Tē ha’api’i nei te Fatu Iesu Mesia ia tātou ’ia aupuru
Nā roto i te tauturu a te Fa’aora, e ti’a ia tātou ’ia here i tāna māmoe iti ’e ’ia aupuru ia rātou mai tāna e hina’aro.
’Ua parau te Fatu Iesu Mesia :
« ’O vau te tīa’i māmoe maita’i. E hōro’a te tīa’i māmoe maita’i i tōna iho ora nō te māmoe […]
« Mai te Metua i ʼite iāʼu nei ra, ʼe ʼo vau hoʼi i ʼite i te Metua ra ; ʼe e hōroʼa hoʼi au i tōʼu ora nō te māmoe. »1
I roto i te hurira’a Hēreni o te mau pāpa’ira’a mo’a, te tahi aura’a nō te ta’o maita’i ’o te « nehenehe ato’a ïa, te fa’ahiahia. » Nō reira i teie mahana, ’ua hina’aro vau e paraparau nō te Tīa’i māmoe maita’i, te Tīa’i māmoe nehenehe, te Tīa’i māmoe fa’ahiahia, ’oia ho’i Iesu Mesia.
I roto i te Faufa’a ’Āpī, tē parauhia nei ’oia te « tīa’i māmoe rahi »,2 te « Tīa’i rahi »,3 ’e te « Tīa’i ’e te ’Episekōpo o tō [tātou mau vairua]. »4
I roto i te Faufa’a Tahito, ’ua pāpa’i ’o Isaïa ē « e fa’a’amu ’oia i tāna nana mai te tīa’i māmoe ra. »5
I roto i te Buka a Moromona, tē parauhia nei ’oia « te tīa’i māmoe maita’i ra »6 ’e te « tīa’i māmoe rahi mau. »7
I roto i Te Ha’api’ira’a Tumu ’e te mau Fafaura’a, ’ua parau ’oia : « Nō reira, tei rotopū ïa vau ia ’outou na, ’e ’o vau nei te tīa’i māmoe maita’i. »8
I tō tātou nei ’anotau, ’ua parau te peresideni Russell M. Nelson : « Tē poihere nei te Tīa’i māmoe maita’i i te mau māmoe ato’a o tāna nana, ’e ’o tātou tōna mau tauturu tīa’i māmoe. ’Ua fāna’o tātou i te fa’a’ite i tōna here ’e i te fa’a’ite ato’a atu tō tātou here i te mau hoa ’e te ta’ata tupu—ma te fa’a’amu, ma te ha’apa’o ’e ma te aupuru ia rātou—mai tā te Fa’aora e hina’aro ’ia nā reira tātou. »9
E mea piri fa’ahou atu, ’ua parau te peresideni Nelson : « Hō’ē tāpa’o rahi nō te ’Ēkālesia mau ’e te ora a te Fatu maori rā, te hō’ē tauto’ora’a fa’anahonahohia ’e te arata’ihia nō te aupuru i te tamari’i tāta’itahi a te Atua ’e i tō rātou ’utuāfare. Nō te mea ho’i ē, nāna teie ’Ēkālesia, ’o tātou tāna mau tāvini, e aupuru tātou i te ta’ata, mai tāna i rave ra. E aupuru tātou nā roto i tōna i’oa, nā roto i tōna mana ’e tāna ha’amanara’a, ’e tōna maita’i here ».10
I te amuamura’a te mau pharisea ’e te mau pāpa’i parau i te Fatu ’e « nā ’ō a’era, Tē ’ite nei teie ta’ata i te feiā rave hara, ’e tē ’amu ato’a nei i tā rātou ’amura’a »,11 ’ua pāhono atu ’oia nā roto e toru ’ā’amu nehenehe ’o tā tātou i mātau ’ei parabole nō te māmoe mo’e, te parabole nō te diderāma i mo’e ra, ’e te parabole nō te tamaiti pūhura.
E mea huru ta’a ’ē ’ia hi’ohia te parau a Luka, te ta’ata pāpa’i ’Evanelia, i te vauvaura’a ’oia i teie nā ’ā’amu e toru, ’ua fa’a’ohipa ’oia i te parau parabole, e ’ōtahi, e ’ere i te ’ōtini.12 E au ē tē ha’api’i nei te Fatu hō’ē noa iho ha’api’ira’a i teie e toru ’ā’amu—e mau ’ā’amu tei ’itehia te mau nūmera ta’a ’ē, 100 māmoe, 10 diderāma ’e 2 tamaiti.
