Kwōn Kōņak Am̧ Kajoor, O Zaion
Kajjojo iaad ej aikuj etale men ko aorōk ilo kaniōk im jetōb ilo tiljek im ilo jar em̧ool.
Bwebwenato ko rej juōn wawein eo eweppen im ej kilen an Jisōs Kraist lemaantak ilo an katakin. Em̧m̧an meļeļe ko ie, būrabōļ ko an Rilo̧mo̧o̧r rej bwebwenato ko keidi n̄an m̧ool ko an jetōb n̄an men ko an laļin im en̄jake ko ilo mour in. N̄an waanjon̄ak, gospel ko ilo Kallim̧ur Ekāāl rej keidi katak ko āinwōt aelōn̄ in lan̄ ej āinwōt ine in mōstad,1 ñan juōn bōōr eo elap,2 ñan ro lo juōn em im ri jerbal ilo jikin kallib eo an,3 kōn virgin ro jon̄oul,4 im n̄an men ko jet. Ilo m̧ōttan jerbal eo an Rilo̧mo̧o̧r ilo Galile, jeje ko rekwojarjar rej kwaļo̧k ke “n̄e ejej būrabōļ, E jab kōnono n̄an er.”5
Enaaj kar lukkuun meļeļe eo ak ennaan eo ilo kar juōn būrabōļ ejjab jejjet. Bōtaab, bwebwenato ej kwaļo̧k wōt m̧ool eo ekwojarjar n̄an ro rej bōk m̧ōttan n̄an tōmak ilo Anij, keppopo ilo jetōb an juon make, im kōņaan ekkatak. Aaet, juōn make ej aikuj kōjerbal anemkwoj eo ejimwe im lukkuun “kajjitōk, kappukot, im kaļļaļļļ”6 ñan pukot m̧ool ko rej pād ilo juōn būrabōļ.
Ij lukkuun jar bwe Jetōb Kwojarjar eo enaaj katakin kōj kajojo ilo ad jimor kejōklokjeņ kōn m̧ool kein raorōk.
Kwojkwoj in Pālele
“Im Jisōs … bar ba n̄an er ilo waan jon̄ak ko, im ba,
“Aelōn in lan̄ ej āinwōt juon kiin̄ eo ear kōm̧m̧an kwōjkwōj in pālele n̄an nejin m̧aan,
“Im ear jilkinļo̧k ro ri karijeran, bwe ren pukot tok ro ar jiron̄ er kōn kwōjkwōj in pālele eo, im re jab kōņaan itok.
“Ej bar, jilkinļo̧k bar jet rikarijeran im ba, Kom̧win ba n̄a ro ar jiron̄ er, Lo, em̧ōj aō kōppojak kwōjkwōj: kau kom̧aan ko aō im kidu re matōk em̧ōj aer m̧ani, im men otemjej re dedeļo̧k: kom̧win itok n̄an kwōjkwōj in pālele.
“A rej kajekdo̧o̧n e im ilo̧k juon n̄an jikin kallib eo an, im juon n̄an m̧weiuk ko m̧weien.”7
Ilo tōre ko etto, juōn iaan iien ko rekamōnōnō im elap ilo mour in ri Jew ro ej ilo iien mare—juōn iien eo emaron̄ bōk juōn wiik ak ruo wiik aetokin. Iien rot in ebōk iien keppopo, im rej kennanik rilotok ro elōñ raan m̧okta jen ien eo, ippān aer bar kakeememej ilo raan in kepellok eo an raan rot kein. Juon kūr jān kiin̄ eo kōn iien m̧are eo āinwōt juon naan in kean̄ eo eaorōk. Ak, elōn̄ iaan rilotok rein ilo būrabōļ in rekar jab itok.8
“Ilo aer jab etal ñan kejota eo an kiin̄ eo ej āinwōt kōkkale in [jerbal in] jumae … iroij ro aer im ej kwalok aer jab erra ibbeir ilo jea eo aer im ibben eo nejin. … Juōn ar ellok wōt n̄an jikin kenikan eo an im juōn ñan [kein wia ko an]”9 kommani wōt men ko raorōk ilo mour ko aer im kejekdoon kōņaan eo an kiin̄ eo.10
Būrabōļ eo ej wōnm̧aanļo̧k wōt:
“Im ej ba n̄an ro ri karijeran, ‘Kwōjkwōj in pālele e dedeḷọk, a ro ar jiron̄ er rej patkake.
