Te ’ō’otira’a ’aita i oti maita’i roa

Nā Elder Vern P. Stanfill

Nō te Hitu ’Ahuru

I tō’u tamari’ira’a, e mea au nā’u te tauira’a rahi o te mau pu’e tau i roto i te matahiti, i te pae apato’a to’o’a o te rā nō Montana, i reira tō’u pa’arira’a. Tā’u pu’e tau au roa a’e, o te ha’apohera’a rā’au ïa—te tau ’ō’otira’a. E tīa’i tō’u ’utuāfare ’e e pure ho’i mātou e ho’onahia tā mātou mau ’āva’e ’ohipara’a pūai i te ’ō’otira’a rahi. E ha’ape’ape’a noa tō’u nā metua i te huru o te reva, te maita’i o te mau ’ānimala ’e te mau fa’a’apu, ’e e rave rahi atu ā mea ’aita tā rāua e rāve’a nō te ārai i te reira.

’A pa’ari ai au, ’ua ta’a roa atu ra iā’u te rū o te reira. I te maita’i o te ’ō’otira’a ho’i mātou e ora ai. ’Ua ha’api’i mai tō’u metua tāne iā’u nō ni’a i te mau mātini ’ō’oti huero. ’Ua hi’o vau iāna i te tūra’ira’a i te mau mātini nā roto i te fa’a’apu, te tāpūra’a i te hō’ē aroā huero na’ina’i, ’e i muri iho, te hi’opo’ara’a i muri i te mātini tāpū nō te ha’apāpū ē, tei roto te rahira’a o te mau huero i te ’āfata, ’e ’aita i fa’aru’ehia i roto i te mau pa’a. ’Ua nā ni’a fa’ahou ’oia i teie ’ohipa e rave rahi taime, ma te fa’atano i te mātini i te mau taime ato’a. ’Ua horo vau nā te hiti ma te paeheru i te mau pa’a nā muri iāna, ’e ’ua fa’ahua ’ite e aha tē rave.

I te māuruuru-maita’i-ra’a ’oia i te mau fa’atanora’a i ravehia i ni’a i te mātini, ’ua ’ite mai au i te mau huero maitata’i i roto i te mau pa’a, i ni’a i te repo, ’e ’ua fa’a’ite atu vau iāna ma te mata fa’ahapa. E’ita e mo’e iā’u i tā tō’u metua tāne i parau mai : « ’Ua nava’i noa mai terā, terā te maita’i a’e e mara’a i teie mātini. » Nō tō’u māuruuru ’ore ri’i i tāna tātarara’a, ’ua feruri au i te ’orera’a i oti maita’i roa teie ’ō’otira’a.

I muri iti noa a’e, i te to’eto’era’a i te pō, ’ua māta’ita’i au i te mau tauasini tuana, te mau mo’orā ’ao ’e te mau mo’orā rātere, i te taura’a mai i roto i te fa’a’apu nō te tāmā’a nō tō rātou tere roa i te pae apato’a. ’Ua ’amu rātou i te mau huero toe o tā mātou ’ō’otira’a ’aita i oti maita’i roa. Nā te Atua i ha’amaita’i roa i te reira. ’E ’aita te hō’ē huero i mo’ehia.

E fa’ahemara’a pinepine i roto i tō tātou ao ’e i roto ato’a i te ta’ere o te ’Ēkālesia ’ia tapitapi nō ni’a i te maita’i-roa-ra’a. E fa’atupu te mau rāve’a ha’apararera’a sōtiare, te mau tīa’ira’a tano ’ore, ’e pinepine ato’a tā tātou iho hi’ora’a ia tātou iho, i te mana’o nava’i ’ore ē—e ’ere tātou i te mea nava’i roa ’e e’ita roa atu te reira e haere. Tē vai ato’a ra ’o tē ’ore e māramarama maita’i i te anira’a a te Fa’aora ’ia « maita’i roa. »¹

’A ha’amana’o ē e ’ere hō’ē ā huru te hina’aro ’ore i te hape, ’e te maita’i-roa-ra’a i roto i te Mesia.² Tē tītau nei te hina’aro ’ore i te hape i te hō’ē fāito noa’a ’ore ’e te fa’ahepo ia tātou iho, nō te fa’aau i ni’a ia vetahi ’ē. E fa’atupu te reira i te mana’o fa’ahapa ’e te ahoaho ’e e nehenehe e tūra’i ia tātou ’ia fa’aātea ’ē ’e ’ia fa’ata’a ’ē ia tātou iho.