Te nūmera rahi rā ho’i i roto i teie nā ’ā’amu, ’o te nūmera hō’ēïa. ’E te hō’ē ha’api’ira’a e nehenehe e tāpe’a mai i roto i teie nūmera, ’o teie paha ïa, tauturu tia’i mamoe noa atu ā ’oe nō 100 peresibutero ’e te feiā e tano ’ei peresibutero i roto i tā ’oe pupu peresibutero, ’aore rā tauturu pupu noa atu ā ’oe nō 10 feiā ’āpī tamāhine, ’aore rā ’orometua noa atu ’oe nō e 2 tamari’i Paraimere, e aupuru noa rā ’oe ia rātou, e ha’apa’o noa ’oe ia rātou ’e e here noa ’oe ia rātou hō’ē hō’ē, hō’ē i muri i te tahi. E’ita roa atu ’oe e parau ē : « E aha ïa māmoe ma’au », ’aore rā, « ’Ia hi’ohia, ’aita i faufa’a roa terā diderāma », ’aore rā « E aha ïa huru tamaiti ’orurehau. » Tei ia tātou nei te « here ateate o te Mesia » ra,13 mai te ta’ata i roto i te ’ā’amu nō te māmo’e mo’e ïa tātou, e « vaiiho i te iva ’ahuru ’e iva […] ’a haere ’a ’imi ai i tei mo’e ra, ē [… ē… ē] ’ia ’itea atu. »14 ’Aore rā mai te vahine i roto i te ’ā’amu nō te diderāma mo’e, e « tīti’a [ïa] i te lāmepa, e purūmu ai i te fare, ’a mā’imi māite ai, [māite] ē, [… ē… ē] ’ia ’itea atu iāna. »15 Tei ia tātou nei te « here ateate o te Mesia » ra, e pe’e ïa tātou i te hi’ora’a o te metua tāne i roto i te ’ā’amu nō te tamaiti pūhura, « tei te ātea ’ē ā ’oia, ’ite mai ra […] aroha mai ra, horo mai ra, tauvahi mai ra i ni’a i tāna ’ā’ī, ho’iho’i mai ra iāna. »16
E ti’a ānei ia tātou ’ia ’ite i te mana’o rū i roto i te ’ā’au o te ta’ata tei mo’e te hō’ē noa māmoe ? ’Aore rā, te mana’o rū i roto i te ’ā’au o te vahine tei mo’e hō’ē noa diderāma ? ’Aore rā te here ’e te aumihi e’ita e ti’a ’ia parau, i roto i te ’ā’au o te metua tāne o te pūhura ?
’Ua tāvini māua ta’u vahine, ia Maria Isabel, i Amerika rōpū, ’ua noho māua i Guatemala City. I reira, ’ua fāna’o vau i te fārerei ia Julia, e melo ha’apa’o maita’i nō te ’Ēkālesia. ’Ua tae mai te mana’o e uiui iāna nō ni’a i tōna ’utuāfare. ’Ua pohe tōna metua vahine i te ma’i mariri ’aita’ata i te matahiti 2011. E fa’atere ha’apa’o maita’i tōna metua tāne i roto i tōna titi, i te tāvinira’a ’ei ’episekōpo ’e ’ei tauturu nō te peresideni titi e rave rahi matahiti. E tauturu tia’i mamoe mau ’oia nā te Fatu. ’Ua fa’ati’a mai ’o Julia i tāna mau tauto’ora’a ’e tōna rohirohi ’ore nō te hāhaere, nō te aupuru ’e nō te tāvini. I ’oa’oa mau ’oia i te fa’a’amu ’e i te ha’apa’o i te māmoe iti a te Fatu. ’Ua fa’aipoipo fa’ahou ’oia ’e ’ua vai itoito noa i roto i te ’Ēkālesia.
Ma’a matahiti i muri mai, ’ua ta’a ’oia i tāna vahine, ’e i teienei tē haere fa’ahou nei i te purera’a ’o ’ōna ana’e. E mana’o huru ’ē tōna, ’e mai te huru ē tē fa’ahapa ra vetahi mau ta’ata iāna nō te ta’ara’a i tāna vahine. Fa’aea atu ra ’oia i te haere i te purera’a, e vārua ’ino tei ’ī i tōna ’ā’au.
