Atatosi o le Faatuatua

O Loo I Ai o Ia Iina mo A’u

Saunia e Joseph David (“J. D.”) Evans, Virginia, ISA

Sa ma tootutuli ma lo’u toalua ua maliu i se fatafaitaulaga i se malumalu paia, ma o se tasi sa i ai le mana faamau sa fofogaina mai faamanuiaga i o ma’ua luga. Ou te faalagolago i na faamanuiaga folafolaina.

Ata na pueina e Leslie Nilsson

A o ou i ai i le lotu i se tasi taeao o le Aso Sa i le 2013, sa ou tapeina la’u telefoni ona ou te lei manao e faalavelave i le sauniga faamanatuga. Ina ua uma le sauniga, sa ou toe kiina la’u telefoni ma vaaia ai ua valaau mai lo’u toalua, o Tanya ia te a’u. Sa ou taumafai e toe valaau atu ia te ia, ae sa lei tali mai o ia.

I le taimi o lena sauniga, o le veni sa tietie atu ai o ia agai atu i se faatasiga faaleaiga faaletausaga na taavalevale i se mea oNew York Thruway. O lo’u afafine ma fanau e toalua a la’u fanau sa matuai faamanualia lava, ma sa maliu Tanya i le taimi lava lea. Ina ua mavae le 44 tausaga o le faaipoipoga, sa faafuasei ona maliu lo’u toalua.

“O le faatuatua ua ta’ua o se meaalofa a le Atua,” o le tala lea a Brother Evans, “ae o se filifiliga foi tatou te faia—o se filifiliga e talitonu.”

I le fa tausaga mulimuli ane, sa feagai ai Katie, o se tasi o la’u fanau teine faaletulafono, ma se taotoga faafuasei e fanauina ai se masaga teine i le 25 vaiaso o le maitaga, ae ua tu lata lava i le taimi e fanau tonu ai ma manaomia ai se tausiga faaeteete. Ina ua faatoa valu vaiaso le matutua o teineiti, sa leva le po i le taimi na toe foi ai Katie i le fale mai lana asiasiga i aso taitasi ia i la’ua i le iunite o le falemai mo pepe faatoa fananau mai ma sa so’a ma maliu ai e se avetaavale onā, ma tuua ai lo’u atalii o se tasi ua oti lana avā ma se fanau e toaono.

Sa avea lo’u toalua ma mea uma ia te a’u, ma o le avā a lo’u atalii o mea uma ia te ia. O taimi faigata na mo lo matou aiga.

Pipiimau i Folafolaga

Ou te lei talisapaia atoatoa le maoae o Tanya ma le tele o lo’u faalagolago ia te ia seia oo ina maliu o ia. Ae sa ma tootutuli i se fatafaitaulaga i se malumalu paia, ma o se tasi sa i ai le mana faamau na fofogaina mai faamanuiaga i o ma’ua luga. Ua ou pipii mau i le folafolaga o na faamanuiaga. Ou te faalagolago i na faamanuiaga folafolaina.

O le maliu o Tanya o se faafitauli o le faatuatua mo au. Sa tatau ona ou filifili, “Pe ou te talitonu moni ea?” O le faatuatua ua ta’ua o se meaalofa a le Atua, ae o se filifiliga foi tatou te faia—o se filifiliga e talitonu i ai. Sa ou filifili e talitonu, ma sa ou iloa ai sa sa’o Moronae ina ua ia tusia faapea tatou te le maua se molimau seia mavae le tofotofoina o lo tatou faatuatua (tagai Eteru 12:6). Ina ua mavae le tofotofoga, sa oo mai le molimau. Sa tauia lo’u faatuatua i se filemu mautinoa o le mafaufau. O le mea lena na mafai ai ona ou agai i luma.

I le avea ai ma o’u toalua lona lua, na fai maiai Becky: “E sili atu lo tatou manaomia o le faatuatua pe a tatou feagai ma se faalavelave. O le alu i le Alii e na o le pau lea o le tali. O le ala i le filemu ma le faamoemoe.”

Ua faasoa mai e Brother Evans ma lona faletua, o Becky, ni ata o lona afafine faaletulafono ma lana masaga teine.