Te rirora’a ’ei ta’ata maita’i roa i roto i te Mesia e ’ohipa ’ē ïa. E ’ohipa tau maoro ïa—arata’ihia nā roto i te here e te Vārua Maita’i—nō te rirora’a mai te Fa’aora. ’Ua ha’amau-pāpū-hia te mau parau tumu e te hō’ē Metua i te ao ra maita’i ’e tei ’ite i te mau mea ato’a, tei roto i te mau fafaura’a tei anihia ia tātou ’ia fāri’i. E ha’amāmā te reira ia tātou i te teimaha o te mana’o fa’ahapa ’e te ti’a ’ore, ma te tūra’i tāmau i te parau ē, ’o vai tātou i te mata o te Atua. Noa atu e fa’aitoito teie ravera’a ia tātou ’e e tūra’i ho’i ’ia riro mai ’ei ta’ata maita’i a’e, e fāitohia rā tātou i tā tātou pūpūra’a ia tātou iho i te Atua e ’itehia i roto i tā tātou mau tauto’ora’a ’ia pe’e iāna nā roto i te fa’aro’o. ’Ia fāri’i ana’e tātou i te anira’a a te Fa’aora ’ia haere iāna ra, e ’ite ’oi’oi tātou ē, e nava’i tā tātou fa’aitoito-roa-ra’a, ’e nā te maita’i o te Fa’aora here e rave i te toe’a, nā roto i te mau rāve’a e’ita e roa’a ia tātou ’ia feruri.

E nehenehe tātou e ’ite i te tupura’a teie parau tumu i te fa’a’amura’a te Fa’aora i nā pae tauasini.

« Hi’o a’era te mata o Iesu, ’e ’ite atu ra ’oia ē, e tī’a’a rahi tē haere mai ra iāna ra, ’ua parau atu ra ia Philipa, ’ei hea tātou e ho’o ai i te mā’a ’ei fa’a’amura’a atu i teie nei mau ta’ata ? […]

« ’Ua parau mai ra Philipa, ’ia piti noa atu ā hānere i te moni veo ’ia ho’o i te mā’a, e’ita roa e rava’i ’ia tāta’itahi hua iti i te ta’ata hō’ē.

« ’Ua parau mai ra iāna te hō’ē pipi āna ra, ’o Anederea te taea’e o Simona Petero ra,

« E pae a te hō’ē tamaiti iti nei pāne, ’e piti ho’i i’a ; e aha rā ho’i te reira e rava’i ai i teie nei feiā rahi ? »³

’Aita ānei ’outou i ui a’enei ē e aha te mana’o o te Fa’aora i ni’a i teie tamaiti ’āpī ’o tei pūpū, ma te fa’aro’o o te hō’ē tamari’i, i te mea tāna i ’ite ē, e mea nava’i ’ore i mua i te ’ohipa rahi e ravehia ?

« ’Ua rave a’era Iesu i nā pāne ra : ’e oti a’era i te ha’amaita’i, ’ua tu’u atu ra i te mau pipi, ’e nā te mau pipi i tu’u i te feiā i ta’oto i raro ; ’e ’ua tu’u ato’a atu ra ho’i i te i’a, e fiu ana’e ihora rātou.

« E pa’ia roa a’era rātou, ’ua parau atu ra ’oia i tāna mau pipi, ’a ha’aputu na i te hu’ahu’a ri’i mau toe’a ra, ’eiaha te hō’ē vāhi iti e fa’aru’ehia. »⁴

Nā te Fa’aora i ha’amaita’i roa i te pūpūra’a ha’eha’a.

I muri noa iho i teie ’ohipa i tupu, ’ua tono Iesu i tāna mau pipi i ni’a i te hō’ē pahī. ’Aita i maoro, tei ni’a rātou i te hō’ē miti pūai ’e te vero i te tuira’a pō. ’Ua ri’ari’a roa rātou i tō rātou ’itera’a atu i te hō’ē ta’ata tūpāpa’u e haere mai ra ia rātou ra, nā ni’a i te pape.

« ’Ua parau atu ra rā Iesu ia rātou i reira ra, nā ’ō atu ra, ’a fa’aitoito ; ’o vau, ’eiaha e māta’u.

« ’Ua parau mai ra Petero iāna, nā ’ō mai ra, e te Fatu, ’o ’oe ra, e parau mai iā’u ’ia haere atu vau ia ’oe na nā ni’a i te ’are.

« ’Ua parau atu ra Iesu, ’a haere mai. Tei raro atu ra Petero fa’aru’e mai ra i te pahī, haere ti’a atu ra ia Iesu ra nā ni’a i te ’are.

« ’Ia ’ite rā ’oia i te ’u’ana o te mata’i, mata’u ihora, ’e tē paremo ra i raro ’ua pi’i atu ra, e te Fatu, ’ia ora vau.

