2022
Juon Ekkarōk in Jerbal kōn Revelesōn an Juon Make
Oktoba 2022
12:41

Juon Ekkarōk in Jerbal kōn Revelesōn an Juon Make

Jān Elder Dale G. Renlund

Jān Doulul eo an Jon̄oulruo Rijilōk ro

Jej aikuj meļeļe ekkarōk ilowaan ewi wāween an Jetōb Kwojarjar jerbal. N̄e jej m̧akūtkūt ilowaan wōt ekkarōk in jerbal eo, Jetōb Kwojarjar emaron̄ kōrļo̧k meļeļe ko rekabulon̄lon̄.

Āinwōt elōn̄ iami, ekar ļap aō bōk im̧we jān Elder Dieter F. Uchtdorf um̧win iiō ko. Menin ekōmeļeļeik, jidik in, ta eo ij ilen ba.1 Kōn menin, ippān naan in jeorļo̧k bōd ko n̄ane …

Pilot ro retijemļo̧k rej ekeke ilowaan wōt jon̄an eddo in baļuun eo im ļoor tōl ko jān ro rej kōjebwebweik jikin jok im kelo̧k ko an baļuun im kōjerbal jikin jok im kelōk eo im iaļ in baļuun. Ekar ba, pilot ro rej em̧akūtkūt wōt ilowaan juon ekkarōk in jerbal. Jekdoon eo jon̄an aer māletlet im kapeel, ej ilo wōt aer ekāke ilowaan ekkarōk an jerbal in pilot ro remaron̄ kwaļo̧k ilo kejparok tōprak ko reļļap an juon baļuun n̄an kōtōprak jerbal ko aer rekabwilōn̄lōn̄.

Ilo juon jekjek āinwōt, jemaron̄ bōk revelesōn ko ad make ilowaan wōt juon ekkarōk in jerbal. Ālkin peptaij, jej bōk juon menin letok aiboojoj, menin letok eo an Jetōb Kwojarjar.2 Ilo ad kajjeon̄ n̄an pād wōt ilo iaļ in bujen eo,3 ej “Jetōb Kwojarjar eo… [me] enaaj kwaļo̧k n̄an [kōj] aolep men [jej] aikuj kōm̧m̧an.”4 N̄e jej jeļā ak ļon̄tak, jemaron̄ kajjitōk jipan̄ jān Anij.5 Kallim̧ur eo an Rilo̧mo̧o̧r elikkuun alikkar: “Kajjitōk im naaj lewōj n̄an kom̧; … Bwe eo ej kajjitōk ej bōk.”6 Kōn jipan̄ eo an Jetōb Kwojarjar, jemaron̄ ukot piktokid ekwojarjar n̄an mejān kajjik indeeo.7

Kallim̧ur eo kōn revelesōn an juon make kōn Jetōb Kwojarjar eo ej kabwilōn̄lōn̄ kaim̧we, āinļo̧k wōt juon baļuun eo ej ekāke. Im āinwōt pilot ro an baļuun, jej aikuj meleļe ekkarōk in jerbal eo ijo Jetōb Kwojarjar ej m̧akūtkūt ilowaan n̄an letok revelesōn ko an juon make. N̄e jej m̧akūtkūt ilowaan wōt ekkarōk in jerbal eo, Jetōb Kwojarjar emaron̄ kōrļo̧k im̧we ko rekabwilōn̄lōn̄, tōl, im kainōm̧m̧an. Itulikin jekkarōk in jerbal n̄e, jekdoon eo jon̄an ad māletlet im kapeel, maron̄ m̧ōņe kōj im itaak im bwil.

