2022
E pu’e ture nō te heheura’a ta’ata hō’ē
Novema 2022
12:41

E pu’e ture nō te heheura’a ta’ata hō’ē

Nā Elder Dale G. Renlund

Nō te pupu nō te Tino ’Ahuru Ma Piti ’āpōsetolo

Tītauhia ’ia māramarama i te pu’e ture e tere ai te Vārua Maita’i. ’Ia rave tātou mai te au i te pu’e ture, e nehenehe te Vārua Maita’i e tu’u hope i te hi’ora’a māere.

Mai ia ’outou e rave rahi, e hi’ora’a rahi nō’u ’o Elder Dieter F. Uchtdorf i roto i te mau matahiti. E ta’a iho ā ia ’outou i te mea tā’u e parau atu.1 Tē tātarahapa nei au i mua iāna…

Te hō’ē pairati ’ite mau, e rere ïa ’oia mai te au i te fāito pūai o te manureva ’e mai te au i te mau arata’ira’a a te feiā hi’opo’a tere’a manureva i ni’a i te tahua manureva ’e i roto i te reva. Nō te fa’a’ōhie, e parau tātou ē e pe’e te mau pairati i te tahi pu’e ture. Ta’a ’ē noa atu tō rātou māramarama ’e te ’aravihi, e mea nā roto noa i te rerera’a mai te au i teie pu’e ture te mau pairati e tu’u maita’i ai ’e e tu’u hope ai i te pūai rahi o te manureva, nō te fa’atupu i te semeio ’e tāna ’ōpuara’a.

Nā reira ato’a, e fāri’i tātou i te heheura’a ta’ata hō’ē mai te au i te tahi pu’e ture. I muri iho i te bāpetizora’a, ’ua hōro’ahia mai te hō’ē hōro’a hanahana, e hōro’a tītau-roa-hia rā, te hōro’a nō te Vārua maita’i.2 ’Ia tūtava tātou i te fa’aea i ni’a i te ’ē’a nō te fafaura’a,3 « nā te [Vārua Maita’i] e fa’a’ite ia [tātou] i te mau mea ato’a tā [tātou] e rave. »4 Mai te peu e mea pāpū ’ore tātou, e mea tūmā’oa’oa, e nehenehe e ani i te tauturu i te Atua.5 ’Aita e parau pāpū a’e i te parau fafau a te Fa’aora tei nā ’ō : « E ani, e hōro’ahia mai tā ’outou… ’o tei ani ra ho’i, ’ua noa’a ïa. »6 Nā roto i te tauturu a te Vārua Maita’i, e ti’a ia tātou ’ia taui i tō tātou nātura hanahana ’ei hope’a mure ’ore.7

Te parau fafau nō te heheura’a ta’ata hō’ē nā roto i te Vārua Maita’i, e parau māere ïa, mai te rerera’a manureva. ’E mai te pairati manureva ra, tītauhia ’ia māramarama i te pu’e ture e tere ai te Vārua Maita’i nō te hōro’a i te heheuraa ta’ata hō’ē. ’Ia rave tātou mai te au i te pu’e ture, e nehenehe te Vārua Maita’i e tu’u hope i te hi’ora’a māere, te arata’ira’a māere ’e te tāmāhanahana māere. I rāpae i terā pu’e ture, e pau tō tātou māramarama ta’a ’ē ’e tā tātou tārēni, e riro tātou i te fa’ahemahia, i te ’ati ’e i te pa’apa’a.

’O te mau pāpa’ira’a mo’a te mea mātāmua o teie pu’e ture nō te heheura’a ta’ata hō’ē.8 ’O te fa’a’amu’a i te mau parau a te Mesia, mai tei ’itehia i roto i te mau pāpa’ira’a mo’a, tē fa’aitoito i te heheura’a ta’ata hō’ē. ’Ua ha’api’i Elder Robert D. Hales : « ’Ia hina’aro tātou i te paraparau i te Atua, e pure tātou. ’E ’ia hina’aro tātou ’ia paraparau mai ’oia ia tātou, e ’imi tātou i roto i te mau pāpa’ira’a mo’a. »9

