Ti’aturi i te ha’api’ira’a tumu a te Mesia
I te patura’a tātou i tō tātou mau fare i ni’a i te niu o te hō’ē aura’a o te fafaura’a ’e te Mesia, ’ua ti’aturi tātou i te ha’api’ira’a tumu a te Mesia.
I roto i tō’u ferurira’a, tē ’ite nei au i te peropheta Nephi pa’ari i tāna ’īri pāpa’ira’a, te mau ’api ’auro māhora i mua iāna, tāna pēni nana’o i te rima.
Tē fa’aoti ra Nephi i tāna nana’ora’a hope’a i ni’a i te ’api. ’Ua pāpa’i ’oia, « ’E i teienei, e tō’u mau taea’e here, e fa’aoti au i tā’u nei mau parau ».1 Terā rā, tau taime ri’i i muri mai, ’ua fa’auru te Vārua ia Nephi ’ia rave fa’ahou mai i tāna mau pāpa’a parau ’e ’ua pāpa’i i te hō’ē parau poro’i nō te ’ōpanira’a. I raro a’e i te fa’aurura’a pūai a te Vārua Maita’i, ’ua rave fa’ahou mai teie peropheta rahi i tāna peni nana’o ’e ’ua pāpa’i, « nō reira, te mau mea tā’u i pāpa’i, ’ua nava’i ïa iā’u, maori rā e mā’a parau iti ā tā’u e pāpa’i nō ni’a i te mau ha’api’ira’a tumu a te Mesia ra ».2
’Auē ïa tō tātou māuruuru rahi nō teie « mā’a parau iti ā »3 ’e nō te Vārua tei tūra’i ia Nephi ’ia pāpa’i i te reira. Te fa’ata’ara’a a Nephi nō ni’a i te ha’api’ira’a tumu a te Mesia, ’ua riro ’ei tao’a faufa’a fāito ’ore nō te feiā e fa’a’amu’a i te reira. Tei roto i te reira te hō’ē ’ōrama nō te bāpetizora’a o te Fa’aora4 ’e te reo o te Tamaiti, i te ani-manihini-ra’a i te mau ta’ata ato’a ’ia pe’e mai iāna5 ’e ’ia « rave i te mau mea tā [tātou] i ’ite [iāna] i te ravera’a ».6 Tei roto i te reira te ’itera’a pāpū o Nephi ē, o rātou ’o tē tātarahapa ma te ’ā’au tae i tā rātou mau hara ’e ’ia pe’e i te Fa’aora i roto i te pape o te bāpetizora’a ma te fa’aro’o i te Mesia, « e fāri’i [ïa] i te Vārua Maita’i ; ’oia ïa, te bāpetizora’a i te auahi ’e i te Vārua Maita’i ».6 Tē fa’aro’o ato’a nei tātou i te reo o te Metua i te paraura’a : « ’Oia ïa, e parau mau ’e te ha’avare ’ore te mau parau a tā’u ra Tamaiti here. ’O te ta’ata ’o tē fa’aitoito noa ē tae noa atu i te hope’a ra, e fa’aorahia ïa ».8
’Ua ha’apāpū te peresideni Russell M. Nelson i te faufa’a rahi hō’ē roa o te ha’api’ira’a tumu a te Mesia, i roto i te hō’ē a’ora’a tāna i te feiā fa’atere o te misiōni tei pi’i-’āpī-hia : « Hau atu i te tahi atu mau mea, tē hina’aro nei tātou i tō tātou mau misiōnare ’ia ha’amau pāpū i roto i tō rātou ’ā’au—ha’amau pāpū i roto i tō rātou mau ivi, i te mau ha’api’ira’a tumu a te Mesia ».9
Tē ha’apoto nei ’Ia Poro Haere i Ta’u nei ’Evanelia e pae tuha’a faufa’a roa o te ha’api’ira’a tumu a te Mesia. Tē nā ’ō ra te reira, « Tē ani manihini nei [tātou] i te mau ta’ata ’ia haere mai i te Mesia ra nā roto i te tauturura’a ia rātou ’ia fāri’i i te ’evanelia tei fa’aho’i-fa’ahou-hia mai nā roto i te fa’aro’o ia Iesu Mesia, ’e i tāna Tāra’ehara, te tātarahapa, te bāpetizora’a ’e te fāri’ira’a i te hōro’a o te Vārua Maita’i, ’e i te tāpe’ara’a ē tae noa atu i te hopea ra ».10
Terā rā te faufa’a mau o te ha’api’ira’a tumu a te Mesia e ’ere nō te mau misiōnare noa ! ’E e mea hōhonu atu ā te reira i te hō’ē fa’ahiti-noa-ra’a i nā tuha’a faufa’a e pae. E pū’ohu te reira i te ture o te ’evanelia. ’O te ’ōpura’a rahi te reira nō te ora mure ’ore.
