Peran n̄an Kwaļo̧k M̧ool eo

Jān Elder Denelson Silva

Jān Jiljilimjuonn̄oul eo

Ñe jejeļā kōn m̧ool eo, Irooj ej letok iien n̄an ad kōm̧mani ta ko En kar kōm̧m̧ani n̄e En kar pād ijin rainin.

Ilo 1982 eo, ikar kam̧ōjļo̧k degree in associate eo aō ilo topograghy ilo juon technical jikuuļ.

Ilo jem̧ļo̧k in iiō eo, juon iaan classmate ro aō eaar kūrļo̧k eō bwe kom̧ro en bwebwenato. Ij keememejļo̧k am̧ro kar etal jān ro uwaan kūlaaj eo im etal n̄an ijo juon im ikkure ie. Ke kom̧ro kar tōbar ijo, eaar jino kōnono kōn aer jum̧ae kabuñ eo an, eaar jab kwaļo̧k tok wōt juon bok, ak ekar letok bok eo. Lukkuun m̧ool eo, ijjab keememej aolep naan ko eaar ba tok, bōtaab ij keememej ilo tōre eo wōt im wāween eo ikar en̄jake ke eaar ba “Ikōņaan kwaļo̧k aō naan in kam̧ool ñan kwe bwe bok in em̧ool im bwe gospel eo an Jisōs Kraist em̧ōj an jepļaaktok.”

Ālkin am̧ro kōnono, iaar ro̧o̧l n̄an m̧weo, lale jet iaan peij ko ilo bok eo, im likiti ilo jeļab in bok ko. Kōnke epaak an jem̧ļo̧k iiō eo am̧ro im kar iiō eo aō āliktata n̄an bōk topography degree eo aō, iaar jab lukkuun leļo̧k aō n̄an bok eo im n̄an classmate eo aō me ekar jeere tok bok in n̄an n̄a. Etan bok eo em̧ōj ami jeļā kadede. Aaet, eaar Bok in Mormon.

Ļalem allōn̄ tokālik, mijinede ro raar itok ñan m̧weo im̧ō, rej tin ro̧o̧l ke ij ro̧o̧ltok jān jikin jerbal. Ikar bar kōdeļo̧n̄ tok er. Kōm̧ eaar jijōt ilo ettōņaak eo itum̧aanin m̧weeo, im raar jino katakin eō.

Ilo aō kar kappukot m̧ool eo, iaar kajjitōk ippāer ewi kabun̄ eo em̧ool im elmen aō loe. Mijinede ro raar katakin eō bwe imaroñ make bōk uwaak eo ippa make. Kōn kōtmene in eļap im ikdeleel, iaar eo̧ron̄ kajjitōk eo aer im riiti jet jebta ko jān Bok in Mormon. Iaar jar kōn juon bōro em̧ool im kōn kōttōpar (lale Moronai 10:4–5). Uwaak ñan jar eo aō eaar lukkuun alikkar, im jet raan tokālik—ilo Māe 1, 1983—ikar peptaij im kapen āinwōt juon iaan ro uwaan Kabuñ eo an Jisōs Kraist im Armej Ro Rekwojarjar ilo Raan Ko Āliktata.

Rainin, ñe ij ļōmņak kōn jinoin bwebwenato in iien in eaorōk me ekar bōk jikin, iaar lo aorōkin peran eo an classmate eo aō ke eaar kwaļo̧k naan in kam̧ool eo an kōn m̧ool eo em̧ōj an jepļaaktok im kar kwaļo̧k tok n̄an eō kōn kam̧ool in Jepļaaktok eo an gospel eo an Jisōs Kraist, barāinwōt Bok in Mormon. Jerbal in edik im eļam waan, ak eaar juon men ļapļap im aorōk ñan ña, ikar ejaake juon jemjerā eo ikōtaaō im mijinede ro ke iaar ioon er.

M̧ool eo em̧ōj an walok ñan ña, im ālkin aō peptaij, iaar erom̧ juon rikalooraņ Jisōs Kraist. Ilo iiō ko tokālik, im kōn jipañ ko an jet armej me relukkun aōrok āinwōt ritōl ro, rikaki ro, im ro mōtta, im barāinwōt ilo aō make ekkatak, iaar ekkatak menin bwe ke ikar kālet n̄an erom̧ juon rikaloor an Jisōs Kraist, iaar jab kōm̧mane wōt jerbal in jojomare m̧ool eo, ak barāinwōt ikar kwaļo̧k kake.