“Innām koṃwin ilọk ilo iaḷ ḷapḷap ko, im ro otemjej koṃ naaj lo er, koṃwin kūrtok er ñan kwōjkwōj in pālele.
“Im ro ri karijeran rej ilọk ilo iaḷ ko, im āñintok ro otemjej rej lo er, ro re nana im ro reṃṃan; im elōñ rej maat tok ñan kwōjkwōj in pālele eo.”11
Manit eo ilo tōre ko ej bwe eo ej eddoik kwōjkwōj in pālele eo—ekkar n̄an būrabōļ in, ej kiin̄ eo, ej leļo̧k nuknuk n̄an ro raar itok n̄an kwojkwoj eo. Nuknuk kein rej nuknuk rot en ejelok lamen, rej nuknuk ko aolep ro rej pād rej kōnaki. Ilo jekjek in, ekōmman bwe en ejelok ri utiej im ri tta, im aolep remaroñ ippān doon im joñan wōt juōn.12
Armej ro me rar kur tok er jen torerein ial eo rebban kar wōr iien aer rool in kabojak ak kajjeon̄ baj janij im kōppopo ñan iien in aorōk. Emman eo ke, kiin̄ eo ej lelok an aolep ro ar kur er nuknuk jān nuknuk ko an make. Aolep raar maroñ in kanuknuk er make kōn nuknuk ko an kiin̄ eo.13
Im ke kiin̄ eo ej deļo̧n̄tok n̄an jikin m̧are eo, ej etale aolep armej ro im kajju loe ke ewōr juon an rilotok ejjab ekōņak kope in m̧are. Raar bōk m̧aantak em̧m̧aan eo, im kiin̄ eo eaar kajjitōk, “Jera, ekōjkan aṃ itok ijin, im jab kōṇak kopā in pālele? Ļeo eaar jaje en ba ta.”14 Ilo an būlōñ, kiin̄ eaar kajjitōk, “Etke kwojjab ekkōņak kope in m̧are, meñe ewōr juōn raar kōpooje ñan kwe?”15
Elukkuun alikkar ke em̧m̧aan in ear jab ekōņak kope in m̧are, im naan kein “Im ej ikōn̄” ej kwaļo̧k ke ejjeļo̧k an em̧m̧aan in jekpen ņae.16
Elder James E. Talmage ej kwaļo̧k jet an naan n̄an kōmeļeļeik kōn jerbal kein an em̧m̧aan in reaorōk: “Ri lotok eo ebwōd bwe ar kejōttokjen, kwalok an jab kautiej, im kin an lukkuun rube manit, elukkuun alikar ilo kilen aer kenaan kake. Jinoin kiin̄ eo eaar lukkuun lale, kajjitōk ekōjkan an kar em̧m̧aan eo deļo̧n̄ ilo an ejjeļo̧k an kope in m̧are. Ñe rilotok in en kar kōmeļeļe kōn jekjek in nuknuk ko an, ak ñe en kar wōr an jekpen ņae, en kar kōnono; ak kar ba n̄an kōj bwe em̧m̧aan in ekar ikōn̄ wōt. Kūr eo an kiin̄ eo eaar kōm̧m̧ane m̧oktaļo̧k n̄an aolep ro rikarijeran renaaj loe; ak kajjojo iaer reaikuj deļo̧n̄ ilo kōjem in kōm̧are eo; im m̧okta jen aer tōpartok ruum eo, ijo kiin̄ eo ej waļo̧k ilo likieo in armej, aolep raikuj in pojak, ak juon wōt, eaar deļo̧n̄ ilo bar juon kōjem; im kar jab ilo jikin deļo̧n̄ eo, eaar jab ruwainene.”17
