Bwidej in Upaaj: Iaļ in Kōmour in Jeorļo̧k Bōd
N̄an mour ilo juon jekjek me kwoj leļo̧k bwidej in upaaj mour eo am̧ ej juon m̧akūtkūt in tōmak me ej ļoor Rilo̧mo̧o̧r.
Bok in 1 Samuel ej koba juon bwebwenato ejabun̄bun̄ kōn Devid, nej kiin̄ eo an Israel, im juon kōrā etan Abigeil.
Ālkin mej eo an Samuel, Devid im em̧m̧aan ro an rekar etal jān Kiin̄ Saul, eo ekar kappukot n̄an bōk mour eo an Devid. Rekar leļo̧k rikōjparok menin mour ko im rijerbal ro an juon em̧m̧an em̧weie etan kar Nabal, eo ekar juon armej elej. Devid ekar jilkinļo̧k 10 iaan em̧m̧aan ro an n̄an iak iakwe Nebal im kajjitōk m̧ōn̄ā eļap aikuji im kein jerbal ko.
Nebal ekar uwaake kajjitōk eo an Devid kōn kajjirere im jilkinļo̧k em̧m̧aan ro an kōn ejjeļo̧k m̧ōn̄ā.
Illu, Devid ekar kōpooj em̧m̧aan ro an n̄an jelm̧ae Nabal im aolepān armej ro an, raar ba, “ear ņa oņeaō nana kōn em̧m̧an.”1 Juon rijerbal ekar jiron̄ Abigeil, lieo ippān Nabal, kōn jerbal nana eo an ļeo pāleen n̄an em̧m̧an ro an Devid. Em̧ōkaj an Abigail kar aiintok m̧ōn̄ā ko aikuji im kein jerbal ko im etal n̄an kōm̧m̧an koņ.
Ke Abigail ekar oon ļein, ej “bun̄pedo im̧aan Devid, im badikdik jān e n̄an bwidej,
“Im ear bun̄pedo i neen im ba, En ippa, aō irooj, en ippa ruōn. …
“Innām, … Jeova kar kōjparok eok jān ruōm̧ kōn bōtōktōk, im jān am̧ make iden-oņe kōn peim̧. …
“… Kiiō, men in lewōj in, n̄a karijerōm̧ iar bōktok n̄an kwe aō irooj, ren leļo̧k n̄an likao ro. …
“Ij akweļap n̄an eok, bōd an karijerōm̧. …
“Innām Devid ear ba n̄an Abigeil, Nōbar Jeova, Anij in Israel, eo ear jilkintok eok rainin bwe kwōn wōnm̧ae eō:
“Im kwōn jeraam̧m̧an kōn jeļāļo̧kjeņ eo am̧, im kwōn jeraam̧m̧an, kwe eo kwaar kōjparok eō rainin jān ruō kōn bōtōktōk, im jān aō make iden-oņe kōn eō kōn peiū. …
“Āindein Devid ear bōk jān pein lio men ko ear bōktok āan ippān, im ear ba n̄an e, Kwōn wanlōn̄ļo̧k ilo aenōm̧m̧an n̄an m̧weo im̧ōm̧; … lo, em̧ōj aō eōron̄ ainikiōm̧, im kwaar kabun̄būruō.”2
Rekar jim̧ōr ilo̧k ilo aeņōm̧m̧an.
Ilo bwebwenato in, Abigail emaron̄ in kar loe āinwōt juon jekjek ekajoor ak kakōļļe in Jisōs Kraist.3 Jān en̄taan in pinmuur eo An, E emaron̄ kōroļo̧k kōj jān jerawiwi im eddo in bōro in illu im letok n̄an kōj kōkajoor eo jej aikuji.4
Ejja āinwōt an Abigail kar m̧ōņōņō in bōk jerawiwi eo an Nabal ioon make, ejja āinwōt Rilo̧mo̧o̧r eo—ilo juon wāween epen meļeļe kake—bōk Ioon jerawiwi ko ad im jerawiwi ko an ro me raar kōmetak ak kakkure kōj.5 Ilo Getsemane im ioon debwāāl eo, E ekar bōk jerawiwi kein. Ekar kōm̧m̧ane juon iaļ n̄an ad joļo̧k būruōn idenoņe eo. “Iaļ” eo ej kōn jeorļo̧k bōd—eo emaron̄ juon iaan men ko reppen tata jemaron̄ kōm̧mane im juon iaan men ko rekwojarjar tata jemaron̄ en̄jake. Ilo iaļ in jeorļo̧k bōd eo, kajoor in pinmuur eo an Jisōs Kraist emaron̄ lutōktok n̄an mour ko ad im jinoe n̄an kōmour kinej ko rem̧wilal ilo bōro im jetōb.
