Upo’oti’a i ni’a i te ao nei ’e ’ia noa’a te ora
’Ia fa’afa’aea ’outou i te pūai, te pāpū ’ore, ’e te hepohepo o teie ao nā roto i te upo’oti’ara’a i ni’a i te ao nei nā roto i tā ’outou mau fafaura’a i te Atua.
E au mau taea’e, e au mau tuahine here, e māuruuru rahi tō’u ’ia fāri’i ia ’outou i teie sābati po’ipo’i hanahana. Tē vai tāmau nei ’outou i roto i tō’u ferurira’a. E fa’ahiahia rahi tō’u ’ia ’ite i tā ’outou huru ravera’a i te mau taime ato’a e ’ite ’outou i te tahi atu mau ta’ata i roto i te fifi. E maere rahi tō’u nō te fa’aro’o ’e te ’itera’a pāpū tā ’outou e fa’a’ite tāmau noa nei. Tē ta’i nei au i ni’a i te mau māuiui o tō ’outou ’ā’au, tō ’outou mau ’ino’ino, ’e tā ’outou mau ha’ape’ape’ara’a. ’Ua here au ia ’outou. Tē ha’apāpū atu nei au ia ’outou ē, tē here nei tō tātou Metua i te ao ra ’e tāna tamaiti here ’o Iesu Mesia, ia ’outou. ’Ua ’ite maīte rāua i tō ’outou huru orara’a, tō ’outou maita’i, tō ’outou mau hina’aro, ’e tā ’outou mau pure nō te ani i te tauturu. Tē pure tāmau noa nei au ’ia ’ite ’outou i tō rāua here ia ’outou.
E mea faufa’a roa te ’itera’a i tō rāua here, nō te mea, mai te huru ra ē, tē ’arohia nei tātou i te mau mahana ato’a nā te mau ’arora’a u’ana o te mau parau ’āpī. I tupu nā paha te tahi mau mahana a hina’aro ai ’outou e ’o’omo i tō ’outou piripou ta’otora’a, ’a ha’amenemene ai ia ’outou ’e ’a ani i te ta’ata ’ia fa’aara mai ia ’outou ’ia hope ana’e te ’ārepurepura’a.
Terā rā, e au mau taea’e, e au mau tuahine here, e rave rahi mau mea nehenehe e tīa’i mai nei ia tātou. I te mau mahana i muri nei, e ’ite tātou i te mau fa’a’itera’a rahi a’e o te mana o te Fa’aora ’aita ā tō te ao nei i ’ite a’enei. I rotopu i teienei taime ’e i te taime e ho’i mai ai ’oia « ma te mana ’e te hanahana rahi »,1 e hōro’a mai ’oia i te mau ha’amaita’ira’a e rave rahi, ’e te mau temeio i ni’a i te feiā ha’apa’o maita’i.
’Ātirā noa atu, te ora nei tātou i teie taime i roto i te hō’ē tau fifi roa a’e i roto i te ’a’amu o te ao nei. E fa’atupu te mau fifi ’e te mau tāmatara’a i te mana’o teimaha ’e te rohirohi i roto i te mau ta’ata e rave rahi. Terā rā, ’a hi’o nā i te hō’ē ’ohipa i tupu ’aita i maoro a’e nei, o tē nehenehe paha e ha’amāramarama ia ’outou nō ni’a i te huru e nenehe ia ’outou ’e iā’u nei ’ia ’ite i te fa’afa’aeara’a.
’Āita i maoro a’e nei, i te mahana ’ōpani iriti nō te hiero nō Washington D.C., ’ua fa’aro’o te hō’ē melo nō te tomite ’ōpani iriti i te hō’ē ’āparaura’a māramarama a arata’i ai ’oia e rave rahi pāpa’i ve’a tu’iro’a nā roto i te hiero. ’Ua here roa te hō’ē ’utuāfare ’āpī i taua tere ha’apurorora’a parau ’āpī. ’Aita te hō’ē pāpa’i ve’a i fa’aea i te ui i te mau uira’a nō ni’a i te « tere » o te hō’ē ta’ata haere hiero a haere noa ai ’oia nā roto i te hiero. ’Ua hina’aro ’oia ’ia ’ite ē, e fa’ahōho’a anei te tere hiero i te mau tāmatara’a i roto i te tere o te hō’ē ta’ata i roto i te orara’a nei.
