Jisōs Kraist Ej Kajoor n̄an Jodikdik ro

Jān Elder Dieter F. Uchtdorf

Jān Doulul eo an Jon̄oulruo Rijilōk ro

Likūt tōmak eo am̧ ilo Jisōs Kraist. E enaaj tōl eok ilo iaļ ejim̧we. E ej am̧ kajoor.

N̄an kōpooj ennaan in n̄an rainin, iaar en̄jake im̧we eļap n̄an kōnono n̄an jiron̄ ro im likao ro.

Ij bar kōnono n̄an aolep ro raar bar jodikdik, bar n̄an ro rejjab maron̄ bar keememej e.

Ij kōnono n̄an aolep ro rej iakwe jodikdik ro nejid im kōņaan bwe ren tōprak ilo mour in.

N̄an ro diktak in epepen, ewōr juon aō ennaan ejeņoļo̧k n̄an kwe jān am̧ Rilo̧mo̧o̧r, Jisōs Kraist.

Ennaan eo an Rilo̧mo̧o̧r n̄an Kwe

Ro m̧ōtta reddik rejitenbōro, n̄e Rilo̧mo̧o̧r en kar pād ijin kiiō, ta eo En kar ba n̄an kwe?

Ij tōmak En kar jino kwaļo̧k An lukkuun iakwe n̄an kwe. E en kar ba naan kein, ak ren kar lukkuun kajoor—jen wōt An pād—ilo ejjeļo̧k kajjitōk, kwon kar lukkuun en̄jake ilo buruōm, kobrak aolepān am̧.

Im aaet, kōnke jej aolep m̧ōjņo̧ im jab wānōk, jet abņōņō ko renaaj pād ilo ļōmņak ņe am̧. Kwomaron̄ keememej bōd ko kwaar kōm̧m̧ani, iien ko kwaar pād ilo kapo, men ko kwoj kōtmene kwon kar jab kōm̧m̧ani—ak kōtmene kwon kar kōm̧m̧an em̧m̧anļo̧k.

Rilo̧mo̧o̧r enej kar meļeļe kōn menin, im ij tōmak E en kar kwaļo̧k n̄an eok naan ko E eaar kōnono kaki ilo jeje ko rekwojarjar:

Jab mijak.¹

“Jab pere.”²

“Kwōn m̧ōņōņō.”³

“En jab pok būruemi.”⁴

Ijjab tōmak Enaaj kōm̧m̧an jekpen ņae kōn bōd ko am̧. E eban kadikiļo̧k. Jaab, E enaaj kajjitōk bwe kwon ukweļo̧k—n̄an likūt jerawiwi ko am̧ itulik, n̄an oktak, bwe En maron̄ jeo̧rļo̧k am̧ bōd. E enaaj kakeememej eok bwe 2,000 iiō remootļo̧k E ekar bōk jerawiwi ko Ioon Make bwe kwon maron̄ ukweļo̧k. En̄in ej m̧ōttan karōk in m̧ōņōņō eo kar letok n̄an kōj jān Jemedwōj Ilan̄ eo ej iakwe.

Jisōs emaron̄ kar kwaļo̧k bwe bujen ko am̧ Ippān—kar kōm̧m̧ani ke kwaar peptaij im bar kōkāāl kajjojo iien kwoj bōk m̧ōttan kwojkwoj eo—ej lewaj n̄an eok juon jemdo̧o̧n eo ejeņoļo̧k Ippān. Kain jemdo̧o̧n in me jeje ko rekwojarjar ej kōmeļeļeiki āinwōt kobaik kom̧ bwe, kōn jipan̄ eo An, kwomaron̄ ineek jabdewōt eddodo.⁵

Ij tōmak bwe Rilo̧mo̧o̧r Jisōs Kraist ekōņaan bwe kwon loe, en̄jake, im jeļā bwe E ej am̧ kajoor. Kōn jipan̄ eo An, ejjeļo̧k jon̄an men ko kwoj maron̄ kadedeikļo̧k. En̄in ej aorōk eo am̧ ejjeļo̧k jon̄an. E ekōņaan bwe kwon kalimjōk eok make ilo jekjek eo Ej kalimjōk eok. Im bwe elukkuun oktak jān wāween eo laļ in ej kalimjōk eok.

