’Ua ’ite ānei ’oe nō te aha, ’ei keresetiano, tē ti’aturi nei au i te Mesia ?
’Ua māuiui Iesu Mesia, ’ua pohe ’e ’ua ti’afa’ahou mai nō te fa’aora i te mau ta’ata ato’a i te pohe tino ’e nō te hōro’a i te ora mure ’ore ’e te Atua.
Tau matahiti i teienei, i te hō’ē pō i muri a’e i te ’ohipa, ’ua ta’uma atu vau ni’a i te pere’o’o uta ta’ata matauhia e au, nō te ho’i i te fare i New Jersey nā New York City mai. ’Ua ’ite mai te vahine i pīha’i iho vau iāna i te pārahira’a i te mea tā’u e pāpa’i ra i ni’a i tā’u rorouira ’e ’ua ui mai, « tē ti’aturi ra ānei ’oe i […] te Mesia ? » ’Ua parau vau, « ’Ē ! » ’A paraparau noa ai māua, ’ua ha’api’i mai au ē nō tae noa mai nei ’oia mai tōna ārea fenua tinito nō te rave i te ’ohipa i roto i te tuha’a teitei nō te ihi-anoa-ha’a i New York.
Mai terā noa, ’ua ui atu vau iāna, « ’ua ’ite ānei ’oe nō te aha, ’ei keresetiano tē ti’aturi nei au ia Iesu Mesia ? » ’Ua pāhono noa ato’a mai ’oia ’e ’ua ani mai iā’u ’ia parau atu vau iāna. Terā rā, tē haere ra vau e parau iāna, ’ua tae mai iā’u hō’ē o terā mau taime e rave rau mau mana’o e nīnā ra i tō’u ferurira’a. ’O te taime mātāmua teie vau e fa’ata’a atu ai i te « nō te aha » te keresetianora’a, i te hō’ē ta’ata matau-’ore-hia ’e te mea māramarama roa. E’ita e ti’a iā’u ’ia parau noa ē,« tē pe’e nei au ia Iesu Mesia nō te mea ’ua hina’aro ’oia e māuiui ’e ’ia pohe nō tā’u mau hara ». E māere paha ’oia, « E ti’a ānei ia Iesu ’ia pohe ? E’ita ānei e nehenehe i te Atua e fa’a’ore noa mai ’e ’ia tāmā i tā tātou mau hara, mai te mea e ani tātou iāna ? »
Nāhea ’outou i te pāhono atu nō te tahi tau minuti noa ? Nāhea ’outou i te fa’ata’a atu te reira i te hō’ē hoa ? Te mau tamari’i ’e te feiā ’āpī : E nehenehe ānei ’outou e ani i te tahi atu taime, i tō ’outou mau metua ’aore rā i te hō’ē ta’ata fa’atere, « Nō te aha e ti’a ai ia Iesu ’ia pohe ? ’E, te mau taea’e ’e te mau tuahine, e fā’ira’a tā’u e rave : Ta’a ’ē noa atu te mau mea ato’a tā’u i mana’o ’ua ’ite maita’i au i te ha’api’ira’a tumu, te tua’ā’ai, te mau fa’aturera’a a te ’Ēkālesia ’e tē vai atu ā, te pāhonora’a nō teie uira’a tumu o tō tātou fa’aro’o, ’aita ïa i tae ’ōhie mai. I te reira mahana, ’ua fa’a’oti au e tūtonu atu ā i ni’a i te mea faufa’a roa a’e nō te ora mure ’ore.