’Ua paraparau te hō’ē tamaiti o te ’utuāfare. I te tomora’a te pupu ta’ata i roto i te piha ’oro’a hiero, ’ua fa’atoro te tamaiti i te fata, i reira te ta’ata e tūturi ai nō te rave i te mau fafaura’a ’e te Atua, ē, nā ’ō a’era, « Aueee, e mea au roa. Teie te hō’ē vāhi nō te ta’ata ’ia fa’afa’aea i roto i tō rātou tere i te hiero ».
’Aita vau i pāpū ē, ’ua ’ite anei teie tamaiti i te hohonu o tāna mau parau. E mea pāpū ē, ’aita roa ’oia i ’ite i te tā’amura’a ’āfaro ti’a i rotopu i te ravera’a i te hō’ē fafaura’a ’e te Atua i roto i te hiero, ’e te parau fafau maere a te Fa’aora :
« E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, ’e nā’u ’outou e fa’aora.
« ’A rave mai i tā’u zugo i ni’a ia ’outou, ’e ’ia ha’api’ihia ’outou e au ; … ’e e nōa’a ho’i te ora i tō ’outou vārua.
« Tē marū nei ho’i tā’u zugo ’e tē māmā nei tā’u hōpoi’a ».2
E te mau taea’e ’e te mau tuahine here, tē ’oto nei au nō rātou e fa’aru’e nei i te ’Ēkālesia nō te mea te mana’o nei rātou ē, e tītaura’a rahi i ni’a ia rātou te rirora’a ’ei melo. ’Aita ā i ’itehia atura ia rātou ē, te ravera’a ’e te ha’apa’ora’a i te mau fafaura’a, e fa’ariro te reira i te orara’a ’ei mea ’ōhie a’e ! Te mau ta’ata ato’a e rave i te mau fafaura’a i roto i te vāhi pāpetitora’a ’e i roto i te hiero—’e e ha’apa’o i te reira—’ua fa’arahi ïa rātou i te fāna’ora’a i te mana o Iesu Mesia. E tenā na, ’a feruri i te reira parau mau maere !
Te tao’a hōro’a nō te fa’aturara’a i te mau fafaura’a i te Atua, o te mana ïa nō te ra’i—te mana e ha’apūai ia tātou nō te fa’aruru maita’i a’e i tō tātou mau tāmatara’a, mau fa’ahemara’a, ’e mau māuiui o te ’ā’au. E fa’a’ohie te reira mana i tō tātou haere’a. Te feiā e ha’apa’o i te mau ture teitei a’e a Iesu Mesia, e fāna’o rātou i te mana teitei a’e. Nō reira, e fāri’i te mau tīa’i fafaura’a i te hō’ē huru fa’afa’aeara’a ta’a ’ē nō roto mai i tō rātou auta’atira’a o te fafaura’a ’e te Atua.
Hou a hōro’a ai te Fa’aora iāna iho i roto i te mauiui rahi nō Getesemane ’e nō Karavaria, nā ’ō atura ’oia i tāna mau ’āpōsetolo, « E pohe tō ’outou i teie nei ao, e fa’aitoito rā ’ua riro te rē o teie nei ao iā’u ».3 I muri mai, ’ua tāparu ’o Iesu ia tātou tāta’itahi ’ia rave ato’a i te reira a parau ai ’oia, « Te hina’aronei au ’ia upo’oti’aoutoui te ao nei ».4
E te mau taea’e ’e te mau tuahine here, tā’u parau poro’i ia ’outou i teie mahana ’oia ho’i, maoti tōna upo’oti’ara’a i ni’a i teie ao hi’a, ’e maoti tāna tāra’ehara nō tātou tāta’itahi, e nehenehe ato’a ’outou e upo’oti’a i ni’a i teie nei ao tei ’ī roa i te hara, te pipiri ’e te rohirohi.
Maoti tō te Fa’aora fa’aorara’a ia tātou tāta’itahi i te paruparu, te mau hape ’e te hara, nā roto i tāna tāra’ehara hope ’ore, ’e maoti tōna fāri’ira’a i te mau māuiui ato’a, te pe’ape’a, ’e te mau hopoi’a ’aore ā ’outou i fāri’i a’enei,5 nō reira, mai te mea e tātarahapa mau ’outou ’e e ’imi ho’i i tāna tauturu, ’e nehenehe ’outou e ti’a i ni’a a’e i teie ao pāpū ’ore i teie taime.
E nehenehe ’outou e upo’oti’a i ni’a i te mau ati pae vārua ’e te rohirohi i te pae manava o teie nei ao, mai te mana’o fa’ateitei, te teoteo, te riri, te ’ohipa ’ino, te hae, te nounou, te pohehae, ’e te mata’u. Noa atu te mau fa’anevanevara’a ’e te mau ’ohipa tāviri e ’ohu nei ati a’e ia tātou, e ’itehia ia ’outou te fa’afa’aeara’a mau—’oia ho’i te māmā ’e te hau—noa atu i roto i tō ’outou mau fifi teimaha.
