“Rum blong Gro,” Liahona, Julae/Ogis 2022.
Stap Kam Olfala long Wan Fetful Wei
Rum blong Gro
Lod i save se bae mi gro i kam antap mo givim flaoa bakegen.
Man blong mi Jerold, i ded plante yia i pas. Kansa ia i kam kwiktaem, mo long tri manis taem hem i ded. Naoia mi stap tingting long hem taem mi stap wok long yad blong mi.
Taem mi stap jenisim pot blong flaoa blong mi, mi gat tingting. Bifo mi stat, flaoa ia i oraet nomo. Hem i stap long haos insaed long wan pot, be hem i no gro i kam antap. Mi save se sapos mi no jenisim pot , bae i luk olsem se bae i stop blong givim flaoa, mo bae i stop blong gro i kam antap. Bae hem i no wan gudwan.
Mekem se mi tingting blong givim flaoa ia rum blong gro i kam antap, taem mi jenisim pot mo putum long bigfala pot blong flaoa. I no wan gudfala bigfala pot—wan we hem i 5 sentimeta bigwan moa long faswan. Sapos mi givim tumas spes long hem, bae i gat tumas wota mo bae rus blong hem i roten mo bae i ded.
Mi ting se bae flaoa ia i gat sam hadtaem taem bae hem i traem blong stretem hem long ples ia. Be hem i harem gud insaed long pot flaoa ia, we hem i bin stap longtaem long hem. Hem i no save se, jenis ia, bae i helpem hem blong gro i kam antap. Mi nidim blong fidim, givim gudfala laet, wota, sam moa kaekae long taem blong jenis ia mo hem i stretem hem. Mi save se, long en, bae i gro i kam antap mo i givim flaoa bakegen.
Taem mi stap tingbaot laef blong mi olsem wan wido, mi luksave se mi olsem flaoa ia nomo. Mi bin stap gud. Mi bin stap oraet nomo. Be taem man blong mi i ded, mi harem Spirit i toktok slo long mi se, mi stap go long wan niu rod blong gro i kam antap. Mi gat ol samting yet blong lanem mo mekem long laef ia.
Long nekis tu yia afta, seven man long wod blong mifala oli ded. Mi stat blong askem ol niu wido sista fren blong mi blong kam tugeta, blong toktok, blong visit, mo givim seves long ol narafala man—mekem se wanwan long mifala bae i no filim se hem i stap hemwan. I nogat wan long mifala i wantem jusum blong oli “jenisim pot flaoa blong olgeta.” Be taem mi stap traem blong stretem mi long laef long wol ia, we man blong mi i no stap, nao mi faenem se mi save givim sapot long ol narafala man we oli fesem sem jalenj ia. Mi faenem fulap janis blong spendem taem wetem ol pikinini mo ol apupikinini, mo letem olgeta i save se tru long Atonmen blong Jisas Kraes, long nekis laef, famli blong mifala i save stap tugeta bakegen.
Bae mi neva save se bae mi gro i kam antap yet, from man blong mi i ded. Be Papa long Heven i kam insaed blong i jenisim pot we mi stap long hem, i givim mi wan niu rum blong gro i kam antap, taem i muvum mi i go long wan pot we i bigwan moa—wan niu jalenj we i givim mi janis ia blong gro i kam antap.
Mi stap misim Jerold evri dei. Sam yia i pas nao, be mi stap gat hadtaem yet blong stretem mi blong laef we hem i no stap wetem mi. Be mi save se Lod bae i fidim mi folem rod ia. Wetem taem, mo wetem tras long Hem, bae mi gro i kam antap mo givim flaoa bakegen.
Hem we i raet, i stap long Aedaho, YSA.