Jeje ko rekwojarjar rej ļōme m̧ōttan eo m̧oktata in ekkarōk in Jerbal in kōn revelesōn an juon make.8 Kwojkwoj ioon naan ko an Kraist, āinwōt loe ilo jeje ko rekwojarjar, ej ļōn̄aj revelesōn eo an juon make. Elder Robert D. Hales ekar ba: “N̄e jej kōņaan kōnono n̄an Anij, jej jar. N̄e jej kōņaan bwe En kōnono n̄an kōj, jej etali jeje ko rekwojarjar.”9

Jeje ko rekwojarjar rej katakin kōj wāween bōk revelesōn an juon make.10 Im jej kajjitōk ta eo ejim̧we im em̧m̧an11 im ejjab kōn ta eo ejjab ekkar n̄an ankilaan Anij.12 Jejjab “kajjitōk nana,” kōn kōttōpar ko rejjab jim̧we n̄an kaļe kajjitōk ko n̄an kōjeraam̧m̧an kōj make ak n̄an kakūrm̧ool kōņaan ko ad make.13 Ilōn̄in aolep men, jej aikuj kajjitōk ippān Jemedwōj Ilan̄ ilo etan Jisōs Kraist,14 tōmak bwe jenaaj bōk.15

M̧ōttan eo kein karuo an ekkarōk in jerbal eo ej bwe jej bōk revelesōn n̄an mour ko ad make im jikin ko me ewōr ad eddo n̄ani im jab n̄an ro jet. Ilo bar juon wāween ba, jej kelo̧k im jok ilo jikin ekāke ko em̧ōj karōke n̄an kōj. Aorōk eo an jikin jok im kelo̧k ko kar kalikkari ilo jejjōt kar katakin raan ko m̧oktata ilo bwebwenato in Jepļaaktok eo. Hiram Page, juon iaan Rikam̧ool ro Rualitōk n̄an Bok in Mormon, kar ba bwe ekar bōk revelesōn ko n̄an aolepān Kabun̄ in. Jejjo membōr ro kar m̧ōņe er im tōl er ilo jab jim̧we.

Ilo uwaake, Irooj ekar kwaļo̧k bwe “ejjeļo̧k juon naaj jitōn̄e n̄an bōk kien ko im revelesōn ko ilo kabun̄ in ijello̧kin rikarejera Josep Smith, … m̧ae Inaaj kappe … bar juon ilo ijo jikin.”16 Katak ko, kien ko, im revelesōn ko n̄an Kabun̄ in rej mālim wōt n̄an rikanaan ro rej mour, ro rej būki jān Irooj Jisōs Kraist.17 En̄in ej jikin jok im kelo̧k an rikanaan eo.

Iiō ko remootļo̧k, ikar bōk juon call jān juon armej eo ekar kalbuuj kōn an kar deļo̧n̄e jikin eo ejjab jikin. Ekar ba n̄an eō bwe kar kwaļo̧k n̄an e bwe ewōr kakkobaba in jeje ko rekwojarjar kar kūlbwini ium̧win floor eo an m̧weo ekar kajjieon̄ delo̧n̄e. Ekar ba bwe n̄e enaaj kar bōk kakobaba in jeje ko rekwojarjar, ekar jeļā bwe enaaj kar bōk menin letok an ukok, būk m̧aantak jeje ko rekwojarjar rekāāl, im ļam katak ko im tōl eo an Kabun̄ in. Ikar ba n̄an e ke ekar bōd, im ekar akweļap ippa bwe in jar kake. Ikar ba ke iban. Ekar jino eddo an ekōnono im ekar kam̧ōj call eo.18

Ikar jab aikuj in jar kōn kajjitōk in kōn juon un epidodo bōtaab eļap: rikanaan eo wōt ej bōk revelesōn n̄an Kabun̄ in. Enaaj kar “jab jim̧we n̄an wāween ko an Anij”19 n̄an ro jet n̄an bōk revelesōn rōt in, eo jikin ej pād ilo jikin jok im kelo̧k an rikanaan eo.

Revelesōn an juon make ej ekkar wōt n̄an juon armej make. Komaron̄ bōk revelesōn, n̄an waanjon̄ak, kōn ia eo n̄an jokwe ie, ta iaļ in jerabal eo n̄an bōke, ak wōn eo n̄an m̧areik.20 Ritōl ro an Kabun̄ in remaron̄ katakin katak ko im kwaļo̧k kapilōk ko reim̧we, bōtaab eddo eo n̄an kāālet kein rej ped ioomi. Revelesōn eo am̧ in n̄an bōke; en̄in ej jikin jok im kelo̧k eo am̧.

