Kwoj Ke Mōnōnō Wōt?
M̧ōņōņō eo ad n̄an ļoor Jisōs Kraist ej jon̄an wōt awa eo jej kōtļo̧k ad wujlepļo̧k ilo jikin ko rekwojarjar.
Juon Jabot, ilo kar kōppopo n̄an bok kwojkwoj ālkin jet wiik in kōm̧m̧ani jerbal ko ko an kweilo̧k an stake, ekar jiktok juon kōlmenļokjen ekaitoktok limo im kajoor ilo ļōmņak e aō.
Ke priest eo ej jino leļok kajeraam̧m̧an eo an pilawā eo, naan ko iaar ron̄ aolep iien m̧okta jen an kajoor in im̧we kōlmenļo̧kjen eo aō im būruō. “Im kam̧ool n̄an kwe, O Anij, Jemām Indeeo, bwe rem̧ōnōno in bōk ioer etan Nejūm̧, im keememej E iien otemjej im kōjparok kien ko An ko Eaar liļo̧k n̄an er; bwe Jetōb eo An en maron̄ pād ippāer iien otemjej.”1 Ewōr jete iien jaar kam̧ool n̄an Anij ke jej m̧ōņōņō?
Ilo aō kōļmenļo̧kjeņ kōn aorōkin naan kein rekwojarjar, naan in rem̧ōņōņō ekar kabwilōn̄ eō ejjab āinwōt m̧okta. Juon en̄jake eo em̧man im kwojarjar eaar kobrak kōlmenļo̧kjen eo aō im buruwō kōn iakwe im kam̧m̧oolol kōn en̄taan in pinmuur eo an Rilo̧mo̧o̧r im jerbal eo An ilo karōk in pinmuur an Jemān n̄an baam̧le eo aō im n̄a. Innām iaar ron̄ im en̄jake kajoor in naan ko jen jar in dān eo: “Bwe ren maron̄ kam̧ool … bwe ren keememej E iien otemjej.”2 Ij lukkuun meļeļe ilo iien eo bwe kōjparok bujen ko ad rej aikuj ilōn̄i kōttōbar ko aō.
Bōk mōttan kwojkwoj eo ejjab juon imminene eo jej bōke n̄an kwaļo̧k ke jej errā. Ej juon kakeememej ekajoor kōn m̧ool eo kōn Pinmuur eo an Kraist indeeo im aikuj eo n̄an keememej E im kōjaparok kien ko An. M̧ōnōnō n̄an pedped wōt ioon Rilo̧mo̧o̧r elukkuun aorōk jon̄an ej pād ioļap in ruo iaan quote ko ilo jeje ko rekwojarjar ilo Kabun̄ in: jar ko an kwojkwoj. Meļeļe kōn m̧ool eo kōn ta eo Jemedwōj Ilan̄ ej m̧ōņōņō in letok n̄an kōj kajjojo kōn Nejin Emake Wōt ej kōttōpar in kijejeto eo ad n̄an iien otemjej karooleļo̧k m̧ōņōņō in.
Mour in jetōb eo ad ej ke ekkal pen ilo Jisōs Kraist?
N̄e pādpād in jetōb kein ad rejab m̧wilaļ ak ejeļo̧k kein kōkajoor e, jenaaj kōm̧m̧an bwe jen pādpād ioon ļōmņak ko an aolep armej. Im n̄e jenaaj dābiji wōt laajrak in ke m̧won jar eo ekkā an mōr im ej tōl jen kien, kien ko rejjab m̧ool, kien ko ad make rej jab m̧ool, im kejbarok awa, innām jemļo̧k eo kōn m̧ōņōņō enaaj likjab. Jejab aikuj kōtmene bwe pādpād ko an m̧ōņōņō en jerbale jim̧we ilo social media ak ippān ri TikTok ro. Katak ko an armej rej ekkejeļ ippān m̧ool eo ekwojarjar.
Kabaun̄ in ej juon jikin kuk ippān doon n̄an ro rejjab wānōk ro rej iakwe Anij im ro rej m̧ōņōņō in ļoor Irooj Jisōs Kraist. M̧ōņōņō in ej pedped ilo m̧ool eo bwe Jisōs ej Kraist, Nejin Anij eo emour. M̧ool eo ekwojarjar maron̄ jeļā kake jān wōt kajoor eo an Jetōb Kwojarjar. Kōn menin, m̧ōņōņō eo ad ej jokkūn wōt juon n̄an jon̄an awa eo jej kōtļo̧k ad pād ilo jikin ko rekwojarjar ijoko jetōb kwojarjar ej pād ie.
Enaaj em̧m̧an ad kōm̧m̧an n̄e jān kar joļo̧k iien ilo bwebwenato ko eļap tokjeer kōnono kōn kajjitōk ko ippān Jemed Ilan̄ eo ej iakwe im kadikļo̧k ad kappukot jeļā ko an ro jet. Jemaron̄ kar kālet n̄an niknik ilo ekkatak naan ko an Kraist ilo jeje ko rekwojarjar im katak ko an rikanaan ro An remour.