Tē ha’api’i ato’a mai nei te mau pāpa’ira’a mo’a e nāhea i te fāri’i i te heheura’a ta’ata hō’ē.10 ’E e ani tātou i te mea ti’a ’e te maita’i11 ’eiaha rā i tei au ’ore i te hina’aro o te Atua.12 ’Eiaha ’ia « hapa na tā [tātou] anira’a », ma te ’ōpuara’a ti’a ’ore e ha’apa’o i tā tātou iho tāpura ’ohipa ’e tō tātou iho navenavera’a.13 Nā ni’a roa atu, e ani tātou i te Metua i te ao ra nā roto i te i’oa o Iesu Mesia,14 ma te ti’aturi ē, e fāri’i mai tātou.15

Te mea piti o teie pu’e ture, ’oia ho’i ïa, e fāri’i tātou i te heheura’a ta’ata hō’ē, i roto i tō tātou noa iho ’ōti’a, ’eiaha rā nā ni’a i tō vetahi ’ē ti’ara’a. ’Oia ho’i, e fa’areva tātou ’e e tau ho’i i ni’a i te tahua taura’a manureva tei fa’ata’ahia nō tātou. ’Ua ’apohia mai te faufa’a rahi nō te tahua taura’a manureva tei fa’ata’a-maita’i-hia, i te ’ōmuara’a o te ’ā’amu nō te Fa’aho’i-fa’ahou-ra’a. ’Ua parau haere ’o Hiram Page, hō’ē o nā ’ite to’ova’u nō te Buka a Moromona ē, tē fāri’i ato’a nei ’oia i te mau heheura’a nō te ’Ēkālesia tā’āto’a. E rave rahi melo tei fa’ahemahia ’e tei vare.

’Ei pāhonora’a, ’ua heheu mai te Fatu ē « ’aita roa te hō’ē ta’ata e mā’itihia ’ia fāri’i i te mau fa’auera’a ’e te mau heheura’a i roto i teie nei ’ēkālesia maori rā ’o tō’u tāvini ra ’o Iosepha Semita… ē tae noa atu i te taime au e fa’ata’a ai i te tahi ’ē ’ei mono nōna. »16 E ti’ara’a nō te peropheta ora ’ia fāri’i i te ha’api’ira’a tumu, te fa’auera’a ’e te heheura’a nō te ’Ēkālesia, nō ’ō mai i te Fatu ra Iesu Mesia.17 Nōna terā tahua taura’a manureva.

Tau matahiti i ma’iri, ’ua niuniuhia mai au e te hō’ē ta’ata tei tāpe’ahia nō te tomo-huna-ra’a i roto i te hō’ē fare. ’Ua nā ’ō mai ’oia ē, ’ua heheuhia mai iāna ē e mau pāpa’ira’a mo’a ’ē tei hunahia i raro a’e i terā fare tāna i tomo atu. ’Ua parau mai ’oia ē, ’ia noa’a iāna te reira mau pāpa’ira’a mo’a ’ē, ’ua pāpū iāna ē e fāri’i ’oia i te hōro’a nō te ’īritira’a, nō te fa’atae mai i teie mau pāpa’ira’a ’āpī ’e nō te fa’atano i te ha’api’ira’a tumu ’e te arata’ira’a o te ’Ēkālesia. ’Ua parau atu vau iāna ē, ’ua hape ’oia, i tāparu mai nei ’oia ’ia pure au nō te reira. ’Ua pāhono atu vau e’ita vau e nā reira. Parau ’ino mai nei ’oia ’e mutu a’era te niuniura’a.18

’Aita i faufa’a e pure nō teie tītaura’a, e tumu ’ōhie ho’i ’e te faufa’a rahi : ’o te peropheta ana’e tē fāri’i i te heheura’a nō te ’Ēkālesia. « E ’ere te ha’apa’ora’a a te Atua »19 ’ia fāri’i te ta’ata i te heheura’a tei fa’ata’ahia nō te tahua taura’a manureva a te peropheta.

