Tē marū nei tāna zugo ’e tē māmā nei tāna hōpoi’a

Nā te tuahine J. Anette Dennis

Tauturu hō’ē i roto i te peresidenira’a rahi nō te Sōtaiete Tauturu

’A ha’amana’o ē, e tamari’i te ta’ata tāta’itahi i ni’a i te fenua nei nā te Atua ’e tē here nei ’oia i te ta’ata hō’ē.

Tē fa’ati’ahia ra te ’ā’amu nō te hō’ē ta’ata ’o Jack te i’oa, e ’ūrī a’ua’u manu tāna, tei here-roa-hia e āna, ’o Cassie te i’oa. E te’ote’o rahi tō Jack nō Cassie, ’e pinepine ’oia i te fa’ateitei iāna ’ei ’ūrī māramarama. Nō te fa’a’ite pāpū i te reira, ’ua ani Jack i te tahi mau hoa ’ia haere mai e māta’ita’i ia Cassie ’ia ha’uti. I te taera’a Jack i te vāhi a’ua’ura’a ’ānimara, ’ua vaiiho ’oia ia Cassie ’ia horohoro, ’a haere ai ’oia i roto mai nō te tāpa’o iāna.

’Ia tae i te taime ha’amatara’a, e hina’aro rahi tō Jack e fa’a’ite i te mau ’aravihi fa’ahiahia o Cassie. Terā rā, e ’ohipa ’ē roa tā Cassie i rave. ’Aita ’oia i fa’aro’o i te mau parau a Jack, mai tāna i mātau i te rave ma te hina’aro mau. Tāna noa i hina’aro e fa’aea noa i pīha’i iho ia Jack.

’Ua pe’ape’a roa Jack, ’ua ha’amā ri’i ’e ’ua riri ato’a ia Cassie ; ’aita i maoro roa, ’ua parau ’oia e ho’i rāua. ’Aita ato’a ’o Cassie e hina’aro e ’ōu’a i muri i te pere’o’o, nō reira ’ua amo atu Jack iāna ma te fa’a’oroma’i ’ore ’e ’ua tūra’i atu i roto i te vaira’a ’ūrī. ’Ua mā’ino’ino roa ’oia, ’a tāhitohito noa ai te feiā tei ’āpe’e mai iāna i te huru o tāna ’ūrī, i tō rātou tere ho’ira’a i te fare. ’Aita ’o Jack i māramarama nō te aha Cassie i fa’aro’o ’ore ai. ’Ua ha’api’ipi’i-maita’i-hia ’oia, ’e tōna noa hina’aro rahi nā mua a’e ’o te fa’a’oa’oara’a ’e te tāvinira’a iāna.

I te taera’a i te fare, ’ua ha’amata Jack i te hi’opo’a ia Cassie nō te mau pēpē, te mau matie pipiri, ’aore rā te mau ’utu mai tāna i mātau i te rave. ’A tu’u ai ’oia i tōna rima i ni’a i tōna ’ōuma, ’ua ’ite a’era ’oia i te tahi mea rarirari ’e ’ua ’ite ’oia i te toto i ni’a i tōna rima. Ma te ha’amā ’e te ri’ari’a, ’ua ’ite atu ’oia i te hō’ē mutu rahi i ni’a i te ivi ’ōuma o Cassie. ’Ua ’ite ato’a ’oia i te tahi atu mutu i ni’a i tōna ivi ’āvae nō mua.

’Ua rave mai Jack ia Cassie i roto i tōna nā rima ’e ’ua ta’i. E mea teimaha mau tōna ha’amā nō tāna ha’avāra’a hape ’e tāna huru ravera’a iāna. ’Aita i mātarohia terā huru tō Cassie i terā mahana, nō te mea ra ’ua pēpē ’oia. Nō tōna māuiui, tōna mamae ’e tōna mau pēpē i nā reira ai ’oia. E ’ere roa atu nō tōna ’orera’a e hina’aro e fa’aro’o ia Jack, ’aore rā te ’orera’a e here iāna.¹

’Ua fa’aro’o vau i teie ’ā’amu e rave rahi matahiti i teienei ’e ’aita roa i mo’ehia iā’u. E hia rahira’a ta’ata pēpē e vai nei i rotopū ia tātou ? E hia pinepinera’a tātou i te ha’avāra’a ia vetahi ’ē nō ni’a i tō rātou huru i rāpae ’e tā rātou mau ’ohipa, ’aore rā te ’orera’a rātou e ’ohipa, ’āhiri ho’i tātou i māramarama maita’i a’e, e fa’a’ite ïa tātou i te aumihi ’e te hina’aro e tauturu, ’eiaha rā i te fa’ateimahara’a i tā rātou hōpoi’a nā roto i tā tātou ha’avāra’a ?

