E Faafeiloai Atu i Lenei Lomiga

Agai i Luma ma le Faatuatua ia Keriso

O Le Aao o le Atua, saunia e Yongsung Kim, e le mafai ona kopiina

E tusa lava po o le a le pogisa ma le tuuatoatasi tatou te ono lagonaina pe a tauivi ma o tatou tofotofoga, e i ai lava se ala e agai ai i luma a o tatou savavali i luga o le ala o feagaiga ma saili le taitaiga mai se Faaola ma se Tama Faalelagi alolofa. I lenei lomiga, ua faasoa mai ai e Elder Neil L. Andersen o le Korama a Aposetolo e Toasefululua le taua o le sailiga o o tatou olaga uma o le sailia o le faatuatua ia Iesu Keriso (itulau 4). Na ia tusia, “E le faigata tele ona filifili le faatuatua ia Iesu Keriso pe a tatou lagonaina le malosi faaleagaga, ae e tatau foi ona tatou filifili le faatuatua pe a oo ina faigata le olaga.”

O la’u tusiga ma se tasi o tusiga a le autalavou matutua i lenei lomiga e taulai atu i se tasi o tofotofoga masani o loo tauivi ai le tele o aiga ma tagata taitoatasi i lo tatou lalolagi i ona po nei: ponokalafi (itulau 8, 34). Na aoao mai Peresitene Dallin H. Oaks, Fesoasoani Muamua i le Au Peresitene Sili e faapea o i latou o loo tauivi ma ponokalafi “e le leaga pe ua aunoa foi ma se faamoemoe” (“Faamaloloina Mai Mailei o Ponokalafi,” Liahona, Oke. 2015, 55). E mafai e soo se tasi lava ona maua le malosi e faatoilalo ai faatosinaga o ponokalafi e ala i le fausiaina o le faatuatua ia Iesu Keriso ma faaaoga punaoa mai uo, tagata o le aiga, taitai faale-ekalesia, ma polofesa o le soifua maloloina faalemafaufau.

I la’u tusiga, o loo ou faamatalaina ai tulaga eseese o le faaaogaina o ponokalafi ma talanoaina ni auala patino e mafai ai e tagata taitoatasi ona o ese atu ma le faaaogaina o ponokalafi i nei tulaga taitasi. O loo ou faamamafaina le taua o punaoa faaleagaga ma le matafaioi taiala taua e mafai e le Agaga Paia ona faia i le tuuina atu o le lagolago mo le faatoilaloina o ponokalafi.

Ou te faamoemoe o lenei lomiga o le a fesoasoani ia te oe e lagona ai le filemu ma le alofa mai lou Tama Faalelagi ma mai lou Faaola, o Iesu Keriso, ma o le a fesoasoani ia te oe ia malamalama e faapea, faatasi ai ma le faatuatua moni, e mafai ai ona faatoilaloina soo se faafitauli lava i le olaga.

Brian J. Willoughby

Polofesa, Aoga o le Olaga Faaleaiga, Iunivesite o Polika Iaga