Men eo aurōk n̄an likūt ilo raan in Jabot ko, kōļļā juon mōttan jon̄oul eo ilo m̧ool, kabwijer peba in mālim n̄an deļo̧n̄ tampeļ, etal n̄an tampeļ, im kōjparok bujen tampeļ eo ad ekwojarjar rej aolep kajoor eo n̄an m̧ōņōņō eo ad im kam̧ool n̄an kallim̧ur eo ad. Jej ke mōnōnō in likūt kijejeto eļapļo̧k jān jon̄an in n̄an kōkajoorļo̧k ad tōmak ilo Kraist?
Jemedwōj Ilan̄ ej lukkun iakwe kōj, bōtaab iakwe ij ej itok jān eļap kōtōpar. Ej kōņaan bwe jān m̧ōņōņō in likūt Rilo̧mo̧o̧r ilo aolepen mour ko ad. Rilo̧mo̧o̧r ej waanjon̄ak eo ad em̧m̧antata kōn m̧ōņōņō in wujlepļo̧k n̄an Jemān ilo aoelp men otemjeļo̧k. E ej “iaļ eo, im m̧ool eo, im mour eo.”3 E eaar m̧ōņōņō in pinmuur kōn jerawiwi ko ad. E eaar m̧ōņōņō in kōmeraik eddo ko ad, kaenōm̧m̧an mijak ko ad, letok n̄an kōj kajoor, im boktok aenōm̧m̧an n̄an buruōd ilo iien inepata im buromōj.
Ak tōmak ilo Jisōs Kraist ej juon kālet. “Eļan̄n̄e [kom̧] maron̄ kōņaan wōt tōmak,”4 ilo naan ko An, ewōr ijo jemaron̄ ijino jān e ak bar kōkaal ial in ad tōmak. Naan ko An, n̄e jej likūt ilo būruwōd āinwot ine im em̧m̧an ad lale im kōjparoke, enaaj wōr okran im tōmak ko ad renaaj eddōkļo̧k ilo peran im pedped wōt kōn makūtkūt im kajoor. Bok in Mormon ej kein jipan̄ eo ad ekajoortata n̄an eddōkļo̧k im kōjepļaaktok tōmak eo ad. M̧ōņōņō ej kōlapļo̧k eo an tōmak.
Ilo mour in, jān ejaake eo ekwojarjar, ejab pidodo im jet iien remaron̄ in eddo. Bōtaab, “[kōj] jej, bwe [jen] maron̄ m̧ōņōņō”!5 Pedped wōt ilo Rilo̧mo̧o̧r eo im bujen ko rekwojarjar rej boktok lan̄lōn̄ eo ejjeļo̧k jemļo̧kin! Unin mour wabanban in ej n̄an kwaļo̧k ke jej mōņōņō. “Jerbal eo elap ilo mour in [im woneen rikaļoor] ej n̄an ekkatak ankilaan Irooj innem kōm̧m̧ane.”6 Rikaļoor eo em̧ool ej tōl n̄an juon m̧ōņōņō eo edipio. Jej ke m̧ōņōņō in kōļļāik jon̄an woneen jerbal in rikaloor?
Ial in bujen ejjab juon men eo epidodo ilo juon elaajrak; ej juon jerbal in eddōkļok in jetōb im kamūlalļo̧k ad wujlepļo̧k n̄an Irooj Jisōs Kraist. Jibadbad eo an aolep kien, pedped, bujen, im kain̄i ej n̄an kalōk tōmak im lōke ilo Kraist. Ad kālet n̄an likūti Kraist ilo io̧ļap in mour ko ad, kōn menin, ej aikuj aolep iien—ejjab aikuj ba pedped ioon, ekkar n̄an, ak mae iien loe. Jejjab maron̄ bōk raan in kakije ko ak iien ko ad make jen m̧ōņōņō n̄an “jutak āinwot rikamol ro an Anij aolep iien ko im ilo aolep men otemjeļo̧k, im ilo aolep jikin ko.”7 Mour āinwōt rikaloor ebōk eļap kijejeto, kōnke m̧ōttā eo an Jetōb Kwojarjar elukkuun aorōk.