Rilo̧mo̧o̧r ekar kwaļo̧k, ilo naan ko ralikkkar, bwe kwoj juon leddik ak ļaddik Nejin Anij Ekajoor Pōtata. Jemedwōj Ilan̄ ej armej eo eaiboojoj tata ilo aolepān laļ in, eobrak kōn iakwe, m̧ōņōņō, erreeo, kwojarjar, meram, tūriam̧o kake, im m̧ool. Juon raan Ekōņaan bwe kwon jolete men otemjej ko ewōr An.⁶

En̄in ej unin am̧ pād ioon laļ in—n̄an ekkatak, eddōkļo̧k, im wōnm̧aanļo̧k im erom̧ men otemjej ko Jemedwōj Ilan̄ ekar kōm̧anm̧ani n̄an eok.

Bwe en pidodo menin, E ekar jilkintok Jisōs Kraist bwe en am̧ Rilo̧mo̧o̧r. Ej jibadbad eo An kōn karōk in m̧ōņōņō eo eļap, Kabun̄ eo An, priesthood eo An, jeje ko rekwojarjar—aolepeer.

En̄in ej mejen kajjik eo am̧. En̄in ej jekļaj eo am̧. En̄in ej kālet eo am̧!

M̧ool im Kālet ko

Men eo eaorōk ilo karōk eo an Anij n̄an m̧ōņōņō eo am̧ ej kajoor eo am̧ n̄an kālet.⁷ Aaet, Jemedwōj Ilan̄ ekōņaan bwe kwon kālet m̧ōņōņō eo indeeo Ippān, im E enaaj jipan̄ eok n̄an jolete, ak Eban kipel eok kake.

Kōn menin E ej kōtļo̧k bwe kwon kālete: Meram ak marok? Em̧m̧an ak nana? Mōņōņō ak būrom̧ōj? Mour indeeo ak mej ilo jetōb?⁸

Āinwōt epidodo kālet in, ejjab ke? Ak jet iien, ilo laļin, eļapļo̧k an pen lukkuun pen.

Jorāān eo ej bwe jejjab aolep iien lo men ko ralikkar me jej kōņaan. Rijilōk Paul ekar keidi āinwōt kalimjōke “ilo juon glass im e tab.”⁹ Elōn̄ pok ko ilo laļ in kōn ta ejim̧we im ta ebōd. M̧ool eoktak n̄an kōm̧m̧an nana n̄an em̧m̧an im em̧m̧an n̄an nana.¹⁰

Ak n̄e kwoj lukkuun kappukot m̧ool eo—indeeo, m̧ool eo ejjamin oktak—kālet ko am̧ renaaj alikkarļo̧k. Aaet, kwonaaj ioon kapo ko im apan̄ ko. Men ko renana renaaj waļo̧k. Men ko jejjab jeļā kaki renaaj waļo̧k. Men ko rekabūrom̧ōjm̧ōj. Ak kwomaron̄ jeļa ta eo kwon kōmmane n̄e kwojeļā wōn kwe, etke kwoj pād ijin, im n̄e kwoj lōke Anij.

Ia eo kwoj lo m̧ool eo?

Epād ilo gospel eo an Jisōs Kraist. Im bwe tarlep in gospel eo ej katakin ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Jisōs Kraist eaar ba, “N̄a iaļ eo, im m̧ool eo, im mour eo: ejjeļo̧k armej ej itok n̄an Jema, eļan̄n̄e jab kōn Eō.”¹¹

N̄e ewōr ippam̧ kālet ko raorōk n̄an kōm̧m̧ani, Jisōs Kraist im gospel eo An em̧ōj an jepļaaktok rej kālet eo em̧m̧antata. N̄e ewōr ippam̧ kajjitōk ko, Jisōs Kraist im gospel eo An em̧ōj an jepļaaktok rej uwaak eo em̧m̧antata. N̄e kwoj m̧ōjņo̧, Jisōs Kraist ej am̧ kajoor.

E ej leļo̧k kajoor n̄an eo ej m̧ōk, im n̄an eo ejjeļo̧k an maron̄, Ej korļo̧k kajoor.

