Avia, hanaraka Ahy

2 Mpanjaka 21–23

Mampitodika ny fontsika amin’ Andriamanitra ny soratra masina

Ny Filoha Spencer W. Kimball dia nilaza fa ny tantara momba ny mpanjaka Josia hita ao amin’ny 2 Mpanjaka 21–23, “dia anisan’ny tantara tsara indrindra ao amin’ny soratra masina” (ao amin’ny Avia, hanaraka Ahy—Ho an’ny isam-batan’olona sy ny fianakaviana: Testamenta Taloha 2022, 129).

Ny fomba nahitan’i Josia mpanjaka ny soratra masina

Nitarika ny vahoaka hanongana ny sampy i Josia mpanjaka

King Josiah Cleansing the Land of Idols, © Look and Learn / Bridgeman Images

Lasa mpanjakan’i Joda i Josia fony izy mbola valo taona monja. Nandova fanjakan’ny olona nino andriamani-diso izy, nefa te hanaraka ny Tompo. Tamin’ny taona fahavalo nanjakany, dia nasainy noravana nanerana an’i Joda ny alitara sy ny sampin’ny andriamani-diso.

olona mamaky ny soratra masina.

Josiah, King of Judah, Restores the Worship of God in His Kingdom, by unknown artist, photo by Stefano Bianchetti / Bridgeman Images

Folo taona taty aoriana dia nangataka ny vahoakany izy mba hamerina amin’ny laoniny ny tempoly tao Jerosalema, izay nahitan’i Hilkia mpisorona avo ny soratra masina. Rehefa novakian’i Josia mpanjaka ilay boky, dia voataona hanaraka ny fampiaran’izany izy. Namory ny vahoakany izy avy eo ka namaky ilay boky tamin’izy ireo.

Nandritra fotoana ela dia nanamafy ny fony tamin’ Andriamanitra ny vahoaka. Saingy ny soratra masina dia nanampy tamin’ny fampitodihana ny fon’izy ireo hiverina amin’ Andriamanitra. Nampanantena ny vahoaka i Josia Mpanjaka fa handeha amin’ny fomban’ny Tompo sy hankatò ny didy izy.

Fifanakalozan-kevitra

Inona no soratra masina nanana fiantraikany teo amin’ny fiainanao? Inona no andinin-tsoratra masina azonao vakiana androany mba hitaona fanahy anay?

Soratra masina ao amin’ny Testamenta Taloha ho an’ny toe-javatra manokana

Rehefa:

• Mahatsapa ho irery:

  2 Mpanjaka 6:16

• Mila fampaherezana:

  Isaia 40:31

• Mahatsapa ho tsy tiana:

  Salamo 130; Isaia 54:10

• Matahotra:

  Salamo 27:1; Isaia 41:10

• Tsy mahatadidy hoe iza ianao:

  Genesisy 1:26–27

• Te hahatsapa ho akaiky kokoa ny Mpamonjy:

  Isaia 53:3–5

Sosokevitra ho an’ny fandalinana soratra masina

• Asio vavaka ny famakianao ny soratra masina. Angataho ny Ray any An-danitra mba hanome anao ny Fanahy Masina hahatsapanao fiadanana sy fitaomam-panahy.

• Vakio amin’ny faniriana hampatanjaka ny finoanao an’i Jesoa Kristy.

• Vakio amin’ny faniriana hampihatra ny soratra masina eo amin’ny fiainanao. Anontanio ny tenanao hoe: inona no tian’ny Tompo hampianarina ahy ato amin’ireto soratra masina ireto?

• Asio fotoana hisaintsainana. Aza atao maika ny fotoana hamakianao.

• Mangataha fanampiana. Ny famakiana miaraka amin’ny vady na namana na mpiray trano dia mety hitarika fifanakalozan-kevitra tsara sy hanampy anao hahatsiaro ny hamaky isan’andro.

Afaka mijery ny fanehoana ny fiainan’i Josia Mpanjaka ianao ao amin’ny horonan-tsary novokarin’ny Fiangonana hoe, “Josiah and the Book of the Law,” ao amin’ny ChurchofJesusChrist.org.