Juōn rijeje eo ej rikirijtin, John O. Reid, eaar je kōn an kar em̧m̧aan in jab kōņaan kōnak nuknuk in kamare eo ej lukkuun waļo̧k an “jab kautiej jimoor kiin̄ eo im laddik eo nejin.” Ar jab ejelok an nuknuk in kamare; ak bōlen, e ar kelet bwe en jab kōnake. Ar make jab errā ñan an kōnake nuknuk in ñan iien in aorōk. Kiin̄ eo eaar m̧ōkaj in jeļā ļōmņak eo an: “Liāpe pein im neen, im bōkļo̧k e im joļo̧k e ilo kapin marok, ijo renaaj jan̄ im n̄i ļaļļaļ.”18
Ekajet eo an kiiō eo ejjab pedped ioon an jab ekōnak kope in mare—ak kōn “e, lukkun m̧ool, eaar kālet bwe en jab kōnak juon. Em̧m̧aan … in eaar kōņaan wōt pād ilo kwojkwoj in pālele eo ak ekar jab kōņaan ļoor manit eo an kiin̄ eo. Ekar kōņaan kōm̧m̧ane wōt kōņaan eo an make. Ilo an jab jimwe an nuknuk ekwalok lukkuun ta ilo buruōn ilo an jumae kiin̄ eo im ta ar ba.”19
Eļōn̄ Kar Kūr Er, ak Eiet Kar Kāālet Er
Im būrabōļ eo ar kejemlok kōn naan kein ilo jeje ko rekwojarjar: “Bwe kūr elōn̄, e iiet ro kāālōt er.”20
Ilo kabwilōñlōñ, Josep Smith eaar kōm̧m̧ane oktak eo ilo eoon eo jān Matu ilo ukook eo an Baibōļ: “Bwe kūr elōn̄, e iiet rokāālōt er; kōn menin ejjab aolep rej kōņak kope in kōm̧are.”21
Kur eo n̄an iien kwojkwoj in pālele eo kālet n̄an bōk m̧ōttan kwojkwoj eo ak eoktak. Kūr in ej n̄an aolep em̧m̧aan im kōrā. Kajjojo armej renaaj uwaake kur in im jijjet ilo jikin mōn̄ā eo—ak reppan kāālet er bwe rejjab kōnake nuknuk ko rejim̧we ñan ukōt ļo̧k tōmak eo aer ilo Irooj Jisōs Kraist im An jouj ekwojarjar. Kōn menin, jej bōk kur kein an Anij im uaak ko ad kajjojo n̄an kur kein, im elōn̄ emaron̄ kūr ak eiiet ro kālet.22
N̄an erom̧ ak kāālet ejjab menin kōjenoļo̧k kōj. Aaet, kwe im n̄a marōn kāālet bwe ren kālet kōj ilo ad kōm̧m̧ani men ko rejimwe ilo mour in anemkwoj in kāālet eo ad.
Jouj lale kilen aer kejerbale naan in kālet ilo eoon in me jeminene kake jen Katak im Bujen Ko:
“Lo, elōn̄ ro kūri er, a jet wōt kāālete er. Im etke kar jab kāālet er?
