E feiā ’āpe’e nō te Ari’i o te hau
’A tūtava ai tātou ’ia fa’ahotu i te mau huru mai tō te Mesia, e nehenehe tātou e riro mai ’ei mauiha’a nō tōna hau i roto i te ao nei.
’Ia au i te mau parau tohu tei hōro’ahia ia Zetaria,1 ’ua tomo Iesu ma te hanahana i roto i te ’oire mo’a i ni’a i te hō’ē ateni, ’o tei fa’arirohia i roto i te mau pāpa’ira’a ’ei « tāpa’o tahito nō te ti’ara’a ari’i ’āti Iuda »,2 mai tei au i te Ari’i o te mau ari’i ’e te Ari’i o te hau.3 ’Ua ha’aatihia ’oia e te hō’ē naho’a rahi o te mau pipi ’oa’oa, tei hōhora i tō rātou mau ’ahu, te rao’ere ni’au ’e te tahi atu mau rao’ere rā’au, i ni’a i te roara’a o te purūmu nā reira ho’i Iesu i te haere. ’Ua ’ārue rātou i te Atua, ma te parau ma te reo pūai, « ia ora na te Ari’i i te haere’a mai ma te i’oa o te Fatu ra : ’ei hau tō te ra’i ’e te ha’amaita’i i te vāhi teitei ».4 ’E fa’ahou ā, « hosāna te Tamaiti a Davida : ’Ia ora ’oia o tei haere mai ma te i’oa о te Fatu ; Hosāna i te ra’i teitei ra ».5 Teie tupura’a ’ohipa hanahana, ’o tā tātou e fa’ahanahana nei i teie mahana tei matauhia i te i’oa ra te sābati nō te mau ’āma’a tamara, ’ua riro ’ei ’ōmuara’a ’oa’oa nō te mau ’ohipa ’ino mau e tupu i roto i te reira hepetoma hope roa te teitei, nā roto i te tusia tāu’a-’ore-hia o te Fa’aora ’e te temeio fa’ahiahia o te mēnema ta’ata ’ore.
’Ei feiā ’āpe’e nāna, e nuna’a ta’a ’ē tātou nōna, tei pi’ihia nō te poro i tōna mau maita’i,6 e mau ta’ata fa’atupu i te hau tāna e hōro’a hua noa ’e tāna tusia tāra’ehara. E tao’a hōro’a teie hau tei fafauhia i te mau ta’ata ato’a e fāriu atu i tō rātou ’ā’au i te Fa’aora ’e ’o tē ora ma te parauti’a ; e hōro’a mai te reira hau ia tātou i te pūai nō te fāna’o i te ora tahuti nei ’e ’o tē fa’ati’a ia tātou ’ia fa’a’oroma’i i te mau tāmatara’a māuiui o tō tātou tere.
I te matahiti 1847, ’ua hōro’a te Fatu i te mau arata’ira’a pāpū i te mau pionie feiā mo’a, ’o tei hina’aro i te hau nō te vai hau noa ’e te tāhō’ē, ’a fa’aruru ai i te mau fifi mana’o-’ore-hia i roto i tō rātou tere i te pae to’o’a o te rā. I roto i te tahi atu mau mea, ’ua fa’aue te Fatu i te feiā mo’a ’ia « fa’aea na i te tama’i te tahi i te tahi ; ’a fa’aea na i te parau fa’a’ino te tahi nō te tahi ra ».7 Tē ha’apāpū nei te mau pāpa’ira’a mo’a ē, te feiā e rave i te ’ohipa parauti’a ma te fa’aitoito i te haere i roto i te marū o te Vārua o te Fatu, e fafauhia mai ia rātou te hau tā rātou e hina’aro nō te ora i roto i te pu’e tau ahoaho tā tātou e ora nei i teie mahana.8
’Ei mau pipi nō te Ari’i o te hau, ’ua fāri’i tātou i te arata’ira’a ’ia ora « ma te tāhō’ē mai i tō rātou ’ā’au i roto i te tāhō’ēra’a ’e i roto i te here te tahi i te tahi ».9 ’Aita i maoro a’enei ’ua parau tō tātou peropheta, te peresideni Russell M. Nelson, « tē ’ōfati nei te mau mārōra’a i te mau mea ato’a tā te Fa’aora i pāruru ’e i ha’api’i ».10 Tē tāparu ato’a nei tō tātou peropheta ’ia ’imi tātou i te mau rāve’a ato’a ’ia fa’a’ore i tō tātou iho mau pe’ape’a e ’ū’ana nei i roto i tō tātou ’ā’au ’e tō tātou orara’a ».11