Te mau taea’e ’e te mau tuahine, mai te mea e tītauhia ia tātou ’ia fāri’i i te anira’a a te peresideni Nelson ’ia ha’amau pāpū i te ha’api’ira’a tumu a te Mesia i roto i te puo o tō tātou mau ivi, e ti’a ia tātou ’ia fa’ahōhonu i tō tātou fa’afāriura’a i te Fatu nā roto i te tuatāpapara’a, te pure, ’e hō’ē orara’a ha’apa’o ’e hō’ē tātarahapara’a tāmau. E ti’a ia tātou ’ia ani manihini i te Vārua Maita’i ’ia nana’o i te ha’api’ira’a tumu a te Mesia i ni’a i « te pāpā ta’ata [o tō tātou mau] ’ā’au »11 ma te hōhonu ’e ma te vai maoro mai tei nana’ohia e Nephi i ni’a i te mau ’api ’auro.
I te ’āva’e ’Ātopa i ma’iri a’enei, ’ua ani mai te peresideni Nelson, « e aha te aura’a ’ia upo’oti’a i ni’a i te ao nei ? Nō te tahi atu mau mea, ’ua parau ’oia, « Te aura’a, ’oia ho’i, te ti’aturira’a i te ha’api’ira’a tumu a te Mesia hau atu i te mau ha’api’ira’a a te ta’ata nei ».12
’Ua tātarahia te ta’o ti’aturi mai « te hō’ē ti’aturira’a pāpū i roto i te huru o te ta’ata, te ’aravihi, te pūai ’aore rā te parau mau a te hō’ē ta’ata ’aore rā o te hō’ē mea ».13 Taua ta’ata ra o Iesu Mesia ïa ’e te hō’ē mea ’o tāna ïa ha’api’ira’a tumu.
Nō reira nāhea te ti’aturira’a ma te hina’aro mau i te ha’api’ira’a tumu a te Mesia, e taui ai i te huru ’a ora ai tātou i tō tātou orara’a ?
Mai te mea e ti’aturi tātou i te ha’api’ira’a tumu a te Mesia, e nava’i roa tō tātou ti’aturira’a i te Mesia nō te ora i tāna mau parau ato’a.13 E tuatāpapa tātou ia Iesu Mesia i te roara’a o tō tātou orara’a15 tāna misiōni, tāna mau ha’api’ira’a ’e tāna tāra’ehara hope ’ore. E tuatāpapa tātou i tāna mau parau fafau ’e te mau tītaura’a nō reira teie mau parau fafau i hōro’ahia mai ai.16 ’A tuatāpapa ai tātou, e ’ī tātou i te hō’ē here rahi a’e nō te Fatu.
Mai te mea e ti’aturi tātou i te ha’api’ira’a tumu a te Mesia, e ha’afātata atu tātou i tō tātou Metua i te ao ra i te mau mahana ato’a nā roto i te pure ha’eha’a ’e te ’ōmo’e, i reira tātou e fa’a’ite ai i tā tātou ’ā’au mēhara nō te hōro’a nō tāna Tamaiti ’e nō tō tātou mau ha’amaita’ira’a.17 E nehenehe tātou e pure nō te auhoara’a o te Vārua Maita’i heheu,18 e pure nō te ’āna’i i tō tātou hina’aro i ni’a i tōna,19 ’ia feruri i tā tātou mau fafaura’a ’e ’ia fa’a’āpī i tā tātou tītaura’a ’ia ha’apa’o i te reira.20 E nehenehe tātou e pure nō te turu ’e nō te fa’a’ite i tō tātou here nō tō tātou mau peropheta, mau ’ite ’e mau heheu parau ;21 e pure nō te mana tāmāra’a o te fa’aorera’a hapa ;22 ’e e pure nō te pūai ’ia pāto’i i te fa’ahemara’a.23 Tē ani nei au ia ’outou ’ia rave i te pure ’ei ’ohipa matameha’i i roto i tō ’outou orara’a, ma te ’imira’a i te mau mahana ato’a i te ha’amaita’i i tā ’outou ’āparaura’a ’e te Atua.