M̧ōttan eo kein kajilu in ekkarōk in jerbal eo ej bwe revelesōn an juon make enaaj jokkun wōt juon ippān kien ko an Anij im bujen ko jaar kōm̧m̧ani Ippan. Ļōmņak kake juon jar me āinwōt in: “Jema Ilan̄, iien jar ko an Kabun̄ rejjab kaitoktoklimo. Imaron̄ ke kabun̄jar n̄an Eok ilo Jabōt ilo tōļ ko ak ilo tūrin lojet? Imaron̄ ke jab etal n̄an kabun̄ eo im bōk kwojkwoj eo bōtaab maron̄ bōk wōt kōjeraam̧m̧an ko kōn kōkwojarjar wōt raan in Jabōt?”21 Ilo uwaake kain jar rōt in, jemaron̄ ļōmņak kōn uwaak eo jemaron̄ kōtmene jān Anij, “Nejū, em̧ōj kadede Aō kwaļo̧k ankilaō kōn raan in Jabōt.”

N̄e jej kajjitōk kōn revelesōn kōn juon men eo emōj an Anij kar kalikkar kadede, jej leļo̧k kōj ilo kauwōtata n̄an kapok en̄jake ko ad im ron̄jake ta eo jej kōņaan ron̄. Juon iien juon em̧m̧aan ekar jiron̄ eō kōn apan̄ ko an n̄an kajim̧we jekjek eo an baam̧le eo an rej itok jān menin jāān. Ekar wōr an ļōmņak in koot jāān āinwōt juon uwaak, ekar jar kake, im en̄jake bwe ekar bōk revelesōn n̄an kōm̧m̧ane. Ikar jeļā kar m̧oņe kōnke ekar kappukōt revelesōn ej jum̧ae kien eo an Anij. Rikanaan Josep Smith ekar kakkōl, “Ejjeļo̧k juon jorrāān eļapļo̧k n̄an ajri ro nejin armej jān n̄e rej pād ium̧win kareel eo an juon jetōb riab, n̄e rej ļōmņak ewōr ippāer Jetōb eo an Anij.”22

Jet remaron̄ kwaļo̧k bwe Nipai ekar ko̧kkure juon kien ke ekar m̧ane Leban. Mekarta, kōmālim in ejjab kowaan kien eo—kien eo bwe revelesōn an juon make enaaj jokkun wōt ippān kien ko an Anij. Ejjeļo̧k juon kōmeļeļe edik im likieo, ak kōtļo̧k bwe in kalikkar jet men ko. Jepta eo ekar jab ijjinoe kōn an Nipai kajjitōk eļan̄n̄e emaron̄ m̧an Leban. Ekar juon men eo ekar jab kōņaan kōm̧m̧ane. Kamej Leban ekar jab n̄an jeraam̧m̧an eo an Nephi bōtaab n̄an letok jeje ko rekwojarjar n̄an juon laļ ilju jekļaj im juon armej in bujen. Im Nipai ekar jeļā ke ekar revelesōn—ilo m̧ool, ilo jekjek in, ekar juon kien jān Anij.23

M̧ōttan eo kein kemen an ekkarōk in jerbal eo ej n̄an kile ta eo Anij em̧ōj an kwaļo̧k kadede n̄an eok make, ilo am̧ m̧ōņōņō in bōk elōn̄ļo̧k revelesōn jān E. Eļan̄n̄e Anij ekar uwaake juon kajjitōk im jekjek ko rekar jab oktak, etke jej kōtmene bwe uwaak eo enaaj oktak? Josep Smith ekar lokjak ilo jorrāān in jekjek in ilo 1828 eo. M̧ōttan eo m̧oktata an Bok in Mormon kar ukote, ke Martin Harris, juon rijipan̄ im rijeje eo m̧oktata, ekar kajjitōk ippān Josep kōn mālim n̄an bōk peij ko kar ukōti n̄an kwaļo̧ki n̄an lio pāleen. Kar jab jeļā ta eo n̄an kōm̧m̧ane, Josep ekar jar n̄an bōk tōl. Irooj ekar jiron̄ e n̄an jab kōtļo̧k an Martin būk peij ko.