E feruri ana’e tātou i teie mau parau tumu nā roto i te here mau o te Mesia ia tātou, ’e ’o tātou, ’ei feiā ’āpe’e nāna, e ’imi i te fāri’i nō te tahi ’e te tahi. Tē fa’ata’a nei te mau pāpa’ira’a mo’a i te reira huru here mai te aroha.12 ’Ia feruri ana’e tātou i te aroha, e fāriu tō tātou vaerua i ni’a i te mau ravera’a hōro’a noa ’e te mau ō nō te ha’amāmā i te māuiui o te feiā e fārerei nei i te fifi i te pae tino, i te pae mātēria ’aore rā i te pae ’āehuehu. Teie rā, ’aita te aroha i tā’ati-noa-hia i ni’a i te hō’ē mea tā tātou e hōro’a nā te tahi ta’ata, e huru rā te reira o te Fa’aora ’e e nehenehe e riro ’ei tuha’a nō tō tātou huru ta’ata. E ’ere i te mea māere ē, ’ua ani mai te Fatu ia tātou ’ia fa’a’ahu ia tātou « i te ru’uru’u o te aroha […] ’o te ru’uru’u ïa nō te maita’i roa ’e te hau ».13 ’Ia ’ore te aroha, e mea faufa’a ’ore ïa tātou,14 ’e e’ita tātou e fatu i te pārahira’a tā te Fatu i fa’aineine nō tātou i roto i te mau aora’i o tō tātou Metua i te ao ra.15
’Ua fa’ahōho’a maita’i roa Iesu i te aura’a o te parau, te ru’uru’u nō te maita’i roa ’e te hau, i mua iho ā rā i te mau ’ohipa pe’ape’a tei tupu hou tōna maratirira’a. ’A feruri na mā’a taime iti i te mea tā Iesu i putapū i te taime ’a hōroi ai ’oia i te ’āvae o tāna mau pipi, ma te ’ite ē, e ho’o te hō’ē o rātou iāna i taua pō ra.16 ’Aore rā tau hora i muri mai, i te taime ’a fa’aora ai Iesu ma te aroha i te tari’a o te hō’ē o te mau ta’ata tei ’āpe’e ia Iuda, te ta’ata tei ho’o iāna, nō te haru iāna.17 ’Aore rā i te taime ’a ti’a ai te Fa’aora i mua ia Pirato, ’ua parihia ’oia ma te ti’a ’ore e te mau tahu’a rarahi ’e te mau peresibutero, ’e ’aita roa ’oia i fa’ahiti noa a’e i te hō’ē parau nō te pāto’i i te mau parira’a hape i tu’uhia i ni’a iāna, ’e ’ua vaiiho noa ’oia i te tāvana nō Roma ’ia fa’ahiahia.18
Nā roto i teie mau fifi e toru, noa atu te teimaha o te ’oto ’e te mana’o pe’ape’a, ’ua ha’api’i mai tō tātou Fa’aora nā roto i tōna hi’ora’a ē, « e fa’a’oroma’ira’a roa tō te aroha ’e te hāmani maita’i ; e ’ore te aroha e fe’i’i e ’ore […] e fa’arahi, e ’ore […] e fa’aahaaha, e’ita e rave i te mea au ’ore, e’ita e ’imi i te maita’i nōna iho, e’ita e riri vave, [’e] e’ita e mana’o ’ino ia vetahi ’ē ».19
Te tahi atu tuha’a faufa’a e ti’a ’ia ha’apāpū, ’e tē vai ra te mau hope’ara’a i ni’a i tō tātou ti’ara’a pipi ’e te huru nō tō tātou fa’atupura’a i te hau o te Fa’aora, tō tātou ïa huru i ni’a i te tahi ’e te tahi. I roto i tāna tau tāvinira’a i ni’a i te fenua nei, ’ua fa’atumuhia te mau ha’api’ira’a a te Fa’aora—’eiaha noa, i ni’a iho ā rā—i te mau maita’i o te here, te aroha, te fa’a’oroma’i, te ha’eha’a, ’e te aumihi—e mau huru faufa’a rahi mau nō te feiā e hina’aro e ha’afātata atu ā iāna ’e ’ia fa’atupu i tōna hau. E mau hōro’a teie mau huru nō ’ō mai i te Atua ra, ’e ’a tūtava ai tātou i te fa’ahotu i te reira, e ha’amata tātou i te hi’o i te mau ta’a-’ē-ra’a ’e te mau paruparu o tō tātou ta’ata tupu ma te aumihi, te ’ā’au mahora, te fa’atura ’e te fāri’ira’a. Hō’ē o te mau tāpa’o pāpū maita’i, e ha’afātata atu ia tātou i te Fa’aora ’e e riro hau mai tātou mai iāna te huru, ’o te here mau, te fa’a’oroma’i ’e te maita’i i ni’a i tō tātou mau ta’ata tupu, noa atu te huru tupura’a.