Ro rej kattare Irooj renaaj bar kōkāāl kōn kajoor eo An.¹²

N̄an Kōkajoorļo̧k Jodikdik ro

N̄an jipan̄ eok lo Iaļ eo im jipan̄ eok kōm̧m̧an bwe katak an Kraist en jerbal ilo mour eo am̧, Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar kōpooj juon kein ekkatak ekāāl, juon bok ekāāl N̄an Kōkajoorļo̧k Jodikdik Ro.

Enan̄in 50 iiō ko, N̄an Kōkajoorļo̧k Jodikdik ro ekar juon kein tōl n̄an epepen in an jodikdik ro an Armej ro Rekwojarjar ilo Raan Ko Āliktata. Ij aolep iien bōk juon kape ilo bōjo̧ e aō, im ij jere ippān armej ro ewōr aer kajjitōk kōn jon̄ak ko ad. Em̧ōj kōkāāle im kōkm̧anm̧anļo̧k n̄an jipan̄ ilo apan̄ ko im kapo ko ad ilo tōre in ad. Kape eo ekāāl an N̄an Kōkajoorļo̧k Jodikdik Ro epojak ilo online ilo 50 kain kajin ko im renaaj pojak n̄an būriin. Enaaj juon jipan̄ eļap an aorōk n̄an kōm̧m̧ani kālet ko ilo mour eo am̧. Jouj im kaorōk e āinwōt am̧ make im jeere ippān ro mōttam̧.

Oktak in ekāāl an N̄an Kōkajoorļo̧k Jodikdik ro ej bar taitōļ kōn Juon Tōl n̄an Kōm̧m̧ani Kālet ko.

N̄an lukkuun kalikkar, tōl eo em̧m̧antata kwomaron̄ bōk n̄an kōm̧m̧ani kālet ko ej Jisōs Kraist. Jisōs Kraist ej kajoor n̄an jodikdik ro.

Kōn menin jipadpad eo N̄an Kōkajoorļo̧k Jodikdik ro ej n̄an jitōn̄ļo̧k eok n̄an E. Ej katakin eok m̧ool ko indeeo an gospel eo An me em̧ōj an jepļaaktok—m̧ool ko kōn wōn kwe, wōn E, im ta eo kwomaron̄ kōm̧m̧ane kōn kajoor eo An. Ej katakin eok elmen kōm̧m̧ani kālet ko rejim̧we pedped ioon m̧ool ko indeeo.¹³

Ebar aorōk n̄an jeļā ta eo N̄an Kōkajoorļo̧k Jodikdik Ro ejjab kōm̧m̧ane. Ejjab kōm̧m̧ani kālet ko n̄an kwe. Ejjab lewaj n̄an kwe juon “aaet” ak “jaab” kōn aolep kālet ko kwomaron̄ jelm̧ae. N̄an Kōkajoorļo̧k Jodikdik ro ej mije pedped in kālet ko am̧. Ej mije jon̄ak ko raorōk, pedped in katak ko, im katak ko ijelo̧kin aolep kain m̧wil ko kajjojo.

Irooj, kōn rikanaan ro An, elakkar tōl kōj ilo iaļ in aolep iien. Ej akwelape kōj n̄an “kōļap jetōb eo [ad] n̄an bōk revelesōn.”¹⁴ E ej kūr kōj n̄an “ron̄jake E.”¹⁵ E ej kūr kōj n̄an ļoor E ilo wāween ko rekwojarjarļo̧k.¹⁶ Im jej ekkatak ilo juon eiten āinwōt wāween in kajjojo wiik ilo Itok, Ļoor Eō.

Ij kile bwe tōl in emaron̄ lewaj n̄an eok juon laajrak eaetok in nuknuk ko kwojjab aikuj in kōņaki, naan ko kwojjab aikuj in ba, im pija ko kwojjab aikuj in alooji. Ak ta eo elukkuun jipan̄ ilo aolepen kabun̄ in? Ta eo enaaj lukkuun kōpooj eok n̄an mour ejjelok jem̧ļo̧kin Āinwōt Kraist ?