E mau parau maita’i ana’e tā Julia nō ni’a i teie tauturu tia’i mamoe fa’ahiahia, e ta’ata rave i te ’ohipa ’e te here ’e te aumihi. Tē ha’amana’o pāpū roa nei au i te mana’o rū tei tae mai iā’u i te fa’ata’ara’a mai ’oia i tōna parau. Hina’aro roa vau e rave i te hō’ē mea nō terā ta’ata, e ta’ata tei ha’a rahi roa ’ino nō te ta’ata e rave rahi roa i terā mau matahiti.
’Ua hōro’a mai ’oia i tāna nūmera niuniu ’e ’ua ha’amata vau i te niuniu iāna, ma te ti’aturi ē, pēnei a’e e fāri’i ’oia ’ia fārerei tino māua. E rave rahi hepetoma i ma’iri, ’e e rave rahi roa tāniuniura’a ’aita i manuia, ē i te hō’ē mahana, pāhono mai nei ’oia i te niuniu.
’Ua fa’a’ite atu vau ē, ’ua fārerei māua ’o Julia, tāna tamāhine, ’e ’ua fa’ahiahi roa vau i tāna tāvinira’a, tāna aupurura’a ’e tōna herera’a i te māmoe iti a te Fatu e rave rahi roa matahiti te maoro. ’Ua māere ’oia i terā huru parau. ’Ua parau atu vau iāna ē, ’ua hina’aro mau vau e fārerei mata ’e mata iāna. ’Ua ui mai ’oia e aha tā’u fā nō te anira’a i terā fārereira’a. Pāhono atu vau : « ’Ua hina’aro mau vau e fārerei i te metua tāne o terā vahine fa’ahiahia. » ’Ua mū te niuniu ma’a tetoni—e ma’a tetoni mai te huru iā’u nei e hora. Pāhono noa mai nei : « Ahea ’e i hea ? »
Te mahana māua i fārerei, ’ua ani vau iāna ’ia fa’ati’a mai i te tahi mau ’ohipa tāna i rave nō te hāhaere, ’e aupuru ’e tāvini i te māmoe iti a te Fatu. I te fa’ati’ara’a mai ’oia i te tahi mau ’ā’amu putapū mau, ’ua ’ite a’era vau i te tauira’a i roto i tōna reo, ’e terā vārua tāna i putapū e rave rahi roa taime ’ei tauturu tia’i mamoe, ’ua ho’i fa’ahou mai. ’Ua rari roa tōna mata i te roimata. ’Ite ihora vau ē, e taime tano terā nō’u, ’aita rā ho’i te parau i matara mai. ’Ua pure au i au i roto i tō’u upo’o : « E te Metua, ’a tauturu mai na. »
I reira iho, ’ua fa’aro’o a’era vau i tō’u reo i te nā-’ō-ra’a : « E te taea’e Florian, ’ei tāvini nā te Fatu, tē tātarahapa nei au nō te mea ’aita mātou i reira nō ’oe. ’A fa’aore mai na i tā mātou hapa. ’A fa’ati’a fa’ahou na ia mātou ’ia fa’a’ite atu ia ’oe ē, ’ua here mātou ia ’oe. ’Ua hina’aro mātou ia ’oe. E mea faufa’a ’oe nō mātou. »
I te sābati nō muri mai, ’ua ho’i mai ’oia. ’Ua paraparau maoro ’oia i tōna ’episekōpo ’e ’ua vai itoito noa. Ma’a ’āva’e i muri mai, ’ua fa’aru’e mai ’oia—’ua ho’i mai rā. ’Ua ho’i mai. Tē parau pāpū nei au ē, nā roto i te tauturu a te Fa’aora, e ti’a ia tātou ’ia here i tāna māmoe iti ’e ’ia aupuru ia rātou mai tāna e hina’aro. ’E nō reira, i’ō i Guatemala City ’ua fa’aho’i mai te Fatu ra Iesu Mesia i te hō’ē o tāna mau māmoe faufa’a rahi i roto i te nana. ’E ’ua ha’api’i ato’a mai i te hō’ē ha’api’ira’a nō ni’a i te aupurura’a e’ita roa e mo’e iā’u. Nā roto i te i’oa o te Tīa’i māmoe maita’i, te Tīa’i māmoe nehenehe, te Tīa’i māmoe fa’ahiahia, ’oia ho’i te Fatu Iesu Mesia, ’āmene.