Em̧ool Irooj eaar ļōmņak kōn tōre in ad ilo An kar kwaļo̧k kōn būrabōļ kōn virgin ro jon̄oul. Ro ļalem iaer rekar māletlet, E kar ba rekar “rekar bōk Jetōb Kwōjarjar bwe en aer ritōl, im rekar jab po ilo m̧on,”8 ke laam̧ ko an ro rebwebwe “raar mat” bwe ejabwe aer oiļ.9 Naan ko an Nipai rej kameļeļe kōn kar-membōr ro retiljek an Kabun̄ in “Im ro jet enaaj kajokane, im kaalļo̧k er n̄an kōjatdikdik ioon men ko an kanniōk, bwe renaaj ba: Men otemjej ej em̧m̧an ilo Zaion.”10
Kanniōk ej pukōt n̄an lōke men ko an laļ ijello̧kin Kraist—ilo bar jet naan, kalimjōk mejen laļ in im jab mejen jetōb. Jetōb Kwojarjar ej letok n̄an kōj bwe jen lo “men ko āinwōt, im … āinwōt n̄e rej lukkun.”11 Ej wōt “jān kajoor eo an Jetōb Kwōjarjar [kom̧ maron̄] jeļā m̧ool eo an men ko otemjeļo̧k”12 im jab ilo m̧on. Jej likūt Kraist ilo io̧ļap in mour ko ad im kallim̧ur kōn m̧ōņōņō eo ad n̄an pokake kien ko An ejjab kōnke jebillo ak kōnke jemaron loe.13
Ak ta virgin ro rōbwebwe? Etke raar jab kōņaan kotak oil in jetōb in ļaam̧ eo? Raar ke bōk aer iien? Raar ke bōlen jab bojak kōnke raar jab lo ke e menin aikuj ak bwe ejeļo̧k tokjen? Jekdoon un ta, kar m̧on er kōn eddo eo aorō an Kraist. Menin ej jerbal ko an Satan n̄an riab im etke ļaam̧ in kam̧ool ko aer raar jab jerbal kōn jitōbin oil. Bārabōl in ej waanjon̄ak in iien kein ad. Elon̄ emōj aer eļļo̧k jen Rilo̧mo̧o̧r im bujen ko aer m̧okta ļo̧k jen aer etaļ jen im̧ōn jar eo An.
Jej mour ilo iien ko reoktak kar kanaan jān rikanaan ro etto, juon raan eo aSetan enaaj illu “enaaj kajoor ibūruōn ro nejin armej, im kōketak er n̄an illu ņae men eo em̧m̧an.”14 Elon̄ iaad rej mour ilo laļ eo an online eo kōm̧m̧an kalimomo ko im ennaan ko rej jum̧ae kwojarjar eo ad im tōmak ilo Kraist.
Kajoor eo im̧we jen jetōb ekajoor tata ilo mour eo an juon ajri ej itok jen waanjon̄ak eo etiljek an mama im baba im bubu im jimma ro retiljek ilo kojparok bujen ko aer rekwojarjar. Jinen im jemen rej katakin ajiri ro nejier tōmak ilo Irooj Jisōs Kraist bwe er barāinwōt “ren maron̄ jeļā n̄an ia rej maron̄ reilo̧k n̄an jeorļo̧k jero̧wiwi ko aer.”15 Bajjok im jab tiljek ilo kōjparok bujen ko ej tōl n̄an jetōb bajjok. Jetōbin jorrāan ej ekkā an ļap n̄an ajri ro nejid im ajri ro jibūd. Bāāren ro im bubu im jim̧m̧a ro, jej ke m̧ōņōņō wōt?
Būreejtōn Russell M Nelson ekar kakkōl ke “ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”16 Elukkun alikkar im ejjab bwōd kakōl in n̄an kōkaal ļam̧ ko ad im kōlapļo̧k oil in jetōb eo. Jej ke m̧ōņōņō wōt in ļoore rikanaan ro remour? Ewi jon̄an jetō in oil in laam eo am? Ta oktak ko ilo mour eo am̧ make me enaaj kōmaron̄ eok n̄an kōmakijkij ļo̧k am̧ bōk im̧we eo an Jetōb Kwojarjar?
Rainin, āinwōt ilo iien ko an Jisōs, ewōr enaaj eļļo̧k jen e, jab mōnōnō in bōke leen mour in rikaļoor. Āinwōt an lapļo̧k elotaan im matōrtōr ilo Kabun̄ eo an Rilo̧mo̧o̧r im ro rej ļoor E, ad mour in juon rikaloor enaaj aikuji juon kōņaan eļapļo̧k n̄an kajim̧we im kōkajoor jerbal eo an jetōb im jab eo̧ron̄ er.17
N̄e pedped in jetōb ko ad ej ekkaļ pen ioon Jisōs Kraist, jeban wōtlak im jeban aikuj n̄an mijak.
“Lo, Irooj ej aikuj bōro eo im ļōmņak eo em̧ōņōņō; im ro rem̧ōņōņō im pokake renaaj m̧ōn̄ā men ko rem̧m̧an jān āneen Zaion ilo raan kein āliktata.”18
Kōtļo̧k bwe iien otemjej jān m̧ōņōņō. Ilo et eo ekwojarjar etan Irooj Jisōs Kraist, amen.