Tē tāvini nei te feiā fa’atere o te ’Ēkālesia i te mau fenua e rave rahi

’Ua tāmau noa te feiā fa’atere o te ’Ēkālesia i tā rātou tāvinira’a nā te ao nei, i nā ’āva’e e ono i ma’iri a’e nei. Teie te tahi o tā rātou mau ’ohipa mai te ’āmuira’a rahi nō ’Ēperēra mai.

’Ua feruri te peresideni Oaks nō ni’a i te fa’aurura’a o te mau vahine

I roto i te hō’ē video nā te ’Ēkālesia tei matara i te ’āva’e Tetepa ra, ’ua parauparau te peresideni Dallin H. Oaks, te tauturu hō’ē i roto i te Peresidenira’a Mātāmua, nō ni’a i te fa’aurura’a o tōna metua vahine ’e tōna māmā rū’au, tei tauturu iāna ’ia fa’ahotu i te hō’ē ’itera’a pāpū ’e te fa’aro’o i te Fatu. ’Ua tāmau noa te fa’aurura’a a te mau vahine i roto i tōna ’orara’a ’e tāna vahine, te tuahine June Oaks, ’e i muri a’e i tōna pohera’a, tāna vahine, te tuahine Kristen Oaks.

« Tā’u mau ’orometua ha’api’i faufa’a roa a’e i te pae nō te ha’api’ira’a tumu a te ’Ēkālesia ’e te tāvinira’a ’e te mau hōpoi’a ’utuāfare—i ni’a roa te ’āna’ira’a te mau peropheta o te ’Ēkālesia—’o te mau vahine ïa », tā te peresideni Oaks i parau.

’Ua paraparau Elder Uchtdorf i te mau tītīhoria

’Ua tere atu Elder Dieter F. Uchtdorf nō te pupu nō te Tino ’Ahuru ma Piti ’āpōsetolo i Pōrōnia i te ’āva’e ’Ēperēra ra. ’Ua peresideni ’oia i te hō’ē purera’a nō te feiā tītīhoria nō Ūterenia tei ’ite mai i te hō’ē vāhi ha’apūra’a i reira, nō te hō’ē tau poto.

Nō te fārereira’a, Elder Uchtdorf, tei riro nā i te ’ōmuara’a o tōna orara’a ’ei tītīhoria, ’ua parau ē, ’ua ’ī tōna ’ā’au i te « ’oto rahi nō te māuiui » o te feiā mo’a i te mau mahana hope’a nei ’e te tahi atu mau ta’ata i roto i te mau fenua tei vavahihia e te tama’i, e ’ā’au mehara ato’a rā.

« ’Ua ha’apūai ’e ’ua fa’ateitei teie mau ta’ata ’e teie mau ’utuāfare ia mātou i tō rātou maita’i, te ti’aturi ’e te fa’aro’o i roto i te Fa’aora ’e nō te Fa’aora, ’e tāna mau ’ōpuara’a hanahana », ’ua parau ’oia. « ’Ua ti’aturi māua Harriet e ha’apūai ’e e tāmāhanahana ia rātou, nā rātou rā i hōpoi mai i te māramarama o te ra’i, te tīa’ira’a ’e te tāmāhanahanara’a i tō māua ’ā’au ».

’Ua paraparau Elder Bednar i te National Press Club i Washington, D.C.

’Ua a’o atu Elder David A. Bednar nō te pupu nō te Tino ’Ahuru ma Piti ’āpōsetolo i te National Press Club i te ’āva’e Mē ra, ma te fa’ata’a atu te e aha ’e te nō te aha te ’Ēkalesia a Iesu Mesia nā te ao nei e hōro’a ai i te tauturura’a i te ao nei, te tōtauturu, te ha’api’ira’a, te hiero, te misionare ’e te tuatāpapara’a tupuna.

« Te fā tumu o Te ’Ēkalesia a Iesu Mesia i te Feiā Mo’a i te mau Mahana Hope’a nei ’o te tauturura’a ïa i te feiā ato’a ’ia ha’api’i i te nātura ’e te huru o te Atua, ’ia here i te Atua, ’ia riro ’ei pipi nā tāna Tāmaiti, ’o Iesu Mesia, ’e ’ia here ’e ’ia tāvini i tō tātou mau taea’e ’e mau tuahine », ’ua parau Elder Bednar.

’Ua tere nā peresideni rahi nō te Sōtaiete Tauturu ’e te Paraimere i Amerika Apato’a

’Ua farerei te peresideni Camille N. Johnson, peresideni rahi nō te Sōtaiete Tauturu, ’e te peresideni Susan H. Porter, peresideni rahi nō te Paraimere, i te mau ti’a fa’atere tīvira ’e te mau melo nō te ’Ēkalesia i Rāparata, Tīreni, Urutue ’e i Paratue, i roto i te hō’ē fārereira’a aupurura’a ’e torora’a te rima, 10 mahana te maoro.

’Ua fārerei atu rāua i te mau tā’atira’a a te fa’aterera’a hau ’o tē tauturu nei i te mau vahine e fa’aruru nei te pāruru ’ore i Paratue ’e i Rāparata.

« Tē tīa’i nei tā mātou ’Ēkālesia ma te fa’aoroma’i e ’ohipa nā muri ia ’outou nō te ha’amaita’i i te mau rāve’a nō te ha’api’ira’a ’e nō te fa’arava’ira’a iāna iho o te mau vahine », ’ua parau te peresideni Johnson.

Ta’a noa atu te tauturura’a a te fa’aterera’a hau, ’ua aupuru ato’a nā peresideni Johnson ’e Porter i te mau melo o te ’Ēkālesia. ’Ua fa’atupu rāua i te mau rurura’a nō te mau metua ’āpī, te hō’ē purera’a nō te mau vahine ’ōtahi, te mau rurura’a ’āmui nō te mau ’utuāfare ’e te mau tamari’i, ’e te hō’ē ha’api’ipi’ira’a nō te feiā fa’atere o te ’āmuira’a.