“Taialaina o Fanau aga’i atu i le Faaola,” Liahona, Aok. 2023.
Taialaina o Fanau aga’i atu i le Faaola
O le auala o loo musuia ai e le polokalama a Tamaiti ma le Autalavou le tuputupu ae faaKeriso i le laasaga e tasi i le taimi.
Ata o Keriso, saunia e Heinrich Hofmann
E ui i le mamafa o Lana misiona, ae sa faaalu e le Faaola se taimi e auauna atu ai i tamaiti. Sa Ia valaaulia i latou e o mai ia te Ia ma ia faamanuiaina. (Tagai Mareko 10:13–16.) E pei lava ona faaalu e Keriso le taimi e taiala ai tamaiti i o latou uluai laasaga, e faapena foi i tatou.
Na faalauiloa e le Ekalesia le polokalama a Tamaiti ma le Autalavou i le 2019 e fesoasoani ai i tamaiti ma le autalavou e fausia lo latou faatuatua ia Iesu Keriso faapea foi ma le iloaina ma malamalama i uunaiga mai le Agaga Paia a o latou saili ia malamalama i le fuafuaga a le Tama Faalelagi mo i latou. E fesoasoani ia i latou e tuputupu ae patino ai ma auai i le galuega o le faaolataga ma le faaeaga. O le ute o lenei polokalama o le taialaina lea o tagata talavou e “mulimuli i le faataitaiga a le Faaola a o latou tuputupu ae.”1 Ua tatou aoao e faapea “Ua tupu le poto ma le tino o Iesu, ua alofagia o Ia e le Atua atoa ma tagata” (Luka 2:52). O lenei mamanu mai le popofou o le soifuaga o le Faaola e fesoasoani i tagata talavou ia tuputupu ae i ni auala se fa: faaleatamai, faaletino, faaleagaga, ma faaleagafesootai.
A o tomanatu i gaoioiga ma galuega faatino auauna atu o loo i lalo, fesili i lau fanau pe o le a se mea latou te mananao e faataitai. E mafai ona maua nisi manatu i le childrenandyouth.ChurchofJesusChrist.org.
O se uarota i Misuri, ISA, na aoao atili e uiga i le Tusi a Mamona i se gaoioiga e ta’ua o le “Tolauapiga a Nifae.”
Ata na pueina e Sheri Skog
Faaleagaga
“Ua faateleina le ‘alofagia [o Iesu] e le Atua.’ E mafai ona e tuputupu ae faaleagaga e ala i le faaalia o lou alofa mo le Atua ma lou naunautai ia ola i le talalelei.”2
Na fai mai Gloria Pereira, o se tina mai Chile, “E fausia e [fanau] lo latou faasinomaga faaleagaga e ala i le atiina ae o sini e ogatasi ma o latou uiga ma manaoga.”
Na fai mai Daniela Moreira, o se peresitene o le Peraimeri mai Mendoza, Atenitina, sa galulue tamaiti i lana uarota ia malamalama i le faamoemoega o le malumalu. Ina ia ausia lenei sini, sa latou asiasi atu i le fausiaina o le Malumalu o Mendoza Atenitina. Sa latou aoaoina foi le ala e mafai ai ona faamauina aiga i le malumalu ma mulimuli ane faia ni faataitaiga o le malumalu.
“O gaoioiga o le tulaga faaleagaga o gaoioiga na e tuua le faailoga maoae i tamaiti laiti,” o le tala lea a Daniela. “Latou te aoao ia iloa ma lagonaina le mafutaga faifai pea a le Agaga Paia ma faamasani i lagona.”
Manatu mo gaoioiga faaleagaga: Faatautaia se sauniga molimau; tauloto mau e te fiafia i ai; fai se po o fesili-ma-tali faatasi ma le au epikopo po o le au peresitene o le paranesi; auai i se papatisoga; fai talafaasolopito o aiga e saunia ai igoa mo le malumalu; faitau mau o loo lisi atu i lalo o viiga e sili ona e fiafia i ai; fai se malologa mai ala o faasalalauga faaagafesootai.
Dayra—o se tamaitai talavou mai Nuevo León, Mekisiko—na valiina upu faamalosiau i luga o maa e avatu i tuaoi.