Martin ekar kajjitōk bwe Josep en bar kajjitōk ippān Anij. Josep ekar, im uwaak eo ekar, jab menin bwilōn̄, ejja wōt. Bōtaab Martin ekar akweļap ippān Josep n̄an bar kajjitōk alen kein jilu, im Josep ekar kajjitōk. Tōre in Anij ekar jab ba , “jaab.” Ijjelo̧kin, ekar āinwōt n̄e Anij ekar ba, “Josep, kwojeļā wāween aō en̄jake kōn menin, ak ewōr am̧ anemkwoj n̄an kāālet.” Rōļo̧k jān mo ko, Josep ekar kāālet n̄an kōtļo̧k bwe Martin en būk peij ko 116 in ļo̧o̧k eo im kwaļo̧ki n̄an jejjo iaan ro uwaan baam̧le eo. Peij ko kar ukōti raar jako im jamin kar loi. Irooj ekar eddo an kauweik Josep.24

Josep ekar ekkatak, āinwōt an rikanaan eo Jekab ilo Bok in Mormon kar katakin: “Pukot jaab n̄an kapilōk Irooj, ak n̄an bōk kapilōk jān Pein. Bwe … ej kapilōk ilo mālōtlōt.”25 Jekab ekar kakkōl bwe men ko renana renaaj waļo̧k n̄e jej kajjitōk men ko jejjab aikuj in kar. Ekar ba m̧oktaļo̧k bwe armej in Jerusalem ro renaaj kar kappukot “men ko raar jab maron̄ meļeļe,” reiļo̧k jān “kōkaļļe eo,” im lukkuun laleļo̧k Rilo̧mo̧o̧r eo an laļ in.26 Raar bōd kōnke rekar kajjitōk kōn men ko rejjab aikuj in kar im maron̄ jab meļeļe.

Eļan̄n̄e kwar bōk revelesōn an make n̄an kajjejet kōņaan eo am̧, im jekjek ko rejjan̄in oktak, Anij em̧ōj an kadede uwaake kajjitōk eo am̧.27 N̄an waanjon̄ak, jej kajjitōk im bar kajjitōk jet iien n̄an lukkuun kalikkar ke emōj jeorļo̧k ad bōd. N̄e jenaaj ukweļo̧k, obrak kōn lan̄lōn̄ im aenōm̧m̧an kōn jeļā, im bōk jeorļo̧k in jerawiwi ko ad, jej jab aikuj bar kajjitōk ak jemaron̄ lōke uwaak eo emōj an Anij letok.28

Āinwōt ad lōke uwaak ko an Anij imaan, jej aikuj peļļok n̄an revelesōn ko ad make rej itok wot. Aaet ilo m̧ool, jejjo iaan ijo jipadōki rej kaju jān juon baluun ejjab pojrak. Jej aikuj kile bwe revelesōn an juon make maron̄ bōke “lain im bar lain” im “naan in kain̄i im bar naan in kain̄i,”29 bwe tōl eo kar kwaļo̧k en maron̄ in im emakijkij ej ļapļo̧k.30”

M̧ōttan ko an ekkarōk in jerbal eo kōn revelesōn an juon make rej aitokļo̧k im ippān doon kōkajoorļo̧k. Bōtaab ilowaan wōt ekkarōk in jerbal eo, Jetōb Kwojarjar eo emaron̄ im enaaj kwaļo̧k aolep men jej aikuji n̄an weak lōn̄ļo̧k im dāpij kajoor eo ilo iaļ in bujen eo. Innām jemaron̄ jeraam̧m̧an kōn kajoor eo an Jisōs Kraist n̄ān erōm ta eo Jemedwōj Ilan̄ ekōņaan bwe jān erōm. Ij kajjitōk ippāmi n̄an wōr lōke n̄an bōk revelesōn an juon make kōn kwe make, meļeļe bwe Anij ekar kwaļo̧k, juon wōt ippān jeje ko rekwojarjar im kien ko An ekar litok kōn rikanaan ro An kar jitōn̄ er im jen ilowaan wōt eddo eo im anemkwoj in kāālet eo am̧ make. Ijeļā bwe Jetōb Kwojarjar emaron̄ im enaaj kwaļo̧k n̄an kwe aolep men ko me kwoj aikuj kōm̧m̧ani,31. Ilo etan Jisōs Kraist, amen.

