’Ia ’ite rātou ia ’oe

(Ioane 17:3)

Nā Elder Jonathan S. Schmitt

Nō te Hitu ’Ahuru

Tō’u hina’aro rahi mau, ’ia ’ite mau ’outou ia Iesu nā roto i tōna rahira’a i’oa ’e ’ia riro mai ’outou mai iāna te huru.

’A tau matahiti i teienei, ’ua ora vau i te hō’ē ’ohipa tei tupu tei taui i tō’u orara’a, i roto i te hō’ē purera’a ’ōro’a o tā’u iho pāroita i Arizona. I te taime i fa’ahitihia ai i roto i te pure ’ōro’a i tō tātou hina’aro « ’ia rave i ni’a [ia tātou] i te i’oa o [Iesu Mesia] », ¹ ’ua fa’aha’amana’o mai te Vārua Maita’i iā’u ē, e rave rahi i’oa tō Iesu. Tae mai nei teie uira’a i roto i tō’u ’ā’au : « E aha te i’oa o Iesu ’o tā’u e rave i ni’a iho iā’u i teie hepetoma ? »

E toru i’oa tō Iesu tei puta mai i roto i tō’u ferurira’a, ’e ’ua pāpa’i au i te reira. I roto i teie nā i’oa e toru, tē vai ra te mau huru mai tō te Mesia ’o tā’u e hina’aro nei e tātara hu’ahu’a roa. I te hepetoma i muri mai, ’ua tūtonu vau i ni’a nā i’oa e toru ’e ’ua tāmata vau i te tauahi i tō rātou huru mau ’e te ta’a-’ē-ra’a e tū’ati. Mai taua taime ra, ’ua tāmau noa vau i te ui atu i teie uira’a ’ei tuha’a nō tā’u ha’amorira’a ’ōtahi : « E aha te i’oa o Iesu tā’u e rave i ni’a iho iā’u i teie hepetoma ? Te pāhonora’a i teie uira’a ’e te tūtavara’a i te tātara i te mau huru mai teie tō te Mesia, ’ua riro ïa ’ei ha’amaita’ira’a nō tō’u orara’a.

I roto i tāna pure rahi turu, ’ua fa’ahiti Iesu i teie parau mau faufa’a roa : « Teie ho’i te ’ora mure ore, ’ia ’ite rātou ia ’oe i te Atua mau ra, ’e ia Iesu i te Mesia tā ’oe i tono mai ».² I teie mahana, tē hina’aro nei au e fa’a’ite atu ia ’outou i te mau ha’amaita’ira’a ’e te mana, e tae mai nā roto i te ’itera’a ia Iesu Mesia nā roto i tōna i’oa e rave rahi.

Hō’ē rāve’a ’ōhie nō te ha’api’i i te ha’amātau i te hō’ē ta’ata ’o te ’itera’a ïa i tōna i’oa. Tē parauhia rā e, « te i’oa o te hō’ē ta’ata, ’ua riro ïa nō teie ta’ata mai te ta’ira’a navenave ’e te faufa’a nā roto i te mau reo ato’a ».³ ’Ua tupu ānei teie ’ohipa ia ’outou, i te pi’ira’a i te hō’ē ta’ata ma te i’oa hape ’aore rā ’ua mo’ehia tōna i’oa ? ’Ua pi’i māua tā’u vahine ’o Alexi, i te hō’ē taime, i te hō’ē o tā māua tamari’i ’o « Lola ». ’A tae ho’i ē, mai tā ’outou paha i mana’o, ’o Lola o tā mātou ïa ’ūri ! Nō te maita’i ’aore rā nō te ’ino, te moera’a te i’oa o te hō’ē ta’ata e fa’a’itera’a ïa i teie ta’ata ē, ’aita roa paha ’outou i ’ite maita’i iāna.