E toru uira’a tumu tā teie parau mau faufa’a e fa’atupu mai :
’A tahi, e aha te aura’a ’ia upo’oti’a i ni’a i te ao ?
’A piti, Nāhea tātou ’ia rave i te reira ?
’E a toru, nāhea te upo’oti’ara’a i ni’a i te ao i te ha’amaita’i i tō tātou orara’a ?
E aha te auraʼa ’ia upo’oti’a i ni’a i te ao ? Te aura’a, ’oia ho’i, e upo’oti’a i ni’a i te fa’ahemara’a ’ia ha’apa’o i te mau mea o teie nei ao hau atu i te mau mea a te Atua. Te aura’a, ’oia ho’i, ti’aturi i te mau ha’api’ira’a tumu a te Mesia hau atu i te mau ha’api’ira’a a te ta’ata nei. Te aura’a, ’oia ho’i, ’ia ’oa’oa i te parau mau, ’ia fa’ahapa i te ha’avarevare, ’e te rirora’a ’ei mau pipi ha’eha’a nā te Mesia ».6 Te aura’a, ’oia ho’i, e mā’iti ’ia ha’apae i te mau mea ato’a e fa’aātea i te vārua. Te aura’a, ’oia ho’i, ’ia ineine nō te « ha’apae » tae roa atu i tā tātou mau hara au roa a’e.7
I teie nei, e ’ere roa atu te upo’oti’ara’a i ni’a i te ao nei, i te rirora’a ’ei ta’ata maita’i roa i roto i teie orara’a, e ’ere ato’a te mo’era’a tō ’outou mau fifi mai te au i te ’ohipa tahutahu, ’e’ita roa atu ïa. ’E ’ere ato’a te oreraa tātou e rave fa’ahou i te mau hape. Terā rā, te aura’a o te upo’oti’ara’a i ni’a i te ao nei, o te tupura’a ïa i te rahi tō ’outou pūai nō te pāto’i i te hara. E marū tō ’outou ’ā’au ’ia tupu ana’e i te rahi tō ’outou fa’aro’o ia Iesu Mesia.8 Te aura’a nō te upo’oti’ara’a i ni’a i te ao nei, o te tupura’a ïa i te rahi i te here i te Atua ’e i tāna tamaiti here, hau atu i tō ’outou here i te hō’ē ta’ata ’aore rā i te tahi atu mea.
Nō reira, nāhea ïa tātou i te upo’oti’a i ni’a i te ao nei ? ’Ua ha’api’i mai te ari’i Beniamina ia tātou e nāhea. ’Ua parau ’oia ē, « Te ta’ata tino nei, ’o te ’enemi ïa o te Atua » ’e e vai noa ’oia mai te reira ē a muri noa atu « maori rā ’ia auraro ’oia i te parau a te Vārua Maita’i, ’e ’ia fa’aru’e i te mau peu a te ta’ata tino nei, ’e ’ia riro ’ei ta’ata mo’a nā roto i te tāra’ehara a te Mesia ra te Fatu ».9 I te mau taime ato’a e ’imi ’outou ’ia pe’e i te mau fa’aurura’a a te Vārua, i te mau taime ato’a e rave ’outou i te hō’ē ’ohipa maita’i—te mau ’ohipa ’e’ita « te ta’ata tino » e rave, tē upo’oti’a ra ïa ’outou i ni’a i te ao nei.
E ’ere te upo’oti’ara’a i ni’a i te ao nei i te hō’ē ’ohipa o tē tupu i roto i te hō’ē mahana ’aore rā e piti. E tupu te reira i te roaraa o te hō’ē orara’a ’a ha’apa’o tāmau ai tātou i te ha’api’ira’a tumu a te Mesia. E fa’atupu tātou i te fa’aro’o ia Iesu Mesia nā roto i te tātarahapara’a i te mau mahana ato’a ’e nā roto i te ha’apa’ora’a i te mau fafaura’a o tē hōro’a mai ia tātou i te mana. E fa’aea noa tātou i ni’a i te ’ē’a o te fafaura’a, ’e e ha’amaita’ihia tātou i te maita’i o te pūai i te pae vārua, te heheura’a nā te ta’ata iho, te hō’ē fa’aro’o tupu tāmau noa i te rahi ’e i te aupurura’a a te mau melahi. E nehenehe te orara’a i te ha’api’ira’a tumu a te Mesia e fa’atupu mai i te ’ohura’a maita’i pūai roa a’e, ma te fa’atupu i te hō’ē itoito pae vārua i roto i tō tātou orara’a.10
Mai te mea e fa’aitoito tātou i te ha’apa’o i te mau ture teitei a’e a Iesu Mesia, e ha’amata tō tātou ’ā’au ’e tō huru mau i te taui. E fa’ateitei te Fa’aora ia tātou i ni’a a’e i te ’umera’a a teie ao hi’a nā roto i te ha’amaita’ira’a ia tātou i te aroha rahi a’e, te ha’eha’a, te pīpiri ’ore, te hāmani maita’i, te ha’avī iāna iho, te hau, ’e te fa’afa’aeara’a.