Būreejtōn Russell M. Nelson ekar katakin bwe Rilo̧mo̧o̧r eo ej letok n̄an kōj maron̄ eo n̄an jeorļo̧k bōd.
“Jān Pinmuur eo Eļap, komaron̄ jeorļo̧k an ro rekar kōmetak eok bōd im ro me reban bōk eddo kōn nana eo aer n̄an eok.
“Elukkuun pidodo n̄an jeorļo̧k an juon bōd eo ej m̧ool im ettā ilo pukot jeorļo̧k bōd eo am̧. Ak Rilo̧mo̧o̧r eo enaaj lewaj n̄an eok maron̄ eo n̄an jeorļo̧k an juon bōd eo ekar jab em̧m̧an an kōm̧m̧an n̄an eok ilo jabdewōt wāween. Innām m̧akūtkūt ko aer rekōmetak rejjab maron̄ kakkure jetōb eo am̧.”6
An Abigeil boktok eļap m̧ōn̄a im kein jerbal ko emaron̄ katakin kōj bwe Rilo̧mo̧o̧r ej lelo̧k n̄an ro em̧ōj kametak er im kakinejnej er kōkajoor im jipan̄ eo jej aikuji n̄an kōmour im ro̧o̧l n̄an m̧okta.7 Kar jab kōmakeļo̧k kōj n̄an jerbale kaje ko an jerbal ko an ro jet kōn kōj make; kōj barāinwōt maron̄ mour im leļok iien an lo̧mo̧o̧ren jān eddo eo an bōro in illu im jabdewōt jerbal ko an me remaron̄ itok.
Irooj ekar ba, “N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd.”8 Irooj ej aikuji ad jeorļo̧k bōd n̄an em̧man eo ad make.9 Bōtaab Ejjab kajjitōk ippād n̄an kōm̧m̧an ilo An jab jipan̄, An iakwe, An meļeļe. Kōn bujen ko ad ippān Irooj, kōj kajjojo jemaron̄ bōk kajoor in kōkajoorļo̧k eo, tōl, im jipan̄ eo jej aikuji n̄an jim̧or jeorļo̧k bōd im n̄an joļo̧k bōd.
Jouj im jeļā bwe jeorļo̧k an juon bōd ejjab meļeļein bwe kwon likūt eok make ilo juon jekjek ijo kwonaaj wōnm̧aanļo̧k wōt in metak. “Jemaron̄ jerbal m̧aaņļok n̄an jeroļo̧k an juon armej bōd im en̄jake wōt im̧we jān Jetōb n̄an kattoļo̧k eok jān er.”10
Āinwōt an kar Abigeil kar jipan̄ Devid bwe en jab bōk “kaen̄taan būruom̧”11 im n̄an bōk jipan̄ eo ej aikuji, Rilo̧mo̧o̧r enaaj barāinwōt jipan̄ eok. E ej iakwe eok, im E ej ioon eok ilo iaļ eo am̧ “kōn kemour ilo pein.”12 Ej kōņaan aenōm̧m̧an eo am̧.
N̄a make ikar kam̧ool kabwilōn̄lōn̄ eo kōn an Kraist kemour būruōn illu eo aō. Kōn mālim eo an jema, ij kwaļo̧k bwe ikar rūttoļo̧k ilo juon em̧ ijo ikar jab en̄jake kōjparok kōn kar jab jim̧we in kōm̧m̧an ilo en̄jake im naan. Ilo iiō in jodikdik im rūm̧m̧an ded ko aō, ikar ellotane jema im kar illu ilo būruō jān metak eo.
Ilo iiō ko remootļo̧k im ilo kijejeto ko aō n̄an pukot aeņōm̧m̧an im kōmour eo ilo iaļ in jeorļo̧k bōd eo, ikar kile ilo juon wāween eļap bwe ejja Eo Nejin Anij eo ekar pinmuur kōn jerawiwi ko aō, ejja Ripunmuur eo wōt eo me enaaj lo̧mo̧o̧ren ro me raar lukkuun in kōmetak eō. Ikar jab maron̄ lukkuun tōmak m̧ool eo m̧okta ilo aō jab tōmak eo kein karuo.