’Ua ’ite Iesu ’e ’ua pi’i i te mau ta’ata ma tō rātou i’oa. I ’Īserā’ela i tahito ra, ’ua parau te Fatu, « ’eiaha e mata’u : ’ua fa’aorahia ’oe e au, nā’u i ma’iri i tō i’oa na ; nō’u ’oe ».⁴ I te po’ipo’i nō te Pasa, ’ua ha’apūaihia te ’itera’a pāpū o Maria nō te ti’afa’ahoura’a o te Mesia, i tō Iesu pi’ira’a iāna ma tōna i’oa.⁵ Hō’ē ā huru, pi’i atu ra te Atua ia Iosepha Semita mā tōna i’oa, ’ei pāhonora’a i tāna pure nō te fa’aro’o.⁶

I roto i te tahi huru, ’ua hōro’a te Fatu i tāna ra mau pipi i te mau i’oa ’āpī, tei fa’a’ite i tō rātou huru natura, tō rātou ’aravihi ’e tō rātou ’ite. ’Ua hōro’a Iehova ia Iakoba i te i’oa ’āpī ’o ’Īserā’ela, tōna aura’a « te ta’ata e vaiiho i te Atua ’ia upo’oti’a » ’aore rā « ’ia upo’oti’a te Atua ».⁷ ’Ua hōro’a Iesu ia Iakobo ’e ia Ioane te i’oa o Boanere, tōna aura’a « te tamari’i a te pātiri »⁸ Hi’o ana’e i tōna ti’ara’a fa’atere i muri iho, ’ua hōro’a Iesu nō Simona i te i’oa ’o Cepha ’aore rā Petero, tōna aura’a e papa.⁹

Mai ia Iesu tei ’ite ia tātou tāta’itahi ma te i’oa, hō’ē rāve’a nō te ’ite maita’i iāna ’o te ha’api’ira’a ïa i tōna i’oa e rave rahi. Mai te mau i’oa o ’Īserā’ela ’e o Petero, e rave rahi i’oa tō Iesu tei riro ’ei mau upo’o parau ’o tē tauturu ia tātou ’ia hāro’aro’a i tāna misiōni, tāna ’ōpuara’a, tōna nātura ’e tōna mau huru. ’A ’ite mārū noa ai tātou e rave rahi i’oa o Iesu, e māramarama maita’i a’e ïa tātou i tāna misiōni hanahana ’e tōna huru nounou ’ore. Te ’itera’a i te rahira’a o tōna i’oa e fa’auru-ato’a-hia tātou ’ia riro hau atu mai iāna te huru—’ia fa’ananea i te mau huru mai tō te Mesia ’o tē hōpoi mai i te ’oa’oa ’e te ’ōpuara’a i tō tātou orara’a.

A tau matahiti i teienei, ’ua tuatāpapa te peresideni Russell M. Nelson i te mau pāpa’ira’a mo’a ato’a nō ni’a ia Iesu Mesia i roto i Tropical Guide.¹⁰ I muri iho ’ua ani ’oia i te feiā ’āpī pa’ari ’ia tuatāpapa i teie ā mau pāpa’ira’a mo’a. Nō ni’a i te rahira’a i’oa o Iesu, ’ua parau te peresideni Nelson ē, « ’a tuatāpapa i te mau mea ato’a nō Iesu Mesia ma te ’imira’a tu’utu’u ’ore ’e ma te pure ’ia māramarama i te aura’a mau nō ’outou iho, i tōna mau ’upo’o parau rau ’e tōna mau i’oa ».¹¹

Te pe’era’a i te anira’a a te peresideni Nelson, ’ua ha’amata vau i te hāmani i tā’u iho tāpura nō te rahira’a i’oa o Iesu. Tē vai ra i roto i tā’u iho tāpura i teienei hau atu i te 300 i’oa, ’e ’ua pāpū iā’u ē te vai fa’ahou atu ā tei ’ore ā i ’itehia iā’u.