Nō reira, ’ua parau atu vau i tō’u hoa ’āpī1 tē vai ra tō tātou hō’ē vaerua ’āmuihia mai ’e te hō’ē tino ’e ’o te Atua te Metua nō tō tātou vaerua.2 ’Ua parau vau iāna ē ’ua ora na tātou ’e tō tātou Metua i te ao ra hou tātou ’a fānauhia mai ai i roto i teienei ao tahuti.3 Nō te mea ’ua here te Atua iāna ’e i te tā’āto’ara’a o tāna mau tamari’i, ’ua hāmani ’oia i te hō’ē fa’anahora’a nō tātou nō te fāri’i i te hō’ē tino mai te hōho’a o tōna tino hanahana,4 ’ia riro ’ei melo nō te hō’ē utuāfare,5 ’e ’ia ho’i fa’ahou i mua i tōna aro here nō te fāri’i i te ’oa’oa mure ’ore ’e tō tātou mau ’utuāfare,6 mai tāna i rave nōna.7 Terā rā, ’ua parau vau, e fa’aruru tātou e piti ha’afifira’a tumu i roto i teie ao e ti’a ’ia hi’a :8 (1) te pohe o te tino—te ta’a-’ē-ra’a tō tātou tino i tō tātou vaerua. ’Oia mau, ’ua ’ite teie vāhine ē, e pohe pā’ātoa tātou. ’E (2) te pohe pae vārua—tō tātou ta’a-’ē-ra’a ’e te Atua nō tā tātou mau hara, mau hapa ’e mau hapehape ’ei ta’ata tahuti, ’o te fa’aātea ia tātou i tōna aro mo’a.9 ’Ua fa’ati’a ato’a teie vahine i te reira.
’Ua ha’amāramarama vau iāna ē, ’o te ’ohipa teie o te ture nō te parauti’a. E tītau teie ture mure ’ore i te hō’ē utu’a mure ’ore ’ia aufauhia nō tā tātou mau hara tāta’itahi ’aore rā ’ōfatira’a i te mau ture ’aore rā i te parau mau a te Atua, ’aita ana’e e ’ore roatātou e nehenehe e ho’i fa’ahou e ora i mua i tōna aro mo’a.10 E ’ere te reira i te mea ti’a, ’e e’ita te Atua « e nehenehe e ’ape i te parauti’a ».11 ’Ua māramarama te vahine i te reira ’ua ta’a ’ōhie iāna ē, e Atua aroha ato’a ’oia, te here ’e te hina’aro nei ’ia fa’atupu i tō tātou ora mure ’ore.12 ’Ua fa’aara atu vau i tō’u hoa ē tē vai ato’a nei tō tātou hō’ē ’enemi ha’avarevare ’e te pūai—te puna nō te ’ino ’e nō te ha’avare—tē aro nei ia tātou.13 Nō reira, e ti’a i te hō’ē ta’ata ma te hō’ē pūai hanahana hope ’ore nō te fa’aruru i teie mau pāto’ira’a ato’a ’e teie mau ha’afifira’a ato’a, nō te fa’aora ia tātou.14
I reira ’ua fa’a’ite atu vau iāna i te parau ’api—te « parau ’āpī nō te ’oa’oa rahi nō te mau nūna’a ato’a »15—ē « i aroha mai te Atua i tō te ao, e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore ».16 ’Ua fa’a’ite pāpū atu vau i tō’u hoa ’e tē fa’a’ite pāpū nei au ia ’outou ē ’o Iesu Mesia taua Fa’aora ra, ’ua tītauhia iāna ’ia māuiui, ’ia pohe ’e ’ia ti’afa’ahou mai—tāna tāra’ehara mure ’ore—nō te fa’aora i te mau ta’ata ato’a i te pohe tino nei17 ’e nō te hōro’a i te ora mure ’ore ’e te Atua ’e nō tō tātou mau ’utuāfare18 i te feiā ato’a e pe’e iāna. Tē fa’ahiti nei te Buka a Moromona, « e nā reira te Atua … i roa’a ho’i iāna te rē i te pohe ; ’e ’ua roa’a tō te Tamaiti mana ’ia ti’a iāna ’ia riro ’ei ārai nō te mau tamari’i a te ta’ata nei … ; ’ua ’ī ’oia i te [aroha ’e] te aumihi … ; ’ua motu iāna te mau tā’amu nō te pohe, ’ua rave i ni’a iāna iho i tā rātou mau ’ohipa ’ī’ino ’e tā rātou mau hara, ’e ’ua fa’aora ia rātou, ’e ’ua ha’amaha i te tītaura’a a te parauti’a ».19
