2022
Kōtļo̧k bwe Kōm̧m̧an Em̧m̧an En Juon Ad Imminene
Oktoba 2022
9:28

Kōtļo̧k bwe Kōm̧m̧an Em̧m̧an En Juon Ad Imminene

Elder Rafael E. Pino

Jān Jiljilimjuonn̄oul eo

N̄e jenaaj pen im dim ilo kōm̧m̧an em̧m̧an, manit ko ad renaaj jipan̄ kōj n̄an pād wōt ilo iaļan bujen in.

Inaaj m̧ōņōņō aolep iien kōn jerbal eo aō ilo Kabun̄ in eo ej bōk eō n̄an jokwe ilo laļ ko reoktak. Jekar loe ilo kajjojo iaan aelōn̄ kein oktak ko reļļap im armej ro rem̧m̧an ekoba manit im imminene ko.

Ewōr ad aolep make manit ko im imminene ko, jān baam̧le ko ad, ak jān jukjuk in pād eo jej jokwe ie, im jej kōjatdikdik n̄an dāpij wōt imminene im manit ko rej ekkeijel ippān pedped in katak ko an gospel. Manit im imminene ko me rej lōn̄aj kōj raorōk n̄an kijejeto ko ad n̄an pād wōt ilo iaļan bujen eo, im ko jet me rej jum̧ae pedped in katak ko an gospel, jej aikuj kejooli.

Manit ej juon men armej rej mour kake ak wāween an juon armej ļōmņak emakijkij im emminene kake, manit, im kōm̧m̧an ko ekkā kōm̧m̧ani. Aolep iien, men ko jej ļōmņaki im ekkā ad kōm̧m̧ani jej kile āinwot imminene.

Kōtļo̧k bwe in kōmeļeļeik men in: Patricia, kōrā eo ippā ejiten bōro, eļap an enno ippān idaak ni innām̧ m̧ōn̄ā mere. Ilo kar etal eo kajuon n̄an Puebla, Mexico, kom̧ro kar etal n̄an juon jikin ijo kom̧ro kar wia juon ni. Ālkin idaak ni eo, kōrā eo ippā ekar kajjitōk ippāer n̄an rube ni eo im bōktok mere ko bwe en kan̄i. Ke ej itok, ekar jadin būrōrō. Raar illik chili ie! Mere tōn̄al ippān chili! Āinwōt ekāāl n̄an kom̧ro. Ak tokālik kom̧ro kar ekkatak bwe oktak eo ej kōrā eo ippa im n̄a, ro rekar jab m̧ōn̄ā mere ippān chili. Ilo Mexico, menin, ejjab kāāl; ej juon imminene.

Ilo bar juon tōre kom̧ro kar m̧ōn̄ā ilo Brazil ippān jet mōttam, im raar letok kijem avocado. Ilo tōre eo kom̧ro ej tin illik jidik salt ņa ioon avocado eo, ro mōttam rekar ba n̄an kom̧ro, “Ta eo komiro ej kōm̧m̧ane? Ededeļo̧k am likūt juka ioon avocado ņe!” Avocado ippān Juka! Āinwōt ekāāl n̄an kom̧ro. Ak tokālik kom̧ro kar ekkatak bwe oktak eo ej kōrā eo ippa im n̄a, ro rekar jab mōn̄a avocado ippān juka. Ilo Brazil, avocado ippān juka ej juon imminene.

Imminene n̄an jet emaron̄ kāāl n̄an ro jet, pedped wōt ioon manit ko im imminene ko aer.

Ewi manit im imminene ko rej jeminene kaki ilo mour ko ad?

Būreejtōn Russell M. Nelson ekar ba: “Rainin ekkā ad ron̄jake ‘juon jekjek ekāāl āinjuon jān m̧okta.’ Eļan̄n̄e kwoj lukkuun kaorōke jekjek in āinjuon jān m̧okta, ij karuwaineneik kom̧ n̄an ukōt būruwōm̧i, am̧i ļōmņak, im am ļapļo̧k n̄an Jemedwōj Ilan̄ im Nejin, Jisōs Kraist. Kōm̧m̧an bwe en jekjek eo am̧ ekāāl āinjuon jān m̧okta” (“Juon Jekjek Ekāāl Āinjuon Jān Mokta,” Liaona, Nob. 2020, 118).

Kūr in ej n̄an aolep. Jekdo̧o̧n n̄e jejeram̧ol ak m̧weie, jelaļo̧kjen ak jajeļo̧kjen, rūtto ak dik, nan̄inmej ak ājmour. E ej karuwaineneik kom̧ n̄an kōtlo̧k bwe menin imminene ko ilo mour ko ad ren men ko rej jipan̄ kōj ilo iaļan bujin in.

Ejjeļo̧k juon laļ ewōr aolep men ko rem̧m̧an im aiboojoj ie. Kōn menin, ilo an Paul im Rikanaan Josep Smith katakin:

“Eļan̄n̄e ewōr jabdewōt men wānōk, karbōb, ak em̧m̧an ekkōnono kake ak nebare, kōmij kappukoti men kein.” (Laajrak in Tōmak 1:13).

“Eļan̄n̄e ewor nōbar, kom̧win ļōmņak kōn men kein” (Pilippai 4:8).

Jeļā bwe menin ej juon naan in kipel, ejjab juon naan bajjōk.