Te heheura’a ta’ata hō’ē, ’ua ti’a ïa nō terā ta’ata. E nehenehe e fāri’i i te heheura’a, ’ei hi’ora’a, nō ni’a i te vāhi nohora’a, nō te tōro’a ’ohipa e haere ’aore rā nō te ta’ata e fa’aipoipo.20 E nehenehe te feiā fa’atere o te ’Ēkālesia e fa’a’ite mai i te ha’api’ira’a tumu ’e te parau a’o fa’auru, tei ni’a rā ia ’outou te hōpoi’a e rave i te fa’aotira’a. Nā ’outou e fāri’i i terā heheura’a ; nā ’outou terā tahua taura’a manureva.

Te mea toru o teie pu’e ture, ’oia ho’i ïa, e tū’ati te heheura’a ta’ata hō’ē i te mau fa’auera’a a te Atua ’e i te mau fafaura’a tā tātou i rave i mua iāna. Mai te peu pa’i e purehia mai teie : « E te Metua i te ao ra, e mea fiu ri’i te mau purera’a a te ’Ēkālesia. E’ita ānei tā’u e nehenehe e ha’amori ia ’oe i te Sābati i ni’a i te mou’a ’aore ra i te pae tahatai ? E nehenehe ānei tā’u e ’ore e haere i te purera’a ’e e ’ore e rave i te ’ōro’a, ’e e hōro’a noa mai ’oe i te mau ha’amaita’ira’a i parauhia nō te ha’amo’ara’a i te Sābati ? »21 Nō te pāhono i teie huru pure, e’ita e ’ore e pāhono mai te Atua : « E tā’u tama, ’ua heheu a’ena vau i tō’u hina’aro nō ni’a i te mahana sābati. »

’Ia tītau tātou i te heheura’a nō ni’a i te hō’ē mea tā te Atua i hōro’a a’ena i te arata’ira’a pāpū, tē ha’amāhorahora ra ïa tātou ia tātou iho i tō tātou mau mana’o hape ’e i te mau parau tā tātou e hina’aro e fa’aro’o. ’Ua fa’ati’a a’ena mai te hō’ē ta’ata nō ni’a i tōna mau fifi e ha’amaita’i i te vaira’a o tōna ’utuāfare i te pae nō te moni. ’Ua tae mai te mana’o e tāviri ri’i i te tahi moni ’ei rāve’a, ’e ’ua pure ’oia nō ni’a i te reira ’e i tōna mana’ora’a ’ua tae mai te heheura’a e nā reira iho ā. I ’ite au ē, ’ua fa’ahemahia ’oia, inaha ’ua tītau ’oia i te heheura’a tei pāto’i i te hō’ē fa’auera’a a te Atua. ’Ua fa’aara te peropheta Iosepha Semita ē : « ’Aita e ’inora’a rahi a’e nō te mau tamari’i a te ta’ata nei, i te vaira’a i raro a’e i te mana o te hō’ē vārua ’ino, ’e ’ua mana’o ē ’o te Vārua a te Atua. »22

E parau vetahi ē, ’ua ’ōfati Nephi i te fa’auera’a i te taparahira’a ia Labana. ’Aita rā teie ’ohipa ta’a ’ē e fa’a’ore nei i te ture—te ture ho’i ē, e tū’ati te heheura’a ta’ata hō’ē i te mau fa’auera’a a te Atua. ’Aita e tatarara’a ’ōhie roa nō teie ’ā’amu, noa atu rā, e fa’ahiti ri’i noa vau i te tahi mea i tupu. ’Aita terā ’ohipa i ha’amata nā roto i te anira’a Nephi e taparahi ia Labana. E ’ere i te ’ohipa tāna i hina’aro e rave. E ’ere te taparahira’a ia Labana nō te maita’i o Nephi, ’ia noa’a rā te mau pāpa’ira’a mo’a i te nūna’a ’āraua’e ’e ’ia riro mai ’ei feiā nō te fafaura’a. ’E ’ua pāpū ia Nephi ē, e heheura’a terā—’e hau roa atu i’ō nei, e fa’auera’a nā te Atua.23