Ke iakwe eo aō n̄an Rilo̧mo̧o̧r ekar eddōkļo̧k, barāinwōt ikdeelel eo aō n̄an bōk jikin metak im illu kōn pein kōmour eo An. Ekar juon jekjek ebōk elōn̄ iiō ko, aikuji peran, jermatmat, kūtarre, im ekkatak n̄an lōke kajoor kwojarjar eo an Rilo̧mo̧o̧r n̄an lo̧mo̧o̧ren im kōmour. Ej wōr wōt jerbal n̄an aō kōm̧m̧ane, bōtaab būruo ejako an pād ilo iaļ in tariņae. Em̧ōj letok n̄an eō “juon bōro ekāāl,”13—juon eo ekar en̄jake iakwe eo em̧wilaļ im indeeo an aō Rilo̧mo̧o̧r, eo ekar pād ikōja, eo ej tōlļo̧k eō ilo em̧m̧an im kijenmej n̄an juon jikin em̧m̧anļo̧k, eo ekar jan̄ ippa, eo ekar jeļā aō būrom̧ōj.
Irooj ekar jilkintok n̄an eō kōjeram̧m̧an in kaeņōm̧m̧an ko ejjeļo̧k oktak jān an kar Abigeil bokļo̧k ta eo Devid ekar aikuji. Ekar jilkintok rikatakin ro n̄an mour eo aō. Im eo em̧m̧antata im kar ļap an kōm̧m̧an oktak iaan aolep ekar jemjerā eo aō ippān Jemedwōj Ilan̄. Kōn E, ij kam̧m̧oolol bwe ijeļā kōn iakwe eo emera, ekōjparok, im ej tōl an juon Jema eo ewāppen.
Elder Richard G. Scott ekar ba: “Kojjab maron̄ jeroļo̧k ta eo em̧ōj an waļo̧k, ak komaron̄ jeorļo̧k bōd.14 Jeorļo̧k bōd ej kōmour kinej ko renana, im reļlap, n̄an kōtļo̧k iakwe eo an Anij n̄an joļo̧k baijin in dike eo ilo būruom̧ im am̧ ļōmņak. Ej karreoik am̧ bōklōkōt kōn ikdeelel eo n̄an idenoņe. Ej kōm̧m̧ane jikin eo n̄an karreoik, kōmour, kōjepļaaktok iakwe eo an Irooj.”15
Jema eo ilo laļ in ekar barāinwōt bōk juon oktak ekabwilōlōn̄ ilo būruon ilo jet iiō ko remootļo̧k im ekar oktakļo̧k n̄an Irooj—juon men ikar jab kōtmene ilo mour in. Bar juon naan in kam̧ool n̄an n̄a kōn kajoor in ukōt eo edipeo an Jisōs Kraist.
Ijeļā bwe E ej maron̄ kōmour rijerawiwi eo im ro rekar jerawiwi ņae. E ej Rilo̧mo̧o̧r im Ripinmuur eo an laļ in, eo ekar likūt laļļo̧k mour eo An bwe jen maron̄ bar mour. Ekar ba, “Jetōb eo an Irooj ej pād ippa, kōnke emōj an kapiti eō n̄an kwaļo̧k gospel eo an n̄an ro ri jeramōl; ar jilkinļo̧k n̄a bwe in ten kōm̧our ro erub būruweer, kanekwoj ro rikamakoko, im kōm̧our mejen ro re bilo, im kanemkwoj ro rej kakkure16
N̄an aolep ro erūb būruweer, ped ilo kōm̧akoko, kinejnej, im bōlen pilo jān metak ak jerawiwi, E ej letok kōmour, iien kōmour, im anjo̧. Ij kam̧ool bwe kōmour im iien kōmour eo E ej letok em̧ool. Aitok in iien kōmour eo ej an juon make, im jejjab aikuj ekajet e iien eo an bar juon. Eaorōk n̄an kōtļo̧k kōj make n̄an iien eo jej aikuji n̄an mour im n̄an jouj n̄an kōj make ilo jerbal eo. Rilo̧mo̧o̧r eo ej tūriam̧o im ej pād im jutak pojak n̄ān letok jipan̄ eo jej aikuji.17
Ilo iaļ in jeorļo̧k bōd eo im kōmour ej pād juon kāālet n̄an jab dāpij wōt jon̄ak ko renana ak jemjerā ko ilo mour ko ad ak jabdewōt jikin. N̄an aolep ro rej pād ilo kareel ko ad, kōm maron̄ lewaj jouj n̄an lej, iakwe n̄an dike, ineem̧m̧an n̄an kakkure, kōjparok n̄an inepata, im aenōm̧m̧an n̄an akweel.
