2022
M̧ool n̄an Anij im Jerbal eo An
Oktoba 2022
13:53

Mool n̄an Anij im Jerbal eo An

Jān Elder Quentin L. Cook

Jān Doulul eo an Jon̄oulruo Rijilōk ro

Kōj aolep ej aikuj kapukōt naan in kam̧ool eo ad make kōn Jisōs Kraist, kajikik ikideelel ko ad, ukweļo̧k jen jerawiwi ko ad, im m̧ool n̄an Anij im jerbal eo An.

Oktoba eo lok, kar kappeik eō, ippānļo̧k Būreejtōn M. Russell Ballard im Elder Jeffrey R. Holland, n̄an loļo̧k United Kingdom, ijo kōmjeļ aolep kar jerbal āinwōt mijenede ro reddik. Kom̧ kar jeraam̧m̧an n̄an maron̄ katakin im kam̧ool, barāinwōt bar mour kōn bwebwenato ko ilo British Isles, ijo jimman jimma Herber C. Kimball im ro m̧ōttan rekar mijenede ro m̧oktata.1

Būreejtōn Russell M. Nelson, ilo an kakūtōtō kom̧ kōn jerbal in, ekar kakeememej bwe ejeja n̄an kappeik jilu Rijilōk ro n̄an loļo̧k eria eo ijo rekar jerbal āinwōt mijenede ilo iien ko rekar jodikdik. Ekar kwaļo̧k bwe aolep rej ikideelel n̄an loļo̧k ijo rekar mijen ie. Kōn juōn ettōn̄ dikdik eļap ilo mejen, ekar lukkuun kōmeļeļeik waanjon̄ak eo bwe elan̄e enaaj bar wōr jilu Rijilōk ro rekar jerbal ilo juōn wōt mijen ilo 60 iiō ko remootļo̧k, innām remaron̄ bōke ejja wōt kain jerbal in.

Heber C. Kimball

N̄an kepopo n̄an kappe in, ikar bar riiti Life of Heber C. Kimball, jeki jān juon jibūn ļaddik, Orson F. Whitney, eo tok ālik kar kūr e n̄an rijilōk. Bok in kar letok n̄an eō jān jinō eo aorōk ke inan̄in kar 7 iiō rūttowa. Kōm kar m̧aanjabpopo n̄an etal n̄an aje eo an This Is the Place Monument eo ilo Juļae 24,1947, jān Būreejtōn George Albert Smith.2 Liin ekar kōņaan bwe in jeļā eļapļo̧k kōn eo jim̧m̧aō Herber C. Kimball.

Bok eo epād ie juon ennaan eļap kar kaiookļo̧k Būreejtōn Kimball me ekar ļap kilaan n̄an tōre kein ad. Mokta jān kwaļo̧k ennaan eo, kōtļo̧k bwe ij kwalo̧k jidik kadkadin.

Ke Rikanaan Josep Smith ekar kalibuuj ilo Liberty Jail, Rijilōk Brigham Young im Herber C. Kimball ekar pād eddo eo ippāerro, ium̧win jekjek ko rejerata renana, kōn lale diwōjļo̧k eo an Armej ro Rekwojarjar jān Missouri. Diwōjļo̧k eo ekar aikuj m̧ōttan eo eļap kōnke kōn kean̄ in m̧anm̧an eo kōm̧m̧ane jān Governor Lilburn W. Boggs.3

Ālikin 30 iiō tokāļik Herber C. Kimball, iien eo ekar pād ilo Būreejtōnji eo Kein Kajuon, reilikļo̧k ilo bwebwenato kōn juon epepen ekāāļ, kar katakin, “Kōtļo̧k bwe in ba n̄an kwe, bwe elōn̄ iami enaaj loe iien eo n̄e kwonaaj bōk aōlep joreen, melijon̄, im en̄taan me komaron̄ m̧adm̧ōde, im elōn̄ iien ko rem̧m̧an n̄an kwaļo̧k bwe kwoj m̧ool n̄an Anij im jerbal eo An.”4