’Ua hape au nō te reira e rave rahi taime i roto i tō’u orara’a, ’ua ha’api’i rā te Fatu iā’u ma te fa’a’oroma’i nā roto i te mau ’ohipa i tupu o te ta’ata iho, ’e ma te fa’aro’ora’a i te mau ’itera’a o te orara’a o te ta’ata e rave rahi. I reira tō’u ha’afaufa’a-maita’i-ra’a i te hi’ora’a o tō tātou Fa’aora here, nō te mea ’ua hōro’a ’oia i te hō’ē tuha’a rahi o tōna taime i te aupurura’a ia vetahi ’ē ma te here.

Te ’ohipa i tupu i roto i te orara’a o tā’u tamāhine ’āpī roa a’e, tei roto te mau fifi o te ea i te pae manava, mai tōna na’ina’ira’a mai. E rave rahi taime i roto i tōna orara’a, e tupu mai te mana’o iāna, e’ita tāna e nehenehe fa’ahou e haere i mua. E vai noa e a muri noa atu tō mātou māuruuru rahi i te mau melahi o te fenua nei, tei ti’a mai i taua mau taime ra : e pārahi i pīha’i iho iāna ; e fa’aro’o iāna ; e ta’i ’e ’ōna ; ’e te ’ōpere-’āmui-ra’a i te mau hōro’a ta’a ’ē, te hāro’aro’ara’a pae vārua, ’e te autā’atira’a nō te here te tahi ’e te tahi. I roto i taua mau huru tupura’a o te here, pinepine te mau hōpoi’a i te amohia i nā pae e piti.

’Ua fa’ahiti Joseph B. Wirthlin i te 1 Korinetia, e nā ’ō ra, « parau noa ā vau i te mau parau ato’a a te ta’ata nei, ’e tā te mau melahi ato’a ra, ’e ’aita ’ō’u e aroha, ’ua riro ïa vau mai te veo ’oto ra, ’e mai te sumebalo māniania ra ».²

’Ua parau ā ’oia :

« E mea ’ōhie roa ’e e mea ’āfaro noa te parau poro’i a Paulo i teie tino ’āpī o te feiā mo’a : ’Aita e faufa’a te ’ohipa o tā ’outou e rave mai te mea ē, ’aita o ’outou e aroha. E nehenehe ’outou e parau i te mau reo, e fāri’i i te hōro’a nō te tohu, e māramarama i te mau mea mo’e, ’e e fāri’i i te mau ’ite ato’a ; noa atu e fa’aro’o tō ’outou nō te hōpoi ’ē atu i te mau mou’a, mai te mea ’aita e aroha ’aita roa ïa e faufa’a.

« ‘’O te aroha ra ’o te hina’aro mau ïa i te Mesia’ [Moroni 7:47]. ’Ua riro te Fa’aora ’ei hi’ora’a nō taua here ra ».³

Tē tai’o nei tātou i roto i te Ioane, « ’O te mea teie e ’ite ai te ta’ata ato’a ē, e pipi ’outou nā’u, ’ia aroha ’outou ia ’outou iho ».⁴

E rave rahi a’ora’a tei hōro’ahia mai e tō tātou mau ti’a fa’atere o te ’Ēkālesia nō ni’a i te aroha, te hō’ēra’a, te here, te hāmani maita’i, te aumihi, te fa’a’orera’a hapa ’e te tahiti’a. Tē ti’aturi nei au ē, tē ani mai nei te Fa’aora ia tātou ’ia ora i te hō’ē huru teitei a’e, te mo’a a’e⁵—tōna huru here i reira ho’i te mau ta’ata ato’a e ’ite ai ē, nōna mau ho’i rātou, ’e e mea hina’arohia rātou.