Nō te mea ’ua fa’ata’a-mau-hia te tahi mau i’oa tō Iesu nōna iho,¹² tē hina’aro nei au e hōro’a atu e pae i’oa ’e te mau upo’o parau e tano nō tātou tāta’itahi. Tē ani nei au ia ’outou ’ia hāmani i tā ’outou iho tāpura, ’a ha’api’i mārū noa ai ’outou i te ’ite ia Iesu ma tōna rahira’a i’oa. ’Ia nā reira ana’e ’outou, e ’ite mai ’outou ē tē vai ra te tahi atu mau i’oa—e tō rātou mau huru mai terā tō te Mesia—’o tā ’outou e hina’aro e rave i ni’a iho ia ’outou ’ei mau pipi nō te fafaura’a a Iesu.¹³

’A tahi, ’o Iesu te tīa’i māmoe maita’i.¹⁴ Nō te reira, ’ua ’ite Iesu i tāna māmoe,¹⁵ « e pi’i ’oia i tāna iho māmoe i tō rātou i’oa »,¹⁶ ’e, mai te ’ārenio a te Atua, ’ua hōro’a ’oia i tōna ora nō tāna māmoe.¹⁷ ’Oia ato’a, tē hina’aro nei Iesu ’ia riro tātou ’ei tīa’i māmoe maita’i, i roto iho ā ra i tō tātou iho ’utūafare ’e ’ei mau taea’e ’e ’ei mau tuahine i roto i te aupurura’a. Hō’ē rāve’a nō te fa’a’ite i tō tātou here nō Iesu ’o te fa’a’amura’a ïa i tāna mau māmoe.¹⁸ Nō te mau mamoe e ’ōvere noa ra, e haere te tīa’i māmoe i roto i te metepara nō te ’imi mai i te māmoe mo’e, ’e e fa’aea i pīha’i iho ia rātou e tae roa ’ia ho’i rātou i te vāhi pāruruhia.¹⁹ ’Ei mau tīa’i māmoe maita’i ’e mai te au i te fa’ati’ara’a a te ture o te fenua, e ti’a ia tātou e rave i te taime rahi nō te tāvini i te ta’ata i tō rātou fare. I roto i tā tātou aupurura’a, e ti’a i te parau poto tāireuira [SMS] ’e te ihi anoa ha’a ’ia fa’a’ohipahia nō te ha’amaita’i, e’ita ra e mono i te fārereira’a i te ta’ata iho.²⁰

’A piti, ’o Iesu Mesia te tahu’a rahi nō te mau mea maita’i e tae mai.²¹ Te ’itera’a ē tē fātata mai ra te hora nō tōna fa’asātaurora’a, ’ua parau Iesu : « ’I parau ’atu vau ia ’outou i teie nei mau parau, ’ia hauhia tō ’outou iā’u nei. E pohe tō ’outou i teie nei ao : E fa’aitoito rā, ’ua riro te rē o teie nei ao iā’u ».²² I teie mahana, ’a tāmau noa ai tō tātou ao i te hi’ora’a iāna iho ’e te ’āmahamaha, e hina’aro-rahi-hia ia tātou ’ia poro ’e ’ia fa’a’ohipa te maita’i, te hau ’e te tīa’ira’a. Noa atu te mau tāmatara’a o tō tātou orara’a tahito, e fa’atoro noa te fa’aro’o i te ’ananahi,²³ ma te ’ī i te tīa’ira’a, ’o te fa’ati’a ia tātou ’ia pāhono i te anira’a a Iesu ’ia vai maita’i noa.²⁴ E tauturu te orara’a i te ’evanelia ma te ’oa’oa ia tātou ’ia riro ’ei pipi nō te mau mea maita’i e tae mai.

Te tahi ato’a upo’o parau o Iesu ’oia ho’i, hō’ē noa tōna huru, inanahi, i teienei mahana ’e a muri noa atu.²⁵ Te au-maita’i-ra’a e huru ïa mai tō te Mesia. ’Ua rave noa Iesu i te hina’aro o tōna Metua,²⁶ ’e ’ua māhora noa tōna rima nō te fa’aora, nō te tauturu ’e nō te fa’aoraora ia tātou.²⁷ ’A vai ai tātou ma te au-maita’i-ra’a i roto i te orara’a i te ’evanelia, e riro rahi atu ā tātou mai ia Iesu te huru.²⁸ Ta’a noa atu tō te ao nei fāri’ira’a i te mau fa’ata’aminora’a ’ā’ano i roto tāna mau ’īato tuiro’o, ’a ha’afēto’ito’i-noa-hia ai te ta’ata ’e ’a hōpoi-’ē-hia atu e te mata’i rau o te ha’api’ira’a tumu,²⁹ te orara’a ma te au-maita’i-ra’a i te ’evanelia e tauturu ia tātou ’ia vai ’āueue ’ore ’e te pa’ari maita’i i te mau taime vero o te orara’a.³⁰ E nehenehe ato’a tātou e fa’a’ite i te au-maita’i-ra’a ma te fari’ira’a i te anira’a a peresideni Nelson ’ia « rave i te taime nō te Fatu ».³¹ E tae mai te pūai rahi pae vārua nō roto mai i te mau mea iti ’e te ha’iha’i³² mai te fa’ananeara’a « te mau peu mo’a ’e te mau ravera’a tāmau ti’a »³³ te pure i te mau mahana ato’a, te tātarahapara’a, te tuatāpapara’a i te pāpa’ira’a mo’a ’e te tāvinira’a ia vetahi ’ē.