Josep Smith ekar ba, “Ij katakin er pedped in katak ko rejim̧we, im rej tōl er make.”¹⁷

Im Kiin̄ Benjamin ekar ba n̄an armej ro an ilo Bok in Mormon, “Ij jab maron̄ ba n̄an kom̧ aolep men ko kom̧ maron̄ jero̧wiwi ie; bwe ewōr iaļ ko im wāween ko, em̧ool āindein elōn̄ bwe ij jab maron̄ bwini.”¹⁸

Kiin̄ Benjamin ekar ba, “A jon̄an in imaron̄ ba n̄an kom̧, … lale kom make, im ļōmņak ko ami, im naan ko ami, im kōm̧m̧an ko ami, im pokake kien ko an Anij im wōnm̧aanļo̧k ilo tōmak ilo … [ad] Irooj, em̧ool n̄an jemļo̧kin mour ko ami.”¹⁹

Enana ke bwe en wōr kien? Em̧ool ejjab. Jej aikuji aolep raan. Ak enana ke n̄an mije wōt kien ko im jab mije Rilo̧mo̧o̧r? Kwoj aikuj in jeļā etke im elmen, innām ļōmņaki ta ko rej waļo̧k itok jān kālet ko am̧. Kwoj aikuj likūt am̧ lōke ilo Jisōs Kraist. E enaaj tōl eok ilo iaļ ejim̧we. E ej am̧ kajoor.²⁰

Kajoor ilo Katak eo Em̧ool

N̄an Kōkajoorļo̧k Jodikdik ro ej kajoor n̄an kwaļo̧k katak eo kōn Jisōs Kraist. Ej kajoor n̄an karuwaineneik eok n̄an kōm̧m̧ani kālet ko pedped ioon katak an Kraist. Im ej kajoor n̄an kōmeļeļeik kōjeraam̧m̧an ko Jisōs Kraist eaar kallim̧ur n̄an ro rej ļoor iaļ eo An.²¹

Būreejtōn Russell M. Nelson ekar ba: “N̄e ikdeleel eo am̧ eļap n̄an kōtļo̧k bwe [ilo mour eo am̧], … elōn̄ kālet ko remaron̄ pidodo. … Elōn̄ men ko abbelon̄lon̄ kaki im rej oktak n̄an jet men ko kwojjab abōņōņō kaki. Kwojeļā ewi karbab eo am̧ make. Kwojeļā ta eo n̄an alooje im riiti, ia n̄an joļo̧k am̧ iien, im wōn ro kwoj iiaio̧ ippāer. Kwojeļā ta eo kwoj kōņaan n̄an kadedeļo̧k. Kwojeļā kain rot armej eo kwoj … kōņaan erom̧ āinwōt.”²²

Juon Jon̄an Routiejļo̧k

Jon̄ak ko Routiiejļo̧k an Jisōs Kraist n̄an rikaļoor ro An. Im kūr eo n̄an lukkuun kappukot Ankilaan im mour kōn m̧ool ko An ej jon̄ak eo eutiejtata ekkar!

Men ko raorōk an kanniōk im kālet ko an jetōb rejjab aikuj pedped ioon kōņaan ko an juon make, ak ta eo ewōr tokjen ak ebun̄bun̄.²³ Irooj ejjab ba, “kōm̧m̧ane men eo kwoj kōņaan.”

E ej ba, “Anij En Anjo̧.”

E ej ba, “Itok, ļoor eō.”²⁴

E ej ba, “mour ilo wāween ko rekwojarjarļo̧k.”

E ej ba, “kōjparok kien ko Aō.”

Jisōs Kraist ej waanjon̄ak eo ad em̧m̧an, im jej kajjieon̄ kōn aolepen ad kajoor n̄an ļoor E.

Ro m̧ōtta rejitenbōro, ij āliji, n̄e Rilo̧mo̧o̧r en kar jutak ijin rainin, E en kar kwaļo̧k iakwe eo An ejjeļo̧k jem̧ļo̧kin n̄an kwe, An lōke ilo kwe edipio. E en kar ba n̄an kwe ke kwomaron̄ kōm̧m̧ane menin. Kwomaron̄ bōk lan̄lōn̄, mour lem̧ōņōņō kōnke Jisōs Kraist ej am̧ kajoor. Kwomaron̄ lo lōke, aenōm̧m̧an, jokne, lem̧ōņōņō, im en̄jake am̧ aorōk kiiō im indeeo, kōnke kwonaaj loi aolep ilo Jisōs Kraist, ilo gospel eo An, im ilo Kabun̄ in An.