Ñe jej errā n̄an tōmak ilo m̧ool eo im ñan ļoor e, im ñe jej pukōt kilen bwe jen maroñ erom̧ juon m̧oolin rikaļooran Jisōs Kraist, jejjab ebbōk pepa in nōbar eo ej kwaļo̧k ke jejamin kōm̧m̧an bōd, reban kōnanaiki kōj, im reban kapoiki kōj bwe jen etal jān m̧ool eo, bwe reban kariab e kōj, ak barāinwōt bwe jeban ioon eñtaan ko. Bōtaab jeļā m̧ool in ej katakin bwe elaññe jenaaj deloñe iaļ in erānin̄ im eaidik me enaaj kōrool kōj ñan im̧aan mejen Jemedwōj Ilan̄, aolep iien enaaj wōr iaļ ñan ad ko jen jorren kein (lale 1 Korint 10:13); enaaj wōr wōt iien ad pere pere ko ad make m̧okta jen ad pere tōmak ko ad (lale Dieter F. Uchtdorf, “Itok, Kobatok Ippam,” Liaona,Nob. 2013, 21); im āliktata, ej lukkuun kapene ke jeban make iaar ñe jej ioon eñtaan ko, bwe Anij ej loļo̧k armej ro An ilo iien eñtaan ko aer (lale Mosaia 24:14).

Ñe jejeļā kōn m̧ool eo, Irooj ej letok iien n̄an ad kōm̧mani ta ko En kar kōm̧m̧ani n̄e En kar pād ijin rainin. Lukkuun m̧ool, Ej kwaļo̧k ñan kōj ilo katak ko An ta ko jej aikuj kōm̧m̧ani: “Im kom̧ naaj ilo̧k ilo kajoor eo an Jetōb eo Aō, kwaļo̧k naan kōn gospel eo Aō, ruo ilo̧k ruo, ilo Eta, im kotak ainikiōmi āinwōt ainikien juon jilel, kwaļo̧k naan eo Aō āinwōt enjel ro an Anij” (Katak im Bujen Ko 42:6). Iien eo em̧m̧an n̄an jerbal in mijinede n̄e jej jodikdik ej make wōt im jeņoļo̧k!

Jouj, likao ro, jab karūm̧ūjļo̧k iien kōppopo ko ami n̄an jerbal n̄an Irooj āinwōt mijinede ro. Ilo am̧ naaj ioon jekjek ko me remaron̄ kōm̧m̧an bwe en pen am̧ kālet n̄an etal im mijen—āinwōt an nej kakkure iien jikuuļ, ak ba goodbye n̄an leddik eo jeram̧ ilo am̧ jab jeļā n̄e kwonaaj jerāiki wōt, ak etal jān juon jerbal, keememej ta eo eaar waļo̧k n̄an Rilo̧mo̧o̧r Jisōs Kraist ilo Getsemane. Ilo iien kwaļo̧k naan eo An, E ekar barāinwōt jelm̧ae men ko reppen, ekoba kōnanaik E, jum̧aeik E, im āliktata kap eo em̧eo kōn katok in pinmuur eo An. Aeet ilo aolep jekjek ko E ekar kappukot n̄an kōm̧m̧ane ankilaan Jemān im leļo̧k aiboojoj N̄ane. (Lale Jon 5:30; 6:38–39; 3 Nipai 11:11; Katak im Bujen Ko 19:18–19.)

Jiroñ ro, komij lukkuun ruwainene, eļan̄n̄e kwoj ikdeleel, ñan jerbal ilo jikin kallip in an Irooj, im ilo ami kōpooj kom̧ make n̄an jerbal āinwōt full-time mijinede, kom̧ ban ellā jān ejja mellijon̄ kein wōt.

N̄an aolep ro rej kāālet n̄an jerbal n̄an E, ij kallim̧ur ke 24 ak 18 allōñ renaaj eļļā ilo jikin mijen eo āinwōt an nej bar āindein eļan̄n̄e kwonej pād wōt ilo m̧weo, bōtaab iien ko rem̧m̧an me rej kōttar likao im jiron̄ ro an Kabun̄ in n̄an etal n̄an mijen ej make wōt im jeņoļo̧k. Ilo iien in kwoj pinej jenkwan Rilo̧mo̧o̧r Jisōs Kraist im Kabun̄ eo An, eban jejtokjen. Kobaļo̧k ilo iien jar lōn̄lōn̄ kein, kōļapļo̧k im kwaļo̧k naan in kam̧ool eo elōñ kōttan ilo juon raan, ekkatak jeje ko rekwojarjar iumwin elōn̄ awa ko, im ioon armej rein me koban kar ioone er ne kwon kar Pād wōt m̧weo, elukkuun pen kōmeļeļe iien rōt in. Ejja joñan ļābōļ in en̄jake ko kar kōpooji n̄an jodikdik ro me Irooj ej kūr er n̄an etal n̄an mijen ko. Eļap ami ruwainene im eļap aikuji kom̧. Jouj jab kajejtokjen aorōk in jerbal in mijinede, n̄an service mijen ko ej bar letok en̄jake ko me jejjab maron̄ kōmeļeļeiki. “Aorōk in jetōb ko rekanooj ļap im̧aan mejān Anij” (Katak im Bujen Ko 18:10), ekoba aorōk in jetōb eo am̧.