’A maha, ’o Iesu tei mo’a i ’Īserā’ela nei.³⁴ ’Ua riro te orara’a o Iesu ’ei hōho’a nō te mo’ara’a. ’A pe’e ai tātou ia Iesu, e nehenehe tātou e riro mai tei mo’a i ’Īserā’ela nei.³⁵ E tupu tātou ma te mo’a ma te haere-pinepine-ra’a i te hiero, i reira te « mo’ara’a o te Fatu » i te nana’ora’ahia i ni’a a’e i te mau tomora’a ato’a. I te mau taime ato’a ’a ha’amori ai tātou i roto i te hiero, e ho’i tātou ma te fa’a’īhia i te mana teitei a’e nō te fa’ariro i tō tātou fare e vāhi mo’a.³⁶ Nō rātou ato’a ’aita e vai ra te parau fa’ati’a i teienei nō te tomo atu i roto i te hiero mo’a, tē ani atu nei au ia ’outou ’a haere atu e fārerei i tō ’outou ’episekopo ’e ’a fa’aineine ia ’outou iho nō te tomo atu ’aore rā nō te ho’i fa’ahou atu i roto i taua vāhi mo’a ra. E ha’amara’a te taime e ravehia i roto i te hiero i te mo’ara’a i roto i tō tātou orara’a.

Te i’oa hope’a o Iesu ’oia ho’i e ha’apa’o mau tāna ’e te parau mau.³⁷ Mai ia Iesu i vai ha’apa’o maita’i noa ’e te parau mau, tōna hina’aro rahi ’ia fa’a’ite tātou i teie mau maita’i i roto i tō tātou orara’a. ’Ia paruparu anae tō tātou fa’aro’o, e nehenehe tātou e pi’i ia Iesu, « e te Fatu, ’ia ora vau », mai ia Petero i tōna ha’amatara’a i te pāremo i roto i te miti ’ārepurepu nō Galilea.³⁸ I taua mahana ra, ’ua fa’atoro atu Iesu i tōna rima nō te fa’aora i te pipi e pāremo ra. ’Ua nā reira ’oia nō’u, ’e e nā reira ato’a ’oia nō ’outou. ’Eiaha e fa’aru’e ia Iesu—e ’ore roa ’oia e fa’aru’e ia ’outou !

’Ia vai ha’apa’o maita’i ana’e tātou ’e te parau mau, tē pe’e ra tātou i te pi’ira’a a Iesu ’a « fa’aea i roto iāna », e nehenehe te aura’a ē « ’a mau pāpū iā’u nei »,³⁹ ’Ia fa’aruru ana’e tātou i te mau uira’a, ’ia fa’a’ō’o’o-ana’e-hia tātou nō tō tātou fa’aro’o, ’ia fa’atoro-ana’e-hia tātou i te rima tāhitohito nā te feiā i roto i te fare rahi ’e te ’ā’ano o te ao nei, ’ia vai ha’apa’o maita’i noa tātou ’e ’ia vai parau mau noa. I roto i taua mau taime ra, e ha’amana’o tātou i te tāparura’a a Iesu, « ’a hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u ».⁴⁰ ’Ia nā reira ana’e tātou, e hōro’a mai ’oia ia tātou te fa’aro’o, te tīa’ira’a ’e te pūai e hina’arohia nō te fa’aea noa i pīha’i iho iāna.⁴¹