Pinepine tātou i te ’ite i te mau ta’ata ’ia fa’ahiti i te mau parau au ’ore ’e te fa’a’ino nō ni’a i te mau huru, te paruparu ’e te mau mana’o o vetahi ’ē, mai te mea iho ā rā ē, ’e ’ere te reira mau huru ’e te reira mau mana’o mai tō rātou te huru. Pinepine e ’itehia te reira mau ta’ata ’ia ’āfa’ifa’i i te reira mau huru parau ia vetahi ’ē ra, ’o tē fa’ahiti fa’ahou i te mau mea tā rātou i fa’aro’o ma te ’ore i ’ite pāpū i te mau mea i tupu. Te mea ’oto rā, tē fa’aitoito nei te mau rāve’a tūreiara’a tōtiare i te reira huru peu i te i’oa o te mau parau mau ta’oti’ahia ’e te parau pāpū. Ma te ’ōti’ati’a ’ore, pinepine te ’āparaura’a rorouira i te arata’i i te ta’ata i roto i te mau fa’a’inora’a ’e i te mau ’arora’a pūai, ma te fa’atupu i te mana’o ’ino’ino, ma te ha’amāuiui i te mau māfatu ’e ma te ha’apuroro i te hō’ē ’arora’a rahi.
’Ua tohu Nephi ē, ’ia tae i te mau mahana hope’a nei, e fa’atupu te ’enemi i te ’ārepurepu ’e e fa’ati’arepu ho’i i te ta’ata ’ia riri i te mea maita’i.20 Tē ha’api’i nei te mau pāpa’ira’a mo’a ē, « te mau mea ato’a ’o tē tītau mai ’e ’o tē fa’aitoito mai ’ia rave i te maita’i, ’e ’ia here i te Atua, ’e ’ia tāvini iāna, e mea fa’auruhia ïa e te Atua ».21 I te tahi a’e pae, « te mau mea ’ino ra, nō ’ō mai ïa i te diabolo ra ; ’e e ’enemi ho’i te diabolo i te Atua, ’e tē tama’i tāmau noa mai ra ïa ’oia iāna, ’e tē tītau ra ïa ’e tē fa’aitoito ra ïa ’ia rave i te hara, ’e ’ia rave tāmau noa ato’a i te mea ’ino ».22
’Ia au i teie ha’api’ira’a tohu, e’ita e māerehia ē, te hō’ē o te mau rāve’a ha’avarevare a te ’enemi ’o te fa’atupura’a ïa i te au ’ore ’e te riri i roto i te ’ā’au o te mau tamari’i a te Atua. E ’oa’oa ’oia ’ia ’ite i te ta’ata ’ia fa’a’ino, ’ia ha’ama’au ’e ’ia ’ōhumu te tahi ’e te tahi. E nehenehe teie peu e ha’amou i te huru, te ro’o o te hō’ē ta’ata ’e te fa’atura iāna iho, mai te mea iho ā rā e ha’avā-ti’a-’ore-hia te ta’ata. E mea faufa’a ’ia ha’apāpū ē, mai te mea e fa’ati’a tātou i teie huru peu i roto i tō tātou orara’a, tē vaiiho ra ïa tātou i te hō’ē vāhi i roto i tō tātou ’ā’au ’ia ti’a i te ’enemi ’ia ueue i te ’āmahamahara’a i rotopū ia tātou, e nehenehe ho’i tātou e topa i roto i tāna herepata tahae.
Mai te mea ’aita tātou e ha’apa’o i tō tātou mau mana’o, tā tātou mau parau ’e tā tātou mau ’ohipa, e nehenehe tātou i te hope’a e topa i roto i te herepata a te ’enemi, ma te ha’amoura’a i tō tātou mau aura’a ’e te feiā e ha’a’ati ra ia tātou ’e te feiā tei herehia e tātou.
Te mau taea’e ’e te mau tuahine, ’ei nuna’a ta’a ’ē na te Fatu, ’e ’ei ta’ata fa’atupu i tōna hau, e’ita e ti’a ia tātou ’ia fa’ati’a i teie mau rāmāra’a a te ’enemi ’ia tupu mai i roto i tō tātou ’ā’au. E’ita e ti’a ia tātou ’ia amo i te hō’ē hōpoi’a teimaha ’o te ha’amou i te mau mana’o putapū, te mau aura’a ’e ’oia ato’a te mau ora. Tē vauvau nei te ’evanelia i te hō’ē parau maita’i ’oa’oa rahi.