Ilo iien eo kwonaj jepļaak jen am̧ jerbal, bolen leddik eo jeram̧ ak ļeo jeram̧ ejako an kōttar eok, ak kiiō kwonaaj jeļā kilen kōnnaan n̄an ro jet. Ilo am̧ naaj jikuuļ enaaj ļapļo̧k am̧ meļeļe im kwonaaj lo men ko kwar jab loi m̧okta im eaar maron̄ kōpooj eok n̄an jikin jerbal, im āliktata, enaaj lōn̄ am̧ jeļā kōn peran in kwaļo̧k kōn gospel in aeņōm̧m̧an, kam̧ool kōn m̧ool eo em̧ōj an jepļaaktok.

N̄an ro iaami me em̧ōj ami m̧are im ilo jabdewōt iiō in mour ko ami, eļap aikuji kom̧ ilo jerbal in an Irooj. Kōpooj kom̧ make. Mour juon mour ewāmourrurr, pukōt n̄an un̄n̄are peim̧ make ilo mour in jetōb im ilo kanniōk, kōnke iien ko rem̧m̧an n̄an kōm̧m̧ane ta eo Irooj enkar kōm̧m̧ane n̄an ajri ro Nejin rejjab n̄an jet wōt ekkar n̄an iiō ko aer. En̄jake ko rekam̧ōņōņō tata me kōrā eo pāleeō im n̄a kom̧ro kar en̄jake ilo iiō ko ļo̧k, jerbal ippān ripālele ro rej jerbal in mijinede, jerbal ilo jikin ko rejeņoļo̧k, im jerbal ippān armej ro me rej make wōt im jeņoļo̧k.

Men ko iaar ekkatak ilo kar iien eo āliktata bwe in bōk degree eo aō ekar katakin eō bwe jej aikuj aolep iien jojomare m̧ool eo n̄e jej kwaļo̧k kake im bwe jojomare m̧ool eo ej juon men ej aikuj wōnmaanļo̧k wōt im jab bōjrak. Ñan jojomare m̧ool eo ejab maron̄ kōm̧m̧an ilo juon wāween elej ak ijjeļo̧kin kōn itok limo n̄an iakwe, jeer, im karuwainene armej ro me jej kwaļo̧k kam̧ool n̄an er kōn m̧ool eo, ļōmņak wōt kōn em̧m̧an eo ilo mour in kanniōk im jetōb an ajri ro nejin Jemedwōj Ilan̄ eo eļap iakwe ippān (lale Mosaia 2:41).

Ilo kar kweilo̧k eo eļap ilo kar Oktoba 2021, Būreejtōn Russell M. Nelson, ri kannaan eo ad ejitenbōro, ekar katakin kōn oktak eo jān ta eo jet rej ļōmņake, ewōr men eo me jej ņa etan jim̧we im bōd. Em̧ool ewōr m̧ool—m̧ool eo ejjeļo̧k jem̧ļo̧kin. (Lale “Mool Erreo, Katak Erreo, im Revelesōn Erreo,” Liaona, Nob. 2021, 6.)

Jeje ko rekwojarjar rej katakin kōj, “M̧ool ej jeļāļo̧kjeņ kōn men ko āinwōt aer kiiō, im āinwōt aer kar waļo̧k, im āinwōt aer naaj waļo̧k tokālik” (Katak im Bujen Ko 93:24

Jeļā m̧ool eo ejjab kōm̧m̧an ad em̧m̧anļo̧k jān ro jet, ak ej katakin kōj ta eo jej aikuj in kōm̧m̧ane n̄an jepļaakļo̧k n̄an im̧aan mejān Anij.

Ilo am̧ wōnm̧aanļo̧k wōt ilo am̧ pen ilo Kraist im kōn peran ejjab wōt n̄an kwaļo̧k m̧ool eo ak n̄an mour kōn m̧ool eo, kwonaaj lo jokne im aeņōm̧m̧an ilo men ko reppen kwoj jelm̧ae ilo raan kein.

Men kein reppen remaroñ katūbok kōj ñan laļ, jeļā bwe ñe je kōjerbal tōmak ilo Jisōs Kraist, “en̄taan kein [ad] renaaj n̄an jidik wōt iien” (Katak im Bujen Ko 121:7) n̄e jenej ļōmņake aolep men ko an mour indeeo.s Jouj, jab karōk juon am̧ make iien n̄an kōjem̧ļo̧k apan̄ im idajon̄jon̄ ko am̧. Lōke Anij im jab ebweer, bwe eļan̄n̄e jenaaj ebweer, jeban jeļā jem̧ļo̧kin iaļ in ad n̄e jen kar pād ilo aelōn̄ in kiin̄ eo an Anij.

Dāpij wōt m̧ool eo, ekkatak jān kein ekkatak ko rem̧ool:

• Jeje ko rekwojarjar (lale 2 Nipai 32:3).

• Naan ko an rikanaan ro (lale Amos 3:7).

• Jetōb Kwojarjar Eo (lale Jon 16:13).

Ij kwaļo̧k aō naan in kam̧ool kōn Jisōs Kraist im bwe Kabun̄ eo An in. Ewōr juon ad rikanaan ej mour rainin, im jenaaj en̄jake anemkwoj eļan̄n̄e jenaaj kwaļo̧k m̧ool eo kōn peran. Ilo etan Jisōs Kraist, amen.