E te mau taea’e e te mau tuahine, tē hina’aro nei Iesu ’ia ’ite tātou iāna nō te mea ’o te i’oa ana’e tāna e amo nei i raro a’e i teie nei ao, tātou e nehenehe ai e fa’aorahia.⁴² ’O Iesu te ’ē’a, te parau mau ’e te ora—’aore roa e ta’ata e tae i te Metua ra, maori rā ’ei nā roto iāna.⁴³ ’O Iesu ana’e te ’ē’a ! Nō te reira tumu, ’ua pi’i mai Iesu, « ’a haere mai iā’u nei »,⁴⁴ « ’a pe’e mai iā’u »,⁴⁵ « ’a haere mai nā muri iho iā’u »,⁴⁶ ’e « ia ha’api’ihia ’outou e au ».⁴⁷

Ma tō’u ’ā’au ato’a, tē fa’a’ite pāpū nei au nō Iesu Mesia—ē tē ora nei ’oia ē, ’ua here ’oia ia ’outou ē, ’ua ’ite ’oia i tō ’outou i’oa. E Tamaiti ’oia nā te Atua,⁴⁸ te Tamaiti fānautahi a te Metua.⁴⁹ ’O ’oia tō tātou mato, tō tātou pare, tō tātou pāruru, tō tātou ha’apūra’a ’e tō tātou fa’a’ora.⁵⁰ ’O ’oia te māramarama o te ’ana’ana i roto i te pōuri.⁵¹ ’O ’oia tō tātou Fa’aora⁵² ’e tō tātou Tāra’ehara.⁵³ ’O ’oia te Ti’afa’ahoura’a ’e te Ora.⁵⁴ Tō’u hina’aro rahi mau, ’ia ’ite mau ’outou ia Iesu nā roto i tōna rahira’a i’oa ’e ’ia riro mai ’outou mai iāna te huru, ma te fa’ahōho’ara’a i tōna mau huru hanahana i roto i tō ’outou orara’a. I te i’oa o Iesu Mesia ra, ’āmene.

Fa’ata’ara’a

1. Te Ha’api’ira’a Tumu ’e te mau Fafaura’a 20:77.

2. Ioane 17:3 ; reta tei fa’ahuru-’ē-hia. ’Ia au i teie pure, ’ua ha’api’i te peresideni David O. McKay : « Nō roto mai teie parau i te hō’ē o te mau pure hanahana roa a’e—tē mana’o nei au, te pure faufa’a roa a’e—tei ’ore i fa’ahitihia i roto i teie nei ao, ’eiaha ra te pure a te Fatu. O te pure teie a te Mesia tei fa’ahitihia hou ’oia ’a tomo ai i roto i te ō nō Getesemane, i te pō i ho’ohia ai ’oia… ’Aita vau i ’ite i te tahi atu pene faufa’a rahi mau i roto i te bibilia » (i roto Conference Report, ’Ātopa 1967, 5).

3. Dale Carnegie, How to Win Friends and Influence People, rev. ed. (1981), 83.

4. Isaia 43:1 ; reta tei fa’ahuru-’ē-hia.

5. Hi’o Ioane 20:16.

6. Hi’o Iosepha Semita—’Ā’amu 1:17.

7. Fa’atoro Bibilia, « ’Īserā’ela ».

8. Mareko 3:17.

9. Hi’o Luka 6:14 ; Ioane 1:42.

10. Hi’o Russell M. Nelson, « ’Ua tuatāpapa vau hau atu e 2 200 pāpa’ira’a mo’a nō ni’a i te Fa’aora i roto e ono hepetoma : Teie te tahi ’o tā’u i ha’api’i mai », Inspiration (blog), 28 nō Fepuara 2017, ChurchofJesusChrist.org. Te pe’era’a i te ’ohipa i tupu, tē nā ’ō ra te peresideni Nelson, « ’ua riro vau ’ei ta’ata ta’a ’ē ! » (« Fa’ahaere mai i te mana o Iesu Mesia i roto i tō tātou oraraʼa », Liahona, Mē 2017, 39).

