Mije Tampeļ eo
Ij kallim̧ur bwe an ļapļo̧k iien ilo tampeļ enaaj kōjeraam̧m̧an mour eo ami ilo wāween ko ejjeļo̧k bar juon emaron̄ kōjeram̧m̧an āinwōt in.
Ro jeiū im jatū jitōnbōro, ilo kar m̧wen̄an kein ļalem̧ rekabwilōn̄lōn̄ an kweilo̧k eo eļap, jaar bar juon alen en̄jake bwe lan̄ ko rej peļļo̧k! Ij jar bwe kom̧ kar rekooti im̧we ko ami im naaj ļoori im etali. Jemedwōj Ilan̄ im Nejin Jitōnbōro, Jisōs Kraist, rej kōttar n̄an jipan̄ kom̧. Ij libūjerjere kom̧ n̄an kōļapļo̧k kijejeto ko ami n̄an kappukot jipan̄ eo Aer.
Kiiō epaak, Sister Nelson im n̄a ekar wōr am̧ro iien em̧m̧an n̄an wate season 4 eo ekāāl in Bok in Mormon pijaan alooj ko.1 Kar im̧we kōm kōn pijaan alooj kein! Imaron̄ ke kwaļo̧k n̄an kom̧ jidik in ijo ej waļo̧k ilo pija eo kōn an Rilo̧mo̧o̧r kar waļo̧k n̄an Rinipai ro.
Elukkuun aorōk bwe Rilo̧mo̧o̧r eo ekar kāālet n̄an waļokļo̧k n̄an armej ro ilo tampeļ eo. Ej m̧weo Im̧ōn. Ej obrak kōn An kajoor. Jen lale bwe jen jab bōk mejād jān ta eo Irooj ej kōm̧m̧an n̄an kōj kiiō. E ej kōm̧m̧an bwe en pidodoļo̧k wōt tōpar tampeļ ko An. E ej kōm̧ōkajļo̧k bun̄tōn eo me jej kalōk tampeļ ko. E ej kōļapļo̧k maron̄ eo ad n̄an jipan̄ aiintok Israel. E ej barāinwōt kōm̧man bwe en pidodoļo̧k n̄an an kajjojo iaad eddōkļo̧k ilo jetōb. Ij kallim̧ur bwe an ļapļo̧k iien ilo tampeļ enaaj kōjeraam̧m̧an mour eo ami ilo wāween ko ejjeļo̧k bar juon emaron̄ kōjeram̧m̧an āinwōt in.
Kiiō ewōr ad 168 tampeļ ko rej jerbal im 53 tampeļ ko rekāāl rej ekkal wōt im bar 54 ko rej designi wōt!2 Eļap aō m̧ōņōņō in kōjjeļā kōn karōk eo am n̄an kalōk juon tampeļ kāāl ilo kajjojo jikin kein rej elaajrak: Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; im Tacoma, Washington.
Jej barāinwōt ļōmņak in kalōk elōn̄ļo̧k jān juon tampeļ lo metropolitan eria ko reļļap me iien ito itak n̄an ijo tampeļ eo ej pād ie ej juon apan̄ ļapļap. Kōn menin, ij m̧ōņōņō in kōjjeļā kōn bar emen jikin ko repaake Mexico City ijo tampeļ ko rekāāl renaaj ekkal ie ilo Cuernavaca, Pachuca, Toluca, and Tula.
Ro jeiū im jatūt jitōnbōro, kōm̧m̧an bwe jen mije tampeļ eo ilo wāween ko kom̧ij jan̄in kar kōm̧m̧ani m̧okta. Ij kōjeraam̧m̧an kom̧ n̄an epaakeļo̧k Anij im Jisōs Kraist aolep raan. Ij iakwe kom̧. Anij en pād ippemi m̧ae iien jenaaj bar ioon doon, ij jar ilo āt eo ekwojarjar etan Jisōs Kraist, amen.