Te mea maha o teie pu’e ture, ’o te ’itera’a ïa e aha tā te Atua i heheu a’ena mai ia ’outou iho, ’a vai māhorahora noa ai i te tahi atu ā heheura’a nō ’ō mai iāna ra. Mai te mea pa’i ē ’ua pāhono te Atua i te hō’ē uira’a ’e tō mea noa nei ā, ’aita i taui, e aha pa’i ïa e tīa’i i te tahi atu ā pāhonora’a ? ’Ua turori ato’a Iosepha Semita i ni’a i terā huru fifi i te matahiti 1828. ’Ua oti te tuha’a mātāmua nō te Buka a Moromona i te ’īritihia, ’e ’ua ani a’era ’o Martin Harris, tei hōro’a mai i te moni tauturu ’e te pāpa’i parau i te ha’amatara’a, i te parau fa’ati’a a Iosepha e ’āfa’i e fa’a’ite i te mau ’īritira’a i tāna vahine. ’Aita Iosepha i pāpū roa, ’ua pure atu ra nō te arata’ira’a. ’Ua parau te Fatu iāna ’eiaha e hōro’a i te mau ’api ia Martin ra.

Tītau fa’ahou a’era Martin ia Iosepha ’ia ani fa’ahou i te Atua. ’Ua nā reira atu ra Iosepha, ’e e’ita tātou e māere, hō’ē ā pāhonora’a. ’Ua tāparu rā Martin ia Iosepha e ani i te toru o te taime, ’e ’ua nā reira Iosepha. I terā taime, ’aita te Atua i parau « ’Aita. » Mai te huru rā ’ua nā ’ō atu te Atua : « E Iosepha, ’ua ’ite ’oe i tō’u mana’o nō ni’a i te reira, tei ia ’oe rā te ti’amāra’a ’ia mā’iti. » Nō te mea i mana’o ’oia ē ’aita fa’ahou terā ’ōpanira’a, ’ua fa’ati’a a’era Iosepha ia Martin ’ia rave i te 116 ’api ’e ’ia fa’a’ite i te tahi mau melo o tōna ’utuāfare. Mo’e atu ra nā ’api i ’īritihia ’e ’aita i ’ite-fa’ahou-hia mai. ’Ua a’o pāpū te Fatu ia Iosepha.24

I ’apo na Iosepha i tā te peropheta Iakoba, nō te Buka a Moromona, i ha’api’i : « ’Eiaha ’outou e tītau ’ia a’o atu i te Fatu, ’ia fāri’i mai rā i te a’ora’a nō ’ō mai iāna ra. Inaha ho’i […] tē a’o mai ra ’oia ma te pa’ari. »25 ’Ua fa’aara Iakoba ē, e tupu te mau ’ohipa au ’ore ’ia ani tātou i te mau mea ’eiaha e ani. ’Ua parau ātea ’oia nō te mau ta’ata i Ierusalema, e ’imi rātou « i te mau mea e rave rahi tei ’ore i hāro’aro’ahia e rātou », ma te tītau « i te mau mea ’aore i ti’a ia rātou ’ia rave ra », ’e ’ua hi’o ’ore roa i te Fa’aora o te ao nei.26 ’Ua turori rātou nō tō rātou anira’a i te mau mea e’ita rātou e hāro’aro’a ’e e’ita ato’a ho’i e nehenehe e hāro’aro’a.

Mai te mea ’ua fāri’i tātou i te heheura’a ta’ata hō’ē e tano i tō tātou vaira’a ’e ’aita te reira i taui, ’ua pāhono a’ena ïa te Atua i tā tātou uira’a.27 ’Ei hi’ora’a, i te tahi taime e ui fa’ahou ā tātou i te ha’apāpūra’a ē, ’ua fa’a’orehia tā tātou hara. Mai te mea ’ua tātarahapa tātou, ’e i ’ī na tātou i te ’oa’oa ’e ’ua hau te mana’o, ’e ’ua fāri’i i te matarara’a o te hara, ’aita ïa e faufa’a e ui fa’ahou ā, e ti’aturi rā i te pāhonora’a tā te Atua i hōro’a a’ena.28