11. Russell M. Nelson, « Prophets, Leadership, and Divine Law » (pureraʼa ’ati ti’a te a’o nei nā te feiā ʼāpī paʼari, 8 nō Tēnuare 2017), broadcasts.ChurchofJesusChrist.org.

12. ’Ei hi’ora’a, ’o Iesu te Mesia, te Iehova Rahi, te Fānautahi mai te pohe mai ’e te Tāmaiti ’ōtahi a te Atua.

13. Hau atu i te anira’a a te peresideni Nelson ’ia tuatāpapa i te mau pāpa’ira’a mo’a nō ni’a ia Iesu i roto i te Tropical Guide, e nehenehe ato’a ’outou e tuatāpapa i te rahira’a i’oa o Iesu ma te hi’ora’a atu i te arata’i nō te pāpa’ira’a mo’a i raro a’e « Mesia, i’oa o ». E hina’aro ato’a paha ’outou e tuatāpapa i te buka a Elder Jeffrey R. Holland Witness for His Names (2019) ’e hō’ē a’ora’a nō te purera’a a Elder Ronald A. Rasband ’upo’o parau « Name Above All Names » (Brigham Young University–Hawaii devotional, 20 nō ’Ātopa 2020), speeches.byuh.edu.

14. Hi’o Ioane 10:11.

15. Hi’o Ioane 10:14.

16. Ioane 10:3.

17. Hi’o Ioane 10:11–15 ; 1 Nephi 11:31–33.

18. Hi’o Ioane 21:15–17

19. Mea au roa a’e nā’u te ’īritira’a a Iosepha Semita o te Luke 15:4, e nā ’ō ra, « ’O vai te ta’ata i roto ia ’outou e hō’ē hānere tāna mamoe, ’a mo’e ai hō’ē, e vaiiho i nā iva ’ahuru ma iva ’e e haere i roto i te metepara e ti’i i terā i mo’e, e tae roa ’ia ’itehia mai iāna ? » (i roto Luke 15:4, nota a, reta tei fa’ahuru-’ē-hia).

20. Mai tā Elder David A. Bednar i ha’api’i : « ’Ua mānao te rahira’a ’ua nava’i noa hō’ē parau pāpa’i [nō te aupurura’a]. Tē vai nei te taime e hina’arohia ’outou i te fare, ’e e ti’a ia ’outou e hi’o i te mau ta’ata i roto i te mata, nō te mea e fāri’i ’outou i te mau mana’o ’e te fa’aurura’a i roto i te fare ’o tā ’outou e ’ore roa atu e fāri’i » (« An Evening with Elder David A. Bednar », [broadcast for religious educators], 7 nō Fepuare 2020], broadcasts.ChurchofJesusChrist.org).

21. Hi’o Hebera 9:11.

22. Ioane 16:33.

23. Hi’o Jeffrey R. Holland, « ‘Remember Lot’s Wife’: Faith Is for the Future » (Brigham Young University devotional, 13 nō Tēnuare 2009), speeches.byu.edu. « E fa’atoro noa te fa’aro’o i te ananahi. E tāmau noa te fa’aro’o i te fa’atupu i te mau ha’amaita’ira’a ’e te parau mau ’e te mau tupura’a ’ohipa ’o te riro noa ’ei mea pāpū maita’i i roto i tō tātou orara’a ».

24. Hi’o Mataio 9:2 ; Mareko 6:50 ; Ioane 16:33 ; 3 Nephi 1:13 ; Te Ha’api’ira’a Tumu ’e te mau Fafaura’a 61:36.

25. Hi’o Hebera 13:8 ; hi’o ato’a Arata’i nō te mau pāpa’ira’a mo’a, « Te Mesia, te mau i’oa ’o ».

26. Hi’o Ioane 8:29.

27. Hi’o Alama 5:33 ; 19:36 ; 3 Nephi 9:14.

28. Hi’o, ’ei hi’ora’a, David A. Bednar, « More Diligent and Concerned at Home », Liahona, Novema 2009, 20 : « Te au-maita’i-ra’a ’o te hō’ē ïa parau tumu mau ’a tu’u ai tātou i te mau ni’u nō te hō’ē ’ohipa rahi i roto i tō tātou orara’a tāta’itahi … E ti’a ia tātou ’ia riro ’e ’ia riro hau mai ’ei mea au maita’i ».