N̄an leļo̧k ta eo kar jab lewaj ej juon m̧ōttan eļap an kajoor in kōmour ekwojarjar maron̄e kōn tōmak ilo Jisōs Kraist. N̄an mour ilo juon jekjek me kwoj leļo̧k, āinwōt an Aiseia kar ba, bwidej in upaaj mour eo am̧18 ej juon m̧akūtkūt in tōmak me ej ļoor waanjon̄ak eo eļap an juon Rilo̧mo̧o̧r eo ekar en̄ntaan kōn aolep bwe en maron̄ jipan̄ aolep.
Josep in Ijipt eo ekar mour juon mour in bwidej in upaaj. Kar matōrtōre jān likao ro jein, liaakeļo̧k, wia kake n̄an rikam̧akoko, kalbuuji ilo ejjeļo̧k ruon, im meļo̧kļo̧ke jān juon eo ekar kallim̧ūur n̄an jipan̄. Ak ekar lōke ilo Irooj. “Jeova ear pād ippān Josep”19 im kōkwojarjar mālijjon̄ ko an n̄an kōjeraam̧m̧an im eddōk eo an make—im n̄an lo̧mo̧o̧ren baam̧le eo an ilo aolepān Ijipt.
Ke Josep ekar ioon likao ro jein āinwōt juon ritōl eo eļap ilo Ijipt, jeorļo̧k bōd im erreiļo̧k eo an erreo rekar waļo̧k ilo naan ko an rem̧m̧an ekar ba:
“Innām kiiō kom̧win jab būrom̧ōj, im jab āliklik, kōn ami kar wiakake eō n̄an ijin: bwe Anij ear jilkintok eō im̧aami bwe in kōjparok mour. …
“Innām kiiō e jab kom̧eo kom̧ ar jilkintok eō, a Anij.”20
Kōn Rilo̧mo̧o̧r eo, mour eo an Josep ekar erom̧ “bwidej in upaaj.”21
Kevin J Worthen, būreejtōn eo an BYU, ekar ba bwe Anij “emaron̄ kōm̧m̧an bwe em̧man en itok … ejjab wōt jān tōprak ko ak barāinwōt jān likjab ko an ro jet me rekar kōm̧man menin ad metak. Jon̄an an Anij em̧m̧an im kajoor ņe.”22
Ij kam̧ool bwe waanjon̄ak in iakwe im jeorļo̧k bōd eo eļaptata ej eo an ad Rilo̧mo̧o̧r, Jisōs Kraist, eo ekar pād ilo en̄taan emeo ekar ba, “Jema, Kwōn joļo̧k rueir; bwe re jaje ta eo rej kōm̧m̧ane.”23
Ijeļā bwe Jemed ilo Lan̄ ej kōņaan em̧m̧an im kōjatdikdik n̄an kōj kajjojo ajri ro Nejin. Ilo Jeremaia jej riit, “I jeļā kōttōpar ko Aō n̄an kom̧, Jeova ej ba, kōttōpar in aenōm̧m̧an.”24
Jisōs Kraist ej am̧ make Messaia, am̧ Ripinmuur im Rilo̧mo̧o̧r ej iakwe, eo ejeļā akweļap ko an būruom̧. Ej kōņaan kōmour im m̧ōņōņō n̄an eok. Ej iakwe eok. Ej jan̄ ippam̧ ilo būrom̧ōj ko am̧ im mōņōņō n̄an kōmour eok. Jen bōk ilo m̧ōņōņō im bōk pein iakwe eo An me ej eļļo̧k25 ilo ad etetal ilo iaļ in kōmour in jeorļo̧k bōd eo ej aō jar ilo etan Jisōs Kraist, amen.