Mānava ia ’oe i roto i teie ve’a
Mau parau rahi nō te 192ra’a o te ’āmuira’a rahi nō ’Ātopa
E mea hau ’o Temple Square i te 192ra’a o te ’āmuira’a rahi nō ’Ātopa a te ’Ēkālesia. ’Ua tāpe’ahia te patura’a o te mau tahua ’e te fa’anahora’a pāto’ira’a ’āueuera’a fenua, ’e tō te reira ato’a māniania, i ni’a i te hiero tahito ra nō Roto Miti (Utah, Marite).
E hau ’ē rā e fa’a’ī i tō tātou mau ’utuāfare ’e tō tātou ’ā’au ’ia tāpe’a tātou i te māniania o te ao nō te fa’aro’o i te mau peropheta ora ’e te mau ’āpōsetolo ora.
« Nā ni’a atu i teie terōno i teie mahana ’e ananahi, e fa’aro’o tāmau mai ā ’outou i te parau mau », ’ua ha’api’i mai te peresideni Russell M. Nelson ’e terā ’ana’ana i roto i tōna mata. « ’A ani i te Fatu nā roto i te pure ’ia ha’apāpū mai ē, e parau mau ānei te mau mea tā ’outou i fa’aro’o » (hi’o i te ’api 29).
I roto i te ’āmuira’a, ’ua ha’api’i mai te mau ta’ata a’o i te mau parau mau e ha’apūai i te ’itera’a pāpū, mai te ravera’a ’e te ha’apa’ora’a i te mau fafaura’a mo’a (hi’o i te mau ’api 95 ’e 73), te fāri’ira’a i te heheura’a ta’ata hō’ē (hi’o i te ’api 16), ’e te ti’ara’a pipi (hi’o i te ’api 77).
’Ua parau te peresideni Nelson : « Mai te mea e fa’ariro ’outou i te ha’apa’ari-tāmau-noa-ra’a i tō ’outou ’itera’a pāpū ’ei ’ohipa e rave mātāmua roa, ’a hi’o maīte i te mau temeio e tupu mai i roto i tō ’outou orara’a » (hi’o i te ’api 95).
I te otira’a te ’āmuira’a rahi, ’ua ha’amata fa’ahou ā te ’ohipa i ni’a i te hiero nō Roto Miti. ’Ua ha’amata ato’a te ’ohipa ’aore rā te mau fa’aineinera’a nō 125 hiero ’ati a’e i te ao nei, tei fa’aarahia ’aore rā tei patuhia. Tei roto ato’a ïa nā hiero ’āpī e 18 tā te peresideni Nelson i fa’aara i roto i te tuha’a purera’a hope’a o te ’āmuira’a (hi’o i te ’api 121).
« Tē fa’ariro nei [te Fatu] i tōna mau hiero ’ei mau vāhi ’ōhie ’ia haere », ’ua parau te peresideni Nelson. « Tē fa’a’oi’oi nei ’oia i te terera’a o te patura’a i te mau hiero. Tē fa’ananea nei ’oia i tō tātou ’aravihi ’ia tauturu i te ha’aputuputura’a ia ’Īserā’ela » (hi’o i te ’api 121).