Te mau ta’ahira’a tei heheuhia mai e te Atua ’o tē ti’a ia tātou ’ia pe’e ia Iesu ’e ’ia fāri’i i te ora mure ’ore, ’ua pi’ihia te ha’api’ira’a tumu a te Mesia. Tē vai ra i roto « te fa’aro’o ia Iesu Mesia ’e i tāna tāra’ehara, te tātarahapara’a, te bāpetizora’a [i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei], te fāri’ira’a i te hōro’a o te Vārua Maita’i ’e te tāpe’a-māite-ra’a ē tae roa i te hop’ea ».20 ’Ua fa’a’ite atu vau i teie mau ta’ahira’a i tō’u hoa, teie rā te tahi mau rāve’a ’o tā te mau peropheta ’e te mau ’āpōsetolo i ha’api’i iho nei, nāhea te ha’api’ira’a tumu a te Mesia e riro ai ’ei ha’amaita’ira’a nō te mau tamari’i ato’a a te Atua.
’Ua ha’api’i te peresideni Russell M. Nelson : « E pūai rahi tō te ha’api’ira’a tumu vi’ivi’i ’ore a te Mesia. E taui te reira i te orara’a o te feiā ato’a ’o tei māramarama i te reira ’e e ’imi ’ia fa’a’ohipa i te reira i roto i tōna orara’a ».21
’Ua ha’api’i Elder Dieter F. Uchtdorf, « mea itoito [Te arata’i] Nō te Pūai o te Feiā ’āpī i te fa’a’itera’a i te ha’api’ira’a tumu a… te Mesia [’e] ma te tītau ia ’oe [te feiā ’āpī] ’ia rave i te mau mā’itira’a niuhia i ni’a i te [reira] ».22
’Ua ha’api’i Elder Dale G. Renlund, « e tītau tātou i te mau misiōnare ’ia rave i te mea tei anihia ia rātou ’ia ha’api’i ’e ’ia rave :… ma te fa’a’ohipa te ha’api’ira’a tumu a te Mesia i roto i tō rātou orara’a [’e] ’ia haere ’e ’ia mau pāpū i ni’a i te ’ē’a nō te fafaura’a ».23
E hōro’a mai te ha’api’ira’a tumu a te Mesia i te mana i te feiā e aro nei ’aore rā e mana’o nei e ’ere rātou i te melo nō te ’Ēkālesia nō te mea tē tauturu nei ’oia [te ’Ēkālesia] ia rātou, mai tā Elder D. Todd Christofferson i parau, « ’a ha’apāpū : ’Ua pohe Iesu Mesia nō’u [’e] ’ua here ’oia iā’u ».24
Te mau metua mai te mea tē fifi ra tā ’outou tamari’i ’e te parau tumu o te ’evanelia ’aore rā te hō’ē ha’api’ira’a a te peropheta, e ara e pāto’i atu i te mau huru a’ora’a tano ’ore ato’a 25 ’aore rā mau porora’a nō te aro atu i te ’Ēkālesia ’aore rā i tōna feiā fa’atere. E nehenehe teie mau ravera’a ha’iha’i ’e te faufa’a ’ore e riro ’ei ’ati rahi nō te ha’apa’o maita’i tau roa nō tā ’outou tamari’i.26 E paraparau maita’i te reira nō ’outou ē, e pāruru ’aore rā e pāturu ’outou i tā ’outou tamari’i faufa’a roa ’aore rā e fa’a’ite i te mau tāpa’o