Herber ekar waanmaanļo̧k wōt: “N̄an iooni men ko repen me rej itok, enaaj menin aikuj n̄an kwe n̄an am̧ bōk juon jeļā kōn m̧ool eo an jerbal in kōn kwe make. Men eppen ko renaaj kanooj in kapan̄pan̄ jon̄an juon em̧m̧aan ak kōrā eo ejjab bōk jeļā in an make ak kam̧ool in eban m̧ool. N̄e ejan̄in wōr am̧ naan in kam̧ool, mour jim̧we im kūr ioon Irooj im en jab bōjrak am̧ mour jim̧we [m̧ae] kwoj [bōke]. Eļan̄n̄e kwojjab kwonaaj wōtlo̧k. … Iien eo enaaj itok n̄e ejjeļo̧k emmaan ak bar kōrā enaaj maron̄ niknik ioon an juon bar meram. Kajjojo enaaj tōl jān meram eo ilo e make. … Eļan̄n̄e ejjeļo̧k am̧ kwonaaj wōtlo̧k; kōn menin pukōt naan in kam̧ool eo kōn Jisōs im kōdāped n̄an e, bwe n̄e iien eo epen ej itok kwomaron̄ jab tūbbo̧k im wōtlo̧k.”5

Kajjojo iaad jej aikuj ad make naan in kam̧ool kōn jerbal eo an Anij6 im pādpād ioon jerbal eo eļap an Jisōs Kraist. Ilo 76 jekjōn in Katak im Bujen ko ej kōnono kōn jilu laļ ko im keidi aiboojoj eo an selestial n̄an aļ. Innām ej keidik aiboojoj eo an terrestrial n̄an allōn̄.7

Elukkuun kabulon̄lon̄ an lon̄ an make aļ meram, ak allōn̄ ej bōk an meram ak ej “baro meram.” Ilo ad kōnono kōn laļ eo an terrestrial, eoon 79 ej ba, “Errein ro rej jab kajoor ilo naan in kam̧ool kōn Jisōs.” Jeban aikuj bōk laļ eo an selestial im mour ippān Anij Jemed ilo ad baro meram; ej aikuj wōr ad naan in kam̧ool make kōn Jisōs im gospel eo An.

Jej mour ilo juon laļ eo eļapļok nana ie8 im bōro ko rej oktakļo̧k jān Anij kōnke kōn katak ko an armej.9 Juon iaan waanjon̄ak ko ekaitoktok limo ilo jeje ko rekwojarjar kōn inepata ko an Heber Kimball kōn pukōt juon naan in kam̧ool kōn jerbal eo an Anij im Jisōs Kraist ej kwaļo̧k ilo kapilōk eo an Alma n̄an ļōm̧aro jilu nejin—Hilamōn, Siblon, and Koriantōn.10 Ruo iaan ļōmaro nejin raar m̧ool n̄an Anij im jerbal eo An. Bōtaab ļeo juon nejin ekar kōm̧m̧ane jet jokāālet ko renana. N̄an n̄a kapilōk eo eļap tata an aorōk an Alma ej bwe ekar kōm̧m̧ane āinwōt juon jemen n̄an jeraam̧m̧an eo an ajri ro nejin make.

N̄ūrbōktak eo an Alma m̧oktata, āinwōt Heber C. Kimball, bwe kajjojo en wōr aer juon naan in kam̧ool kōn Jisōs Kraist im m̧ool n̄an Anij im Jerbal eo An.