I teienei, e mana’o paha ’outou ē, ’ua hōho’a roa te reira i te hō’ē ’ohipa pae vārua teimaha, hau atu i te fa’afa’aeara’a. Terā rā, teie te parau mau rahi : tē parau onoono nei te ao ē, te mana, te mau tao’a rahi, te ro’o ’e te mau arearearaa o te tino, e hōro’a mai te reira i te ’oa’oa, ’e’ita roa atu ïa ! ’E’ita tā reira e nehenehe ! Tā te reira e hōro’a mai, ’o te hō’ē ïa ’ohipa mono faufa’a ’ore nō « te huru ha’amaita’ihia ’e te ’oa’oa » o te feiā « e ha’apa’o i te mau fa’auera’a a te Atua ».11
Te parau mau maori rā, e mea rohirohi a’e ’ia ’imi i te ’oa’oa i te vāhi ’e’ita roa atu e itehia ! Terā rā, mai te mea ē, e nati ’outou ia ’outou i ni’a ia Iesu Mesia, ’e e rave i te ’ohipa pae vārua i tītauhia nō te upo’oti’a i ni’a i te ao nei, tōna ’e tōna ana’e te mana nō te fa’ateitei ia ’outou i ni’a a’e i te ’umera’a a teie nei ao.
I teienei, nāhea te upo’oti’ara’a i ni’a i te ao nei i te ha’amaita’i i tō tātou orara’a ? E mea māramarama roa te pāhonora’a : te tomora’a i roto i te hō’ē auta’atira’a nō te fafaura’a ’e te Atua, ’e tā’amu te reira ia tātou i ni’a iāna ’a fa’ariro ai i te mau mea ato’a nō ni’a i te orara’a ’ei mea ’ōhie a’e. ’Eiaha na e hape mai : ’aita vau i parau ē, te ravera’a i te mau fafaura’a e fa’a’ohie te reira i te orara’a. E tīa’i rā i te pāto’ira’a, nō te mea ’aita te ’enemi e hina’aro ’ia ’itehia ia ’outou te mana o Iesu Mesia. Terā rā, mai te mea e nati ’outou ia ’outou i ni’a i te Fa’aora, te aura’a ra, e roa’a ia ’outou tōna pūai ’e tōna mana tāra’ehara.
Te parau fa’ahou nei au i te hō’ē ha’api’ira’a hohonu a te peresideni Ezra Taft Benson : « Te mau tāne ’e te mau vahine o tē fa’afāriu i tō rātou orara’a i te Atua ra, e ’ite ïa rātou ē, e rahi atu ā te mau mea tāna e nehenehe e rave i roto i tō rātou orara’a hau atu i tā ratou iho e nehenehe e rave. E fa’arahi ’Oia i tō rātou ’oa’oa, e fa’a’a’ano i tā rātou hi’ora’a, e hōro’a i te ’ana’anatae i tō rātou ferurira’a, … e fa’ateitei i tō rātou vārua, e fa’ananea i tō rātou mau ha’amaita’ira’a, e fa’arahi i tā rātou mau rāve’a, e tāmāhanahana i tō rātou vārua, e fa’atupu i te hoa, ’e e nini’i mai i te hau ».12
E pe’e teie mau ha’amaita’ira’a faito ’ore i te feiā e ’imi i te pāturura’a a te ra’i nō te tauturu ia rātou ’ia upo’oti’a i ni’a i teie ao. Nō reira, tē fa’atae nei au i te mau melo o te ’Ēkālesia tā’ato’a i te fa’auera’a tā’u i hōro’a i tō tātou feiā ’āpī pa’ari i te ’āva’e Mē i ma’iri a’e nei. ’Ua fa’aitoito ’ū’ana vau ia rātou—’e tē tāparu nei au ia ’outou i teie nei—’ia ha’apa’o i tō ’outou iho ’itera’a pāpū nō Iesu Mesia ’e tāna ’evanelia. ’A ha’a nō te reira. ’A aupuru i te reira ’ia tupu i te rahi. ’A fa’a’amu i te reira i te parau mau. ’Eiaha e ha’avi’ivi’i i te reira i te mau ha’api’ira’a hape a te mau tāne ’e te mau vahine ti’aturi ’ore. Mai te mea e fa’ariro ’outou i te ha’apa’ari-tāmau-noa-ra’a i tō ’outou ’itera’a pāpū ’ei ’ohipa e rave mātāmua roa, ’a hi’o maīte i te mau temeio e tupu mai i roto i tō ’outou orara’a.13