Mai te mea e ti’aturi tātou i te ha’api’ira’a tumu a te Mesia, e tu’u ïa tātou i te hiti i te mau tao’a ’ana’ana o te ao nei, ’ia ti’a ia tātou ’ia fa’atumu i ni’a i te Tāra’ehara o te ao nei.24 E fa’aiti mai ’aore rā e ha’apae roa tātou i te taime e ravehia i ni’a i te mau rāve’a tōtiare ; te mau ha’uti i ni’a i te natirara ; te mau fa’a’ana’anataera’a faufa’a ’ore, te moni rahi ’aore rā te tano ’ore ; te umera’a a te mau tao’a ’e te mau fa’aahaaha o teie nei ao ; ’e te tahi atu huru ’ohipa e fa’atupu i te mau peu hape ’e i te mau ha’api’ira’a tano ’ore a te ta’ata. I roto noa i te Mesia tātou e ’ite mai ai i te parau mau ’e te fa’aotira’a mure ’ore.
E riro mai te tātarahapara’a mau25 ’ei hō’ē tuha’a ’oa’oa26 nō tō tātou orara’a—’ia fa’a’orehia te hara ’e ’ia tauihia i te hōho’a o te Mesia.27 E ’īriti te tātarahapa ma te fa’aro’o i te ’ē’a nō te tāra’ehara a te Mesia. ’Ua ha’api’i te peresideni Dallin H. Oaks ē, ’ia fa’a’ore ana’e te Fa’aora i te hara, « e’ita ’oia e tāmā noa ia [tātou] i te hara. E hōro’a ato’a mai rā ’oia [ia tātou] i te pūai ’āpī »28 E hina’aro tātou tāta’itahi i teie pūai nō te ha’apa’o i te mau fa’auera’a a te Atua ’e nō te fa’aoti i te ’ōpuara’a mure ’ore o tō tātou orara’a.
I roto ia Iesu Mesia ’e i roto i tāna ha’api’ira’a tumu, e ’ite mai tātou te pūai. ’Ua parau ’oia, « ’Oia mau, ’oia mau, tē parau atu nei au ia ’outou nā teie tā’u mau ha’api’ira’a tumu ’e ’o rātou ’o tē patu ia rātou i ni’a iho i te reira ra tē patu ra ïa i ni’a iho i tā’u nei papa, ’e e ’ore roa rātou e noa’a i te mau ’ūputa o hade ra ».29
Tē ’ite nei tātou tē tupu ra teie fafaura’a i roto i te orara’a o te feiā ha’apa’o. ’Ua hau i te hō’ē matahiti i teienei, ’ua nehenehe iā’u e fārerei atu ia Travis ’e Kacie. ’Ua fa’aipoipohia rāua i te pae tīvira i te matahiti 2007. E ’ere ’o Travis i te melo nō te ’Ēkālesia i taua taime ra. Kacie, tei pa’ari maita’i i roto i te hō’ē ’utuāfare ha’apa’o nō te feiā mo’a i te mau mahana hope’a nei, ’ua fa’aru’e i tōna fa’aro’o i te feiā ’āpīra’a ’oia ’e ’ua fa’aātea i tōna niu.
I te matahiti 2018, ’ua fārerei atu Travis i te mau misiōnare ’e ’ua bāpetizohia i te matahiti 2019. ’Ua riro mai Travis ’ei misiōnare nō Kacie, tei ’ite ato’a i te hō’ē fa’afāriura’a tei taui i tōna orara’a. ’Ua tā’atihia rāua i te hiero i te ’āva’e Tetepa 2020. Fātata e piti matahiti i muri a’e i tōna bāpetizora’a, ’ua pi’ihia Travis ’ia tāvini i roto i te ’episekōpora’a.
E ma’i varavara tō Travis ’o te fa’atupu tāmau noa i te mau pūpā pu’u māriri i roto i tōna mau melo ’ōroto o tōna tino. E rave rahi tāpūra’a tāna i fāri’i nō te tātara mai i te mau pu’u mariri tupu tāmau, ’aita rā te ma’i e ora. E rave rahi matahiti, ’ua hōro’ahia ia Travis i raro mai 10 matahiti nō te ora.
’Ua tupuhia Kacie i te ma’i retinitis pigmentosa, e ma’i varavara roa nō te mau tupuna, e fa’aiti mai i te hi’ora’a ’ā’ano o te mata ē tae roa atu e pō roa te mata.