Ilo katakin eo an eļap an em̧m̧an an Alma n̄an leo nejin Hilamōn, ej kōm̧m̧ane juon kallimur bwe ro rej “likūt aer lōke ilo Anij naaj rejetake er ilo amālejjon̄ ko aer, im inepata ko aer, im en̄taan ko aer, im naaj bkōjerkak er ilo raan eo āliktata.”11

Ke Alma ekar bōk juon loļo̧k eo ekar lo juon enjeļ, menin ejeja. Im̧weo ko kar kōm̧m̧ani jān Jetōb Kwojarjar eļapļo̧k an jej uwaer. Im̧we kein remaron̄ juōn wōt aer aorōk āinwōt im̧we ko an enjel. Būreejtōn Joseph Fielding Smith ekar katakin: “En̄jake ko an bōro rej itok jān Jetōb Kwojarjar eļapļo̧k aer aorōk jān juon visiōn. N̄e Jetōb eo ej kōnono n̄an jetōb, jeno̧k eo ioon jetōb eo eļapļo̧k an pen jeerļo̧k.”12

Menin ej tōlļo̧k kōj n̄an ko̧o̧njel eo an Alma n̄an ļeo nejin kein karuo, Siblon. Siblon ekar weppān, āinwōt leo jein Hilamōn. Ko̧o̧njel eo ikōnaan kwaļo̧k ej Alma 38:12, eo ej kōnono jidik in, “Lale bwe kwōn kajeikiki aolep ikdeelel ko am̧, bwe kwōn maron̄ obrak kōn iakwe.”

Bridle ej juōn naan ekaitoktok limo. N̄e jej iuwe ioon juon kūdia, jej kōjerbal bridle eo n̄an tōl kūdia eo. Juon naan āinwōt emaron̄ n̄an tōl, kōjebwikiki, ak kapojrake. Kallimur Mokta ej kwaļo̧k bwe jekar lam̧ōj kōn lan̄lōn̄ ke jaar jeļā enaaj kar wōr ad ānbwinni kanniōk.13 Anbwin eo ejjab nana—ej aiboojoj im aorōk—bōtaab jet ikdeelel ko, eļan̄n̄e jab jetjet kōjerbale im ilo jim̧we kōjeikik, maron̄ kōjepeļļo̧k kōj jān Anij im jerbal eo An im kabōjrak jelet an naan in kam̧ool eo ad.

Jān kōnono kōn ruo ikideelel ko rejenoļo̧k—juon, illu im ruo, lōn̄.14 Elukkuun kabulōnlōn bwe men kein jimōr elan̄e jab kajikiki im kabwejer enaaj kōm̧m̧an eļap metak bar, kadikļo̧k kareel eo an Jetōb, im kōjepeļļo̧k kōj jān Anij im jerbal eo An. Rikapo eo ej bōke jabdewōt iien em̧m̧an n̄an kobrak mour ko ad kōn pija ko renana im ettoon.

Ilo jet baam̧le ko, ejjab juon men jab jeļā kake kōn an juon ļeo pālele ak lio pālele illu im den̄ōt eo pāleen ak juon ajri. Ilo Julae, eo ikar bōk kwonaō ilo United Kingdom All Party Parliamentary Forum eo ilo London.15 Kakkure ņae kōrā ro im jodikdik ro ekar kōmejajaik āinwōt juon jorrāān ļapļap ilo aolepān laļ in. Ilo kakobaba n̄an kakkure, ro jet raar ioon kakkure ilo naan. Kean eo kōn baamle ej ba n̄an kōj ro “rej kakkure pāleen ak ro nejin naaj juōn raan ņaruwier im̧aan Anij.”16

Būreejtōn Nelson ekar lukkuun kalikkar aorōk menin inne jibbon̄.17 Jouj likuti ilo kōlmenļo̧kjen eo am̧ bwe jekdoon ak men̄e mama ak baba eo ekar ak ekar jab kametak kwe, kwoj jab aikuj kametak eo paleem ak ajri eo nejim ilo anbwin, naan ak en̄ajke.

