“‘O Mai ia te Au’: O Le Sailiga Faaleagaga o o Tatou Olaga Uma,” Liahona, Aokuso 2023.
“O Mai ia te Au”: O Le Sailiga Faaleagaga o o Tatou Olaga Uma
O le aoao ia iloa ma alofa i le Alii o Iesu Keriso e faaauau pea i lou olaga atoa.
O Keriso o Loo Valaauina Peteru ma Aneterea, saunia e James Taylor Harwood
I le avea ai ma soo o le Alii o Iesu Keriso, tatou te olioli i Lana valaaulia: “O mai ia te au.” Ua Ia valaaulia i tatou e tauave Lana “amo i o [tatou luga], ma aoao e uiga ia te [Ia]” (Mataio 11:28–29). O lona uiga tatou te talitonu ia te Ia ma talia ma le fiafia Lona suafa, Ana aoaoga, ma Ana poloaiga.
Tatou te o mai uma lava i le lalolagi ma taleni ma uiga eseese, ma e tofu i tatou uma ma ni aafiaga tulaga ese o le olaga. Ae mo i tatou uma, o le faamuamua o Iesu Keriso i o tatou olaga o le sailiga lea o o tatou olaga uma . E ala i le olaga atoa o le faatuatua, suesue, tatalo, ma le salamo, tatou te iloa atili ai ma alolofa atili ia te Ia.
Ua tatou ola i lenei lalolagi ua tumu i luitau ma mea faalavefau. Ina ia faatumauina la tatou taulaiga i mea e faavavau, ia ola i se olaga o le faatuatua ia Iesu Keriso, ma ia oo i le liua faifai pea i le tele o tausaga o le olaga e manaomia ai lo tatou lototele ma le tuuto, faatasi ai ma le fesoasoani mai le lagi.
Maua le Malosi i Sauniga ma Feagaiga
O se fesoasoani tele mai le lagi e oo mai i le ituaiga o sauniga ma feagaiga o le malumalu lea e tausia i tatou ia “faavaeina, mauaa, faatuina, ma faamautuina”1 i la tatou sailiga ia o mai i le Faaola.
Ua aoao mai Peresitene Russell M. Nelson e faapea “o le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu.” Na te lei faapea mai o le osia o feagaiga e faafaigofieai le olaga, “ae o lou mulimuli o oe lava ia i le Faaola o lona uiga e te maua Lona mana faamalosiau ma togiola.”2
Atonu e taumanatunatu nisi pe aisea ua faatonuina ai e le Alii Lana perofeta e fausia ma faapaiaina le tele o malumalu i le lalolagi atoa. I lenei lalolagi ua faateleina le fememeai, o le saogalemu ma faamanatu o o tatou sauniga ma feagaiga e taua. O le a latou faatumauina lo tatou agai i luma i le mea ua tatou ta’ua nei o le ala o feagaiga.
Na saunoa Peresitene Nelson: “O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu … o le a faamalosia ai lou tuuto e tumau i luga o le ala o le feagaiga.”3
Ola Agavaa mo le Agaga Paia
Ou te fiafia lava i nei upu mai le Aposetolo o Paulo na tusia i le toeitiiti 2,000 tausaga talu ai ae o loo moni pea i aso nei:
“[E] le iloa e se tasi mea a le Atua, ua na o le Agaga o le Atua.
“A ua maua e i matou … le agaga mai le Atua; ina ia matou iloa mea ua foaifuaina mai e le Atua ia te i matou.
“O ia mea … e aoaoina mai e le Agaga Paia. …
“A e le talia e le tagata faaletino, o mea a le Agaga o le Atua: aua o mea valea ia ia te ia: na te le mafai foi ona iloa, aua e faamasinoina faaleagaga” (1 Korinito 2:11–14).
O upumoni faaleagaga ma le taitaiga mai le Agaga Paia e le mafai ona faamatalaina atoatoa i upu. O ia vaega “o mea loloto foi a le Atua” (fuaiupu 10), “ua saunia (e le Atua) mo i latou o e alofa ia te ia” (fuaiupu 9).
A o tatou mauaina le meaalofa o le Agaga Paia i le papatisoga, e tatau ona tatou taumafai e ola agavaa mo ona faatosinaga faifai pea e ala i le vaai i mea tatou te faia, mea tatou te tautatala ai, ma ē tatou te faasoa atu i ai o tatou taimi. O le faia o lena mea, o le a oo mai ai le malamalama faaleagaga ma le mautinoa sili atu i o tatou agaga, ma mafai ai e i tatou ona “le faatuatua i le poto o tagata, a o le mana o le Atua” (fuaiupu 5).
Ua fautuaina i tatou e Peresitene Nelson e filifili “ia aloese mai soo se mea e aveesea ai le Agaga”4 ma “fai le galuega faaleagaga e manaomiaina e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga.”5
Pipiimau i Aafiaga Faaleagaga
Ina ua faamatala e Paulo lona liua malosi a o malaga atu i Tamaseko, sa ia fai mai, “Ua faafuasei ai ona pupula faataaliolio mai ia te au o le malamalama tele mai le lagi” (Galuega 22:6)—sa matua susulu na tauaso ai o ia—ma sa ia faalogoina le siufofoga o le Alii.
O le mea e malie ai, o i latou sa faatasi ma Paulo na vaai foi i le malamalama ae sa lei faalogo i le siufofoga (tagai Galuega 22:9). Sa le mafai aisea? Pe sa latou talitonu ea ia Paulo, pe sa latou taumafai e faatalitonu o ia faapea sa ia mafaufauina le aafiaga?