Ata na pueina e Melissa Sue Lara Garza
Faaleagafesootai
“Ua faateleina le ‘alofagia [o Iesu] e … tagata.’ E mafai ona e tuputupu ae faaagafesootai e ala i le faaalia o le alofa mo tagata uma.”3
Na faasoa mai e Melisa Lara mai Mekisiko le auala na faatu ai e lana tama teine, o Dayra, se sini e tuuina atu savali faamalosiau i le taimi o le faamai pipisi o le KOVITI-19: “Sa ia teuteuina maa i fasifuaitau, tufatufa atu i latou i lona pitonuu, ma tuua i latou i le faitotoa.” I se tasi fale, sa tatala ai e se tamaitai matua le faitotoa ma fesili atu po o le a lana mea o fai. Ina ua uma ona faamalamalama atu e Dayra lana galuega faatino, sa fesili atu le fafine po o le a le fasifuaitau a Dayra mo ia. Sa tau atu e Dayra ia te ia, “E mafai ona e agai pea i luma. Ua matou i ai faatasi ma oe.”
Sa fai mai Melisa, “Sa fai mai le tamaitai ma loimata, ‘Faafetai lava; o upu na e tatau ona ou faalogo i ai. O loo ou feagai ma se luitau ma sa tatalo. Ona e sau ai lea i lo‘u faitotoa e aumai ia te a‘u se savali sa ou manaomia.’ Ou te faafetai na faasoa atu e la’u tama teine lana molimau. Sa ia fai mai ia te au, ‘Tina, ou te lei iloa o le mea sa ou faia na i ai lena aafiaga.’”
Manatu mo gaoioiga faaagafesootai: Talanoa i se tasi o loo galue i le galuega o loo e moemiti i ai; faiaoga i se tei laitiiti; tusi ni tusi i faifeautalai; nonofo faatasi ma se tasi e fou i le taumafataga o le aoauli; valaaulia se uo i se gaoioiga a le Ekalesia; tauloto igoa o tagata o le uarota po o le paranesi; faailoa atu oe lava i se tuaoi e te le iloa; fai se taumafataga aloaia e aoao ai uiga faaalia.
Faaletino
“Na tuputupu ae Iesu i le ‘tino.’ E mafai ona e aoao ia galue ma tausia lou tino, lou soifua maloloina faalemafaufau, ma foafoaga a le Atua.”4
Na faasoa mai e Karla Duarte, o se tina mai Nicaragua, le faataitaiga lenei: “E toatele tamaiti na faatuina se sini e galulue faatasi i gaoioiga faamama i le fale, e aoao ai pe faapefea ona fai se meaai, ma faia ni togalaau laiti faatasi ma le fesoasoani a isi tagata o le aiga.”
A tatou tausia o tatou tino o se malumalu, ua tatou faatagaina le Agaga Paia e mau i totonu o i tatou. O le soifua maloloina e eseese i manaʻoga ma tomai, ae e mafai e tagata talavou ona seti ni sini tulaga ese e faʻaleleia ai lo latou lava soifua maloloina.
Manatu mo gaoioiga faaletino: Fuafua se faiga masani o faamalositino malie; alu i se savaliga sopo; vele le fanua o se tuaoi; teu se pusa mo faalavelave faafuasei e 72-itula; talanoa ma se faufautua e uiga i le atuatuvale; faataitai le mānava tele i totonu ma le malolo o lou tino; kuka meaai paleni; aoao e uiga i le Upu o le Poto; faataitai le fesoasoani muamua.
Faaleatamai
“Sa tuputupu a’e Iesu i le ‘poto.’ E mafai ona e suesue i le aoga, aoao ni tomai fou, ma faaleleia au taleni.”5
Sa vaavaai atu Avigail Rodriguez mai Polivia i lona atalii o Bruno e ono tausaga i lena taimi, na faatuina ma faamaeaina lana sini o le aoaoina o Mataupu Faavae o le Faatuatua. E ui ina sa tauivi Bruno ma le faitautusi, ae na fai mai Avigail o le ausiaina o lenei sini na fesoasoani ia Bruno e avea ai “o se tagata faitau lelei tele. O le isi ana sini o le faitauina atoa lea o le Tusi a Mamona a o lei papatisoina o ia, ma sa ia ausiaina.”
E mafai e tamaiti ona faateleina lo latou malamalama i eria e musuia ai i latou e aoao. Mai le suesuega o le vateatea i le susuega o meaola, e i ai lava se mea e maua ai.
Manatu mo gaoioiga faaleatamai: Fai se po taleni; tusi i se apitalaaga; faitau se tusi; matamata i fetu; aoao e ta se mea faifaaili; fai le orikami; suesue pe faapefea ona aoga meapueata; faatautaia suesuega faasaienisi; faataitai le sipelaina o upu uumi.