Ilo tōre in ad juon iaan kapan̄pan̄ ko reļļap tata ej akweel im kakkure ilo kōnono eiookļok jorrāān ko an iaiio. Ilo elōn̄ wāween ko illu im kajin ko reddo emōj an bōk jikin kōmeļeļe, ekōnono, im ippān doon. Elōn̄ emōj aer etal jān ko̧o̧njel eo an rijilōk eo erūtto an Rilo̧mo̧o̧r, Piter, n̄an kappukot men ko rem̧m̧an an Kraist āinwōt jatōr, kijenmej, wānōk, jouj, im yokwe.18 Raar barāinwōt kowaan piktok eo āinwōt an Kraist an ettā.

Ilo kakobaba n̄an kōjbwebweik illu im kōjeikik ikdeelel ko jet, jej aikuj in tōl mour ko rerreo kōn kōjbwebweik ļōmņak ko ad, kajin, im m̧akūtkūt ko. Jej aikuj joļo̧k pija ko renana, etale jetjet eo an ta eo jej alooje ilo im̧ōko im̧ōd, im joļo̧k aolep jekjek in jerawiwi.

Menin ej bōktok n̄an kōj kapilōk eo an Alma n̄an ļeo nejin Koriantōn. Ejjab āinwōt ļōm̧aro jein, Hilamōn im Siblon, Koriantōn ekar bōk kwonaan ilo mour in jerawiwi.

Kōnke Koriantōn ekar bōk kwonaan ilo jab mour jim̧we, ekar menin aikuj n̄an Alma n̄an katakin kōn ukweļo̧k. Ekar katakin kōn nana eo an jerawiwi innām ekōjkan ukweļo̧k.19

Kōn menin kapilōk in bōbrae eo an Alma ekar n̄an kōjeikik ikdeelel ko, bōtaab n̄an ro me raar jerawiwi ej n̄an ukweļo̧k. Būreejtōn Nelson ekar leļo̧k n̄an membōr ro juon ko̧o̧ņjeļ eļap kōn ukweļok ilo Eprōļ 2019 kweiļo̧k eo eļap. Ekar lukkun kalikkar bwe ukweļo̧k kajjojo raan ej menin aikuj n̄an mour ko ad. “Ukweļo̧k ejjab juon m̧akūtkūt; ej juon wāween jerbal. Ej kii eo n̄an lem̧ōņōņō im aenōm̧m̧an ilo kōļmenļo̧kjeņ,” ekar katakin. “Ukweļo̧k aolep iien ej iaļ eo n̄an erreo, im erreo ej bōktok kajoor.”20 Eļan̄n̄e Koriantōn ekar kōm̧m̧ane ta eo Būreejtōn Nelson ekar ko̧o̧njel, enaaj kar m̧ōkaj in wōt an ukweļo̧k jen kar jino kōtļo̧k an ļōmņak ko retoon deļo̧n̄ ippān. Jerawiwi ko reļļap ejjamin naaj kar waļo̧k,

Ko̧o̧njel eo āliktata Alma ekar leļo̧k n̄an lōmaro nejin ej juōn iaan katak ko raorōk ilo aolepen jeje ko kwojarjar. Ej iookļo̧k Pinmuur eo kar kadedeļo̧k jān Jisōs Kraist.

Alma ekar kam̧ool bwe Kraist enaaj kar joļo̧k jerawiwi.21 N̄e ekar jab Pinmuur eo an Rilo̧mo̧o̧r eo, katak eo indeeo an jim̧we enaaj kar aikuji kaje.22 Kōnke kōn Pinmuur eo an Rilo̧mo̧o̧r, tūriamo emaron̄ menin anjo̧ n̄an ro me raar ukweļo̧k, im kōtļo̧k aer bar ro̧o̧l n̄an im̧aan mejān Anij. Enaaj em̧m̧an ad kōm̧m̧ane n̄an lin̄uri katak in aiboojoj.