Kōnke burueer rej kanooj likūti ioon men ko an lal in, im jibadek utiej ko an armej ran.”23
Ij tōmak bwe meļeļe eo an eoon kein rekajju. Ejjeļo̧k an Anij kalijōkļo̧k ilo juon laajrak eo jej kōtmene ke etad enaaj likūti. E ejjab kōm̧m̧an jon̄an “kāālet” bwe en pen n̄an jet. Ijelo̧kin, ad bōro, ad kōņaan, ad kautiej katak im bujen ko ilo gospel aorōk, ad pokake kien ko, im, men eo aorōktata, jouj im tūriam̧o in pinmuur eo an Rilo̧mo̧o̧r kalikar elaññe jej juōn iaan ro kālet in Anij.24
“Bwe kōmij niknik jerbal n̄an jeje, n̄an karreel būruōn ro nejim, im barāinwōt ro jeiūm̧ im jatūm̧, n̄an tōmak ilo Kraist, im n̄an jepļaaktok n̄an Anij; bwe kōm jelā bwe ej jañ jouj ej mour, ālikin aolep ijo jemaron̄ kōmman make.”25
Ilo poub kein ad ilo kajjojo raan in ad mour im ilo makūtkūt ko ilo wuj waan mour an lal in me jej mour ie, enaaj kōmman menin ad meloklok men ko an indeeo me eļap aer aorōk ilo ad kōm̧m̧ani men ko rekam̧ōņōņō jidik wōt iien, jejeram̧m̧an kaki, bun̄bun̄, im kaorōk men ko raorōk ippād make. Men kein an jidik wōt ien “men ko an lalin” im “utiej ko an armej” remaron̄ tōl kōj bwe jen erlok jen jimwe eo ad ilo mour in jetōb bwe jen tōpar āinwōt būrarrar in juup.26
Kallim̧ur im Naan in Kam̧ool
Ij bar āliji kakkōl eo an Irooj ñan armej ro An eo eaar likūt ippān rikanaan Haggeai jen Kallim̧ur Mokta: “Innām kiiō, āindein an Jeova in inelep ba, “Koṃwin kōḷmānḷọkjeṇ kōn iaḷ ko ami.”27
Kōj kajjojo ej aikuj etale mour in kanniōk im mour in jetōb ko ad m̧okta ilo m̧ool im jar n̄an jeļā men ko ilo mour ko ad me remaron̄ karum̧ūjļo̧k an kejeramōn ko ad rellap me Jemedwōj Ilan̄ im Rilo̧mo̧o̧r rej mōnōnō in litok. Im aeet Jetōb Kwojarjar eo enaaj jipan̄ kōj lo wōn kōj im jela kōj make.28
Ilo an jejjet ad bukōt menin letok eo an jetōb n̄an an mejed loe im lejiln̄ur ron̄,29 Ij kallim̧ur bwe jenaaj jeraam̧m̧an kōn jon̄an eo elaptata im ekajet n̄an kōkajoor bujen ko ad ippān Irooj eo ej mour. Jenaj barāinwōt bōk kajoor in mour in kwojarjar ilo mour ko ad30—im jenaj jimoor kur n̄an im kāālet n̄an kejota eo an Irooj.
“Kwōn ruj, kwōn ruj; kwōn kaņōk kajoor eo am̧, O Zaion.”31
“Bwe Zaion eaikuj ļapļo̧k ilo wūlio, im ilo ekwōjarjar; tōrerein ko an reaikuj kilepļo̧k; stake ko an reaikuj kajoorļo̧k; aaet, em̧ool Ij ba n̄an kom̧, Zaion eaikuj jerkak im kōņak nuknuk ko an rekarbōb.”32
Ij lan̄lōn̄ in kwaļo̧k kam̧ool eo aō kwojarjar im mour em̧ool an Anij, Jemād Indeeo, im Nejin Jitōnbōro, Jisōs Kraist. Ij kamo̧o̧l bwe Jisos Kraist ej ad Rilo̧mo̧o̧r im Ripinmuur, im bwe E ej mour. Im Ij bar kam̧ool bwe Jemen im Nejin raar waļo̧k n̄an Josep Smith, im jino Kejepļaaktok gospel eo an Rilo̧mo̧o̧r ilo raan ko āliktata. Ij jar bwe kōj kajjojo jen katak im jeraam̧m̧an kin mejed n̄an loe im lojiln̄ūr n̄an ron̄, ij jar ilo et eo ekwojarjar etan Irooj Jisōs Kraist, amen.