« ’Ua fa’atoro mai ra Iesu i tāna rima i reira ra, haru mai ra iāna, nā ’ō mai ra, e teie nei ta’ata fa’aro’o hara’ini ē, e aha ’oe i mata’u ai ? »³

Te mau taea’e ’e te mau tuahine, e ’ere paha teie te hope’ara’a o te paraparaura’a. Tē ti’aturi nei au ē ’a ho’i ai te Fa’aora i ni’a i te pahī ma te tāpe’a i tō rāua rima, ’o Petero tei rari roa ’e tei ha’amā roa ato’a paha, ’ua parau paha te Fa’aora i te hō’ē mea mai teie te huru : « E Petero, ’eiaha e mata’u ’e ’eiaha e ha’ape’ape’a. ’Ahani ’oe e nehenehe e hi’o ia ’oe iho mai tā’u e hi’o ia ’oe, e iti mai ïa tō ’oe fē’a’a ’e e rahi atu ā tō ’oe fa’aro’o. ’Ua here au ia ’oe, e Petero iti e ; ’ua pou ’oe i rāpae i te pahī. E mea maita’i tā ’oe pūpūra’a, ’e noa atu ’ua fē’a’a ’oe, tei reira noa iho ā vau nō te rave a’e ia ’oe mai roto mai i te moana, ’e e maita’i roa ïa tā ’oe pūpūra’a. »

’Ua ha’api’i mai Elder Dieter F. Uchtdorf :

« Tē ti’aturi nei au ē, e hina’aro te Fa’aora Iesu Mesia ’ia hi’o ’outou, ’ia fāri’i ’e ’ia ’ite ē ’o ’oia tō ’outou pūai. Nā roto i tāna tauturu, ’aita e ’ōti’a nō te mau mea tā ’outou e nehenehe e fa’aoti. ’Aita ho’i e ’ōti’a nō tō ’outou pūai. E hina’aro ’oia ’ia hi’o ’outou ia ’outou iho mai te huru tāna e hi’o ra ia ’outou. ’E e mea ta’a ’ē roa te reira i te huru tā tō te ao e hi’o nei ia ’outou […]

« E hōro’a mai ’oia i te mana i tei rohirohi ; ’e i te feiā ’aita e pūai e fa’arahi ’oia i te pūai. »⁶

Tītau-roa-hia ia tātou ’ia ha’amana’o ē, noa atu te nava’i ’ore o tā tātou pūpūra’a maita’i roa a’e, e nehenehe tā te Fa’aora e ha’amaita’i roa i te reira. Noa atu te huru iti o tā tātou mau tauto’ora’a, ’eiaha roa atu tātou e ti’aturi ’ore i te mana o te Fa’aora. E nehenehe i te hō’ē parau ’ōhie hāmani maita’i, te hō’ē fārereira’a poto ’e te ’ā’au tae mau, ’aore rā te hō’ē ha’api’ira’a Paraimere tei ha’api’ihia ma te here, e tāmāhanahana, e tāmarū i te ’ā’au, ’e e taui i te mau orara’a mure ’ore, nā roto i te tauturu a te Fa’aora. E nehenehe tā tātou mau tauto’ora’a ’aruri e fa’atupu i te mau semeio, ’e nā roto i te reira, tei roto atu ra tātou i te hō’ē ’ō’otira’a maita’i roa.

Te mea pinepine, e tu’uhia tātou i roto i te hō’ē vaira’a e ’imi tātou i te nae’a i ni’a atu ā. E mana’o paha tātou ē e’ita te reira ’ohipa e mara’a ia tātou. Pēnei a’e tē hi’o ra tātou i te feiā nā muri ia rātou tātou e tavini nei, ’e ’ua feruri ē, e’ita roa atu tātou e ’aifāito atu. Te mau taea’e ’e te mau tuahine, ’o te reira tā ’outou e mana’o ra, ’a hi’o noa mai i te mau tāne ’e te mau vahine fa’ahiahia e pārahi ra i muri mai iā’u, i pīha’i iho ia rātou vau e tāvini nei.

Hō’ē ā tō tātou ’ati.

Tera rā, ’ua ha’api’i mai au ē, e ’ere hō’ē ā huru te hina’aro ’ore i te hape ’e te maita’i-roa-ra’a i roto i te Mesia, e ’ere hō’ē ā huru te fa’aaura’a iāna i ni’a ia vetahi ’ē ’e te pe’era’a i te hi’ora’a. ’Ia fa’aau tātou ia tātou i ni’a ia vetahi ’ē, e piti noa ïa fa’ahope’ara’a. E hi’o tātou ia tātou ’ei ta’ata maita’i a’e i te tahi atu mau ta’ata, ’e e riro tātou i te ha’avā ’e i te fa’ahapahapa ia rātou, ’e ’aore rā, e hi’o tātou ia tātou ’ei mea faufa’a ’ore i mua ia vetahi ’ē, ’e tupu atu ra te mana’o tapitapi ’e te ha’afaufa’a ’ore iāna iho ’e te ha’aparuparu. Mea varavara roa te ’āpī ’ia fa’aau ia tātou iho i ni’a ia vetahi ’ē, ’aita e fa’aitoitora’a, ’e i te tahi taime e mea hepohepo mau roa. E nehenehe ho’i teie mau fa’aaura’a e vāvāhi i te pae vārua, ’aita atu rā tātou e fāri’i i te tauturu pae vārua tei tītauhia. I te tahi pae, e nehenehe te pe’era’a i te hi’ora’a o te feiā tā tātou e fa’atura ra, ’o tē fa’a’ite i te mau huru maitata’i o te Mesia, e riro i te mea ’ā’apo ’e te fa’aitoito, ’o tē tauturu ia tātou ’ia riro ’ei pipi maita’i a’e nō Iesu Mesia.