Kōn menin ij kwaļo̧k aō kam̧ool āinwōt juon Rijilōk an Irooj Jisōs Kraist im likūti ippāmi aō kōjeraam̧m̧an ilo juon kam̧m̧oolol eļap im iakwe n̄an kom̧, ilo etan Jisōs Kraist, amen.

Kakeememej ko

1. Luk 5:10; 8:50; 12:7; Katak im Bujen Ko 38:15; 50:41; 98:1.

2. Katak im Bujen Ko 6:36.

3. Matu 14:27; Jon 16:33; Katak im Bujen Ko 61:36; 68:6; 78:18.

4. Jon 14:1, 27.

5. Lale Matu 11:28–30.

6. Lale Katak im Bujen ko 84:38.

7. Kwomaron̄ ba bwe karōk eo an Jemed ekar ejaak n̄an kōtļo̧k am̧ kwaļo̧k am ikdeleel ilo kālet ko am̧ bwe kwon maron̄ bōk jerbal ko redipio kōn ta eo kwoj kōņaan. Āinwōt an Elder Dale G. Renlund katakin, “Kōttōpar eo an Jemedwōj Ilan̄ ilo kōkaajriri ejjab n̄an ajri ro Nejin bwe ren kōm̧m̧ane ta eo ejim̧we; ej n̄an ajro ro Nejin bwe ren kālet n̄an kōm̧m̧ane ta eo ejm̧we im āliktata n̄an er0m̧ ainwōt E” (“Kom̧win Kāālōt Rainin,” Liaona, Nob. 2018, 104).

8. Lale 2 Nipai 2:26–27.

9. 1 Korint 13:12.

10. Lale Aiseia 5:20.

11. Jon 14:6.

12. Lale Aiseia 40:29–31.

13. Āinwōt Armej ro Rekwojarjar, ekkā ad jeļā ta eo jej kōm̧m̧ane im jab kōm̧m̧ane—m̧wilid. Menin emaron̄ em̧m̧an, ak em̧m̧anļo̧k n̄an jeļā ta eo jej jeļā (kōn m̧ool ko me rej kwaļo̧k m̧wilid) im n̄an wōn jej jeļā (bwe Rilomo̧o̧r—im wāween an iakwe eo ad im̧we m̧wil ko m̧wilid).

14. Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 96.

15. See Russell M. Nelson, “Ron̄jake E,” Liaona, Māe 2020, 88–92.

16. Pedped in katak eo pedped ioon tōl eo N̄an Kōkajoorļo̧k Jodikdik ro ekāāl ilo jejjet ippān kein jipan̄ ko jet kar kwaļo̧ki jān Kabun̄ in an Rilo̧mo̧o̧r, ekitbuuj Preach My Gospel, jerbal in karejar, the laajrak in kein katak ko an Itok, Loor Eō me pedped ioon mije m̧ōko, būrookram̧ eo an Ajri im Jodikdik ro, Teaching in the Savior’s Way, im eo ekāāl Bok in Tōl eo Eļap. Ealikkar, Irooj ej kalōk mour in jetōb eo ad. E ej kwaļo̧k n̄an kōļaplo̧k lōke ippān armej in bujen ro An ilo raan ko āliktata.

17. Teachings of Presidents of the Church: Joseph Smith (2007), 284.

18. Mosaia 4:29. Ilo juon wāween, en̄in ta eo Parisi ro ilo tōre ko an Jisōs rekar kajjieon̄ in kōm̧m̧ane. Kōttōpar eo aer n̄an kōbōjrak an armej ro kakkure kien eo, raar kobaik bukwi kien ko pedped ioon jeļāļo̧kjeņ eo aer kōn jeje ko retinņo. Ta eo Parisi ro rekar bōd kake rekar ļōmņak kien ko aer renaaj kar lo̧mo̧o̧ren er. Innām, ke Rilo̧mo̧o̧r eaar waļo̧ktok, rekar jab kile E.