29. Hi’o Ephesia 4:14.

30. Hi’o Mosia 5:15.

31. Russell M. Nelson, « Fa’ata’a i te taime nō te Fatu », Liahona, Novema 2021, 120.

32. Hi’o Alama 37:6.

33. E pereota teie tā peresideni Dallin H. Oaks i fa’ahiti noa e rave rahi taime i roto i tāna tavinira’a. Hi’o, ’ei hi’ora’a, « Hi’o mata ’e mata ’e Elder Oaks ’e Elder Ballard, Feiā ’Āpī Pa’ari » (broadcast for young single adults, 19 nō Novema 2017), ChurchofJesusChrist.org.

34. Hi’o 2 Nephi 9:18–19, 41.

35. I roto i te tahi ’ārui nō te feiā ’āpī pa’ari, ’ua ui atu te tuahine Wendy Nelson i te hō’ē uira’a, ma te mana’o ē, e taui te reira i te orara’a, e ha’amara’a te ti’aturira’a ’e e fa’atōpa i te hepohepo, e fa’aana’anatae, e ha’amara’a i te ha’amauuruurura’a ’e e fa’atōpa i te horuhoru, e tauturu i te arora’a i te fa’ahemara’a ’e e hōpoi mai te ’oa’oa, te tāmahanahana, te here ’e te hau. Teie te u’ira’a « E aha tā te feiā ’āpī pa’ari mo’a e rave ? » ’Ua fa’aitoito ’oia i muri iho ’ia fa’a’ohipa i teie uira’a i roto hō’ē noa taime i te mahana tāta’itahi, i roto e toru mahana i muri iho i te tahi. Hi’o « One Question That Can Change Your Life » (worldwide devotional for young adults, 15 nō Mē 2022), broadcasts.ChurchofJesusChrist.org.

36. Hi’o Te Ha’api’ira’a Tumu ’e te mau Fafaura’a 109:12–13, 22.

37. Hi’o Apokalupo 19:11.

38. Mataio 14:30.

39. Ioane 15:4. Te ta’o Hereni nō te parau abide e μείνατε (meinate ’aore rā menó), te aura’a parahi ’aore rā fa’aea.

40. Te Ha’api’ira’a Tumu ’e te mau Fafaura’a 6:36.

41. ’Ua fa’a’ite Elder Jeffrey R. Holland i te hō’ē mahana, i roto te reo paniora te pereota paretāne « abide in me » e ’īritihia « permaneced en mi », ’ua parau fa’ahou ’oia :« te aura’a o te reira e ’fa’aea—tera rā e fa’aea e a muri noa atu.’ […] E haere tāmau mai, nō ’oe ’e nō te mau ui ato’a e haere mai nā muri, ’e i te tauturura’a i te tahi ’e te tahi ’ia vai pūai noa e tae noa atu i te hope’a » (« Abide in me », Liahona, Me 2004, 32).

42. Hi’o 2 Nephi 31:21.

43. Hi’o Ioane 14:6.

44. Mataio 11:28 ; 3 Nephi 9:14, 22.

45. Mataio 16:24 ; Luka 18:22 ; Ioane 21:19 ; 2 Nephi 31:10.

46. Apokalupo 3:4 ; Mose 6:34.

47. Hi’oMataio 11:29 ; Te Ha’api’ira’a Tumu ’e te mau Fafaura’a 19:23.

48. Hi’o 3 Nephi 9:15.

49. Hi’o Ioane 1:14 ; Alama 5:48.

50. Hi’o 2 Samuel 22:2–3.

51. Hi’o Te Ha’api’ira’a Tumu ’e te mau Fafaura’a 6:21.

52. Hi’o Luka 2:11.

53. Hi’o Te Haʼapiʼiraʼa Tumu ʼe te mau Fafaura’a 18:11–13.

54. Hi’o Ioane 11:25.