’Oia mau, ’aita hō’ē o tātou i riro ’ei ta’ata hara ’ore, ’e e mea pāpū i te tahi taime e fati tātou i raro a’e i teie huru peu. I roto i tōna here mau ’e tōna ’ite i te mau mea ato’a o tō tātou huru ta’ata nei, e tāmata te Fa’aora i te mau taime ato’a ’ia fa’aara mai ia tātou i te reira mau fifi. ’Ua ha’api’i mai ’oia ia tātou, « o tā ’outou ho’i e fa’a’ino ia vetahi ’ē ra, e fa’a’ino-ato’a-hia ïa ’outou i te reira : ’E te fāito tā ’outou e fāito atu ra ’o te fāito ato’a ïa i tā ’outou ».23
E te mau taea’e ’e te mau tuahine, ’a tauto’o ai tātou i te fa’ahotu i te mau huru mai tō te Fa’aora, e nehenehe tātou e riro mai ’ei mauiha’a nō tōna hau i roto i te ao nei, mai te hōho’a ’o tāna iho i ha’amau. Tē ani nei au ia ’outou ’ia feruri i te mau rāve’a e nehenehe ai tātou ’ia taui ia tātou iho ’ei ta’ata ’o tē fa’ateitei ’e ’o tē tauturu atu, ’ei ta’ata ’ā’au hāro’aro’a ’e te fa’a’ore hara, ’ei ta’ata o tē ’imi i te maita’i i roto ia vetahi ’ē, ma te ha’amana’o tāmau noa ē, « mai te mea tē vai atu ra te mau mea maita’i, te mau mea fa’ahiahia, te mau mea ro’o maita’i, ’e te mau mea poupouhia ra, e tītau ïa tātou i te reira ».24
Tē fafau atu nei au ia ’outou ē, ’a pe’e ai ’outou ’e ’a fa’ahotu ai i teie mau huru, e rahi atu ā tō tātou auhoara’a ’e te ’ite ’ōhie i te mau hina’aro o tō tātou mau ta’ata tupu,25 ’e e fāri’i tātou i te ’oa’oa, te hau ’e te tupura’a i te rahi i te pae vārua.26 Pāpū maita’i ē, e ’ite mai te Fatu i tā tātou mau tauto’ora’a ’e e hōro’a mai ’oia ia tātou i te mau ō tā tātou e hina’aro nei, nō te riro ’ei ta’ata fāri’i maita’i a’e ’e te fa’a’oroma’i ma te mau ta’a-’ē-ra’a, te mau paruparu ’e te mau huru parauti’a ’ore o vetahi ’ē. Hau atu, e ti’a roa ia tātou ’ia pāto’i maita’i a’e i te hina’aro ’ia ’ino’ino ’aore rā ’ia fa’a’ino i te feiā e fa’a’ino mai ia tātou. Tō tātou hina’aro ’ia fa’a’ore i te hara, mai tā te Fa’aora i rave, i te feiā tei hāmani ’ino mai ia tātou ’aore rā tei parau ’ino mai ia tātou, pāpū roa e rahi atu ā ’e e riro mai te reira ’ei huru nō tātou.
I teie mahana, te sābati nō te mau ’āma’a tamara, e mata nā tātou i te hōhora i tō tātou ’ahu nō te here ’e tā tātou mau rao’ere nō te aroha, ma te pe’e i te Ari’i nō te hau, ’a fa’aineine ai tātou i te fa’ahanahana, i te temeio nō te mēnema ta’ata ’ore i teie sābati i mua nei. ’Ei taea’e ’e ’ei tuahine i roto i te Mesia, e tū’ou ana’e ma te ’oa’oa, « Hosana te Tamaiti a Davida : ’ia ora ’oia o tei haere mai ma te i’oa о te Fatu ; Hosana i te ra’i teitei ra ».27
Tē fa’a’ite pāpū nei au ē, tē ora nei Iesu Mesia ’e ’o tōna here mau, tei fa’a’itehia nā roto i tōna tusia tāra’ehara, ’ia tae te reira i te feiā ato’a e hina’aro e haere nā muri iho iāna ’e e fāna’o ho’i i tōna hau i roto i teie ao ’e i roto i te ao a muri a’e. Tē parau nei au i teie nei mau mea nā roto i te i’oa o Iesu Mesia, ’āmene.