’E noa atu ē e ti’aturi tātou i te mau pāhonora’a mātāmua a te Atua, tītauhia ’ia vai māhorahora noa i te tahi atu ā heheura’a ta’ata hō’ē. ’Ia hi’ohia, e mau tāpaera’a ri’i noa i roto i te orara’a e ra’ehia i te hō’ē noa rerera’a. ’Ia ta’a ia tātou ē, te heheura’a ta’ata hō’ē, e fāri’ihia ïa « te fa’aue nā ni’a i te fa’aue » ’e « te a’o nā ni’a i te a’o »,29 e nehenehe te reira arata’ira’a heheuhia ’ia tupu i te rahira’a, ’e pinepine mai te reira iho ā.30

E mea tū’ati’ati te mau mea o te pu’e ture nō te heheura’a ta’ata hō’ē, ’e e mea ha’apūai te tahi i te tahi. I roto rā i teie pu’e ture, e ti’a i te Vārua Maita’i ’ia heheu, ’e e heheu mau ho’i ’oia i te mau mea ato’a tei tītauhia nō te ma’ue ’e nō te tāmau noa i terā pūai i ni’a i te ’ē’a nō te fafaura’a. E nehenehe ïa tātou e ha’amaita’ihia e te mana o Iesu Mesia, nō te riro i te mea tā te Metua i te ao ra i hina’aro ia tātou ’ia riro mai. Tē ani nei au ia ’outou ’ia ti’aturi ’e ’ia tītau i te heheura’a ta’ata hō’ē, ’ia māramarama ’outou i te mea tā te Atua i heheu, ’o tē tū’ati i te mau pāpa’ira’a mo’a ’e i te mau fa’auera’a tāna i hōro’a mai nā roto i te mau peropheta tāna i tu’u mai, i roto i tō ’outou iho ’ōti’a ’e te ti’amāra’a ’ia mā’iti. ’Ua ’ite au ē, e ti’a i te Vārua Maita’i ’ia fa’a’ite, ’e e fa’a’ite mau iho ā ’oia ia ’outou i te mau mea ato’a e rave ’outou.31 I te i’oa o Iesu Mesia ra, āmene.

Fa’ata’ara’a

  1. ’Ua fa’a’ohipa tāmau ’e ’ua fa’a’ohipa manuia noa ’o Elder Dieter F. Uchtdorf i te fa’ahōho’ara’a nō ni’a i te manureva nō te ha’api’i i te ta’ata i te mau parau tumu faufa’a rahi nō te ’evanelia. ’Ei hi’ora’a, ’ua fa’aau a’enei ’oia i te tāpura hi’opo’ara’a a te pairati nā mua a’e i te hō’ē tere, i te ha’api’ira’a mai tā te Fa’aora, i roto i « A Teacher’s Checklist [Te tāpura hi’opo’ara’a a te ’orometua] » ([ha’apurorora’a nō te mau ’orometua, 12 nō Tiunu 2022], broadcasts.ChurchofJesusChrist.org).

  2. ’O te Vārua Maita’i te toru o te melo nō te Atuara’a, pinepine ’oia i te parauhia ’o te Vārua ’aore rā te Vārua o te Atua, ’e e ’ohipa faufa’a rahi tāna i roto i te fa’anahora’a nō te fa’aorara’a. Nāna e hōro’a i te ’itera’a pāpū nō te Metua ’e te Tamaiti, nāna e heheu i te parau mau o te mau mea ato’a, nāna e ha’amo’a i te ta’ata i tātarahapa ’e i bāpetizohia, ’e ’o ’oia te Vārua Mo’a nō te fafaura’a (hi’o Arata’i nō te mau pāpa’ira’a mo’a, « Vārua Maita’i », scriptures.ChurchofJesusChrist.org).

  3. Hi’o 2 Nephi 31:19–21 ; Mosia 4:8. ’Aita e rāve’a ’ē atu tātou e « fa’aorahia i roto i te bāsileia o te Atua ra. » Hia’ai noa atu tātou i te rāve’a ’ē, e’ita te reira e huti i te tahi atu ’ē’a.

  4. 2 Nephi 32:5 ; hi’o ato’a Te Ha’api’ira’a Tumu ’e te mau Fafaura’a 84:43–44.