Mo se taimi, sa ou tauivi ai e fuafua po o le a le faatuatua ma le faamoemoe. Sa faamatala e Alema o le faatuatua o le “faamoemoe mo mea e le vaaia ae moni” (Alema 32:21). Ona o lo’u faatuatua ia Iesu Keriso, ua ou faamoemoe ai afai ou te tumau faamaoni ma sa’o i au feagaiga, e mafai ona ma mafuta ma Tanya i le ola e faavavau. Ou te faafetai foi mo le faamautinoaga ua ou maua o loo i ai le Faaola iina mo i tatou taitoatasi. E i ai se eseesega i le va o le mafaufau, “O loo i ai o Ia iina” ma le iloaina, “O loo i ai o Ia iina mo a’u.”

O fanau e toalua a la’u fanau ua i ai ni aafiaga tumau mai le faalavelave tau taavale, ma ou te faavauvau pea i le toesea o Tanya i lo’u olaga. O le a le uma lava lo’u misia o ia, ma o lo’u alofa ia te ia e le faaitiitia i lo’u alofa i lo’u toalua lona lua. Ua faateleina le alofa.

Ua toe faaipoipo foi lo’u atalii. O lona toalua fou o le tausoga muamua lea o Becky. Sa ma faaipoipo uma i le aiga e tasi. O a ni tulaga faigata o lena mea? O se mea ofoofogia, pe atonu foi e leai.

Luitau ma Faamanuiaga

Ua i ai i lo matou aiga le tele o luitau, ae ua matou oo foi i faamanuiaga. Ua avea lo’u atalii ma se tasi o a’u toa. Sa ia faamagalo atu i le avetaavale onā o lē na fasiotia lona toalua, ma sa ia tau atu ia te ia sa ia faamoemoe o le a ia faasa’osa’oina lona olaga. Sa faamanatuina talu ai nei e ana teineiti laiti e toalua lo la aso fanau lona lima. O i laua o ni pepe o vavega moni lava.

“Ou te faafetai mo le faamautinoaga ua ou maua o loo i ai le Faaola iina mo i tatou taitoatasi.”

Mo le 17 tausaga ua mavae, sa ou maua ai le avanoa e auauna atu ai o se peteriaka. I le taimi muamua, sa ou fefe sa le mafai ona ou faataunuuina le valaauga, ae ua ou aoaoina o faamanuiaga e mai le Alii, ae le o le peteriaka. E i ai autu masani i faamanuiaga faapeteriaka aua e finagalo lo tatou Tama Faalelagi i le tele o mea lava e tasi mo Ana fanau uma, ae o faamanuiaga taitasi e eseese, taitoatasi, ma patino.

O se tasi o faamoemoega o se faamanuiaga faapeteriaka o le fesoasoani lea i tagata taitoatasi ia iloa po o ai i latou o ni fanau a le Atua ma ia iloatino le tele o le alofa o lo latou Tama Faalelagi ia i latou. I le avea ai ma se peteriaka, soo se taimi lava ou te faaee atu ai ou lima i luga o le ulu o se tasi e tuuina atu ia i latou se faamanuiaga faapeteriaka, mo na o ni nai taimi taua lava, e faatagaina au e le Tama Faalelagi ia lagonaina le alofa o ia te Ia mo lena tagata. O se lagona matagofie. Pe a ou lagonaina le tele o Lona alofa i tagata taitoatasi e mauaina faamanuiaga, e mafai ona ou lagonaina e alofa foi o Ia ia te au.

“E leai se mea e aumaia ia te au le olioli sili atu nai lo folafolaga o le malumalu, lea ou te maua ai le faamoemoe e ala ia Keriso, e mafai ai ona ou faatoilaloina tofotofoga uma,” o le tala lea a Brother Evans.

O le asō, ua ma taulai atu ai ma Becky i le malumalu. O se tasi o mafuaaga ua tuuina mai ai e lo tatou Alii ia i tatou le malumalu o le tuuina mai lea ia i tatou o sina vaaiga o Siona. E faaopoopo atu i le avea ai ma se peteriaka, sa valaaulia au i ni nai tausaga ua mavae e avea ma se fai faamauga i le malumalu. O se isi lena fiafiaga sili o lo’u olaga. O se valaauga o taimi fiafia uma. E leai se mea e aumaia ia te au le olioli sili atu nai lo folafolaga o le malumalu, lea ou te maua ai le faamoemoe e ala ia Keriso, e mafai ai ona ou faatoilaloina tofotofoga uma.