O Le Matafaioi a Matua
E ui ina fautuaina tamaiti e auai i gaoioiga ma galuega fesoasoani o se uarota po o se paranesi, ae o le tuputupu ae musuia e amata i le aiga. Na fetalai le Alii i matua, “Ua ou poloaiina outou e tausi a’e a outou fanau i le malamalama ma le upumoni” (Mataupu Faavae ma Feagaiga 93:40). E mafai e taitai o le autalavou ona ofo atu le lagolago, ae e sili atu le iloa e matua o a latou fanau. E mafai ona latou galulue taitoatasi ma a latou fanau i lo latou tuputupu ae faaletagata lava ia, aua “o a tatou taleni ma sini e tulaga ese lava e pei o i tatou.”6
Sa uunaia Peresitene Russell M. Nelson matua ina ia tuuina atu i fanau le “alofa, faamalosiauga, ma fautuaga. Ae ia tetee atu i le faaosoosoga e faia mo i latou. O le a silisili mea latou te faia pe a latou faatinoina lo latou lava faitalia.”7
Na fai mai Anahi Hernández, o se tina mai Mekisiko, “I le amataga sa ou fautuaina atu i la’u fanau sini e faatutuina, e pei o le taina o le piano. Ae sa ou iloaina o loo taulai atu le polokalama i mea e mananao tamaiti e aoao ma atiina ae.”
Sa faatagaina e Anahi lana fanau e filifili gaoioiga sa latou mananao e taumafai i ai: “O taimi uma lava ou te valaaulia ai la’u fanau e galulue i a latou sini, sa ou fesili atu ia i latou, ‘O le a se mea e te manao e aoao?’ ‘O le a le mea e te manao e faataitai?’ Ona latou faailoa mai lea o o latou manaoga, ma ou iloa atili ai i latou.”
O Karla e sefulu-tausaga le matua mai Managua, Nicaragua, na faatuina se sini o le aoao e vali.
Ata na pueina e Karla Valeria Duarte Manzanares
E Mananao Tamaiti ma le Autalavou ia Tuputupu Ae
I le musuia ai e ala i le Malamalama o Keriso, e naunau a tatou fanau e aoao, tuputupu ae, ma auauna atu. Latou te mananao ia avea e faapei o lo latou Faaola e ala i le faaleleia faaletagata lava ia.
Fai mai Shelem Castañeda, o se peresitene o le Peraimeri mai se paranesi i Mekisiko, “Ou te tuu atu i tamaiti ua ta’i 11 tausaga le matutua le matafaioi a le taitai, ma ua latou faatulagaina ma faia ni ta’imua e faatino ai isi gaoioiga. Ou te maofa i lo latou matutua, lo latou naunau e fesoasoani ma aoao.”
E agavaa fanau i faaaliga faaletagata lava ia e ala i le sailia ma le agaga tatalo ma galulue agai i se faamoemoega anoa. O lo matou faamoemoega o le “tuu atu i tagata talavou e taitai,”8 ia iloa e mafai ma mananao moni lava e alualu i luma.
O fea la e te amata ai? Na fai mai Cole Rosenberg, o se faufautua o le autalavou a le uarota mai le Iunaite Setete, “Matou te galulue e faataitai pe faape’i foliga o fuafuaga faamanuiaina, ona toe laa lea i tua ma tuu atu i le autalavou e faatulaga ia fuafuaga ma faatino ia gaoioiga.”
Fesoasoani i lau fanau (1) ia iloa uunaiga mai le Agaga Paia, (2) iloa sini, (3) fuafua pe faapefea ona faataunuuina, (4) faatino lena fuafuaga, ma (5) manatunatu i o latou aafiaga. I se tulaga lautele, o le matutua o tamaiti, o le tele foi lea o le mafai ona latou faia nei laasaga na o latou.
O le mulimuli i nei laasaga e lima e mafai ai e tamaiti ona avea ma tausimea o lo latou tuputupu ae e ala i fuafuaga, ta’imua, ma le manao faaKeriso ia faaleleia.
O le misiona a le polokalama a Tamaiti ma le Autalavou o le “fesoasoani lea i tamaiti, autalavou, ma o latou aiga ia alualu i luma i luga o le ala o feagaiga a o latou fetaiai ma luitau o le olaga.”9 A o tatou taialaina tamaiti ma le autalavou o le Ekalesia agai i lo latou Faaola, ia tatou manatua le ala na Ia tuputupu ae ai. Ua ia i tatou le mamalu o le vaai atu i lena tuputupu ae patino.
Sa saunia e tagata o le ekalesia mai le motu o Upolu, Samoa, ni meaai e ave i e mama’i.