Mo Mātua

O La Tatou Malaga Patino aga’i i le Atua

Mātua Pēlē,

O la tatou malaga i le atoatoa, e pei ona vaaia i le lomiga o lenei masina, e faimalaga i le i ai o le faatuatua i le Tama Faalelagi ma Iesu Keriso, salamo, osia ma tausia feagaiga paia, ma le sailia o le taitaiga a le Atua i o tatou olaga.

Talanoaga o le Talalelei

O la Tatou Sailiga ia O Mai Ia Keriso

Fesili i lau fanau po o le a le uiga o le o i se sailiga. Faasoa atu nisi o aoaoga mai le tusiga a Elder Neil L. Andersen i le itulau e 4 e uiga i la tatou sailiga e o mai ia Keriso. O a ni meafaigaluega e faamalosia ai i tatou i lenei faigamalaga?

Faamalosiauina o le Atinaega FaaKeriso

Talanoa ma lau fanau po o a ni a latou sini mo se taimi umi, e pei o se galuega, misiona, po o se faaipoipoga i le malumalu. Faitau manatu i itulau 14–17. E mafai ona outou fuafuaina faatasi nisi o gaoioiga e mafai ona fesoasoani i lau fanau ia ausia a latou sini.

Faaitiitia le Aafia i Mea e Le Talafeagai

I le faaaogaina o le tusiga o loo i le itulau e 8, talanoa e uiga i le faamoemoe e mafai e se tasi ona salamo pe afai e tauivi se tasi ma le faaaogaina o ponokalafi. Fai se fuafuaga faaleaiga e faaitiitia ai le aafia i mea e le talafeagai i ala o faasalalauga e pei o televise ma le initoneti.

Mai le Mekasini o le Mo Le Malosi o le Autalavou

Ua i ai i le autalavou se matafaioi tulaga ese i le ata o le faaolataga, ma o se auala patino e saili ai lenei matafaioi e ala lea i se faamanuiaga faapeteriaka. Mafaufau e talanoaina fesili o i lenei itulau i le afiafi faaleaiga, ma faamatala pe mafai faapefea ona fesoasoani le taitaiga faalelagi i tagata o le aiga e saunia ai ma faatoilalo luitau o le olaga.

O Le a le Faamanuiaga Faapeteriaka?

O lenei faamanuiaga ua folafola mai ai le gafa o se tagata i le aiga o Isaraelu ma “tuuina mai ai le taitaiga musuia mai le Tama Faalelagi,”¹ e masani ona aofia ai folafolaga, faamanuiaga, meaalofa faaleagaga, ma lapataiga e patino i le tagata. E tuuina atu e se peteriaka pe a maea le faatagaga mai le epikopo po o le peresitene o le paranesi.

O Le a Le Matua e Tatau ai Ona Ou Talosagaina se Faamanuiaga?

“E le tatau i taitai perisitua ona faatulaga se tausaga laitiiti faatapulaa mo se tagata ina ia maua ai se faamanuiaga faapeteriaka.”² E tatau ona lava le matua o le tagata e iloa ai le paia o lenei faamanuiaga.

E Faapefea Ona Ou Saunia?

Faalatalata atili atu i le Atua e ala i le salamo, suesueina o aoaoga a perofeta, ma le ositaulagaina o mea faalelalolagi. Mafaufau ma le agaga tatalo i fesili e uiga i lau matafaioi i le fuafuaga a le Tama Faalelagi, ma faamalosia lou manao e mulimuli i Lona finagalo.

Ina ia aoao atili e uiga i le saunia mo lenei faamanuiaga, faitau le “Saunia mo Lo’u Faamanuiaga Faapeteriaka” i le Mo Le Malosi o le Autalavoui lenei masina.

Mai le Mekasini o le Uo

Lomiga Faapitoa e uiga i le Papatisoga

O le masina lenei, o le Uo e faatatau uma lava i le papatisoga, faamauga, ma le avea ma se tagata o O Le Ekalesia a Iesu Keriso o le Au Paia o Aso e Gata Ai! Faitau se savali faapitoa mai le Au Peresitene Sili, aoao e uiga i isi tamaiti o e na papatisoina ma faamauina, ma faia gaoioiga e fesoasoani ai i lau tama e aoao e uiga i a latou feagaiga o le papatisoga.

Ina ia okaina nisi kopi o lenei lomiga faapitoa i le lumanai, asiasi i le store.ChurchofJesusChrist.org.

O Gaoioiga o leSau, Mulimuli Mai ia te A’u i luga o le Initoneti

I lenei masina, saili gaoioiga faalevaiaso i le friend.ChurchofJesusChrist.org e fesoasoani ia malie le suesueina e lou aiga o tusitusiga paia.

Faamatalaga

1. Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 18.17, ChurchofJesusChrist.org.

2. Tusitaulima Aoao, 18.17.