Ina ua uma ni aafiaga faaleagaga faapitoa, atonu e fesili nisi, “Pe na ou lagonaina moni ea lena mea?” po o le “Pe na o lo’u mafaufau i ai?” Ae o i latou o e atamamai, e pei o Paulo, e le faagaloina pe teena ni aafiaga faaleagaga. Latou te teumauina i latou ma manatua pea i latou i o latou mafaufau.
I tausaga na sosoo ma le Uluai Faaaliga, sa feagai ai le Perofeta o Iosefa Samita ma le tetee ma sauaga faifai pea, ae sa faaauau pea ona ia molimau atu ma le lototoa ua faaali mai le Tama ma le Alo ia te ia. “Sa ou mautinoa lena mea, ma sa ou mautinoa sa silafia e le Atua lena mea, ma e lē mafai ona ou faafitia lena mea” (Iosefa Samita—Talafaasolopito 1:25).
E lei galo lava pe faafitia foi e Iosefa ona aafiaga faaleagaga. Sa ia taofimau pea ia i latou i lona olaga atoa. I taimi faigata, na te toe tomanatu ai i na taimi e faamautinoa atu ai ia te ia le alofa o le Atua ma faamalosia o ia i le galuega na tuu atu e le Alii ia te ia e fai.
Atonu tatou te le vaai lava i se vaaiga faalelagi po o le faalogo faaletino i le siufofoga o le Alii, ae e oo mai aafiaga faaleagaga. E tatau ona tatou taofimau i ai. Latou te faamalosia i tatou i la tatou sailiga e o mai ia Keriso, ma faaauau ai pea lo tatou liua.
Filifili le Faatuatua
I le avea ai ma se peresitene o le misiona, pe a o mai faifeautalai ma ta’u mai ia te au sa faigata mea uma, e masani ona ou faasoa atu ia i latou ia faigata o le Aposetolo o Paulo ma mea e mafai ona tatou aoao mai i ona tofotofoga.
Ua ta’u mai e Paulo ia i tatou e faalima ona sasaina o ia i faalavalava ma faatolu i tootoo. Sa fetogia o ia i maa i se tasi taimi ma e faatolu ona i ai o ia i ni vaa sa faaleagaina (tagai 2 Korinito 11:24–25). I ana malaga, sa fetaiai ai Paulo ma “leaga i vaitafe, … leaga i e fao mea,” ma “leaga i tagata o [lona] lava nuu, … i tagata o nuu ese,” ma e oo lava i “uso pepelo.” Sa tuliesea o ia mai aai, faafalepuipuiina, ma mafatia i “galuega mamafa ma le tiga,” “fia ai ma le fia inu,” ma le “maalili ma le le lavalava” (2 Korinito 11:26–27).
E toaitiiti lava tagata o le a oo i tofotofoga e pei o Paulo, ae o le a tofu i tatou uma ma tofotofoga. E leai se tasi o le a le oo i ai. Ma e tele taimi e oo mai ai tofotofoga pe a tatou tau le mafaufauina. Na faapefea ona manumalo Paulo i “puapuaga,” “atuatuvale,” “sasaina,” ma “galuega” sa ia onosaia? (2 Korinito 6:4–5). E mafai e Paulo ona “faanoanoa, ae o loo olioli pea,” ma “peiseai e leai sina mea o ia te i matou, a o loo ia te i matou mea uma” (2 Korinito 6:10), aua sa ia filifilia le faatuatua ia Iesu Keriso.
E le faigata tele ona filifili le faatuatua ia Iesu Keriso pe a tatou lagonaina le malosi faaleagaga, ae e tatau foi ona tatou filifili le faatuatua pe a oo ina faigata le olaga. O le a tatou iloa ai e le tu le Faaola i le faaiuga o la tatou sailiga ma faatalitali mo i tatou e o mai ia te Ia. Ae, o loo tu o Ia i o tatou autafa ma faasino mai le ala. Ioe, o Ia o le ala (tagai Ioane 14:6). Na saunoa Peresitene Nelson, “E siitia e le Faaola i tatou i luga a’e o faaosoosoga o lenei lalolagi pa’ū e ala i le faamanuiaina o i tatou i le alofa mamā sili atu, lotomaualalo, agaalofa, agalelei, loto-pulea, filemu, ma le malologa.”6
O le a Faataunuuina Ana Folafolaga
Ou te faafetai mo lo’u malamalama mautinoa o Iesu o le Keriso. O Ia o lo tatou Faaola, lo tatou Togiola, la tatou Uo pele, lo tatou Fautua. I lo’u olaga atoa, ua faateleina ai lo’u lagonaina o Lona alofa ma Lona soifuaga moni. Ou te molimau atu o le iloaina ma le alofa ia te Ia o se avanoa paia o le olaga faaletino.
Pe a tatou o mai ia Iesu Keriso, ua Ia folafola mai ia i tatou se faamagaloga o a tatou agasala, o se “ola toefuataiina” (Roma 6:4), ma le “malologa mo o tatou agaga” (Mataio 11:29). Mulimuli ane, ua Ia folafola mai ia i tatou le ola e faavavau faatasi ma Ia, Lona Tama, Ona soo tuuto, ma tagata amiotonu o o tatou aiga e faavavau.
I se aso i le lumanai, o le a tatou tootutuli ai i Ona vae. I lena aso, o le a olioli ai o tatou agaga pe a Ia faataunuuina Ana folafolaga uma ia i latou o e ua o mai ia te Ia ma le “faamoemoega atoa o le loto” (3 Nifae 18:32), tuputupu ae i lo latou alolofa mo Ia, ma saili ia lagonaina Lona faatasi mai i o latou olaga atoa.
O le a avea ma se taimi sili ona paia, ma faapaleina i la tatou malaga faaleagaga!