Kakeememej ko

  1. Elder Dieter F. Uchtdorf emakijkij an kōjerbal waanjon̄ak ko rej ekkeijel ippān baļuun n̄an katakin aurōk in pedped in katak ko an gospel. N̄an waanjon̄ak, ekar keidi pre-flight ko an pilot ro n̄an katakin āinwōt Rilo̧mo̧o̧r eo ilo “A Teacher’s Checklist” ([broadcast for teachers, June 12, 2022], broadcasts.ChurchofJesusChrist.org).

  2. Jetōb Kwojarjar eo ej kein kajilu uwaan Doulul in Anij, ekkā kōnono kake āinwōt Jetōb, Jetōb an Anij, im ej kōm̧m̧ani elōn̄ eddo ko reaurōk ilo karōk in lo̧mo̧o̧r eo. Ej kam̧ool kōn Jemed im Nejin, kwaļo̧k m̧ool eo kōn aolep men, kakwojarjar ro rej ukweļo̧k im em̧ōj aer peptaij, im ej Jetōb Kwojarjar in Kallim̧ūr eo (lale Guide to the Scriptures, “Holy Ghost,” scriptures.ChurchofJesusChrist.org).

  3. Lale 2 Nipai 31:19–21; Mosaia 4:8. Ejjeļo̧k bar juon iaļ jej “maron̄ mour ilo aelōn̄ in Anij.” Kōņaan ijello̧kin jamin naaj ejake juon iaļ eoktak.

  4. 2 Nipai 32:5; bar lale Katak im Bujen Ko 84:43–44.

  5. Lale 2 Nipai 32:4; Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 93–96.

  6. Matu 7:7–8.

  7. See “Baam̧le eo: Juon Naan in Kean̄ n̄an Aolepān Laļin”; “Un Kōnono an Jiron̄ ro”; General Handbook: Serving in The Church of Jesus Christ of Latter-day Saints, 27.0; 27.2, ChurchofJesusChrist.org.

  8. Lale 2 Nipai 32:3.

  9. Robert D. Hales, “Holy Scriptures: The Power of God unto Our Salvation,” Liahona, Nov. 2006, 26–27.

  10. The scriptures teach that the voice of the Holy Ghost is mild and still, like a whisper—not loud or noisy; it is simple, quiet, and plain; it can be piercing and burning; it affects both mind and heart; it brings peace, joy, and hope—not fear, anxiety, and worry; it invites us to do good—not evil; and it is enlightening and delicious—not mystifying. Lale 1 Kiin̄ ro 19:11–12; Omnai 1:25; Alma 32:28; Hilamōn 5:30–33; 3 Nipai 11:3; Moronai 7:16–17; Katak im Bujen Ko 6:22–24; 8:2–3; 9:8–9; 11:12–14; 85:6; Boyd K. Packer, “The Candle of the Lord,” Ensign, Jan. 1983, 51–56; Russell M. Nelson, “Ron̄jake E,” Liaona, Māe 2020, 88–92; Russell M. Nelson, “Jelm̧ae Ilju im Jekļaj eo kōn Tōmak,” Liaona, Nob. 2020, 73–76; Russell M. Nelson, ““Revelesōn n̄an Kabun̄ in, Revelesōn n̄an Mour ko ad,” 93–96.

