E aha te mea e parau mau ?
’O ’oia te puna nō te mau parau mau ato’a. Tē fāri’i nei Te ’Ēkālesia a Iesu Mesia i te Feiā Mo’a i te mau Mahana Hope’a nei i te mau parau mau ato’a tā te Atua e fa’atae mai i tāna mau tamari’i.
E a’u mau taea’e ’e e a’u mau tauhine here, māuruuru ia ’outou pā’āto’a nō teie tuha’a purera’a fa’auruhia ! Mai tā tātou ’āmuira’a i te ’āva’e ’Ēperēra i ma’iri a’e nei e tae mai i teie taime, ’ua ’ite tātou e rave rahi tupura’a ’ohipa nā te ao nei, mai te mau ’ohipa e ha’amāuiui i te ’ā’au e tae roa i te mau ’ohipa fa’ahiahia roa.
Tē ’oa’oa nei mātou nō te mau parau fa’a’ite nō ni’a i te mau ’āmuira’a rarahi a te feiā ’āpī tei fa’atupuhia nā te ao ato’a nei.1 I roto i te reira mau ’āmuira’a, ’ua ha’api’i mai tā tātou feiā ’āpī hanahana ē, noa atu te ’ohipa e tupu i roto i tō rātou orara’a, nō roto mai tō rātou pūai rahi a’e i te Fatu.2
Tē ’oa’oa nei mātou i te mea ē, te rahi noa atu ra te mau hiero e patuhia nei nā te ao nei. Nā roto i te ha’amo’ara’a o te hiero ’āpī tāta’itahi, e tae mai te hō’ē pūai hanahana hau atu, i roto i te ao nei nō te fa’aitoito ia tātou ’e nō te pāto’i i te mau tauto’ora’a pūai a te ’enemi.
Te hāmani-’ino-ra’a ’o te mana ïa o te ’enemi. E hara rahi.3 ’Ei peresideni nō te ’Ēkālesia, tē ha’apāpū nei au i te mau ha’api’ira’a a te Fatu Iesu Mesia nō ni’a i taua fifi ra. Tē hina’aro nei au e parau pāpū maita’i atu : te mau huru hāmani-’ino-ra’a ato’a o te mau vahine, te mau tamari’i, ’aore rā te tahi atu, e ’ohipa ’ino rahi ïa i mua i te Fatu. E ta’i ’oia ’e e ta’i au i te mau taime ato’a e ha’apēpēhia te hō’ē ta’ata. E ta’i ’oia, ’e e ta’i tātou pā’āto’a nō te ta’ata tāta’itahi tei fāri’i i te mau huru hāmani-’ino-ra’a ato’a. Te feiā e rave nei i teie mau ’ohipa ha’iri’iri, e ’ere ïa i mua noa i te ture a te ta’ata e amo ai rātou i te hopoi’a, e fa’aruru ato’a rā rātou i te riri ’ū’ana o te Atua.
E rave rahi matahiti i teienei tō te ’Ēkālesia ravera’a e rave rahi rāve’a nō te pāruru, i te mau tamari’i iho ā rā, i mua i te mau hāmani-’ino-ra’a. E rave rahi rāve’a tauturu i ni’a i te tahua natirara a te ’Ēkālesia. Tē ani atu nei au ia ’outou ’ia tuatāpapa i te reira.4 ’Ua ha’amauhia te reira mau arata’ira’a nō te pāruru i te ta’ata hapa ’ore. Tē fa’aitoito nei au ia tātou tāta’itahi ’ia ara maita’i i ni’a i te mau ta’ata ato’a, e riro i te hāmani-’ino-hia ’e ’ia ha’a ’oi’oi nō te pāruru ia rātou. E’ita te Fa’aora e fa’ati’a i te mau hāmani-’ino-ra’a, ’e ’ei mau pipi nāna, e’ita ato’a tātou.
E mau rāve’a pe’ape’a ’ē atu ā tā te ’enemi. I roto i te reira, tē vai ra tāna mau tauto’ora’a nō te ha’apōiri i te ’ōti’a i rotopū i te mea e parau mau ’e i te mea hape. Nā te rahira’a ha’amāramaramara’a e vai nei e ha’afifi rahi nei ’ia fa’ata’a i te parau mau.
Tē fa’aha’amana’o mai nei teie tāmatara’a iā’u, i te hō’ē ’ohipa tā māua te tuahine Nelson i fārerei i tō māua haerera’a e fārerei i te hō’ē ti’a fa’atere, i roto i te hō’ē fenua e mea iti roa te ta’ata tei fa’aro’o i te parau nō Iesu Mesia. ’Aita i maoro a’e nei, ’ua ro’ohia teie hoa rū’au i te ma’i rahi. ’Ua parau mai ’oia ia māua ē, i terā rahira’a mahana ’a tārava noa ai ’oia i ni’a i te ro’i, pinepine ’oia i te hi’o noa i te aroaro ma te ui ē, « E aha te mea e parau mau ? »
E rave rahi i ni’a i te fenua nei « o tei fa’a’erehia i te parau mau nō te mea ’aita rātou i ’ite i te vāhi i reira e ’itea mai ai ».5 E hina’aro te tahi pae e tūra’i ia tātou ’ia ti’aturi ē, e mea tā’ōti’ahia te parau mau—’e e ti’a i te ta’ata tāta’itahi ’ia fa’aoti ’oia iho e aha te parau mau. E riro te reira huru ti’aturira’a ’ei moemoeā nō te feiā e feruri hape ē, e’ita ato’a rātou e amo i te hōpoi’a i mua i te Atua.
E te mau taea’e ’e te mau tuahine here ē, ’o te Atua te puna nō te mau parau mau ato’a. Tē fāri’i nei Te ’Ēkālesia a Iesu Mesia i te Feiā Mo’a i te mau Mahana Hope’a nei i te parau mau ato’a tā te Atua e fa’atae mai i tāna mau tamari’i, tei ha’api’ihia mai i roto ānei i te hō’ē fare tuatāpapara’a ’ihi, ’aore rā, tei fāri’ihia nā roto ānei i te heheura’a ’āfaro ti’a nō ’ō mai iāna ra.
Nā ni’a atu i teie terōno i teie mahana ’e ananahi, e fa’aro’o tāmau mai ā ’outou i te parau mau. ’A tāpa’o i te mau mana’o tei fa’atupu i te ’ana’anatae i roto ia ’outou, ’e te mau mana’o e puta mai i roto i tō ’outou vaerua ’e e vai roa i roto i tō ’outou ’ā’au. ’A ani i te Fatu nā roto i te pure ’ia ha’apāpū mai ē, e parau mau ānei te mau mea tā ’outou i fa’aro’o.
’Ua here au ia ’outou, e tō’u mau taea’e ’e mau tuahine here. Tē pure nei au ’ia hōro’a mai teie ’āmuira’a i te fa’a’amua ’oa’oa pae vārua ’o tā ’outou e ’imi nei. Nā roto i te i’oa mo’a o Iesu Mesia, ’āmene.