19. Mosaia 4:30; eoon eo eaorōk kar kobaiktok.

20. Bar juon unin pedped rekar aikuji rainin ej n̄an kōļapļo̧k m̧antin Kabun̄ eo an Irooj. Pedped in katak ko rej indeeo im ejjeļo̧k jemļo̧kier. Kien ko ak jerbal eo an pedped in katak em̧m̧anļo̧k aer jerbal ilo jet jikin ak ejjab ilo jikin ko jet. Ta eo ej kakobaik kōj ej Jisōs Kraist im m̧ool ko indeeo Ekar kwaļo̧k, men̄e emālij aer jerbal im ilo aolep m̧anit. Kōn menin būrabōļōm eo n̄an laajraki aolep men n̄an kōm̧m̧āni im jab kōm̧m̧ani rejjab ilo imminene ak alikkar. Būrabōļōm̧ eo ej kōjepelļo̧k mije eo ad jān Kein jipan̄ eo Em̧ool an kajoor ko ad, ad Rilo̧mo̧o̧r, Jisōs Kraist.

21. Elōn̄ iiō ko rem̧ootļo̧k, Būreejtōn Boyd K. Packer ekar kōnono kōn naan kein rekajoor: “Katak em̧ool, meļeļe, ej ukōt kōm̧m̧an im m̧wiļ. Ekkatak katak ko ilo gospel in enaaj m̧ōkaj an kōkm̧anm̧anļo̧k m̧wil jān ekkatak kōn m̧wil enaaj kōkm̧anm̧anļo̧k m̧wil” (“Do Not Fear,” Liahona, May 2004, 79).

    Būreejtōn Ezra Taft Benson ekar kwaļo̧k ejja m̧ool in wōt: “Jerbal eo an Irooj ej jān tulowa n̄an nam̧ōj. Laļ in ej kalimjōk tunam̧ōj. … Laļ in ej ļōme m̧wiļ in armej, ak Kraist emaron̄ ukōt piktokin armej” (“Born of God,” Ensign, Nov. 1985, 6).

    Ke rikanaan Alma ilo Bok in Mormon ekar lo nana ilo laļ eo ejjepooļ e, eaar oktakļo̧k n̄an naan in Anij kōnke e ejeļā “eaar ļapļo̧k kajoor in jelōt ļōmņak ko an armej ro jān jāje eo, ak jabdewōt men eo, [n̄an eo eaar waļo̧k n̄an er, kōn menin—Alma eaar ļōmņak eaar mennin aikuj bwe ren kajjieon̄ jelōt wānōk an naan in Anij” (Alma 31:5).

22. Russell M. Nelson, “Anij En Anjo̧,” Liaona, Nob. 2020, 94. Būreejitōn Russell M. Nelson ekar kōmeļeļeiki: “Ilo iiō ko ikar dik, ikar ekkatak jerbal n̄an ro jet im rekar kakobaik laajrak in men ko rej kōm̧m̧ani im men ko rejjab kōm̧m̧ani ilo Jabōt. Eaar jab to jān iien eo ke iaar ekkatak jān jeje ko rekwojarjar bwe m̧akūtkūt im m̧wil ko m̧wilū ilo raan in Jabōt en kwaļo̧k juon kōkaļļe ikōtaaō im Jemedwōj Ilan̄. Kōn meļeļe in, ijjab aikuj laajrak in men ko ij kōm̧m̧ani im jab kōm̧m̧ani. N̄e ij tin kōm̧m̧ane kālet eo aō n̄an kōm̧m̧ane juon m̧akūtkūt ilo raan in Jabōt, ij kajjitōkin eō make, ‘Ta kōkaļļe eo ikōņaan bwe in leļo̧k n̄an Anij?’ Kajjitōk in ekar kōm̧m̧an bwe kālet ko aō kōn raan in Jabōt ren alikkar” (“The Sabbath Is a Delight,” Liahona, May 2015, 130).

23. Elder David A. Bednar ekar kwaļo̧k bwe “Pedped in katak ko kōn mour jim̧we im erreo rej bar … jipan̄ kōj n̄an erreim̧aanļo̧k ilōn̄inļo̧k kōņaan ko ad im ikdeleel ko ad make ilo an letok jeļā in eaorōk kōn m̧ool indeeo ilo ad jelm̧aeiki jekjek ko rokkotaktak, apan̄ ko, im kālet ko, im men ko jej jelm̧aeiki ilo mour in” (““Pedped in Katak ko an Gospel eo Aō”,” Liaona, Māe 2021, 123–24).

24. Luk 18:22.