nō te tauturura’a iāna. ’Ua ’ite rā tā’u vahine, ’o Jayne ’e o vau iho ma te ’ohipa i tupu nō māua ē, te ha’api’ira’a i tā ’outou tamari’i here, nō te aha tātou e hina’aro ’ono’ono ai ia Iesu Mesia ’e e nāhea i te fa’a’ohipa i tāna ha’api’ira’a tumu ’oa’oa ’o te mea ïa e ha’apūai ’e e fa’aora iāna. E fa’afāriu ana’e ia rātou i ni’a ia Iesu Mesia, ’o ’oia tō rātou pāruru parauti’a ’e te Metua. ’Ua ha’api’i te ’āpōsetolo Ioane, « ’o tei tāpe’a tāmau ra i te parau a te Mesia ra, tei iāna te Metua ’e te Tamaiti ». Nō reira tē a’o nei ’oia ia tātou e ara « ’ia haere noa mai te hō’ē ia ’outou na, e ’ere teie tāna parau i ha’api’i ».27
’Aita i maoro a’enei, ’ua haere atu māua Jayne e māta’ita’i i te medebara i reira Mose i te fa’ati’ara’a i te ’ōfī veo i mua i te mau tamari’i ’ōvere o ’Īsera’ela. ’Ua fafau te Fatu e fa’aora i te feiā ato’a tei pati’ahia e te ’ōfī ta’ero, ’ia hi’o noa atu rātou i ni’a i taua ’ōfī veo ra.28 Ma te fa’ati’ara’a i te ha’api’ira’a tumu a te Mesia i mua ia tātou, e nā reira ato’a te peropheta a te Fatu, « e fa’aora ’oia i te mau nūna’a ato’a ».29 Noa atu te huru o te pati’ara’a ’aore rā te ta’ero ’aore rā te arora’a ’o tā tātou e fa’aruru atu i roto i teie medebara pohe rahi, ’eiaha tātou ’ia riro mai te feiā i tahito ra ’e i teienei, ’o te ti’a i te fa’aorahia, te mea pe’ape’a rā, « ’aita i hi’o atu […] nō te mea ’aita rātou i ti’aturi ’e e ora ho’i rātou ».30 Tē ha’apāpū nei te Buka a Moromona : « Inaha teie te ’ē’a mau ; ’aita atu e ’ē’a, ’e aita atu ho’i e i’oa i hōro’ahia mai i raro a’e i te ra’i, e ti’a ai i te ta’ata ’ia fa’aorahia i roto i te bāsileia o te Atua ra. I teienei, inaha, ’o teie te ha’api’ira’a tumu a te Mesia ».31
I taua pō ra i New Jersey, tē fa’a’itera’a nō te aha tātou e hina’aro ai ia Iesu Mesia ’e i tāna ha’api’ira’a tumu, ’ua hōro’a mai nō’u i te hō’ē tuahine ’āpī ’e iāna i te hō’ē taea’e ’āpī. ’Ua putapū māua i te fa’a’itera’a hau ’e te ha’apāpūra’a a te Vārua Maita’i. ’Ua ani noa atu vau iāna ’ia hōro’a mai i te mau ha’amāramaramara’a nō te fārerei atu iāna ’e ’ia tāmau ā i teie paraparaura’a ’e tā tātou mau misiōnare. ’Ua ’oa’oa roa ’oia i te nā-reira-ra’a.
« Nō reira, e mea faufa’a roa ’ia fa’a’itehia teie nei mau mea i tō te ao nei », tē parau nei te Buka a Moromona—’ia here, ’ia fa’a’ite ’e ’ia ’ani manihini32 ’a ha’aputuputu ai tātou ia ’Īsera’ela i roto i tō tātou mau vāhi fa’aeara’a e mau ’utuāfare ’ia ’ite rātou ē, e ’ore roa e ti’a i te hō’ē ta’ata ’ia pārahi i mua i te aro o te Atua, maori rā nā roto i te mau maita’i rahi, ’e te aroha, ’e te maita’i [’e te ha’api’ira’a tumu] a te Mesia Mo’a ».33 I te i’oa o Iesu Mesia, ’āmene.