  11. Lale 3 Nipai 18:20; Moronai 7:26; Katak im Bujen Ko 88:64–65.

  12. Lale Hilamōn 10:5; Katak im Bujen Ko 46:30.

  13. Jemes 4:3; lale Jemes 4:3, New International Version; 2 Nipai 4:35; Katak im Bujen ko 8:10; 46:7; 88:64–65.

  14. Lale Katak im Bujen Ko 88:64–65; Guide to the Scriptures, “Prayer,” scriptures.ChurchofJesusChrist.org.

  15. Lale 3 Nipai 18:20; Moronai 7:26.

  16. Katak im Bujen Ko 28:2, 7.

  17. Lale Katak im Bujen Ko 21:4–5.

  18. Jide, kar kōm̧m̧ani jekjek ko n̄an e n̄an an bōk jipan̄ im uno ko ekar aikuji.

  19. Teachings of Presidents of the Church: Joseph Smith (2007), 197.

  20. Lale Thomas S. Monson, “Whom Shall I Marry?,” New Era, Oct. 2004, 4.

  21. Lale Katak im Bujen Ko 59:9–16.

  22. Joseph Smith, in Times and Seasons, Apr. 1, 1842, 744, josephsmithpapers.org.

  23. Ekkā an Irooj oktak, kōkm̧anm̧anļo̧k, ak kōm̧m̧an mālim n̄an kien ko An em̧ōj kwaļo̧ki, ak men kein rej kōm̧m̧an ilo kanaan in revelesōn im jab an make juon revelesōn. Kanaan in revelesōn ej itok jān rikanaan ro an Anij em̧ōj kile er ekkar n̄an māletlet im meļeļe eo an Anij. Oktak kein rekoba revelesōn eo an Anij n̄an Moses im Joshua n̄an m̧ane armej ro ilo āneen Canaan jekdoon kien eo An “Kwōn jab uror” (Exodus 20:13). Kōn rikanaan ro An, Irooj, emaron̄ ukōt kien ko An n̄an An kōttōpar. Ijoke, jejjab anemkwoj, kōn revelesōn an juon make n̄an ukot im kajekdoon kien ko em̧ōj karōki me Anij ekar kwaļo̧k n̄an Kabun̄ in An kōn rikanaan eo.

    Lale 1 Nipai 4:12–18; n̄an juon kōmeļeļe edipeo, lale Joseph Spencer, 1st Nephi: A Brief Theological Introduction (2020) 66–80.

  24. N̄an juon bwebwenato edipeo kōn pein ko 116 in ļo̧o̧k ko, lale Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 44–53; see also Katak im Bujen Ko 3:5–15; 10:1–5.

  25. Jekab 4:10.

  26. Lale Jekab 4:14–16.

  27. Joseph Smith ekar katakin, “ejjab aikuj in kar kajjitōk ippān Anij kōn juon revelesōn ejenolo̧k ijello̧kin n̄e juon revelesōn im̧aanļo̧k ejjan̄in de kar bōke me ejetjet n̄an jekjek eo” (ilo History, 1838–1856 [Manuscript History of the Church], volume A-1, 286–87, josephsmithpapers.org).

  28. Lale Mosiah 4:3. N̄e jej waanmaanļo̧k im en̄jake bōd im ajļo̧k ālikin juon ukweļo̧k kōn aolepen bōro ak koņaan, ej itok jān tōmak eo edik ilo Jisōs Kraist im An maron̄ n̄an lukkuun joļo̧k ad bōd im kemour kōj. Jet iien jemaron̄ tōmak bwe jeorļo̧k bwod ej n̄an ro jet im ejjab lukkuun n̄an kōj. Menin ej juon likjab in tōmak ilo ta eo Rilo̧mo̧o̧r eo emaron̄ kōm̧m̧an kōn pinmuur eo An indeeo.

  29. Lale Aiseia 28:10; 2 Nipai 28:30; David A. Bednar, “Lain im bar Lain, Naan in Kain̄i im bar Naan in Kain̄i,” New Era, Jept. 2010, 3–7.

  30. Ak eļan̄e Anij ejjan̄in lewaj n̄an eok revelesōn, kajjitōk wōt. Āinwōt an Elder Richard G. Scott katakin, “Wōnm̧aanļo̧k kōn lōke. … N̄e kwōj mour jim̧we im m̧akūtkūt kōn lōke, Anij eban kōtļo̧k am̧ wōnm̧aanļo̧k wōt ilo ejjeļok kakkōl n̄e em̧ōj am kōm̧m̧ane kālet eo ebōd” (“Using the Supernal Gift of Prayer,” Liahona, May 2007, 10).

  31. Lale 2 Nipai 32:5