  5. Hi’o 2 Nephi 32:4 ; Russell M. Nelson,« Heheura’a nō te ’Ēkālesia, heheura’a nō tō tātou orara’a », Liahona, Mē 2018, 93–96.

  6. Mataio 7:7–8.

  7. Hi’o « Te ’utuāfare : E Poro’i i tō te Ao nei » ; « Te parau tai’o a te Feiā ’Āpī Tamāhine » ; Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 27.0 ; 27.2, ChurchofJesusChrist.org.

  8. Hi’o 2 Nephi 32:3.

  9. Robert D. Hales, « Te mau pāpa’ira’a mo’a: Te mana o te ’ia ora tātou », Liahona, Novema 2006, 26–27.

  10. Tē ha’api’i nei te mau pāpa’ira’a mo’a ē, e mea marū te Vārua Maita’i ’e te iti ho’i, mai te hō’ē muhumuhu—e ’ere i te mea pūai ’e te māniania ; e mea ’ōhie, e mea hau ’e e mea pāpū ; e nehenehe te reira e ha’aputa i te ’ā’au ’e e ahu ; tei ni’a i te ferurira’a ’e te ’ā’au ; e fa’atae mai i te hau, te ’oa’oa ’e te tīa’ira’a—e ’ere i te mata’u, te hepohepo ’e te pe’ape’a ; e tītau manihini mai te reira ’ia rave i te maita’i—’eiaha rā te ’ino ; ’e e mea māramarama ’e te au—e ’ere i te mea napu. Hi’o 1 Te mau Ari’i 19:11–12 ; Omoni 1:25 ; Alama 32:28 ; Helamana 5:30–33 ; 3 Nephi 11:3 ; Moroni 7:16–17 ; Te Ha’api’ira’a Tumu ’e te mau Fafaura’a 6:22–24 ; 8:2–3 ; 9:8–9 ; 11:12–14 ; 85:6 ; Boyd K. Packer, « The Candle of the Lord », Ensign, Tēnuare 1983, 51–56 ; Russell M. Nelson, « Fa’aro’o iāna », Liahona, Mē 2020, 88–92 ; Russell M. Nelson, « ’A fāri’i i te ananahi ma te fa’aro’o », Liahona, Novema 2020, 73–76 ; Russell M. Nelson, « Heheura’a nō te ’Ēkālesia, heheura’a nō tō tātou orara’a », 93–96.

  11. Hi’o 3 Nephi 18:20 ; Moroni 7:26 ; Te Ha’api’ira’a Tumu ’e te mau Fafaura’a 88: 64–64.

  12. Hi’o Helamana 10:5 ; Te Ha’api’ira’a Tumu ’e te mau Fafaura’a 46:30.

  13. Iakobo 4:3 ; hi’o Iakobo 4:3, New International Version; 2 Nephi 4:35 ; Te Ha’api’ira’a Tumu ’e te mau Fafaura’a 8:10 ; 46:7 ; 88:64–65.

  14. Hi’o Te Ha’api’ira’a Tumu ’e te mau Fafaura’a 88:64–65 ; Arata’i nō te mau pāpa’ira’a mo’a, « Prayer », scriptures.ChurchofJesusChrist.org.

  15. Hi’o 3 Nephi 18:20 ; Moroni 7:26.

  16. Te Ha’api’ira’a Tumu ’e te mau Fafaura’a 28:2, 7.

  17. Hi’o Te Ha’api’ira’a Tumu ’e te mau Fafaura’a 21:4–5.

  18. ’Aua’a a’e, ’ua fa’anahohia te mau ’ohipa ’ia noa’a iāna te tauturu ’e te rapa’aura’a tāna i hina’aro mau.