Ejjeļo̧k juon emaron̄ bar ro̧o̧l n̄an Anij kōn jerbal ko an make; jej aolep aikuji jeraam̧man eo an en̄taan eo an Rilo̧mo̧o̧r. Aolep raar jerawiwi, im ej wōt kōn Pinmuur eo an Jisōs Kraist me jemaron̄ bōk tūriam̧o kake im mour ippān Anij.23

Alma ekar barāinwōt leļok kapilōk aiboojoj eo n̄an Koriantōn n̄an kōjwōj aolep ro raar ak renaaj deļo̧n̄e jekjek eo an ukweļo̧k, jekdo̧o̧ņ eļan̄n̄e jerawiwi ko reddik ak reļļap āinwōt ko kar kōm̧m̧ani jān Koriantōn. Eoon 29 in Alma 42 ej riit, “Im kiiō, nejū m̧aan, ikōņaan bwe kwōn kōtļo̧k bwe men kein rejjab bar kainepataik eok, im kōtļo̧k wōt bwe jero̧wiwi ko am̧ ren kainepataik eok, kōn inepata eo enaaj bōk laļļo̧k eok n̄an ukeļo̧k.”

Koriantōn ekar ron̄jake ko̧o̧njel eo an Alma im jimōr ukweļo̧k im jerbal ilo jim̧we. Kōnke kōn Pinmuur eo an Rilo̧mo̧o̧r, kemour ej pād n̄an aolep.

Ilo tōre eo an Alma, ilo tōre ko an Heber, im aaet ilo tōre in ad, jej aolep aikuj kapukōt naan in kam̧ool ko ad make kōn Jisōs Kraist, kajikiki ikideelel ko ad, ukwelo̧k jān jerawiwi ko ad, im kapukōt aeņōm̧m̧an ilo Pinmuur eo an Jisōs Kraist im m̧ool n̄an Anij im Jerbal eo An.

Ilo juon kōnono ekāāl im ilo bar kiiō ej jibbon̄in, Būreejtōn Russell M. Nelson ekar ba ilo wāween in: “Ij akweļap ippāmi n̄an bōk eddo in naan in kam̧ool eo am̧ kōn Jisōs Kraist. Jerbale. Eddo kake. Kōjparoke. Kajiririki bwe en eddōkļo̧k. Innām alooje an kabulōnlōn ko waļo̧k ilo mour eo am̧.”24

Ij kam̧oolol bwe jemaron̄ ron̄ kiiō jān Būreejtōn Nelson. Ij kam̧ool bwe Būreejtōn Nelson ej rikanaan eo an Irooj ilo tōre in ad. Ij iakwe im kaorōk im̧we eo ekabwilōn̄lōn̄ im tōl eo jej bōke kōn e.

Āinwōt juon Rijilōk an Irooj Jisōs Kraist, Ij kwaļo̧k aō kam̧ool em̧ool kōn kwojarjar eo an Rilo̧mo̧o̧r im m̧ool eo an Pinmuur eo An ilo etan Jisōs Kraist, amen.

Kakeememej ko

  1. Lale Ronald K. Esplin, “A Great Work Done in That Land,” Ensign, July 1987, 20: “On June 13, Elder Kimball, Orson Hyde, Joseph Fielding, and Heber’s friend Willard Richards left Kirtland for England. Ilo New York, ilo Juun 22, RiCanda rein Isaac Russell, John Goodson, and John Snyder rekar kobaļo̧k ippeer. Mijenede rein jilijimjuōn ekar etaļ n̄an Liverpool ilo Garrick (Lale Heber C. Kimball papers, 1837–1866; Willard Richards journals and papers, 1821–1854, Church History Library, Salt Lake City.)

  2. This Is the Place Monument eo pād ilo east side of Salt Lake City, Utah, ilo tūrin Emigration Canyon keemem e 100 iiō in tōparļo̧k eo an Armej ro Rekwojarjar n̄an Salt Lake Valley ilo Julae 24, 1847. Jikin aorōk ej kwaļo̧k pijan Brigham Young, Heber C. Kimball, im Wilford Woodruff.

