Hata Kama Umezeeka, Hisani Haishindwi Kamwe

Na Richard M. Romney

Magazeti ya Kanisa

Wakiwa wameitwa katika urais wa Muungano wa Usaidizi katika miaka yao ya uzee, wanawake hawa wanaleta uzoefu na uelewa kwenye huduma yao.

Wanawake watatu wazee wakiwa na vifaa vya kuwasaidia kutembea

“Sisi tunaweza kuwa urais wa Muungano wa Usaidizi wazee kuliko wote katika Kanisa,” alisema Sharon Alexander. Amefikisha miaka 89. Na washauri wake Marlene Peterson na Dorothy Arnold wana miaka 90 na 91.

“Kwa hivyo wastani wa umri wetu ni miaka 90,” anasema Dorothy, huku akicheka.

Urais huu wa Muungano wa Usaidizi unahudumu katika tawi kwenye kituo kinachojitegemea huko Ogden, Utah, Marekani. Kitengo hiki ni makazi kwa waumini wengi wa Kanisa wazee na urais mara nyingi unaonekana ukiinama kwenye vifaa vya kuwasaidia kutembea wakati wanapoenda nyumba kwa nyumba, wakiwajulia watu hali na kuhakikisha kila mmoja yuko salama.

Wakati fulani watu kutoka kata za eneo lile walifanya matembezi ya uhudumiaji kama hayo. Ndipo rais wa kigingi alipopata msukumo wa kuwahimiza urais wa tawi wamuulize Bwana ni wakaazi gani wangeweza kutumikia na katika miito ipi.

Nimebarikiwa Sana Kiasi cha Kushindwa Kusema Hapana

“Wakati rais wa tawi aliponipa wito wa kuwa rais wa Muungano wa Usaidizi,” Sharon anasema, “niliwaza, nimepokea baraka nyingi sana kiasi cha kushindwa kusema hapana.” Baadaye, alipokea uvuvio kuhusu ni nani washauri wake wawe. “Marlene ndiye aliyekuja kwanza akilini,” anasema. “Tuliwahi kufanya kazi pamoja kwenye ngazi ya kigingi tukiandaa majina kwa ajili ya kazi ya hekalu. Nilifahamu mume wake alifariki miaka mingi iliyopita na japokuwa hilo lilimsumbua, nilijua alikuwa mwaminifu.”

Kisha, baada ya mkutano wa sakramenti, Sharon alitazama kuzunguka chumba, akitafuta uvuvio. “Nilimwona Dorothy. Alinitabasamia na nilijua alikuwa mshauri mwingine. Bwana aliniongoza kwao wote wawili na Bwana hakufanya makosa kwa yeyote kati yao.”

Kama vile Familia Kubwa

Sharon pia anasema kwamba anaweza kuona faida ya kuwa na watu kutoka kwenye kituo wakiwahudumia wengine ndani ya kituo. “Tupo karibu na mazingira,” anasema. “Tunaelewa kwamba nyakati zingine sisi si weledi, nyakati zingine tunasahau sana na nyakati zingine hatuko vizuri kiafya. Na tunajua jinsi ya kukabiliana na matatizo tunayokutana nayo kwa pamoja.”

“Watu wanaoishi hapa tayari ni kama familia kubwa,” Marlene anasema. “Tunakula milo yetu pamoja, hivyo tunaonana mara tatu kwa siku. Na nyakati zingine tuko pamoja kwenye shughuli pia. Hivyo nadhani rais wa kigingi alipata uvuvio wakati alipohisi kuna watu hapa ambao wangeweza kutumikiana.”

“Tunajua kile kinachotendeka siku hadi siku. Tunajua ikiwa mtu anahitaji usaidizi au ikiwa mtu ni mgonjwa,” Dorothy anasema.

Kama nyongeza kwenye kuhudumu na kuwasaidia wengine ili wahudumu, washiriki wa urais hupanga mafundisho ya Kikundi cha Usaidizi. Wanapendekeza wakaazi ambao wanaweza kuitwa kufundisha na wanarekebisha majukumu na ratiba kulingana na mahitaji binafsi ya mwalimu.

Kumbuka, Bwana Anakupenda

“Lakini jukumu letu kuu ni kuwakumbusha wakaazi wengine kwamba Bwana anawapenda,” Marlene anasema. “Na tunapofanya hivyo, sisi pia tunahisi upendo Wake.”

“Sote tuna changamoto,” Sharon anasema. “Nina matatizo leo ambayo sikuwa nayo miezi mitano iliyopita. Lakini ninapohisi kujihurumia mwenyewe, ninawaza, ‘Hapana, hii siyo kitu ikilinganishwa na kile Mwokozi alichopitia.’ Tuko hapa ili tupige hatua na tukue. Na hata katika umri mzee, ikiwa utaruhusu uzoefu wako ukufunze, unaweza kuendelea kujifunza milele.”

kwa sababu wote kila mmoja amepoteza wapendwa wake, washiriki wa urais pia wamejifunza mengi sana kuhusu huruma. Wanajua jinsi ya kuwasaidia wale wanaohitaji kufarijiwa. Kwa mfano, ndani ya mwaka mmoja Marlene alipoteza wanafamilia wanne na rafiki kipenzi.

“kwa sababu tumepitia mambo magumu,” anasema, “tunaweza kuwasaidia wengine kuvuka mambo magumu pia. Ikiwa unapambana na jambo, jikite kwenye kuwatumikia wengine. Hilo ndilo jambo ambalo wito huu umenisaidia nilifanye.”

Washiriki wa urais wanaleta utajiri wa uzoefu na uelewa kwenye miito yao. Wameishi na kufanya kazi katika sehemu nyingi—California, Ohio, Wyoming na Utah. Wamehudumu hekaluni, katika miito ya kata na vigingi, katika Msingi, Wasichana na kwenye huduma za kibinadamu. Lakini Dorothy hakuwahi kuwa na wito katika Muungano wa Usaidizi, mpaka sasa.

“Ni nini kauli mbiu ya Muungano wa Usaidizi?” anasema. “‘Hisani Haishindwi Kamwe.’ Hiyo ni kweli ukiwa kijana, lakini ina ukweli ule ule unapokuwa mzee. Kama urais, tunajifunza hilo kila siku.”

“Nadhani tunafanya kazi vyema tukiwa pamoja,” Sharon anasema, akikonyeza, “kwa urais ambao una wastani wa umri wa miaka 90.”