Tā’u tāparura’a ia ’outou i teie po’ipo’i maori rā, ’ia fa’afa’aea ’outou i te pūai, te pāpū ’ore, ’e te hepohepo o teie ao nā roto i te upo’oti’ara’a i ni’a i te ao nei nā roto i tā ’outou mau fafaura’a i te Atua. ’A fa’a’ite iāna nā roto i tā ’outou mau pure ’e tā ’outou mau ’ohipa ē, e mana’o pāpū tō ’outou nō ni’a i te upo’oti’ara’a i ni’a i te ao nei. ’A ani iāna ’ia ha’amāramarama i tō ’outou vārua ’e ’ia fa’atae mai i te tauturu tā ’outou e hina’aro. I te mau mahana ato’a, ’a tāpa’o i te mau mana’o e tupu mai i te mau taime a pure ai ’outou ; i muri iho a rave itoito i te reira. ’A hōro’a hau atu i te taime i roto i te hiero ’e ’a ’imi ’ia māramarama e aha tā te hiero e ha’api’i nei ia ’outou ’ia ti’a nā ni’a a’e i teie ao hi’a.14
Mai tā’u i parau na, ’ua riro te ha’aputuputura’a ia ’Īterā’era ’ei ’ohipa faufa’a rahi roa a’e e tupu nei i ni’a i te fenua i teie mahana. Hō’ē tuha’a faufa’a roa nō te reira ha’aputuputura’a, ’o te fa’aineinera’a ïa i te hō’ē nuna’a pāpū, tē ineine ’e te ti’amā nō te fāri’i i te Fatu ’ia ho’i fa’ahou mai ’oia ; e nuna’a tei mā’iti a’ena ia Iesu Mesia i ni’a i teie ao hi’a ; e nuna’a ’o tē ’oa’oa nei i roto i tō rātou ti’amāra’a ’ia ora i te mau ture teitei a’e, ’e te mo’a a’e a Iesu Mesia.
Tē ti’aoro nei au ia ’outou e tō’u mau taea’e ’e mau tuahine here, ’ia riro mai ’outou taua nuna’a parau ti’a ra. Poihere maīte ’e ’a fa’atura i tā ’outou mau fafaura’a hau atu i te tā’ato’ara’a o te tahi atu mau fa’aotira’a. Mai te mea e vaiiho ’outou i te Atua ’ia upo’oti’a i roto i tō ’outou orara’a, te fafau atu nei au ia ’outou ē, e fāri’i ’outou i te hau rahi atu, te ti’aturi, te ’oa’oa, ’e, ’oia ïa, te fa’afa’aeara’a.
Nā roto i te mana o te ’āpōsetolora’a mo’a tei hōro’ahia mai iā’u nei, tē ha’amaita’i nei au ia ’outou i roto i tā ’outou tauto’ora’a nō te upo’oti’a i ni’a i teie ao. Tē ha’amaita’i nei au ia ’outou nō te fa’arahi i tō ’outou fa’aro’o ia Iesu Mesia ’e nō te ha’api’i mai nāhea ’ia fāna’o maita’i a’e i tōna mana. Tē ha’amaita’i nei au ia ’outou ’ia ti’a ia ’outou ’ia ’ite i te parau mau i roto i te parau tano ’ore. Tē ha’amaita’i nei au ia ’outou ’ia ha’apa’o ’outou i te mau mea a te Atua hau atu i te mau mea o teie ao. Te ha’amaita’i nei au ia ’outou ’ia ’ite ’outou i te mau hina’aro o te mau ta’ata ’ati a’e ia ’outou, ’e ’ia ha’apūai i tei herehia e ’outou. Maoti tō Iesu Mesia upo’oti’ara’a i ni’a i teie ao, e upo’oti’a ato’a ’outou. Tē fa’a’ite pāpū nei au i te reira i te i’oa mo’a ’o Iesu Mesia, ’āmene.