  3. Ikōtaan 8,000 im 10,000 Armej ro Rekwojarjar ilo Raan Ko Āliktata rekar ko n̄an Missouri jinoin in 1839 eo n̄an ko jān makūtkūt in kakkure ko an vigilante im mob ro. Ium̧win tōl eo an Brigham Young im Heber C. Kimball, juōn kamiti kar kōm̧m̧an n̄an ain m̧weiuk ko, aikuj ko, im kōm̧m̧an ial eo 200 mail (320 km) ekamōkmōk ilo iien m̧ōlo diwōjļo̧k eo n̄an Illinois. Ro ritūriam̧o rej jokwe ilo town eo an Quincy rekar lelo̧k jidik jikin Armej ro Rekwojarjar rej en̄taan kōn em̧ im m̧ōn̄ā. (Lale Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 375–77; William G. Hartley, “The Saints’ Forced Exodus from Missouri,” in Richard Neitzel Holzapfel and Kent P. Jackson, eds., Joseph Smith: The Prophet and Seer [2010], 347–89.)

  4. Ilo Orson F. Whitney, Life of Heber C. Kimball: An Apostle, the Father and Founder of the British Mission (1945), 449; eoon ko aorōk kobaik.

  5. Ilo Orson F. Whitney, Life of Heber C. Kimball, 450.

  6. Lale Moses 1:39; bar lale “Jerbal in Lo̧mo̧o̧r im Mour Aibojooj ippān Anij,” jekjen 1.2 ilo Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, ChurchofJesusChrist.org. Jej itok n̄an Kraist im jipan̄ ilo jerbal eo an Anij ilo ad mour kōn gospel eo an Jisōs Kraist, kea kōn ro riaikuj, karuwainene ro n̄an bōk gospel eo, im ippān doon e baamle ko n̄an indeeo. Lale barāinwōt Katak im Bujen ko 110, eo ej kwaļo̧k kōn kii ko ko kar liļo̧k n̄an jerbal in lo̧mo̧o̧r.

  7. Lale barāinwōt 1 Korint 15:40–41.

  8. Lale Katak im Bujen Ko 45:27.

  9. Lale Katak im Bujen Ko 45:29.

  10. Alma ekar emmaan nejin Alma rikanaan. Ekar riekajet euteij ilo aneo im priest uteij im rikanaan. Ekar bōk juōn oktak eo ekabulon̄lon̄ āinwōt juōn laddik em̧m̧an dettan.

  11. Alma 36:3.

  12. Joseph Fielding Smith, “The First Presidency and the Council of the Twelve,” Improvement Era, Nov. 1966, 979.

  13. Lale Job 38:7.

  14. Lale Alma 5:9. Alma ekar ba n̄an Koriantōn, “jab bar ilo̧k ilo̧kan [ajurjurmelea] ko an mejam̧.”

  15. All-Party Parliamentary Group, Parliamentary sessions, Tuesday, July 5, 2022, “Preventing Violence and Promoting Freedom of Belief.”

  16. “Baam̧le Eo: Juon Naan in Kean̄ n̄an Laļ in,” ChurchofJesusChrist.org; lale barāinwōt Patrick Kearon, “Em̧ōj an Jerkakpeje kōn Kōmour ilo Pein Bao ko Pein: Jemaron̄ Erom̧ Eļapļo̧k Jān Rianjo̧,” Liaona, Māe 2022, 37–39.

  17. See Russell M. Nelson, “Ta in M̧ool?,” Liaona, Nob. 2022, 29.

  18. Lale 2 Piter 1:5–10.

  19. Lale Alma 39:9.

  20. Russell M. Nelson, “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” Liaona, Māe 2019, 67, 68.

  21. Lale Alma 39:15.

  22. Lale Alma 42:16.

  23. Lale 2 Nephi 25:23.

  24. Russell M. Nelson, Facebook, Aug. 1, 2022, facebook.com/russell.m.nelson; Twitter, Aug. 1, 2022, twitter.com/nelsonrussellm; Instagram, Aug. 1, 2022, instagram.com/russellmnelson; see also “Choices for Eternity” (worldwide devotional for young adults, May 15, 2022), broadcasts.ChurchofJesusChrist.org.