’Ua hōro’a mai te Fa’aora i te hōho’a e pe’e, nā roto i te pe’era’a i te hi’ora’a o te Metua. ’Ua ha’api’i ’oia i tāna pipi ia Philipa :« ’O tō’u nei ho’i pārahira’a roa i’ō ’outou nei ē, ’e ’aore ā ’oe i ’ite iā’u, e Philipa ? ’o tei hi’o mai iā’u ra, ’ua hi’o ïa i te Metua ; e aha ho’i ’oe i parau mai ai ē, e fa’a’ite mai ia mātou i te Metua ? »⁷

Ha’api’i atu ra ’oia : « ’Āmene, ’āmene, e parau atu vau ia ’outou, ’o tē fa’aro’o mai iā’u ra e rave ato’a ’oia i teie nei mau ’ohipa tā’u e rave nei ».⁸

Noa atu te huru iti o tā tātou mau tauto’ora’a, mai te mea e ’ā’au tae mau tō tātou, e fa’a’ohipa ïa te Fa’aora ia tātou nō te rave i tāna ’ohipa. Mai te mea e fa’aitoito roa tātou i tei mara’a ia tātou, ma te ti’aturi iāna nō te rave i te toe’a, e nehenehe ïa tātou e riro ’ei tuha’a nō te mau semeio e hā’ati nei ia tātou.

’Ua parau Elder Dale G. Renlund : « ’Aita i tītauhia te maita’i roa, terā rā, ’ua hina’aro mātou ia ’outou, nō te mea te ta’ata tei ineine ’ia rave, e mea rave ïa i te hō’ē mea. »⁹

Mai tā peresideni Russell M. Nelson i ha’api’i ia tātou : « Mea au nā te Fatu te tūtavara’a. »¹⁰

Tē ti’a ineine nei te Fa’aora nō te fāri’i i tā tātou mau pūpūra’a ha’eha’a ’e nō te ha’amaita’i roa i te reira nā roto i tōna maita’i. Nā roto i te Mesia, ’aita e ’ō’otira’a ’aita i oti maita’i roa. Tītau-roa-hia tō tātou itoito nō te ti’aturi ē, nō tātou tōna maita’i—e tauturu ho’i ’oia ia tātou, e fa’aora ’oia ia tātou i te hōhonura’a o tō tātou fē’a’a, ’e e ha’amaita’i roa ’oia i tā tātou mau tauto’ora’a ha’iha’i roa.

I roto i te parabole nō te ta’ata ueue huero, tē parau nei te Fa’aora nō te mau huero tei tanuhia i roto i te repo maita’i. ’Ua fa’atupu te tahi hō’ē hānere, te tahi, e ono ’ahuru, ’e te tahi, e toru ’ahuru. Tei roto pā’āto’a ïa i tāna ’ō’otira’a maita’i roa.¹¹

’Ua ani te peropheta Moroni i te mau ta’ata ato’a : « ’Oia ïa, ’a haere mai i te Mesia, ’e ’ia maita’i roa ’outou iāna […] ’e mai te mea e ha’apae ’outou i te mau mea paieti ’ore ra, ’e ’a here atu ai i te Atua ma tō ’outou mana ato’a, tō ’outou mana’o ato’a ’e te pūai ato’a, ’ei reira e nava’i ai tōna ra maita’i nō ’outou, ’e nā roto i tōna maita’i e riro ai ’outou ’ei mea maita’i roa i te Mesia ra. »¹²

Te mau taea’e ’e te mau tuahine, tē parau pāpū nei au nō te Mesia, tei mau te mana nō te ha’amaita’i roa i tā tātou pūpūra’a ha’eha’a roa a’e. Fa’aitoito roa ana’e, ’e ’ia hōpoi mai tātou i tei mara’a ia tātou, ’e nā roto i te fa’aro’o, e tu’u i tā tātou pūpūra’a nava’i ’ore i tōna ra ’āvae. Nā roto i tōna i’oa, ’oia te ’Orometua nō te ’ō’otira’a maita’i roa, ’oia ho’i Iesu Mesia, ’āmene.