaot i go antap long ol step wetem filing blong lus. Be taem mi kasem antap long ol las step, wan strong filing i kam long mi. Hem i strong tumas, i mekem mi foldaon i godaon long ni blong mi.
Afta tingting ia i kam long maen blong mi: “ReNae, Mi bin stap karem yu.”
Papa long Heven i givim paoa long tingting blong mi, long wan wei we i soem se Hem i kea, long wan taem we mi nidim moa. Mi luksave se Hem i lavem mi mo Hem i save mi. Hem i lavem mi tumas mekem se hem i givim mi fridom blong mekem joes. Hem bae i no fosem mi o eniwan blong folem Hem, be Hem mo Pikinini blong Hem, Tufala i invaetem yumi blong kam long Tufala (luk long Matiu 11:28–30)
Long dei ia, mi save se mi save dipen long Hem. Laef blong mi i kam gud naoia from mi traehad blong folem Hem mo blong harem Hem evri dei. Taem Papa long Heven mo Jisas Kraes, Tufala i letem mi blong filim soa, Tufala tu i givim pis long mi, kamfot, paoa, mo fasin blong leftemap tingting, blong mi save lanem blong mekem ol had samting. Blong filim soa i helpem mi blong andastanem mo sapotem ol narawan we oli stap traehad.
Bambae yumi neva save fulwan wanem ol narawan oli stap go tru long hem, be yumi save soem lav long olgeta we oli stap raon long yumi. Mi glad blong save se Papa long Heven i lavem mi mo i lisin long mi taem mi singaot i go long Hem.