’Ua fa’auehia tātou ’ia here ia vetahi ’ē,⁶ ’eiaha e ha’avā ia rātou.⁷ E vaiiho ana’e i teie hōpoi’a teimaha ; e ’ere nā tātou e amo.⁸ ’Āhiri i te reira, e nehenehe tā tātou e rave mai i te zugo o te here ’e te aumihi o te Fa’aora.

« E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora.

« ’A rave mai i tā’u zugo i ni’a ia ’outou, ’e ’ia ha’api’ihia ’outou e au ; …

« Tē marū nei ho’i tā’u zugo ’e tē māmā nei tā’u hōpoi’a ».⁹

’Aita te Fa’aora e fāri’i i te hara, e pūpū mai rā ’oia ia tātou i tōna here ’e e fāri’i i te fa’a’orera’a hara ’ia tātarahapa ana’e tātou. Nā ’ō atu ra ’oia i te vahine i haruhia i roto i te fa’aturi, « e’ita ato’a vau e fa’autu’a atu ia ’oe : ’a haere, ’eiaha rā ’ia hara fa’ahou ».¹⁰ Te feiā tāna i tāpe’a ’ua fāri’i rātou i tōna here, ’e ’ua fa’aora ’e ’ua taui taua here ra ia rātou. ’Ua fa’auru tōna here ia rātou ’ia hina’aro e taui i tō rātou orara’a. Te orara’a mai iāna te huru, e hōpoi mai te reira i te ’oa’oa ’e te hau, ’e ’ua ani ’oia ia vetahi ’ē i taua huru orara’a ra ma te marū, te maita’i ’e te here.

’Ua parau Elder Gary E. Stevenson, « ’ia fa’aruru ana’e tātou i te mata’i ’e i te mau ua vero o te orara’a nei, te ma’i ’e te mau pēpē, e fa’a’amu te Fatu—tō tātou Tīa’i, tō tātou Ta’ata utuutu—ia tātou i te here ’e te hāmani maita’i. E fa’aora ’oia i tō tātou ’ā’au ’e ’e fa’ati’a fa’ahou i tō tātou vairua ».¹¹ ’Ei mau pipi nā Iesu Mesia, e’ita ānei e ti’a ia tātou ’ia nā reira ato’a ?

Tē ani mai nei te Fa’aora ’ia tātou ’ia ha’api’i mai nō ni’a iāna¹² ’e ’ia rave i te mau mea tā tātou i ’ite iāna i te ravera’a.¹³ ’O ’oia te hi’ora’a o te aroha ’e te here mau. ’A ha’api’i noa ai tātou ’ia rave i te mau mea tāna e ani mai ia tātou—’eiaha nō te mea e hōpoi’a ’aore rā nō te mau ha’amaita’ira’a ’o tā tātou nehenehe e fāri’i, nō tō tātou noa rā here iāna ’e i tō tātou Metua i te ao ra¹⁴—e tahe mai tōna here nā roto ia tātou, ’e e’ita te reira e fa’atupu noa i te mau mea ato’a tāna i ani mai, e fa’a’ōhie a’e rā ’e e ha’amāmā a’e¹⁵ ’e e fa’a’oa’oa a’e, mai tei ’ore i mana’ohia e tātou. E tītau te reira i te ’ohipara’a tāmau ; e nehenehe e pau e rave rahi matahiti mai tei tupu i ni’a iā’u, terā rā nō te mea ho’i e hina’aro ato’a tātou ’ia riro te here ’ei pūai nō tātou, e nehenehe tāna e rave i te reira hina’aro,¹⁶ te reira huero, ’e i te pae hope’a e fa’ariro iāna ’ei tumu rā’au nehenehe tei ’ī i te hotu monamona a’e.¹⁷

Tē hīmene nei tātou i roto i te hō’ē o tā tātou mau hīmene herehia, « ’o vai au ’ia ha’avā atu e ta’ata hara vau ? Tē vai rā te ’oto mau i roto i te ’ā’au marū ».¹⁸ ’O vai i rotopū ia tātou tē vai rā te ’oto i hunahia ? Te taure’are’a ’ōrure hau, te mau tamari’i o te fa’ata’ara’a, te metua vahine ’aore rā te metua tāne ’ōtahi, te feiā e mau fifi tō rātou i te pae tino ’aore rā i te pae ferurira’a, te feiā tei fē’a’a te fa’aro’o, te feiā e fa’aruru nei i te tati nuna’a ’ē ’aore rā taere, te feiā mana’o ’ōtahi, te feiā e hina’aro nei e fa’aipoipo, te feiā ma’i fa’atītī e hina’aro-’ore-hia, ’e e rave rahi atu mau ta’ata e fa’aruru nei i te mau fifi rau o te orara’a—e mea pinepine o te mau ta’ata iho e mea maita’i tō rātou orara’a ’ia hi’ohia atu.