Ikōņaan bwe kōjwōj en bōk jidik iien n̄an kōlmenļo̧kjen kōn manit ko im wāween ko rejelōt baamle ko ad.

Ilubwiljin imminene ko rem̧m̧an ko me membōr ro an Kabun̄ in rej aikuj imminene kaki ej men kein emān:

  1. Ekkatak jeje ko rekwojarjar an juon make im baam̧le. N̄an erom̧ rioktak ro n̄an Irooj Jisōs Kraist, kajjojo armej ej aer eddo n̄an ekkatak kōn gospel in. Jinen im jemān ajri ro rej eddoik n̄an katakin gospel eo n̄an ajri ro nejier (lale Katak im Bujen ko 68:25; 93:40).

  2. Jar eo an juon make im baamle. Rilo̧mo̧o̧r ej kakien kōj n̄an jar iien otemjej (lale Katak im Bujen ko 19:38). Jar ej kōtļo̧k kōj make n̄an kōnono ippān Jemedwōj Ilan̄ ilo etan Nejin, Jisōs Kraist.

  3. Pād ilo kweilo̧k kwojkwoj ko kajjojo wiik (lale 3 Nephi 18:1–12; Moroni 6:5–6 Jej kōm̧m̧ane menin n̄an keememej Jisōs Kraist ilo ad bōk m̧ōttan kwojkwoj eo. Ilo naan in kain̄i in membōr ro an Kabun̄ in rej kōkaal bujen ko aer ilo aer bōk ioer make etan Rilo̧mo̧o̧r, aolep iien kemeemej E, im kōjparok kien ko An. (lale Katak im Bujen ko 20:77, 79).

  4. Ekkā n̄an bōk kunaami ilo tample im jerbal in menmenbwij an baam̧le. Jerbal in ej meļeļein kakobaik im liāpe baam̧le ko n̄an indeeo (lale Katak im Bujen 125:15).

Ewi wāween en̄jake eo ad eļan̄n̄e jej ron̄ men kein emān? Rej ke m̧ōttan imminene ko ilo mour ko ad?

Ewōr men ko ekkā ad kōm̧m̧ani me rej m̧ōttan ļo̧k imminene ko jekar būki bwe en m̧weid, em̧ool kōtļo̧k bwe Anij en anjo̧ ilo mour ko ad.

Ekōjkan ad maron̄ kālet ta ko renaaj jet men jeminene kaki ilo mour ko ad im baam̧le eo ad? Ilo jeje ko rekwojarjar, jej lo juon waanjon̄ak em̧m̧an; ilo Mosaia 5:15 ej ba, “Ikōņaan bwe kom̧in pen im dim, iien otemjej baptoami ilo jerbal ko rem̧m̧an.”

Em̧m̧an ippa naan kein kōnke jejeļā bwe men kein me rej erom̧ juon imminene ilo mour ko ad ej men ko jej āliji im bar āliji. N̄e jenaaj pen im dim ilo kōm̧m̧an em̧m̧an, manit ko ad renaaj ekkeijel wōt ilo pedped in katak ko an gospel im renaaj jipan̄ kōj n̄an pād wōt ilo iaļan bujen in.

Būreejtōn Nelson ekar barāinwōt kōkapilōklōk: “Jelm̧ae jekjek eo am̧ ekāāl āinjuon jān m̧okta. Kappukot n̄an maron̄ erreeo ilo kōļmenļo̧kjeņ, naan, im kōm̧m̧an. Jerbal in karejar n̄an ro jet. Dāpij jibadbad eo an indeeo. Kōm̧m̧ane kūr eo am̧. Im jabdewōt apan̄ ko am̧, ro jeiū im jatū, mour kajjojo raan bwe kwon ļapļo̧k am̧ m̧aanjabpopo n̄an ioon am̧ Rikōm̧anm̧an” (“Juon Jekjek Ekāāl Āinjuon Jān Mokta,” 118).

Kiiō ejjab kāāl n̄an kōrā eo ippa, Patricia, ak n̄a n̄an m̧ōn̄ā mere ippān chili im avocado ippān juka—ilo m̧ool, em̧m̧an ippam. Ijoke, mour āinwōt Anij ijo eutiejetata ej juon men eļapļok an aorōk ilo jetōb jān m̧ōn̄ā ko jej edjon̄i; ej juon unin kōnono me ej iookļo̧k mour indeeo.

Ij jar bwe imminene ko ad ren letok n̄an kōj en̄jake eo an “m̧ōņōņō eo ejjeļo̧k jem̧ļo̧kin” (Mosaia 2:41) eo kar kallim̧ur n̄an ro rej kōjparok kien ko an Anij im bwe im bwe, ilo kōm̧m̧ane menin, jemaron̄ nej ba, “Im ālikin men kein, kōm ar mour ilo juon wāween elem̧ōņōņō” (2 Nipai 5:27

Ro jeiū im jatū, ij kam̧ool kōn em̧m̧aan rein 15 ro jej rejtake er āinwōt rikanaan ro, rilo̧lo̧ ro, im ribōk revelesōn ro ekoba ad rikanaan jitōb bōro, Būreejtōn Russell M. Nelson. Ij kam̧ool bwe Kabun̄ eo an Jisōs Kraist im Armej ro Rekwojarjar ilo Raan Ko Āliktata em̧ool. Ij eļaptata kam̧ool kōn Jisōs Kraist, ad Rilo̧mo̧o̧r im Ripinmuur, ilo etan Jisōs Kraist, amen.