  19. Te Mau Ha’api’ira’a a te Mau Peresideni o te ’Ēkālesia : Iosepha Semita (2007), 224.

  20. Hi’o Thomas S. Monson, « Whom Shall I Marry ? » New Era, Ātopa 2004, 4.

  21. Hi’o Te Ha’api’ira’a Tumu ’e te mau Fafaura’a 59:9–16.

  22. Joseph Smith, i roto Times and Seasons, 1 nō ’Ēperēra 1842, 744, josephsmithpapers.org.

  23. Tē taui pinepine nei iho ā te Fatu, tē fa’atano nei ’e tē rave nei i te tahi fa’anahora’a ta’a ’ē, i ni’a i tāna mau fa’auera’a i heheuhia, tē ravehia nei rā te reira nā roto i te heheura’a peropheta ’eiaha rā te heheura’a ta’ata hō’ē. E tae mai te heheura’a peropheta nā roto i te peropheta tā te Atua i ha’amau ’ia au i tōna pa’ari ’e tōna māramarama. Tei roto i teie mau fa’anahora’a ta’a ’ē te heheura’a a te Fatu ia Mose ’e Iosua, ’ia taparahi pohe i te mau ta’ata nō te fenua ra nō Kanaana, noa atu pa’i tāna fa’auera’a « ’Eiaha roa ’oe e [taparahi pohe i te ta’ata] » (Exodo 20:13). Nā roto i tāna peropheta, e ti’a i te Fatu ’ia fa’atano fa’ahou, ’e e fa’atano fa’ahou ho’i ’oia i tāna mau fa’auera’a nō tāna mau ’ōpuara’a. E ’ere rā nā tātou ’e tā tātou heheura’a ta’ata hō’ē e fa’ahuru ’ē ’aore rā e hi’o ’ē i te mau fa’auera’a tā te Atua i heheu i tāna ’Ēkālesia nā roto i te peropheta.

    Hi’o 1 Nephi 4:12–18 ; nō te fa’ananea roa atu i te tā’uara’a parau, ’a hi’o Joseph Spencer, 1st Nephi: A Brief Theological Introduction (2020) , 66–80.

  24. Nō te tā’āto’ara’a o te fa’ati’ara’a nō ni’a i nā ’api e 116, hi’o Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 44–53 ; hi’o ato’a Te Ha’api’ira’a Tumu ’e te mau Fafaura’a 3:5–15 ; 10:1–5.

  25. Iakoba 4:10.

  26. Hi’o Iakoba 4:14–16.

  27. ’Ua ha’api’i Iosepha Semita : « ’E fa’ahou ā, e’ita roa atu tātou e tītau i te Atua i te heheura’a ta’a ’ē maori rā ’aita e heheura’a nā mua a’enei e tano i terā ’ohipa » (i roto History, 1838–1856 [Manuscript History of the Church], volume A-1, 286–87, josephsmithpapers.org).

  28. Hi’o Mosia 4:3. ’Ia tāmau noa tō tātou mana’o hapa ’e te tātarahapa i muri iho i te tātarahapara’a ateate ’e tei māna’o-pāpū-hia, tei mātauhia, nō te ’erera’a ïa te fa’aro’o ia Iesu Mesia ’e tōna ’aravihi e fa’a’ore hope roa i tā tātou hara ’e e fa’aora i tō tātou māuiui. I te tahi taime, e mana’o tātou ē, nō vetahi ’ē te fa’a’orera’a hara, ’aita rā e tano roa i ni’a ia tātou. ’O te ’erera’a noa teie i te fa’aro’o i te mea tā te Fa’aora e nehenehe e rave maoti tāna tāra’ehara tā’ōti’a ’ore.

  29. Hi’o Isaia 28:10 ; 2 Nephi 28:30 ; David A. Bednar, « Line upon Line, Precept upon Precept », New Era, Tetepa 2010, 3–7.

  30. ’Aita ana’e rā te Atua i hōro’a ia ’outou i te heheura’a, ’a tāmau i te ani. Mai tā Elder Richard G. Scott i ha’api’i : « ’A fa’a’ohipa ma te ti’aturi […] ’Ia ora parauti’a ana’e ’outou, ’e ’ia rave ana’e ’outou ma te ti’aturi, e’ita ïa te Atua e vaiiho ia ’outou ’ia haere noa atu ā ma te ’ore e fa’aara mai ia ’outou mai te mea ’ua rave ’outou i te fa’aotira’a hape » (« Fa’a’ohipara’a i te hōro’ara’a a te ra’i nō te pure », Liahona, Mē 2007, 10).

  31. Hi’o 2 Nephi 32:5.