’Ua fa’ati’a mai Kacie iā’u i tōna ’ananahi. ’Ua feruri ’oia i te taime, e ’ere i te mea ātea roa, i reira ’oia e riro ai ’ei vahine ’ivi, matapō, ’aita e moni, ’e ’o ’oia ana’e nō te atuatu e maha tamari’i e pa’ari mai ra. ’Ua ui atu vau ia Kacie, nāhea e ti’a ai iāna ’ia fa’atere i te hō’ē ’ananahi pāpū ’ore. ’Ua ’ata mai ’oia ma te hau ’e ’ua parau mai, « ’aitā vau i ’oa’oa a’enei ’aore rā i ’ī i te tīa’ira’a nō tō’u orara’a. Tē tāpe’a nei māua i te mau fafaura’a tā māua i fāri’i i roto i te hiero ».
E ’episekōpo Travis i teienei. E piti ’āva’e i teienei, ’ua fāri’i fa’ahou ’oia te hō’ē tāpūra’a rahi. Terā rā e mana’o maita’i ’e te hau tōna. ’Ua ’ino roa atu ā te mata o Kacie. E ’ūrī arata’i tāna i teienei ’e e’ita tāna e nehenehe e fa’ahoro i te pere’o’o. Tē ’oa’oa nei rā ’oia, i te aupurura’a i tāna mau tamari’i ’e i te tāvinira’a ’ei tauturu i roto i te peresidenira’a o te Feiā ’Āpī Tamāhine.
’Ua hāmani Travis ’e ’o Kacie i tō rāua fare i ni’a i te papa. Tē ti’aturi nei Travis ’e o Kacie i te ha’api’ira’a tumu a te Mesia ’e i te fafaura’a ē, « e ha’amo’a [te Atua] i tō [tātou] mau ’ati ’ei maita’i nō [tātou] ».30 I roto i te ’ōpuara’a maita’i roa a te Atua, te māuiui ma te fa’aro’o i te Mesia ’ua tūati i tō tātou ha’amaita’ira’a i te Mesia. 31 Mai te ta’ata pa’ari nō te parabole tei patu i tōna fare i ni’a i te papa32 ’a topa mai ai te ua ’e ’ua tahe mai ra te pape pu’e ’e ’ua uihi mai e te mata’i ’a ’ua tā’iri i ni’a i te fare tā Travis ’e o Kacie i hāmani, ’aita te fare i topa, nō te mea ’ua ha’amauhia te reira i ni’a i te papa.33
’Aita Iesu i parau nō te rāve’a o te ua ’e te pape pu’e ’e te mata’i i roto i tō tātou orara’a ; ’ua parau ra ’oia nō te pāpūra’a ’ia tupu mai te vero rahi. Tē vāhi pāpū i roto i te parabole e ’ere ïa ē, e tupu mau ānei te vero, e mea nāhea ra tātou i te pāhono i tāna anira’a here ’ia fa’aro’o ’e ’ia rave i te mea tāna ha’api’i.34 ’Aita e rāve’a atu ā nō te ora mai.
’Ia patu ana’e tātou i tō tātou mau fare i ni’a i te papa o te hō’ē aura’a o te fafaura’a ’e te Mesia, tē ti’aturi ra ïa tātou i te ha’api’ira’a tumu a te Mesia, ’e ’a haere ai tātou iāna ra, tei ia tātou ra tāna parau fafau nō te ora mure ’ore. Te ta’ata ’o te ti’aturi i te ha’api’ira’a tumu a te Mesia e haere rātou i mua ma te ti’a-māite-ra’a i te Mesia ’e e tāpe’a maīte e tae roa i te hope’a. ’Aita e rāve’a ’ē atu e fa’aorahia i roto i te bāsileia o te Atua ra.35
Tē hōro’a nei au i tō’u iho ’itera’a pāpū nō te oraraʼa, te ti’afa’ahoura’a ’o Iesu Mesia Tē fa’a’ite pāpū nei au ē, nō te aroha rahi o te Atua i tō te ao nei, ’ua tono mai ’oia i tāna Tamaiti nō te fa’aora ia tātou i te hara35 ’e nō te fa’aora ia tātou i te māuiui.37 Tē fa’a’ite pāpū nei au ē, ’ua pi’i ’oia i te hō’ē peropheta ’o te Atua i tō tātou nei ’anotau, ’oia ho’i, te peresideni Russell M. Nelson, nā roto iāna ’oia e paraparau ai ’e e arata’i ai ia tātou.
Ma tō’u ’ā’au ato’a, tē ani manihini nei au ia ’outou ’ia ti’aturi i te ha’api’ira’a tumu a te Mesia ’e ’ia patu i tō ’outou orara’a i ni’a i te papa o te Ora. E ’ore roa ’oia e fa’aru’e ia ’outou. I te i’oa o Iesu Mesia, ’āmene.