’Aore hō’ē ’o tātou e orara’a maita’i roa a’e ’aita ato’a e ’utuāfare maita’i roa a’e ; pāpū roa e ’aita tō’u. ’Ia tāmata ana’e tātou e ha’amātau ia vetahi ’ē ’o tē fārerei ato’a nei i te mau tāmatara’a ’e te mau mea ti’a ’ore, e nehenehe te reira e tauturu ia rātou ’ia ’ite ē, e ’ere o rātou ana’e i roto i tā rātou arora’a. E hina’aro te ta’ata tāta’itahi ’ia ’ite ē, nō te tino mau nei rātou ’e e hina’arohia rātou i roto i te tino o te Mesia.¹⁹ Te hina’aro rahi o Sātane ’o tē fa’a’amahamahara’a ïa i te mau tamari’i a te Atua, ’e ’ua manuia roa ’oia, terā rā, tē vai ra te mana rahi i roto i te tāhō’ēra’a.²⁰ ’E e ti’a roa ia tātou ’ia haere ma te tāpe’a i te rima te tahi ’e te tahi i roto i teie tere fifi o te tāhuti nei !

’Ua parau mai tō tātou peropheta, te peresideni Russell M. Nelson : « Te mau huru hāmani-’ino-ra’a ato’a ’aore rā fa’a’ino’ra’a i ni’a i te tahi ta’ata nō tōna ti’ara’a nūna’a, tōna taura ta’ata, te ’āpenira’a, te ’āpeni, te fāito ’ite ha’api’ira’a, te ta’ere, ’aore rā te tahi atu mau fa’ata’ara’a faufa’a, e ’ere ïa i te mea au nā tei hāmani ia tātou ! E tūra’i teie huru hāmani-’ino-ra’a ia tātou ’ia ora i raro a’e i tō tātou ti’ara’a ’ei mau tamaiti ’e ’ei mau tamāhine nō te fafaura’a nāna ! »²¹

’Ua ani manihini te peresideni Nelson i te mau ta’ata ato’a ’ia haere ’e ’ia fa’aea noa i ni’a i te ’ē’a nō te fafaura’a o tē arata’i atu i tō tātou Fa’aora ra ’e i tō tātou Metua i te ao ra, ’ua hōro’a ato’a mai rā ’oia i teie parau a’o i muri nei : « Mai te mea e fa’aātea ’ē te mau hoa ’e te ’utuāfare … i te ’Ēkālesia, ’a tāmau noa i te here ia rātou. E ’ere nā ’outou e ha’avā i te mā’itira’a a te tahi atu ta’ata, mai ia ’outou ato’a e ’ore e ti’a ’ia fa’a’inohia nō tō ’outou ha’apa’o maita’i ».²²

E te mau hoa, ’a ha’amana’o na ē, e tamari’i nā te Atua te ta’ata tāta’itahi i ni’a i teie fenua²³ ’e tē here nei ’oia ia rātou tāta’itahi.²⁴ Tē vai ra ānei te ta’ata i ni’a i tō ’outou ’ē’a tā ’outou i mana’o e ha’avā ? Mai te mea tē vai ra, ’a ha’amana’o ē e mau taime nehenehe te reira nō tātou ’ia fa’a’ohipa i te here mai tā te Fa’aora e here.²⁵ Ma te pe’era’a i tōna hi’ora’a, e nehenehe tātou e ’āmuihia iāna ’e ’ia tauturu i te fa’atupura’a i te mana’o here ’e te ’āpitira’a i roto i te ’ā’au o te mau tamari’i ato’a a tō tātou Metua.

E here tātou iāna, nō te mea ’ua here ’oia ia tātou nā mua ».²⁶ ’Ia ’ī ana’e tātou i te here o te Fa’aora, e nehenehe mau tāna zugo e marū, ’e tāna hōpoi’a e nehenehe ïa e māmā.²⁷ ’O tā’u ïa e fa’a’ite pāpū nei i te i’oa o Iesu Mesia, ’āmene.